Дуј неве членија ко Водечко тело

КО ГОДИШНО состанок, кова со икерѓа пе ко 5 октомври 2024 берш, сине јекх посебно известување: О пхрал Џоди Џејдли хем о пхрал Џејкоб Рамф сине именујме те служинен сар членија ко Водечко тело е Јеховаскере сведоконгоро. О солдуј више бут берша верно служинена е Јеховаске.

О пхрал Џејдли тано бијамо ко Мисури (Америка) хем барило ко чачипе. Пле фамилијаја живинена сине паше ко подрачје кова со сине ретко обработимо. Аѓаар запознајнѓа буте пхрален хем пхењен таро различно потекло кола со џана сине адари те шај те проповединен о шукар хабери. Ленгоро мангипе хем јекхипе влијајнѓа бут упри лесте. Крстинѓа пе ко 15 октомври 1983 берш. Уживинела сине ки служба хем адалеске кеда завршинѓа и средно школа, ко септември 1989 берш, почминѓа е општо пионерско службаја.

Сар тикно, лескере родителија бут пути ингарена сине ле хем лескере пхења те посетинен о Бетел. Асавке посете поттикнинѓа лен панда таро тикнипе те чхивен песке цел те служинен ко Бетел — цел која со о солдуј исполнинѓе ла. О пхрал Џејдли, почминѓа те служинел ко Бетел ко Волкил септември 1990 берш. Прво керела сине бути ко Одделение чистибаске, а покасно ко Одделение баши здравствено грижа.

Ко адава време, адалеске со сине баро пораст ко собранија ки шпанско чхиб кола со сине паше сине бари потреба таро пхраља. Адалеске, о пхрал Џејдли селинѓа пе ко јекх таро адала собранија хем почминѓа те сикљол и шпанско чхиб. Кратко пало адава, запознајнѓа е пхења Дамарис, која со служинела сине сар пионери ки исто покраина. Откеда венчинѓе пе, ој да почминѓа те служинел ко Бетел леа.

Ко 2005 берш иклиле таро Бетел те шај те грижинен пе пле родителенге. Ко адава периоди, служинена сине сар општа пионерија. О пхрал Џејдли сине инструктори ки Школа башо пионерија хем служинела сине ко локално Одбор башо контакт машкар о докторија хем о пациентија сој е Јеховаскере сведокија, а исто ко Регионално одбор градибаске.

Ко 2013 берш, о пхрал хем и пхен Џејдли сине викиме палем ко Бетел те поможинен те градинел пе о Ворвик. Пало адава, служинѓе хем ко Патерсон хем ко Волкил. О пхрал Џејдли керѓа бути ко Локално оддел башо проектирибе хем градибе хем ки Служба башо медицинска информацие. Март 2023 берш, сине именујмо сар помошнико ко Одбор службаке. Поврзимо е задаченцар со сине ле ко берша со накхле, ов вакерела: „Понекогаш кеда ка добина неве задаче, шај те уклел амен дар. Ама баш тегани те на бистра кај ваљани те овел амен доверба ко Јехова адалеске со ов тано окова со керела те овел“.

О пхрал Рамф тано бијамо ки Калифорнија (Америка). Кеда сине тикно, и дај лескири сине неактивно ама трудинела пе сине те сикавел ле башо библиска чачипа. Исто аѓаар, ов секова берш џала сине ки пли баба која со верно служинела сине е Јеховаске. Ој бајрарѓа лескоро интерес башо чачипе хем кеда сине ле 13 берш, родинѓа те проучинел и Библија. Ко 27 септември 1992 берш, крстинѓа пе. Лескири дај палем ули активно хем са лескере кхерутне крстинѓе.

Кеда сине терно, о пхрал Рамф дикхела сине кобор сине радосна о пионерија. Адалеске, откеда завршинѓа и средно школа, ко септември 1995 берш, уло пионери. Ко 2000 берш, селинѓа пе ко Еквадор те шај те служинел коте со сине побари потреба. Адатхе запознајнѓа е Инга, јекх пионерка тари Канада, хем пало несаво време леле пе. Откеда женинѓе пе, служинѓе ки јекх диз ко Еквадор, коте со сине јекх тикни група објавителија. Авдиве, адари иси собрание кова со бут шукар напредујнела.

Пало несаво време, о пхрал хем и пхен Рамф сине именујме сар специјална пионерија, а покасно почминѓе хем е покраинско службаја. Ко 2011 берш, сине викиме ко 132 класи ко Гилеад. Пало дипломирибе, служинѓе ко различна тхана ко свето хем учествујнѓе ко различна врсте служба, сар сој ки бетелско, мисионерско хем покраинско служба. О пхрал Рамф, служинѓа исто аѓаар сар инструктори ки Школа башо полновремена објавителија.

Адалеске со почминѓа и пандемија КОВИД-19, о пхрал хем и пхен Рамф иранѓе пе ки Америка. Сине викиме ко Бетел ко Волкил, коте со о пхрал Рамф добинѓа обука те служинел ко Одделение баши служба. Пало несаво време, палем сине бичхалде ки подружница ко Еквадор. Адари о пхрал Рамф служинѓа ко Одбор е подружницакоро. Ко 2023 берш, селинѓе пе ко Ворвик. Ко јануари 2024 берш, о пхрал Рамф сине именујмо те служинел сар помошнико ко Одбор службаке. Кеда размислинела ко саве тхана служинѓа, ов вакерела: „Адава со јекх задача керела те овел посебно нане о тхан коте со служинеа, него о мануша касаја со соработинеа“.

Бут ценинаја хем поштујнаја асавке пхрален башо трудо со дена (Фил. 2:29).