Терне пхраљален, џан пало пример е Маркоскоро хем е Тимотеескоро

1-2. Со шај сине те чхинавел е Марко хем е Тимотее те шај повише те служинен е јаверенге?

ТЕРНЕ ПХРАЉАЛЕН дали мангена те керен повише ки служба башо Јехова те шај панда повише те поможинен е пхраленге хем е пхењенге ко тумаро собрание? Сигурно кај мангена. Бут сием среќна кеда дикхаја кај бут терне пхраља мангена те служинен е јаверенге (Пс. 110:3). Сепак, шај иси тумен предизвикија. На пример, дали сиан ко дуј гоѓа те кере повише ки служба башо Јехова адалеске со на џанеа саво ка овел тло живото, или коте шај о Јехова те бичхалел тут? Или шај одбинѓан несави задача адалеске со дараја кај нане шукар те кере ла. Ако оја, на осетинеа тут само ту аѓаар.

² Е Марко хем е Тимотее сине лен слична предизвикија, ама адава со на џанле саво ка овел ленгоро живото или адава со на сине лен доволно искуство, на чхинавѓа лен те служинен е јаверенге. Кеда о Павле хем о Варнава викинѓе е Марко те џал ленцар ко ленгоро прво мисионерско патујбе, шај о Марко живинела сине пле дајаја ко пумаро шужо хем удобно кхер (Апо. 12:12, 13, 25). О Марко мукхља пло кхер те шај те керел повише ки служба башо Јехова. Прво, селинѓа пе ки Антиохија. Пало адава, заедно е апостол Павлеа хем е Варнаваја патујнела сине ко јавера дур тхана (Апо. 13:1-5). Слично сар лесте, о Тимотеј веројатно живинела сине пле родителенцар кеда о Павле викинѓа ле те џал леа те проповединел. Адалеске со сине терно хем на сине искусно, о Тимотеј шај сине те мислинел песке кај нане доволно способно баши адаја задача (Споредин 1. Коринќања 16:10, 11 хем 1. Тимотеј 4:12.) Сепак, ов прифатинѓа е Павлескири покана хем адалеске сине ле бут благословија (Апо. 16:3-5).

3. а) Котар џанаја кај о Павле бут ценинѓа е Марко хем е Тимотее? (2. Тимотеј 4:6, 9, 11; дикх хем о слике.) б) Кола пучиба ка дикха лен ки акаја статија?

³ О Марко хем о Тимотеј кхединѓе скапоцено искуство хем сиклиле те грижинен пе башо бут различна одговорностија ко собрание, панда џикоте сине терне. О Павле добором бут ценинела сине акале терне пхрален со покасно кеда халило кај лескоро живото панда хари ка завршинел ов мангља ола те овен узи лесте. (Читин 2. Тимотеј 4:6, 9, 11.) Кола особине со сине е Марко хем е Тимотее керѓе о Павле те замангел лен? Сар о терне пхраља шај те џан пало ленгоро пример хем сар шај е Павлескоро љубезно совет те поможинел е терне пхраленге авдиве?

ЏА ПАЛО ПРИМЕР Е МАРКОСКОРО — СПРЕМНО СЛУЖИН Е ЈАВЕРЕНГЕ

4-5. Сар о Марко сикавѓа кај мангела те служинел е јаверенге?

⁴ Те служинел пе е јаверенге шај те значинел бут те трудине тут те поможине ленге хем понадари те кере адава чак кеда тано пхаро. О Марко сине шукар пример башо акава. Кеда о Павле одбинѓа те лел ле пеа ко дујто мисионерско патујбе, о Марко веројатно сине повредимо хем разочаримо (Апо. 15:37, 38). Ама, адава на чхинавѓа ле те служинел е пхраленге хем е пхењенге.

⁵ О Марко прифатинѓа те служинел ко јавер тхан заедно пле братучетеа е Варнаваја. Околу 11 берш покасно кеда о Павле прво пути сине пханло ко Рим, о Марко сине машкар окола со поможинѓе леске (Филем. 23, 24). Уствари, о Павле добором бут ценинѓа и помош таро Марко со баши лесте вакерѓа кај ов бут поможинѓа ле хем утешинѓа ле (Кол. 4:10, 11).

6. Сар користинѓа е Маркоске адава со дружинела пе сине зрела христијаненцар? (Дикх и фуснота.)

