2023: Берш кова со керѓа бут мануша те секиринен пе — Со вакерела и Библија?

Ко 2023 берш, случинѓе пе бут буќа кола со јасно сикавена кај живинаја ко периоди кова со и Библија вакерела баши лесте кај тано „последна диве“ (2. Тимотеј 3:1). Те дикха сар о буќа со случинена пе околу аменде тане о иста адала буќа сој тане пророкујме ки Библија башо амаро време.

И Библија хем адава со случинела пе ко свето

„Ка шунен башо војне ко разна тхана“ (Матеј 24:6).

• „Ко повише делија ко свето иси са повише војне.“a

„Ка овен земјотресија ко разна тхана“ (Марко 13:8).

• „Таро почеток таро 2023 берш, ко свето сине 13 земјотресија кола со сине посилна таро ефта степенија, адава тано о најбаро број сар почминѓа те водинел пе евиденција.“b

„Адава со ка дикхен о мануша ка даравел лен“ (Лука 21:11).

• „Завршинѓа о време кеда о температуре сине бут баре, акана и ситуација тани полошно соске о температуре тане панда побаре“ (Антонио Гутереш, генерално секретари таро ОН).c

„Ка овел бокхалипе“ (Матеј 24:7).

• „2023: Панда јекх берш коте со на џанѓола пе сар о фамилие ка боринен пе е бокхалипаја.“d

„Ка овел бут пхаро време“ (2. Тимотеј 3:1).

• „Секова офтото мануш ко свето иси ле проблеми е емоционално састипаја.“e

Со шај те очекујна ко 2024 берш?

Никој на џанела со точно ка овел ко 2024 берш. Ама, адава со овела ко свето сикавела кај панда хари ка авел е Девлескоро Царство, јекх влада ко небо, хем ка цидел са о манушикане владе хем ка анел крајо башо муке хем секирацие (Даниел 2:44; Откровение 21:4).

А џи тегани, кеда ка ова секириме, шај те рода помош таро Девел. Ки Библија пишинела:

„Кеда дарава, ки туте иси ман доверба!“ (Псалм 56:3).

Сар шај те сикава кај иси амен доверба ко Девел? Поттикнинаја тут те дознајне повише башо адава кај о Девел ветинела јекх пошукар иднина бизо секирацие. Роде те овел тут бесплатно библиско курси те шај те дикхе сар адава со ветинела и Библија шај те користинел туке хем тле фамилијаке.