И Раав верујнела сине ко Јехова

Те замислина аменге кај сиам ки диз Ерихон. Акаја диз сине ко Ханаан. Ко адава тхан о мануша на верујнена сине ко Јехова. Адари бешела сине јекх ромни, лакоро анав сине Раав.

Кеда и Раав сине терни чхај, шунѓа сар о Мојсеј пхравѓа о Лоло Море хем сар водинела сине е Израелцон кеда иклиле таро Египет. Исто аѓаар, шунѓа сар о Јехова поможинела лен сине те побединен кеда џана сине ко војне. Акана шунѓа кај о Израелција але паше узо Ерихон.

Јекх рат, дуј Израелција сине бичхалде чојрале те дикхен о Ерихон. Ола геле ки Раав кхере. Ој викинѓа лен те ачхон ки лате. Адаја рат, о цари шунѓа соске але о дуј Израелција ки диз хем кај геле ки Раав. Адалеске ов бичхалѓа манушен те астарен лен. И Раав гаравѓа е дује Израелцон ко крови хем вакерѓа е манушенге: ‚Адала дуј џене сине ки манде, ама геле песке. Ако гелен акана пали ленде, шај те астарен лен!‘ Џанеа ли соске и Раав гаравѓа лен?— Соске верујнела сине ко Јехова хем џанела сине кај ов ка дел е Израелцонге о Ханаан.

Англедер те џан песке тари Раав, о дуј Израелција вакерге лаке кај ка спасинен хем ла хем лакере фамилија кеда ка овел уништимо о Ерихон. Џанеа ли со вакерге лаке те керел?— Ола вакерге лаке: ‚Ле акава лоло шело, хем пхан ле ки пенџера. Тогаш, са окола со ка овен ко то кхер ка овен спасиме‘. И Раав керѓа аѓаар сар со вакерге лаке. Џанеа ли со уло пало адава?—

Пало несаве диве, о Израелција, јекх пути ко диве мирно пхирена сине околу о Ерихон. Аѓаар керге шов диве. Ама о ефтато диве, адава керге ле ефта пути. Тогаш, сарине почминге гласно те викинен. О Јехова керѓа те перен о зидија тари диз. Ама о кхер коте со сине о лоло шело на пело! Шај ли те дикхе адава ки слика?— И Раав хем лакири фамилија сине спасиме!

Со шај те сикљове тари Раав?— И Раав верујнела сине ко Јехова адалеске со шунѓа бут шукар буќа баши лесте. Ту да сикљовеа бут шукар буќа башо Јехова. Верујнеа ли ту да ки лесте сар и Раав?— Џанаја кај кереа адава!