Дали одржинеа тло „баро штити е веракоро“?

1-2. а) Спрема Ефешаните 6:16, соске ваљани аменге „о баро штити е веракоро“? б) Башо кола пучиба ка кера лафи?

ДАЛИ пхиравеа „о баро штити е веракоро“? (Читин Ефешаните 6:16.) Сигурно оја. Сар јекх штити со шај те заштитинел побаро дело таро тело, аѓаар и вера заштитинела амен таро лошна буќа акале светоскере, сар сој о неморал, о насилство хем са јавер со нане спрема е Јеховаскере мерилија.

² Сепак, адалеске со живинаја ко „последна диве“, амари вера понадари да ка овел испитими (2. Тим. 3:1). Сар шај те проверине ки сави состојба тано тло штити е веракоро? Хем со шај те кере те шај тли вера те ачховел зорали? Те дикха о одговор таро акала пучиба.

ШУКАР ПРОВЕРИН ТЛО ШТИТИ

3. Со керела сине јекх војнико пле штитеа, хем соске?

³ Ко библиско време, е војникон бут пути сине лен штитија кола со сине учхарде кожаја. Ола макхена лен сине масло те шај те заштитинен и кожа хем те на астарен ’рѓа о метална делија. Ако о војнико дикхела сине кај о штити тано оштетимо, ов одма керела сине нешто те шај те поправинел ле хем те овел спремно баши јавер борба. Сар акава пример тано поврзимо тле вераја?

4. Соске мора те проверине тло штити е веракоро, хем сар шај те кере адава?

⁴ Исто сар о војникија ко пурано време, ту да мора редовно те проверине хем те одржине тло штити е веракоро те шај те ове секогаш спремно баши борба. Сар христијања, амен сием ки духовно војна хем боринаја амен против о лошна духија (Еф. 6:10-12). Никој јавер нашти те одржинел тло штити е веракоро туке ко тхан. Сар шај те ове сигурно кај тли вера ка овел зорали кеда ка овел тут испитија? Прво, мора те роде помош таро Девел ки молитва. А пало адава, ваљани те користине е Девлескоро Лафи те шај те испитине коркори тут хем те дикхе дали сиан спрема е Девлескири волја (Евр. 4:12). И Библија вакерела: „Нека овел тут доверба ко Јехова цело вилеа хем те на овел тут доверба ко тло хаљојбе“ (Изр. 3:5, 6). Акале стихоја ки годи, размислин башо несаве одлуке со анѓан лен ко последно време. Дали шај сине тут несаво пхаро финансиско проблеми? Дали тегани сетинѓан тут ко лафија таро Евреите 13:5, коте со о Девел вакерела: „Никогаш нане те мукхав тут хем нане те иранав туке мло думо“? Дали адава ветување бајрарѓа тли доверба кај о Јехова ка поможинел туке? Ако оја, адава сикавела кај одржинеа тло штити е веракоро ки шукар состојба.

5. Со шај те открине ако испитинеа тли вера?

⁵ Шај ка изненадине тут таро адава со ка открине кеда шукар ка испитине тли вера. Шај ка дикхе слабостија кола со на приметинѓан лен несаво време. На пример, шај ка хаљове кај о претерана секирацие, о обесхрабрување или несаве ховајба џинегде керѓе тли вера послабо. Сар шај те кере тли вера позорали?

АРАКХ ТУТ ТАРО ПРЕТЕРАНА СЕКИРАЦИЕ, ХОВАЈБА ХЕМ ОБЕСХРАБРУВАЊЕ

6. Башо кола буќа нане погрешно те грижина амен или те секирина амен?

⁶ Нане погрешно те грижина амен или те секирина амен башо несаве буќа. На пример, грижинаја амен те кера адава со мангена о Јехова хем о Исус (1. Кор. 7:32). Ако кераја несаво сериозно грево, трудинаја амен палем те ова амала е Јеховаја (Пс. 38:18). Освен адава, грижинаја амен сар шај те угодина амаре брачно партнереске, а исто аѓаар грижинаја амен амаре фамилијаке, е пхраленге хем е пхењенге (1. Кор. 7:33; 2. Кор. 11:28).

7. а) Сар шај о претерана секирацие те керен послабо амари вера? б) Спрема Изреки 29:25, соске на ваљани те дара таро мануша?

