Ту да шај те уживине засекогаш ко берекетија таро амаро Створители

О Девел денѓа лафи е пекамбереске е Ибрахимеске кај јекх таро лескере потомција ка анел берекетија са е народонге ки Пхув (1. Мојсеева 22:18). Кој сине адава?

Околу 2.000 берш англедер, о Девел денѓа е Исаске, кова со авела сине таро Ибрахими, моќ те керел баре чудија. Акала чудија сикавѓе кај о ветување со сине дендо е Ибрахимеске — кај ка добинен берекетија са о мануша — ка исполнинел пе преку о Иса (Галатите 3:14).

О чудија со керѓа лен о Иса поможинѓе е јаверенге те хаљовен кај ов тано адава со о Девел биринѓа ле те дел берекетија са е манушенге. Исто аѓаар, о чудија сикавѓе сар о Девел ка користинел е Иса те шај те дел вечна берекетија е манушенге. Приметин сар о чудија е Исаскере откринена аменге несаве таро лескере шуже особине.

Обѕирност — О Иса сасљарѓа е насвален.

Ки јекх прилика, јекх мануш со сине ле лепра молинѓа ле те сасљарел ле. О Иса астарѓа ле хем вакерѓа леске: „Мангава, сасљов“. Ко исто моменти састило (Марко 1:40-42).

Дарежливост — О Иса парварѓа е бокхален.

О Иса на мангља о мануша те овен бокхале. Ко најхари дуј прилике, ов чудоја парварѓа буте манушен само некобор маренцар хем мачхенцар (Матеј 14:17-21; 15:32-38). Откеда хале хем чалиле, ачхило панда бут хајбаске.

Сочувство — О Иса иранѓа е мулен ко живото.

Јекх пути, о Иса дикхља јекхе удовица која со тугујнела сине адалеске со муло лакоро чхаво. На сине ла никој јавер со шај те грижинел пе лаке. Поттикнимо таро сочувство, о Иса иранѓа лакере чхаве ко живото (Лука 7:12-15).