О ТЕРНЕ ПУЧЕНА

Кобор тани важно и популарност ко социјална мреже?

Јекх тинејџерка со викинела пе Илејн вакерела: „Кеда дикхљум кај ме амала тари школа иси лен бут амала со слединена лен ко социјална мреже, мислинѓум манге кај тане бут популарна, хем искрено хари сиум сине љубоморно“.

Дали ту да некогаш осетинѓан тут аѓаар? Ако оја, акаја статија ка поможинел туке те на пере ки замка те натпреварине тут те ове популарно ко социјална мреже.

Кола тане о опасностија?

Ки Библија, ко Изреки 22:1 вакерела: „Пошукар тано те бирине шукар анав, него баро барвалипе“. Значи нане погрешно те манге те ове ко шукар анав, па чак о јавера те манген тут.

Ама, понекогаш тли желба те ове прифатимо тани добором бари, со на сиан среќно ако на сиан популарно. Дали адава шај те овел опасно? И Ања која со иси ла 16 берш, вакерела кај адава тано опасно, ој вакерела:

„Дикхљум сар несаве керена разна глупостија — сар на пример рупинена таро дујто спрати тари школа — само те шај те овен популарна“.

Те шај те привлечинен о внимание пле врсниконгоро, несаве чак сниминена о глупостија со керена хем адава чхивена ко интернет. На пример, несаве тинејџерија чхивена видеоклипија коте со сикавена сар хана капсуле тхојбаске шеја кола со иси лен отровна супстанцие — нешто со никој на ваљани те керел!

И Библија вакерела: „Ма керен ништо... тари желба те фалинен тумен“ (Филипјања 2:3; Good News Translation).

Размислин:

Кобор тани туке важно и популарност ко социјална мреже?
Дали ка ризикујне тло састипе хем тло живото те шај те привлечине о внимание тле врсниконгоро хем те ове прифатимо лендар?

Со вакерена јавера терне

„И популарност овела опасно кеда о мануша тане одлучна те керен са те шај те овен популарна. Ола мислинена кај ако керена лафи, уравена пе или понашинена пе ко одредено начин — чак ако адава тано само ко социјална мреже — ка овен популарна. Нане те осетине тут шукар ако кереа нешто сој спротивно таро тле верувања те шај те ове популарно“ (Лиена).

„Ховавни популарност“

Сепак, о мануша на керена секогаш опасна буќа те шај те овен популарна. И Ерика, која со иси ла 22 берш, вакерела кај несаве мануша користинена јавер тактика:

„О мануша чхивена бут слике таро пумаро живото те шај те дикхен о јавера кај иси лен бут паше амала коленцар со накхена бут време. Аѓаар керена песке ховавни популарност“.

И Кера, која со иси ла 15 берш, вакерела кај несаве мануша ховавена ко социјална мреже те шај те сикавен кај тане популарна:

„Дикхљум кај несаве сликинена пе сар те пхене тане ки забава, а уствари тане кхере“.

О Матеј, коле со иси ле 22 берш, признајнела кај керѓа нешто асавко:

„Чхивѓум слика хем сар локација означинѓум Монт Еверест, иако никогаш на сиум сине ки Азија!“

И Библија вакерела: „Мангаја ко са о буќа те ова чесна“ (Евреија 13:18).

Размислин:

Ако користинеа социјална мреже, дали некогаш чхивѓан нешто со нане чаче само те ове попопуларно?
Дали таро слике хем таро коментарија со чхивеа лен дикхјола пе кој чаче сиан ту хем сој туке важно?

Со вакерена јавера терне

„Несаве мануша шај те керен са, само те добинен повише лајкија. Ама, дали мангеа те ове пенџардо сар некој со керела лафи хем уравела пе непристојно хем сар некој со фалинела пе адалеа со иси ле? Или сар некој со иси ле шукар особине хем искрено грижинела пе е јаверенге? Шукар тано те џане кај сиан мангло таро јавера ама дикх адава те овел нешто колеа со ка дичине тут“ (Хана).

Кобор тано важно кобор мануша слединена амен хем кобор лајкија иси амен?

Бут мануша мислинена кај, те шај те овен популарна ко интернет, мора те овел лен бут мануша со слединена лен хем бут лајкија. О Матеј, со сине спомнимо англедер, признајнела кај ов да мислинела сине аѓаар. Ов вакерела:

„Стално пучава сине е јеверен кобор мануша слединена лен хем кова сине о најбаро број лајкија со добинѓе. Те шај повише мануша те слединен ма, слединава сине манушен колен со воопшто на пенџарава хем очекујнава сине ола да те слединен ман. Уљум алчно баши популарност, а о социјална мреже само повише бајрарена сине адава ки манде“.

Слике: 1. Јекх тинејџерка дикхела кобор лајкија добинѓа хем асала. 2. Јекх чхај хала тари јекх чинија пхерди гудло. 3. И исто чхај астарела пе ко воги хем тани тажно. — И популарност ко социјална мреже тани сар гудло — уживинеа џикоте хаја, ама после перела туке мука

И Марија, која со иси ла 25 берш, приметинела кај несаве мануша мислинена кај ола врединена спрема адава кобор мануша слединена лен хем кобор лајкија иси лен. Ој вакерела:

„Ако несаве чхаја на добинена доволно лајкија башо пумаро селфи, тегани мислинена песке кај тане груба. Џанѓола пе, адава тано погрешно размислибе, ама бут џене реагиринена ко исто начин. Уствари, ола адалеа малтретиринена коркори пес“.

И Библија вакерела: „Те на ова чалмџие, ма те натпреварина амен јекх јекхеа, те на завидина јекх јекхеске“ (Галатјања 5:26).

Размислин:

Ако користинеа социјална мреже, дали приметинеа кај адава поттикнинела тут те споредине тут е јаверенцар?
Дали туке поважно те овен тут повише мануша со ка слединен тут ко социјална мреже, него те кере туке чачутне амала кола со мангена тут?

Со вакерена јавера терне

„Те шај те ове популарно ко социјална мреже мора те ове некој каске со о јавера воодушевинена пе, а адава обично значинела те ове сар ленде. Акава шај те чхивел тут превише те ове концентриримо ко адава сар о јавера дикхена ки туте хем со те кере те шај панда повише те манген тут. Нормално тано те манге о јавера те манген тут, ама и желба те ове популарно шај те керел те ове опседнимо адалеа“ (Џошуа).

Аракх тут тари ховавни скромност

Дали приметинѓан кај несаве мануша кобајаги жалинена пе, ама уствари мангена те фрден чалми адалеа со иси лен?

„Откеда кинѓум манге нево врда, о мануша нон-стоп мангена те возинав лен!“
„Бут нервиринела ман адава со сарине фалинена ман со успејнѓум те слабонав!“

Акала тане примерија баши ховавни скромност — кеда некој жалинела пе, а уствари фрдела чалми.

Предупредување: Кеда некој фалинела пе аѓаар, обично адава нервиринела е јаверен соске џанена која тани ленгири намера. Акава повише нервиринела е манушен него кеда некој отворено фалинела пе.

Јавер пути кеда ка чхиве несави слика или коментари ко социјална мреже, пазин ма те мукхе впечаток кај иси тут ховавни скромност. Шун о мудро совет тари Библија: „Јавер нека фалинел тут, а на тло муј“ (Изреки 27:2).