4 ЛЕКЦИЈА

Кој тано о Девел?

О МАНУША служинена буте девленге. Ама е Девлескоро Лафи сикавела кај иси само јекх хас Девел. Сар лесте нане нијекх јавер, ов тано најбаро хем нане ле ни почеток ни крај. Ов керѓа са со иси ко небо хем ки Пхув, хем денѓа амен џивдипе. Адалеске, само леске ваљани те служина.

О Муса икерела ко вас о дуј плоче коте сој пишиме о деш заповедија — О Закон сине дендо преку о пекамбери о Муса сар „лафи вакердо преку о ангелија“

Е Девле иси ле пло анав. Лескоро анав тано ЈЕХОВА. О Девел вакерѓа е Мусаске: „Акава ка вакере е Израелескере чхавенге: ‚О Јехова, о Девел тумаре даденгоро, о Девел е Авраамескоро, о Девел е Исакоскоро хем о Девел е Јаковескоро, бичхалѓа ма туменде.‘ Акава тано мо анав засекогаш, аѓаар ка памтинен ма тари генерација ки генерација“ (2. Мојсеева 3:15). Ко е Девлескоро Лафи, о анав Јехова, аракхела пе отприлика 7.000 пути. Ко лескоро Лафи вакерела: „Ту, кова то анав тано Јехова, сиан Најбаро упри цели пхув“ (Псалм 83:18).

Свиток аракхло ко Мртво море коте сој пишимо е Девлескоро анав — Ко пуране пишиме лила таро Мртво Море пишинела е Девлескоро анав

Нијекх мануш никогаш на дикхља е Девле. О Девел вакерѓа е Мусаске: „Ту нашти те дикхе мо муј, соске нашти о мануш те дикхел ман хем те ачхол џивдо“ (2. Мојсеева 33:20). О Девел џивдинела ко небо хем нашти те дикха ле амаре јакхенцар. Погрешно тано те кера идолија, слике или симболија со претставинена е Девле хем те молина амен ленге. О Девел о Јехова преку о Муса денѓа заповед: „Ма кер туке резбимо лико ни било со јавер со личинела сар адава со иси упре ко небо, или теле ки пхув, или ко пања тели пхув. На ваљани те клањине ту или те служине ленге, соске ме, о Јехова то Девел, сиум Девел со родела само леске те служине“ (2. Мојсеева 20:2-5). Пало адава, преку по пекамбери о Исаија, о Девел вакерѓа: „Ме сиум о Јехова. Адава тано мо анав хем никаске нане те дав ми слава, ни ми чест е резбиме ликонге“ (Исаија 42:8).

Несаве мануша веруњена ко Девел ама шај мислинена кај нашти те пенџарен ле хем нашти те овен паше леа, ола мислинена кај ваљани побутер те даран лестар него те манген ле. Со мислинеа ту? Грижинела пе ли о Девел туке? Шај ли чаче те пенџаре ле хем те ове паше леа? Те дикха со вакерела е Девлескоро Лафи башо адава саво тано о Девел.

Е Девлескоро духо хем лескере мељаикија

Сар о Девел керела адава со мангела? Ов керела адава пе духоја. Е Девлескоро духо нане несави личност или мељаико (ангели), него ов тано е Девлескири сила со нашти дикхаја ла, енергија со нане ла крајо хем колаја шај те керел са со мангела. О Девел акале силаја керѓа о небо хем и Пхув. „Е Јеховаскере лафеа сине кердо о небо, хем е духоја таро лескоро муј сине кердо са со и ко небо“ (Псалм 33:6). Ки 1. Мојсеева 1:2 вакерела кај џикоте и Пхув сине панда учхарди пањеа хем џикоте о Девел спреминела сине и Пхув е манушенге ‚е Девлескири сила делуњела сине упро пани‘. О Девел тегани користинѓа по духо или пи сила те керел са со џивдинела ки Пхув.

О Девел исто аѓаар користинела е мељаикон те керен адава со ов мангела. О Девел керѓа лен те џивдинен леа ко небо. О мељаикија тане бут силна. Ола ингарена пораке таро Девел хем керена јавера важна задаче. На пример, е Девлескоро Лафи вакерела кај о Закон со сине дендо преку о Муса тано „лафи вакердо преку о ангелија“. Е Девлескере мељаикија исто аѓаар поможинена лескере слугенге ки Пхув. Е Девлескоро Лафи вакерела кај ола тане ‚духија со служинена, кола тане бичхалде те служинен околенге со ка овен спасиме‘ (Евреите 1:14; 2:2).