Поможин е интересентенге те почминен те служинен е Јеховаске

1-2. а) Соске несаве интересентија мислинена пе дали те почминен те служинен е Јеховаске? б) Со ка дикха ки акаја статија?

ДАЛИ несаве буќа керѓе те мислине тут дали те ове е Јеховаскоро сведоко? Шај дарандиљан кај тле колеге, амала или некој тари тли фамилија ка овел против туте. Или шај мислинѓан кај никогаш ка нашти те живине аѓаар сар со родела о Девел. Ако тано аѓаар, тегани шај те хаљове е интересентен кола со мислинена пе дали те почминен те служинен е Јеховаске.

² О Исус џанља кај ако некој дарала башо акала буќа адава шај те чхинавел ле духовно те напредујнел (Мат. 13:20-22). Ама ов на откажинѓа пе околендар кола со на сине сигурна дали те овен лескере следбеникија. Наместо адава, адалеа со керѓа ов, мукхља аменге пример те шај те поможина асавке манушенге 1) те хаљовен со чхинавела лен те напредујнен, 2) те бајрарен пло мангипе спрема о Јехова, 3) те чхивен песке исправна приоритетија хем 4) те накхавен о предизвикија. Сар шај те применина адава со о Исус вакерѓа пле учениконге џикоте користинаја о лил Ов бахтало засекогаш те шај те поможина несаве интересентенге те почминен те служинен е Јеховаске?

ПОМОЖИН ЛЕСКЕ ТЕ ХАЉОВЕЛ СО ЧХИНАВЕЛА ЛЕ ДУХОВНО ТЕ НАПРЕДУЈНЕЛ

3. Со шај чхинавела сине е Никодиме те овел е Исусескоро ученико?

³ Е Никодиме, кова со сине важно еврејско поглавари, сине нешто со чхинавела ле сине те овел е Исусескоро ученико. Само шов масек откеда о Исус почминѓа пле службаја, о Никодим халило кај о Исус сине бичхалдо таро Девел (Јован 3:1, 2). Ама, адалеске со дарандило таро Евреија, ов одлучинѓа тајно те авел ко Исус (Јован 7:13; 12:42). Ов шај дарандило кај ка нашавел бут буќа ако овела лескоро ученико.a

4. Сар о Исус поможинѓа е Никодимеске те хаљол со аџикерела лестар о Девел?

⁴ О Никодим џанела сине о Закони, ама ваљани леске сине помош те хаљовел со аџикерела о Јехова лестар. Сар о Исус поможинѓа ле? О Исус сине спремно те одвојнел леске време, па чак раќате те керел лафи е Никодимеа. Ов јасно вакерѓа е Никодимеске со ваљани те керел те шај те овел лескоро ученико: те каинел пе башо пле гревија, те крстинел пе ко пани хем те сикавел вера ко е Девлескоро Чхаво (Јован 3:5, 14-21).

5. Сар шај те поможина јекхе интересентеске те хаљол со чхинавела ле духовно те напредујнел?

⁵ Чак ако јекх интересенти шукар џанела и Библија, шај ка ваљани леске помош те хаљол со чхинавела ле те служинел е Јеховаске. И бути или о противибе тари фамилија шај чхинавена ле духовно те напредујнел. Адалеске одвојн туке време тле интересентеске. Шај те викине ле те џан ки кафа или те пхирен. Ки асавки опуштено атмосфера шај ка овел поспремно отворено те керел лафи башо предизвикија коленцар со боринела пе. Поттикнин ле те керел о потребна промене, на те шај те угодинел туке, него те сикавел пло мангипе е Јеховаске.

6. Сар шај те поможине е интересентеске те кхедел храброст те применинел адава со сикљола? (1. Коринќања 16:13).

⁶ Кеда јекх интересенти тано уверимо кај о Јехова ка поможинел леске те живинел спрема о библиска мерилија, ов ка овел похрабро те применинел адава со сикљола. (Читин 1. Коринќања 16:13.) Кеда некасаја проучинеа и Библија, ту шај те споредине тут сар јекх наставнико. Кеда џаја сине ки школа, кола сине тле омилена наставникија? Веројатно окола со сине стрплива туја хем поможинѓе туке те градине доверба ко тле способностија. Ко слично начин, ту да ка ове шукар учители ако на сикавеа е интересенте само башо адава со родела о Девел амендар него исто аѓаар те уверине ле кај о Јехова ка поможинел ле те керел о потребна промене ко живото. Сар шај те кере адава?