⁶ Е Марко сине ле бут шуже искуствија адалеске со сине паше амал е зрела христијаненцар. Откеда несаво време сине е Павлеа ко Рим, о Марко гело ко Вавилон те шај те соработинел е апостол Петареа. Ола добором уле паше со о Петар вакерѓа „о Марко мло чхаво“ (1. Пет. 5:13). О Петар веројатно вакерела сине пле терне амалеске бут интересна деталија башо е Исусескоро живото хем служба кола со о Марко покасно пишинѓа лен ко пло евангелие.a

7. Сар јекх терно пхрал со викинела пе Сенг-Ву гело пало пример е Маркоскоро? (Дикх хем и слика.)

⁷ О Марко ачхило зафатимо ки служба башо Јехова хем ачхило паше духовно зрела пхраленцар. Сар шај те џа пало е Маркоскоро пример? Шај мангеа те кере несави задача ки служба башо Јехова ама панда на пхереа о условија башо адава. Ако тано аѓаар, тегани ов стрпливо туја хем понадари да роде јавера начинија сар шај те служине е Јеховаске хем ко собрание. Те дикха о пример јекхе пхралескоро со викинела пе Сенг-Ву, кова со акана служинела сар старешина. Кеда сине потерно сине ле навика те спорединел пе јавере терне пхраленцар. Несаве лендар добинѓе задаче ко собрание, а ов на. О Сенг-Ву сине повредимо хем обесхрабримо хем адалеске керѓа лафи башо адава несаве зрела пхраленцар. Јекх старешина вакерѓа леске те керел адава со шај те служинел е јаверенге чак ако понекогаш о јавера нане те приметинен адава со керела. Акава совет поттикнинѓа ле те поможинел е попхуренге хем околенге каске со ваљани сине превоз џи ки дворана. Кеда сетинела пе ко адава време ов вакерела: „Халиљум со чаче значинела те служине е јаверенге повише. Почминѓум те овав порадосно соске поможинава сине е јаверенге ко практично начин“.

ЏА ПАЛО ПРИМЕР Е ТИМОТЕЕСКОРО — СИКАВ МАНГИПЕ ХЕМ ГРИЖИН ТУТ Е ЈАВЕРЕНГЕ

8. Соске о Павле биринѓа е Тимотее те патујнел леа? (Филипјања 2:19-22)

⁸ Е Павлеске ваљанена сине пхраља кола со сине храбра те патујнен леа кеда ваљани сине те иранел пе ко дизја коте со сине прогонимо. Ов прво биринѓа е Сила те џал леа, кова со сине јекх искусно христијани (Апо. 15:22, 40). Покасно, ов биринѓа е Тимотее да те џал леа. Соске о Павле мангља о Тимотеј те џал леа? Јекх причина сине адаја со е Тимотее сине ле шукар анав англо јавера (Апо. 16:1, 2). Исто аѓаар, ов чаче грижинела пе сине е манушенге. (Читин Филипјања 2:19-22.)

9. Сар о Тимотеј сикавѓа кај чаче грижинела пе пле пхраленге хем пхењенге?

⁹ Панда таро време кеда почминѓа те служинел заедно е Павлеа, о Тимотеј сикавѓа кај повише грижинела пе е јаверенге него песке. Адалеске, е Павле шај сине те овел ле доверба ки лесте кеда мукхља ле ки Верија те шај те охрабринел адари е неве ученикон (Апо. 17:13, 14). Ки адаја прилика, о Тимотеј сигурно шај сине те сикљол бут таро пример е Силаскоро кова со исто аѓаар ачхило ки Верија. Ама покасно, о Павле бичхалѓа е Тимотее ко Солун коркори те шај те охрабринел е христијанен ки адаја диз (1. Сол. 3:2, фус.). Ко следна 15 берш о Тимотеј сиклило те ровел „околенцар со ровена“ аѓаар со сикавела сине сочувство спрема секасте со сине ле мука (Рим. 12:15; 2. Тим. 1:4). Сар шај о терне пхраља авдиве те џан пало е Тимотеескоро пример?

10. Сар јекх пхрал со викинела пе Ву Џеј сиклило повише те интересинел пе е јаверенге?