⁷ Сепак, о претерана секирацие шај те уништинен амари вера. На пример, шај цело време секиринаја амен башо адава дали ка овел амен доволно хајбе хем шеја (Мат. 6:31, 32). Адалеске, шај ка овел аменге најважно те овен амен материјална буќа. Шај чак ка почмина те манга о паре. Ако мукхаја те случинел пе нешто асавко, амари вера ко Јехова ка овел послабо хем ка румина амаро амалипа леа (Мар. 4:19; 1. Тим. 6:10). Јекх јавер стапица тани те ова претерано секириме со мислинена о јавера баши аменге. И дар те на асан аменге или те на противинен пе аменге шај те овел побари тари дар те на разочарина е Јехова. Те шај те заштитина амен, ваљани те молина е Јехова те дел амен вера хем храброст те на дара таро мануша. (Читин Изреки 29:25; Лука 17:5.)

8. Со ваљани те кера ако некој пробинела те ширинел ховајба?

⁸ О Сатана, „о дад е ховајбаскоро“, користинела околен со контролиринела лен те шај те ширинен ховајба башо Јехова хем башо амаре пхраља (Јован 8:44). На пример, о отпадникија вакерена ховајба хем превртиме информацие баши е Јеховаскири организација преку интернет, телевизија хем јавера медиумија. Адала ховајба тане несаве таро „јагале стреле“ е Сатанаскере (Еф. 6:16). Со ваљани те кера ако некој почминела те ширинел асавке ховајба? На мангаја те шуна лен! Соске? Адалеске со иси амен вера ко Јехова хем доверба ко амаре пхраља. Уствари, амен нане амен нисаво контакт е отпадниконцар. На дозволинаја никој хем ништо, па чак ни и радозналост, те чхивел амен те ава ки расправија ленцар.

9. Сар шај о обесхрабрување те влијајнел упри аменде?

⁹ О обесхрабрување шај те керел амари вера послабо. Понекогаш осетинаја амен обесхрабриме адалеске со иси амен проблемија. Џанѓола пе, тегани на ваљани те кера амен кај тано са шукар. Уствари, нане мудро те мислина кај адала проблемија на влијајнена упри аменде. Ама на смејнаја те мислина само ко проблемија. Ако кераја адава, шај те бистра са о шукар буќа со ветинѓа аменге о Јехова (Отк. 21:3, 4). О обесхрабрување шај те лел амари сила хем те чхивел амен те откажина амен (Изр. 24:10). Ама, шај те победина о обесхрабрување.

10. Со сикљоваја таро писмо јекхе пхењакоро?

¹⁰ Те дикха сар јекхе пхења таро САД иси ла зорали вера џикоте грижинела пе пле ромеске кова сој бут насвало. Ко јекх писмо џи ко амаро главно седиште, ој пишинѓа: „Иако понекогаш тано пхаро хем осетинаја амен обесхрабриме, иси амен зорали надеж. Бут сиум благодарно башо са о поуке со дела амен о Јехова те шај те керел амари вера позорали хем те охрабринел амен. Чаче ваљанена аменге асавке советија хем утеха. Ола поможинена аменге понадари да те служина е Јеховаске хем те истрајна ко неволје кола со о Сатана користинела лен против аменде“. Таро е пхењакере лафија сикљоваја кај шај те победина о обесхрабрување. Сар? Дикх ко неволје сар испит таро Сатана. Нека овел тут доверба кај о Јехова ка утешинел тут хем ов благодарно баши духовно храна која со дела амен.

11. Те шај те дикха дали амари вера тани зорали, кола пучиба ваљани те пуча амен?

¹¹ Дали иси несаво подрачје коте со ваљани те кере тли вера позорали? Дали ко последна некобор масекија успејнѓан те на секирине тут претерано? Дали отфрлинѓан о искушение те шуне отпадникон или те распрајне тут некасаја лендар башо ховајба со ширинена лен? Хем дали успејнѓан те икљове ко крајо е обесхрабрибаја? Ако оја, тегани тли вера тани ки шукар состојба. Ама, мора те пазина адалеске со о Сатана користинела јавера да оружја против аменде. Те дикха јекх лендар.

АРАКХ ТУТ ТАРО МАТЕРИЈАЛИЗАМ

12. Со шај те керел аменге о материјализам?

¹² О материјализам шај те лел амаро внимание таро духовна буќа хем те керел те на одржина амаро штити е веракоро. О апостол Павле вакерѓа: „Нијекх војнико нане зафатимо те заработинел паре, соске мангела те керел и волја адалескири со леља ле те овел војнико“ (2. Тим. 2:4). Уствари, е римско војниконге сине забранимо те керен било сави јавер бути. Со шај сине те случинел пе ако несаво војнико на шунела акаја забрана?

13. Соске о војникија ко пурано време на смејнена сине те керен јавер бути?