ПОМОЖИН ЛЕ ТЕ БАЈРАРЕЛ ПЛО МАНГИПЕ СПРЕМА О ЈЕХОВА

7. Сар о Исус поможинѓа околенге со шунена ле те манген е Јехова панда повише?

⁷ О Исус џанља кај о мангипе спрема о Јехова ка мотивиринел лескере ученикон те применинен адава со сикљона. Ов често сикавела лен сине башо буќа кола со поможинѓе ленге панда повише те манген пле небесно Даде. На пример, спорединѓа е Јехова јекхе манушеа кова со дела пле чхавенге шукар буќа (Мат. 7:9-11). Несаве таро адала со шунена ле сине шај на сине лен асавко дад кова со грижинела пе ленге. Замислин сар осетинена пе сине кеда о Исус раскажинела сине и парамис башо милостиво дад кова со вилеа доџакерѓа пле чхаве кова со керѓа бут лошна буќа. Ола шај сине те хаљовен кобор бут о Јехова мангела е манушен (Лука 15:20-24).

8. Сар шај те поможине е интересентеске те бајрарел пло мангипе спрема о Јехова?

⁸ Ту да шај те поможине е интересентеске те бајрарел пло мангипе спрема о Јехова аѓаар со ка истакнине е Девлескере особине џикоте проучинена. Секогаш кеда проучинена, поможин ле те поврзинел адава со сикљола е Јеховаскере мангипаја. Кеда керена лафи баши откупнина, поможин леске те хаљол со значинела адава леске лично (Рим. 5:8; 1. Јов. 4:10). Јекх интересенти веројатно панда повише ка мангел е Јехова ако хаљола кобор бут мангела о Јехова ле (Гал. 2:20).

9. Со поможинѓа јекхе манушеске кова со викинела пе Мајкл те керел промене ко пло живото?

⁹ Те дикха о пример е Мајклескоро тари Индонезија. Панда сар чхаво џанела сине о чачипе, ама на крстинѓа пе. Кеда сине ле 18 берш гело ко странство те керел бути, возинела сине камиони. Покасно женинѓа пе, ама понадари да керела сине бути ко странство дур тари пли фамилија. Пало несаво време лескири ромни хем лескири чхај почминѓе те проучинен и Библија хем те напредујнен. Кеда мули лескири дај, о Мајкл одлучинѓа те иранел пе кхере те шај те грижинел пе пле дадеске хем почминѓа те проучинел и Библија. Адава со сиклило таро дело „Дознајн повише“ ки лекција 27 таро лил Ов бахтало засекогаш, бут погодинѓа е Мајкле. Џикоте размислинела сине башо адава сар осетинела пе сине о Јехова џикоте дикхела сар лескоро Чхаво цидела муке, лескере јакхја пхердиле асва. Ов сине панда поблагодарно баши откупнина хем адава поттикнинѓа ле те керел промене ко пло живото хем те крстинел пе.

ПОМОЖИН ЛЕСКЕ ТЕ ЧХИВЕЛ ПЕСКЕ ИСПРАВНА ПРИОРИТЕТИЈА

10. Сар о Исус поможинѓа пле прва учениконге те чхивен песке исправна приоритетија? (Лука 5:5-11; дикх хем и слика.)

¹⁰ О прва ученикија сигате халиле кај о Исус тано о ветимо Месија, ама ваљанѓа ленге помош те чхивен и служба ко прво тхан. О Петар хем о Андреј више сине е Исусескере ученикија англедер о Исус те викинел лен те овен стално леа (Мат. 4:18, 19). Заедно е Јаковеа хем е Јованеа ола сине рибарија хем шукар џала сине ленге и бути (Мар. 1:16-20). Кеда мукхле адаја бути, о Петар хем о Андреј веројатно керѓе планија сар те грижинен пе пле фамилиенге џикоте џана пало Исус. Со поттикнинѓа лен те чхивен песке исправна приоритетија? О извештај таро Лука вакерела аменге кај о Исус керѓа чудо кова со панда повише уверинѓа лен кај о Јехова ка грижинел пе башо ленгере потребе. (Читин Лука 5:5-11.)

11. Сар шај амаре искуствонцар те бајрара и вера јекхе интересентескири?

