ЛЕКЦИЈА 11
Сар те овел тут побари корист таро читибе и Библија
Дали некогаш мангљан те почмине те кере несави бари бути, ама мислинѓан кај ка овел туке пхаро те кере ла? Те шај те овел туке полокхо, шај почминѓан те кере дело по дело. Слично тано е читибаја и Библија. Шај пучеа тут: „Котар те почминав?“ Ки акаја лекција, ка дикха кола едноставна буќа шај те кере те шај те уживине ко читибе хем ко проучибе и Библија.
1. Соске ваљани редовно те читина и Библија?
Окова со редовно читинела и Библија, или „е Јеховаскоро закони“, ка овел хем бахтало хем успешно. (Читин Псалм 1:1-3.) Ко почеток, пробин те читине само некобор минутија секова диве. Кобор повише буќа дознајнеа тари Библија, добором повише ка уживине ко лакоро читибе.
2. Со ка поможинел аменге те овел амен побари корист таро читибе и Библија?
Те шај те овел амен побари корист таро читибе и Библија, ваљани те одвојна аменге време хем те размислина башо адава со читинаја (Исус Навин 1:8, фуснота). Џикоте читинеа, пуч тут: „Со сикљовава башо Јехова таро акава со читинѓум? Сар шај те применинав адава ко мло живото? Сар шај те користинав акала стихија те поможинав е јаверенге?“
3. Кеда шај те одвојне туке време те читине и Библија?
Дали туке пхаро те аракхе време те читине и Библија? Буте џененге амендар тано пхаро. Трудин тут шукар те користине тло време (Ефешаните 5:16). Адава шај те кере аѓаар со ка бирине туке конкретно време ко диве кеда ка читине и Библија. Несаве мануша одвојнена песке време те читинен и Библија рано сабајле. Јавера биринена те керен адава покасно, на пример џикоте тане ки пауза ручкоске. А несаве читинена и Библија раќате, англедер те совен. Кова тано о најшукар време туке те читине и Библија?
ДОЗНАЈН ПОВИШЕ
Сикљов сар те кере туке поинтересно о читибе и Библија. Дикх сар шај шукар те спремине тут, те шај те овел тут побари корист таро тло курси.
Исто сар со шај те сикљова те манга те ха различно хајбе, аѓаар шај те сикљова те уживина ко читибе и Библија
4. Сикљов те уживине ко читибе и Библија
Шај нане туке локхо те почмине те читине и Библија. Ама, ту шај те сикљове те уживине ко читибе и Библија, исто сар со шај те сикљове те уживине ко хајбе кова со на хаљан англедер. Читин 1. Петрово 2:2, а пало адава керен лафи башо акава пучибе:
Ако секова диве читинеа и Библија, дали мислинеа кај ка уживине ко адава хем ка манге те читине ла повише?
Дикх о ВИДЕОКЛИПИ хем приметин сар несаве терне почминѓе те уживинен ко читибе и Библија. Пало адава керен лафи башо акала пучиба:
Кола предизвикија сине е тернен таро акава видеоклипи?
Со поможинѓа ленге те продолжинен редовно те читинен и Библија?
Сар керѓе песке поинтересно о читибе и Библија?
Предлогија со ка поможинен туке те почмине:
Бирин точно хем современо превод. Пробин о Превод нов свет ако тано достапно ки тли чхиб или ки несави јавер чхиб со џанеа ла шукар.
Прво почмин те читине о делија тари Библија кола со свиџинена пе туке највише. Башо несаве идее, дикх и рамка „Почмин те читине и Библија“.
Бележин адава со читинѓан. Користин и рамка „Продолжин те читине и Библија“ која сој ко крајо тари акаја публикација.
Користин и апликација JW Library®. Ки лате ту шај те читине хем те шуне и Библија ко било кова тхан таро тло мобилно телефони или несаво јавер електронско уред.
Користин и брошурка Да ја истражуваме Божјата Реч. Ки лате шај те аракхе карте хем табеле со шај те керен о читибе и Библија те овел туке поинтересно.
5. Спремин тут баши тло библиско курси
Читин Псалм 119:34, а пало адава керен лафи башо акава пучибе:
Соске тано шукар те молине тут англедер те читине и Библија или те спремине тут башо тло библиско курси?
Сар шај те овел тут најбари корист таро курси? Џикоте спреминеа тут баши јекх лекција ко курси, пробин те кере акала буќа:
(1) Читин о пасусија сој ко почеток тари лекција.
(2) Дикх хем читин о стихија, хем пробин те хаљове сар тане поврзиме е лекцијаја.
(3) Бележин о лафија или о изразија кола со дена одговор ко пучибе, соске адава ка поможинел туке те дискутиринен баши лекција адалеа со проучинела туја и Библија.
Дали џанљан?
Е Јеховаскере сведокија користинѓе различна преводија тари Библија. Ама, највише ценинена о Свето писмо — превод Нов свет адалеске сој тано точно, јасно хем ки лесте користинела пе е Девлескоро анав. (Дикх и интернет статија „Дали е Јеховаскере сведокон иси лен пумари Библија?“)
НЕСАВЕ ШАЈ ВАКЕРЕНА: „О проучибе и Библија тано бут пхаро хем лела бут време. Ме нашти те керав адава“.
Со мислинеа ту?
СО СИКЛИЛЕМ
Те шај те овел тут побари корист тари Библија одвојн туке време те читине ла, молин тут те шај те хаљове адава со читинеа хем спремин тут башо секова библиско курси.
Сар ка одговорине?
Со ка поможинел туке те овел тут побари корист таро читибе и Библија?
Кеда шај те одвојне туке време те читине хем те проучине и Библија?
Соске тано шукар те спремине тут англедер секова библиско курси?
ИСТРАЖИН
Дикх несаве идее со ка поможинен туке о читибе и Библија те овел туке поинтересно.
„Библијата може да ти биде интересна!“ (Стражарска кула бр. 1, 2017)
Дознајн трин начинија сар шај те читине и Библија.
„Сар шај те поможинел манге и Библија? — прво дело: Истражин и Библија“ (интернет статија)
Дикх сар шај те уживине ко читибе и Библија.
„Сар шај те поможинел манге и Библија? — дујто дело: Уживин ко читибе и Библија“ (интернет статија)
Дикх ко кола начинија несаве мануша бут време проучинѓе и Библија.