¹³ Замислин туке акаја ситуација. Јекх група војникија цело сабајле вежбинена пле маченцар. Ама, јекх војнико тари ленгири група нане адатхе. Наместо те овел ленцар, ов тано ки диз коте со иси ле пли тезга ко пазари. Раќате, џикоте о војникија проверинена пли опрема хем оштринена пле мачија, о војнико со керела бути ко пазари спреминела и тезга тајсаске. Ама, о тајсутно диве о противнико изненадено нападинела. Кова војнико ка овел пошукар спремимо баши борба, хем кастар о заповеднико ка овел задоволно? А ако ту боринеа тут, дали би мангеа узи туте те терѓол војнико сој шукар спремимо или некој со мукхља нешто јавер те лел лескоро внимание?

14. Сар војникија е Христосескере, сој аменге најважно?

¹⁴ Сар шукар војникија, амен на мукхаја ништо те лел амаро внимание тари амари главно цел — те овен амендар задоволна амаре заповедникија, о Јехова хем о Христос. Аменге тано адава поскапоцено таро са со шај те нудинел аменге е Сатанаскоро свето. Адалеске трудинаја амен те овел амен доволно време хем сила те шај те служина е Јеховаске, хем те одржина ки шукар состојба амаро штити е веракоро хем амари духовно воено опрема.

15. Саво предупредување денѓа амен о Павле, хем соске?

¹⁵ Амен ваљани секогаш те ова џангавде хем спремна! Соске? О апостол Павле предупрединѓа кај „окола со мангена те барваљовен“ ка овен цидиме тари вера (1. Тим. 6:9, 10). О лафија „цидимо таро вера“ сикавена кај шај те лел пе амаро внимание тари служба башо Девел ако трудинаја амен те кхеда материјална буќа кола со на ваљанена аменге. Аѓаар шај те развина ко амаро вило бут „неразумна хем штетна желбе“. Наместо те мукха асавке желбе те кхувен аменге ко вило, на смејнаја те бистра кај о Сатана користинела лен сар оружје колеа со мангела те керел послабо амари вера.

16. Башо кола пучиба ваљани те размислина џикоте читинаја о извештај таро Марко 10:17-22?

¹⁶ Шај иси амен доволно паре те кина бут материјална буќа. Дали тано погрешно те кина буќа со мангаја лен, ама уствари, на ваљанена аменге? На ваљани те значинел. Сепак шукар тано те размислина башо акала пучиба: Чак ако шај те дозволина аменге несаве буќа, дали чаче ка овел амен време хем сила те користина лен хем те одржина лен? Дали шај те почмина превише те манга о буќа со иси амен? Дали амаро мангипе спрема ленде шај те чхивел амен те постапина сар о терно мануш со одбинѓа е Исусескири покана те служинел ки побари мера е Девлеске? (Читин Марко 10:17-22.) Кобор пошукар ка овел ако живинаја едноставно живото хем ако трошинаја амаро скапоцено време хем сила те шај те кера е Девлескири волја!

ИКЕР ШУКАР ТЛО ШТИТИ Е ВЕРАКОРО

17. Со на смејнаја те бистра?

¹⁷ Никогаш на смејнаја те бистра кај сием ки војна хем кај мора те ова спремна баши борба секова диве (Отк. 12:17). Амаре пхраља хем пхења нашти те пхиравен амаро штити е веракоро аменге ко тхан. Секова јекх коркори мора шукар те икерел пло штити, јавере лафенцар те керел пли вера зорали.

18. Соске о војникија ко пурано време шукар икерена сине пумаре штитија?

¹⁸ Ко пурано време, јекх војнико добинела сине чест ако боринела пе сине храбро ки борба. Ама, ка осетинел пе сине понижимо ако иранела пе сине бизо пло штити. О римско историчари о Тацит пишинѓа: „Јекхе војникоске сине најбари лаџ те иранел пе кхере бизо пло штити“. Адаја сине јекх причина соске о војникија шукар икерена сине пумаре штитија џикоте боринена пе сине.

19. Сар шај шукар те икера амаро штити е веракоро?

¹⁹ Амен шукар икераја амаро штити е веракоро аѓаар со џаја редовно ко состанокија хем кераја лафи е јаверенцар башо е Јеховаскоро анав хем башо лескоро Царство (Евр. 10:23-25). Освен адава, секова диве читинаја е Девлескоро Лафи хем молинаја е Јехова те поможинел аменге те применина лескере советија ко са со кераја (2. Тим. 3:16, 17). Аѓаар, нијекх оружје кова со о Сатана користинела против аменде нане те керел аменге трајно штета (Иса. 54:17). Амаро „баро штити е веракоро“ ка аракхел амен. Ка ова храбра хем ка успејна те победина ко борбе со иси амен секова диве аѓаар со ка соработина амаре пхраленцар хем пхењенцар. А сој најважно, ка овел амен чест те ова тари е Исусескири страна кеда ов ка побединел е Сатана хем лескере следбеникон (Отк. 17:14; 20:10).