¹¹ Амен нашти те кера чудија сар о Исус, ама шај те вакера ленге искуствија башо адава сар о Јехова поможинела околенге кола со чхивена ле ко прво тхан ко пло живото. На пример, сетинеа ли тут сар о Јехова поможинѓа тут кеда почминѓан те џа ко состанокија? Шај ваљанѓан те кере лафи тле шефеа хем те замолине ле те менинел тло работно време ко диве кеда иси тут состанок. Објаснин тле интересентеске сар барили тли вера џикоте дикхеа сине сар о Јехова поможинела тут адалеске со одлучинѓан те чхиве ле ко прво тхан.

12. а) Соске ваљани те канина различна објавителен ко библиско курси? б) Сар шај те користине о видеоклипија те шај делотворно те сикаве тле интересенте? Вакер пример.

¹² Тле интересенте исто аѓаар ка овел ле корист ако шунела сар јавера пхраља хем пхења чхивѓе песке исправна приоритетија. Адалеске, канин различна пхрален хем пхењен те овен присутна туја ко библиско курси. Замолин лен те објаснинен сар запознајнѓе о чачипе хем со керѓе те шај те чхивен и служба е Јеховаске ко прво тхан ко пумаро живото. Освен адава, одвојнен туменге време заедно те дикхен е интересентеа о видеоклипија таро дело „Дознајн повише“ хем, кеда одговоринела ки ситуација, о видеоклипија таро дело „Истражин“ ко лил Ов бахтало засекогаш. На пример, кеда ка керен лафи баши лекција 37, шај те истакнине несаве начелија таро видеоклипи О Јехова ка грижинел пе башо амаре потребе.

ПОМОЖИН ЛЕ ТЕ НАКХАВЕЛ О ПРЕДИЗВИКИЈА

13. Сар о Исус спреминѓа пле ученикон башо противибе?

¹³ О Исус бут пути вакерѓа пле учениконге кај ка овел лен противибе таро јавера, па чак таро ленгере фамилие (Мат. 5:11; 10:22, 36). Ко крајо тари пли служба, о Исус предупрединѓа пле ученикон кај шај чак те овен мударде (Мат. 24:9; Јован 15:20; 16:2). Поттикнинѓа лен те пазинен пе џикоте тане ки служба. Ов советинѓа лен те на распрајнен пе околенцар со противинена пе ленге хем те пазинен те шај понадари да те проповединен.

14. Сар шај те поможина е интересентеске те спреминел пе башо противибе? (2. Тимотеј 3:12).

¹⁴ Шај те поможина е интересентеске те спреминел пе башо противибе аѓаар со ка кера леа лафи башо адава со шај те вакерел пле колегенге, амаленге хем е фамилијаке. (Читин 2. Тимотеј 3:12.) Несаве колеге шај ка асан леске адалеске со акана живинела спрема адава со вакерела и Библија. Јавера, чак паше фамилија, шај те критикујнен лескере верувања кола со темелинена пе ки Библија. Кобор порано спреминаја е интересентен те икљон ко крајо е противибаја, добором поспремна ка овен кеда ка случинел пе ленге адава.

15. Со шај те поможинел јекхе интересентеске те икљол ко крајо кеда лескири фамилија противинена пе леске?

¹⁵ Кеда тле интересенте иси ле противибе тари фамилија, поттикнин ле те размислинел башо адава соске лескири фамилија шај тани вознемирими. Ола шај мислинена кај амен ховаваја ле, или шај едноставно иси лен предрасуде спрема е Јеховаскере сведокија. Чак несаве тари е Исусескири фамилија мислинѓе кај ов делиндило (Мар. 3:21; Јован 7:5). Сикав тле интересенте те овел стрпливо хем тактично пле фамилијаја хем е јаверенцар.

16. Сар шај те поможина е интересентеске те керел лафи башо пле верувања ко тактично начин?

¹⁶ Чак ако и фамилија сикавела интерес, мудро ка овел о интересенти ма те пробинел те објаснинел ленге са таро јекх пути. Ако керела аѓаар, лескере пашутне ка осетинен пе кај адава ленге превише хем јавер пути нане те манген те керен леа лафи башо чачипе. Адалеске охрабрин тле интересенте те керел лафи башо пле верувања аѓаар со ка мукхел прилика јавер пути да те керен лафи (Кол. 4:6). На пример, шај те предложинел пле фамилијаке те пхравен и jw.org. Аѓаар ка шај коркори те дознајнен нешто повише башо е Јеховаскере сведокија.

17. Сар шај те обучине е интересенте те одговоринел некаске со шај иси ле погрешно мислење башо е Јеховаскере сведокија? (Дикх хем и слика.)

