О Девел керѓа о небо хем и Пхув

О Јехова тано о Девел со керѓа амен. Ов керѓа са, керѓа о буќа со шај те дикха лен хем о буќа со нашти те дикха лен. Англедер те керел о буќа со шај те дикха лен, ов керѓа бут, бут ангелија. Дали џанеа кој тане о ангелија? Ола служинена е Јеховаске, хем тане слична сар лесте. Амен нашти те дикха лен исто сар со нашти те дикха е Јехова. О прво ангели со керѓа ле о Јехова уло лескоро помошнико. Акава ангели поможинѓа е Јеховаске кеда керѓа о ѕвезде, о планете хем са о јавера буќа. Јекх таро адала планете тани и Пхув, бут шужо тхан коте со живинаја.

Пало адава, о Јехова спреминѓа и Пхув те шај ки лате те живинен мануша хем животне. Ов керѓа о кхам те дел светлина е Пхувјаке. Исто аѓаар, керѓа о планине, о океанија хем о реке.

Со уло пало адава? О Јехова вакерѓа: „Ка керав чар, кашта хем јавера растенија“. Тегани, тари Пхув почминѓа те бајрол различно овошје, зеленчук хем лулуѓа. Пало адава, о Јехова керѓа различна животне, сар сој о животне со летинена, со живинена ко пани хем со лазинена ки пхув. Несаве тане тикне, сар о зајкија, а несаве тане баре, сар о слонија. Кова животно највише мангеа ту?

Пало адава, о Јехова вакерѓа е прво ангелеске: „Те кера мануш“. О мануша ваљани сине те разликујнен пе таро животне. Ов мангља ола те измислинен различна буќа, те керен лафи, те асан хем те молинен пе леске. Исто аѓаар, ов мангља ола те грижинен пе баши Пхув хем башо животне. Џанеа ли кој сине о прво мануш? Ајде те дикха.