¹⁰ Јекх пхрал со викинела пе Ву Џеј, сиклило повише те интересинел пе е јаверенге. Кеда сине терно леске сине пхаро те керел лафи е попхуре пхраленцар хем пхењенцар. Адалеске кеда сине ки дворана само ка поздравинел пе сине ленцар хем ка цидел пе. Јекх старешина вакерѓа леске те почминел те керел ленцар лафи аѓаар со ка вакерел ленге со ценинела ки ленде. Исто аѓаар, акава старешина поттикнинѓа ле те размислинел со шај интересинела околе касаја со керела лафи. О Ву Џеј применинѓа о совет со добинѓа ле. Ов авдиве служинела сар старешина хем вакерела: „Акана манге полокхо те керав лафи манушенцар сој ки различно возраст. Радосно сиум со акана пошукар хаљовава саве пхарипа иси е јаверен. Адава поможинела манге те џанав со чаче ваљани е пхраленге хем е пхењенге хем сар те поможинав ленге“.

11. Сар шај о терне пхраља те сикљовен повише те грижинен пе е јаверенге ко ленгоро собрание? (Дикх хем и слика.)

¹¹ Терне пхраљален, тумен да шај те сикљовен повише те грижинен тумен е јаверенге. Кеда сиен ко состанокија керен лафи манушенцар сој тари различно возраст хем потекло, пучен лен сар тане, а пало адава шунен. Сар со накхела о време ка дознајнен сар шај те поможинен ленге. Шај ка дознајнен кај несаве попхуре брачно пареске ваљани помош те шај те сикљовел сар те користинел и апликација JW Li­brary^®. Или шај ка дознајнен кај ваљани ленге некој касаја со ка шај те џан ки служба. Дали шај те поможинен асавке пхраленге хем пхењенге те џанен сар те користинен пумаре електронска уредија или дали шај те џан ленцар заедно ки служба? Адалеа со ка овен спремна те поможинен е јаверенге, ка овен шукар пример сариненге.

Е ПАВЛЕСКОРО СОВЕТ ШАЈ ТЕ ПОМОЖИНЕЛ ТУКЕ

12. Сар шај е Павлескоро совет џи ко Тимотеј те поможинел е терне пхраленге?

¹² О Павле денѓа е Тимотееске практично совет те шај те поможинел леске те овел ле посреќно живото хем те овел успешно ки служба (1. Тим. 1:18; 2. Тим. 4:5). Терне пхраљален, туменге да шај е Павлескоро совет те поможинел. Сар? Читинен о солдуј писмија е Павлескере џи ко Тимотеј сар те пхене тане пишиме туменге хем приметинен кова совет шај те применинен ко тумаро живото. Те дикха некобор примерија.

13. Сој вклучимо ко адава те ове пханло е Јеховаја?

¹³ „Вежбин те служине е Девлеске цело вилеа“ (1. Тим. 4:7б). Со значинела некој те служинел е Девлеске цело вилеа? Адава значинела некој те осетинел пе бут пханло е Јеховаја хем те мангел те керел адава со радујнела ле. Ама адалеске со на осетинаја амен аѓаар автоматски, ваљани бут те трудина амен. Со ваљани те кера? О грчко лафи сој преведимо сар „вежбин“ бут пути користинела пе сине те шај те опишинел пе кобор напорно вежбинена о атлетичарија кола со спреминена пе башо натпревар. Ленге ваљани сине самодисциплина. Аменге да ваљани самодисциплина те шај те развина навике кола со ка поможинен амен те шај те ова панда попаше е Јеховаја.

14. Сави ваљани те овел амари цел џикоте читинаја и Библија? Вакер пример.

¹⁴ Џикоте трудинеа тут те овел тут навика те читине и Библија, ма бистре кај тли цел тани те ове попаше е Јеховаја. На пример, кеда читинеа о извештај башо Исус хем башо терно поглавари кова со сине барвало, со сикљовеа лестар башо Јехова? (Марко 10:17-22). О терно мануш верујнела сине кај о Исус тано о Месија ама на сине ле доволно вера те шај те овел лескоро ученико. Сепак, о Исус замангља акале мануше. Сигурно погодинела тут о начин сар о Исус керѓа лафи акале терне манушеа. Дикхјола пе кај о Исус мангља ов те анел мудро одлука. Исто аѓаар, о Исус сикавѓа е Јеховаскоро мангипе спрема адава терно мануш (Јован 14:9). Џикоте размислинеа башо акава извештај хем башо тле околностија пуч тут: „Со ваљани те керав те шај те овав попаше е Јеховаја хем те служинав е јаверенге повише?“

15. Соске тано важно јекх терно пхрал те овел шукар пример е јаверенге? Вакер пример (1. Тимотеј 4:12, 13).