¹⁷ Шај те користине и рубрика „Најчеста пучиба“ ки jw.org те шај те поможине тле интересентеске те спреминел едноставна одговорија башо пучиба кола со и фамилија или о колеге шај те пучен ле (2. Тим. 2:24, 25). Ко крајо тари секоја лекција дикхен о дело „Несаве шај вакерена“ таро лил Ов бахтало засекогаш. Поттикнин е интересенте те вежбинел те одговоринел пле лафенцар. Слободно де ле предлогија башо адава сар пошукар те одговоринел. Аѓаар ка поможине леске уверено те бранинел пли вера.

18. Сар шај те охрабрине е интересенте те овел некрстено објавители? (Матеј 10:27).

¹⁸ О Исус поттикнинѓа пле ученикон те проповединен о шукар хабери е манушенге. (Читин Матеј 10:27.) Кобор посигате јекх интересенти ка почминел те керел е јаверенцар лафи баши пли вера, добором посигате ка овел ле доверба ко Јехова. Сар шај те поможине е интересентеске те чхивел песке асавки цел? Кеда ко собрание ка овел известимо кај иси акција проповедибаске, охрабрин тле интересенте те размислинел сар шај те исполнинел о условија те овел објавители. Објаснин леске соске буте џененге сине полокхо те проповединен кеда иси асавке акцие. Исто аѓаар, шај те охрабрине ле те исполнинел о условија те шај те овел ле говор или приказ ко состанок со икерела пе ко работно диве. Адава ка поможинел леске те сикљол пошукар те објаснинел пле верувања.

СИКАВ ДОВЕРБА КО ТЛО ИНТЕРЕСЕНТИ

19. Сар о Исус сикавѓа кај иси ле доверба ко пле ученикија хем сар шај амен да те кера адава?

¹⁹ Англедер те џал ко небо, о Исус вакерѓа пле учениконге кај јекх диве палем ка овен заедно леа. Ола на халиле кај о Исус вакерела ленге кај ка џан ко небо. Иако о ученикија на халиле са, о Исус сине сигурно кај ола мангена те керен е Јеховаскири волја (Јован 14:1-5, 8). Џанља кај ваљани ленге време те хаљон несаве буќа, сар сој и надеж ко небо (Јован 16:12). Амен да шај те сикава доверба ко интересенти кај ов мангела те угодинел е Јеховаске.

20. Сар јекх пхен таро Малави сикавѓа доверба ки пли интересентка?

²⁰ Иси амен доверба кај амаре интересентија мангена те керен адава сој тано исправно. Размислин башо пример е пхењакоро Чифундо, таро Малави. Ој почминѓа библиско курси е лилеа Ов бахтало засекогаш јекхе терне џувљаја која со викинела пе Алинафе хем сине католико. Кеда завршинѓе и лекција 14, и Чифундо пучља ла со мислинела башо користибе иконе хем кипија кеда обожавинела пе е Девле. И Алинафе вознемирими вакерѓа: „Адаја тани лично одлука“. И Чифундо мислинѓа кај и Алинафе нане више те мангел те проучинел, ама ој стрпливо понадари да проучинѓа лаја аѓаар со надинѓа пе кај сар со накхела о време ка хаљол кај адава тано погрешно. Пало некобор масекија и Чифундо пучља ла о пучибе тари лекција 34: „Сар адава со сиклиљан баши Библија хем башо чачутно Девел о Јехова, поможинѓа туке џи акана?“ И Чифундо вакерела сар одговоринѓа и Алинафе: „Ој вакерѓа бут шукар мисле ама јекх лендар сине кај о Сведокија на керена буќа со и Библија осудинела“. Кратко пало адава и Алинафе чхинавѓа те користинел иконе хем кипија хем исполнинѓа о условија крстибаске.

21. Сар шај те поможина е интересентеске те анел одлука те служинел е Јеховаске?

²¹ Иако о Јехова тано адава со „керела те бајрол“, амен да шај те поможина јекхе интересентеске те напредујнел (1. Кор. 3:7). Амен на сикаваја ле само адава со родела о Девел лестар. Амен поможинаја леске те бајрарел пло мангипе спрема о Јехова. Исто аѓаар, поттикнинаја ле те сикавел пло мангипе аѓаар со ка чхивел песке исправна приоритетија хем сикаваја ле те овел ле доверба ко Јехова кеда иси ле предизвикија. Адалеа со сикаваја кај иси амен доверба ки лесте, бајрараја лескири увереност кај ов да шај те живинел спрема е Јеховаскере мерилија хем поможинаја леске те анел одлука те почминел те служинел леске.