О Исус сине секогаш послушно

Дали туке локхо секова пути те шуне те даде хем те даја?— Несаво пути адава тано пхаро. Џанеа ли кај о Исус шунела сине е Јехова, пе даде хем пе даја?— Лескоро пример шај те поможинел ту секогаш те шуне те даде хем те даја. Те дикха побутер башо акава.

Англедер о Исус те авел ки Пхув, ов сине пе Дадеа, е Јеховаја, упре ко небо. Ама, е Исусе сине ле дад хем дај теле да ки Пхув. Ленгере анава сине Јосиф хем Марија. Џанеа ли сар ола уле лескере родителија?—

О Јехова леља е Исусескоро живото таро небо хем чхивѓа ле е Маријаке ко воги. Аѓаар ов ка шај сине те бијанѓовел хем те живинел ки Пхув. Адава сине чудо! Ов барило е Маријаке ко воги исто сар со јавера бебија бајрона пумаре дајенге ко воги. Пало ења масек бијандило о Исус. Аѓаар и Марија хем о Јосиф уле лескере родителија акате ки Пхув.

Кеда е Исусе сине ле 12 берш, ов керѓа нешто со сикавѓа кобор мангела пе Даде, е Јехова. Адава сине кеда о Исус хем лескири фамилија геле ко Ерусалим баши Пасха. Џикоте иранена пе сине кхере, о Јосиф хем и Марија нашти сине нигде те аракхен е Исусе. Џанеа ли коте сине ов?—

О Јосиф хем и Марија палем иранге пе ко Ерусалим те роден е Исусе. Ола сине бут секириме соске нашти сине те аракхен ле. Ама, пало трин диве аракхле ле ко храми! Џанеа ли соске о Исус сине ко храми?— Соске адари шај сине те сикљовел башо по Дад, о Јехова. Ов мангела сине е Јехова. Исто аѓаар, мангела сине те сикљовел сар те керел адава со мангела о Јехова. Кеда барило да, о Исус секогаш шунела ле сине. Ов керела сине адава чак кеда сине леске пхаро хем кеда ваљани сине те цидел муке. Дали о Исус исто аѓаар шунела сине е Јосифе хем е Марија?— Оја, и Библија вакерела аменге кај шунела лен сине.

Со шај те сикљове таро Исус?— Ту ваљани те шуне те даја хем те даде чак кеда туке пхаро. Ка кере ли адава?—