ЛЕКЦИЈА 34
Сар шај те сикава кај мангаја е Јехова?
Дали тло мангипе спрема о Девел акана тано побаро него кеда почминѓан те проучине и Библија? Дали мангеа понадари да те кере позорало тло амалипе леа? Ако оја, тегани ма бистре кај кобор повише о Јехова дикхела кај тло мангипе спрема лесте бајрола, добором повише ка мангел тут хем ка грижинел пе туке. Сар шај те сикаве леске кај мангеа ле?
1. Сар сикаваја е Јеховаске кај мангаја ле?
Амен сикаваја амаро мангипе е Јеховаске аѓаар со сием леске послушна. (Читин 1. Јованово 5:3.) Ов никас на чхивела силаја те овел леске послушно. Наместо адава, ов дела прилика секаске амендар те бирина дали ка ова леске послушна или на. Соске? О Јехова мангела те ова леске послушна таро вило (Римјаните 6:17). Јавере лафенцар, ов мангела те ове леске послушно адалеске со мангеа ле, а на адалеске со мора. О трито хем о штарто дело таро акава лил ка поможинен туке те сикаве тло мангипе е Јеховаске аѓаар со ка кере адава со ов мангела, а нане те кере адава со ов на мангела.
2. Соске шај те овел аменге пхаро те сикава амаро мангипе е Јеховаске?
„Бут неволје иси е праведнико“ (Псалм 34:19). Сарине амен боринаја амен амаре мааненцар хем слабостенцар. Исто аѓаар, шај иси амен финансиска проблемија, доживинаја неправде или соочинаја амен јавере проблеменцар. Кеда доживинаја асавке буќа шај нане аменге локхо те кера адава со родела амендар о Јехова хем шај мислинаја кај ка овел полокхо те кера аѓаар сар со амен мангаја. Ама, кеда сием леске послушна чак кеда нане аменге локхо, амен сикаваја кај мангаја ле повише таро било со јавер хем кај сием леске верна. Тегани, ов да ка овел аменге верно хем никогаш нане те мукхел амен. (Читин Псалм 4:3.)
ДОЗНАЈН ПОВИШЕ
Дознајн соске е Јеховаске тано важно те ове леске послушно хем сикљов со шај те поможинел туке те ачхове леске верно.
3. Ту сиан вклучимо ко јекх спорно пучибе
Таро библиско лил Јов дознајнаја кај о Сатана вакерѓа јекх обвинение против е Девлескоро слуга о Јов хем против са о јавера со мангена те служинен е Јеховаске. Читин Јов 1:1, 6 — 2:10, а пало адава керен лафи башо акала пучиба:
Спрема адава со вакерѓа о Сатана, соске о Јов сине послушно е Јеховаске? (Дикх ко Јов 1:9-11.)
Со вакерѓа о Сатана башо са о мануша, па чак туке? (Дикх ко Јов 2:4.)
Читин Јов 27:5б, а пало адава керен лафи башо акава пучибе:
Сар о Јов докажинѓа кај чаче мангела сине е Јехова?
О Јов сикавѓа пло мангипе е Јеховаске аѓаар со ачхило леске верно
Амен да сикаваја амаро мангипе е Јеховаске аѓаар со ачховаја леске верна
4. Кер е Јеховаскоро вило бахтало
Читин Изреки 27:11, а пало адава керен лафи башо акала пучиба:
Сар осетинела пе о Јехова кеда амен постапинаја мудро хем сием леске послушна? Соске осетинела пе аѓаар?
5. Ту шај те ове верно е Јеховаске
Амаро мангипе спрема о Јехова поттикнинела амен те вакера е јаверенге баши лесте. Амари верност спрема лесте поттикнинела амен те кера адава, чак кеда нане локхо. Дикх о ВИДЕОКЛИПИ, а пало адава керен лафи башо акала пучиба:
Дали некогаш сине туке пхаро те вакере е јаверенге башо Јехова?
Сар со дикхлем ко видеоклипи, со поможинѓа е Грејсонеске те побединел пли дар?
Ако мангаја адава со о Јехова мангела хем ако мрзинаја адава со ов мрзинела, тегани ка овел аменге полокхо те ова леске верна. Читин Псалм 97:10, а пало адава керен лафи башо акала пучиба:
Таро адава со сиклиљан џи акана, со мислинеа кола буќа мангела о Јехова, а кола буќа мрзинела?
Со ка поможинел туке те сикљове те манге адава сој шукар хем те мрзине адава сој лошно?
6. Амаре шукарипаске тано те ова послушна е Јеховаске
Секогаш тано најшукар те ова послушна е Јеховаске. Читин Исаија 48:17, 18, а пало адава керен лафи башо акала пучиба:
Со мислинеа, соске шај те овел амен доверба ко Јехова кај ов секогаш џанела сој тано аменге најшукар?
Сар адава со сиклиљан баши Библија хем башо чачутно Девел, о Јехова, поможинѓа туке џи акана?
НЕСАВЕ ШАЈ ВАКЕРЕНА: „Е Девлеске нане важно со керава ме“.
Кова стихо би користинеа те сикаве кај амаре постапкенцар шај те кера е Јехова бахтало или тажно?
СО СИКЛИЛЕМ
Амен сикаваја амаро мангипе е Јеховаске аѓаар со сием леске послушна хем верна, чак кеда адава тано пхаро.
Сар ка одговорине?
Со сиклиљан таро е Јовескоро пример?
Сар шај те сикаве тло мангипе е Јеховаске?
Со ка поможинел туке те ачхове верно е Јеховаске?
ИСТРАЖИН
Сикљов повише башо е Сатанаскере обвиненија против о мануша.
„Јов му останува верен на Бог“ (Библијата — која е нејзината порака? Дел 6)
Дикх сар шај чак о чхаве те сикавен пумаро мангипе е Јеховаске.
Сар шај о терне кола со иси лен притисок таро врсникија те ачховен верна е Девлеске?