ТЕ ЖИВИНА САР ХРИСТИЈАЊА

Мудро бирин тли забава

Соске ваљани те ана мудра одлуке кеда керела пе лафи башо адава сави забава биринаја? Кеда биринаја саво филми ка дикха, сави гили ка шуна, ки сави интернет-страница ка кхува, саво лил ка читина или сави видеоигра ка кхела, амен уствари биринаја солеа ка пхера амари годи. Амаре одлуке влијајнена упро амаро понашибе. Жално тано адава со ко побаро дело тари забава авдиве иси буќа кола со о Јехова осудинела лен (Пс 11:5; Га 5:19-21). Тари адаја причина, и Библија поттикнинела амен те размислина башо буќа кола со анена фалба е Јеховаске (Фп 4:8).

ДИКХ О ВИДЕОКЛИПИ САВИ ЗАБАВА ТЕ БИРИНАВ?, А ПАЛО АДАВА ОДГОВОРИН КО АКАЛА ПУЧИБА:

Сар несаве авдисутне забаве личинена ко гладијаторска борбе таро пурано Рим?
Сар шај о членија ко собрание те поможинен е терненге мудро те биринен сар ка забавинен пе?
Сар о стихо таро Римјаните 12:9 ваљани те влијајнел упро адава сави забава биринаја?
Ко кола корисна начинија шај те забавине тут ко тхан коте со живинеа?

АКТИВНО ИЛИ ПАСИВНО ЗАБАВА?

Баро дело тари забава ко свето поттикнинела е манушен те овен пасивна наместо активно те керен нешто. Ко филмија, ко лила хем ко телевизиска програме иси бут креативна буќа, ама адала идее нане тле, него е јаверенгере. Иако нане ништо погрешно ки асавки пасивно забава, бут мануша халиле кај побари корист иси ки активно забава, или јавере лафенцар кеда ола керена несаве буќа. На пример, несаве уживинена те башален ко инструментија или те цртинен нешто. Јавера палем, мангена те овел лен рекреација аври, аѓаар со ка спортујнен, ка пхирен ки природа, ка кампујнен или ка керен нешто јавер. Бизи разлика сави забава ка бирина, важно тано те кера „са баши е Девлескири слава“ (1Ко 10:31).