¹⁵ „Ов пример е верна манушенге“. (Читин 1. Тимотеј 4:12, 13.) О Павле на само со поттикнинѓа е Тимотее те сикљол шукар те читинел хем те сикавел, него исто аѓаар ов мангља те овен ле шукар особине сар сој, мангипе, вера хем чисто понашибе. Соске? Адалеске со адава со некој керела тано бут поважно таро адава со вакерела. Те вакера кај добинѓан задача те икере говор башо адава сар шај те ова поревна ки служба. Нане те лаџа те кере лафи баши адаја тема ако ту деа тло најшукар ки служба. О јавера ка овен поспремна те применинен адава со вакереа ако ту сиан шукар пример ко адава (1. Тим. 3:13).

16. а) Ко кола панџ подрачја шај јекх терно христијани те овел шукар пример? б) Сар шај јекх терно пхрал те овел пример ко „керибе лафи“?

¹⁶ Ко 1. Тимотеј 4:12, о Павле спомнинѓа панџ подрачја ко кола со јекх терно пхрал шај те овел шукар пример. Дали шај ко тло лично проучибе те одвојне време те размислине башо секова таро акала подрачја. Те вакера кај шај мангеа те мукхе шукар пример ко „керибе лафи“. Размислин ко кола начинија шај тле лафенцар те охрабрине е јаверен. Ако панда живинеа тле родителенцар дали шај почесто те благодарине ленге башо адава со керена туке? Пало состанок дали шај те вакере некаске со сине ле учество со свиџинѓа пе туке тари лескири точка? Исто аѓаар, шај те трудине тут те коментирине ко состанокија тле лафенцар. Адалеа со ка трудине тут те ове шукар пример ко керибе лафи ка сикаве кај духовно напредујнеа (1. Тим. 4:15).

17. Со ка поможинел јекхе терне пхралеске те исполнинел пле духовна целија? (2. Тимотеј 2:22).

¹⁷ „Наш таро желбе е тернипаскере, а роде праведност“. (Читин 2. Тимотеј 2:22.) О Павле поттикнинѓа е Тимотее те боринел пе против о желбе кола со шај те лен лескоро внимание таро лескере духовна целија хем те руминен лескоро амалипе е Јеховаја. Шај ту да ка хаљове кај несаве активностија кола со нане погрешна лена тутар бут време хем адалеске на ачхола тут доволно време башо духовна активностија. На пример, размислин башо адава кобор време трошинеа ко спорт, ко интернет или ко кхелибе видеоигре. Дали шај дело таро адава време те користине ле башо теократска активностија? На пример, шај те поможине ко одржибе и дворана или те учествујне ко сведочибе е количкенцар. Ако кереа акала буќа веројатно ка овен тут неве амала кола со ка поможинен туке те чхиве туке духовна целија хем те исполнине лен.

О СЛУЖИБЕ Е ЈАВЕРЕНГЕ АНЕЛА БЛАГОСЛОВИЈА

18. Соске шај те вакера кај е Марко хем е Тимотее сине лен среќно хем шужо живото?

¹⁸ О Марко хем о Тимотеј керѓе жртве те шај повише те служинен е јаверенге хем адалеске сине лен среќно хем шужо живото (Апо. 20:35). Те шај те служинел пле пхраленге, о Марко патујнела сине ко разна тхана ко свето. Исто аѓаар, ов пишинѓа интересно извештај башо е Исусескоро живото хем служба. О Тимотеј поможинѓа е Павлеске те керел собранија хем те охрабринел е пхрален хем е пхењен. О Јехова сине задоволно тари е Маркоскири хем е Тимотеескири самопожртвуваност хем адава керѓа ле радосно.

19. Соске о терне пхраља ваљани те применинен о совет со денѓа о Павле е Тимотееске, хем сави корист ка овел лен таро адава?

¹⁹ Таро писмија со о Павле пишинѓа е Тимотееске шај сине те дикхел пе кобор бут ов мангела ле. Ама о Јехова сине адава со водинѓа е Павле те пишинел адала писмија хем адалеске ола сикавена кобор бут ов мангела тумен да, терне пхраљален. Ов мангела те овел тумен шужо живото џикоте служинена леске. Адалеске ден тумендар са те шај те применинен е Павлескоро совет хем развинен желба те служинен е јаверенге повише. Ако керена адава ка овел тумен бут шужо живото акана хем ка „добинен о чачутно живото“ ки иднина (1. Тим. 6:18, 19).