Дали о пророштвија башо Месија докажинена кај о Исус сине о Месија?

Со вакерела и Библија:

Оја. Џикоте сине ки Пхув, о Исус исполнинѓа бут пророштвија башо „Месијанско водачи“, окова со ка спасинел о свето (Даниел 9:25; 1. Јованово 4:14). Чак пало пло мерибе, о Исус понадари да исполнинела сине о пророштвија башо Месија (Псалм 110:1; Дела 2:34-36).

Со значинела о лафи „Месија“?

О хебрејско лафи со превединела пе сар Месија хем о грчко лафи со превединела пе сар Христос, значинена „помазанико“. Спрема адава, „Исус Христос“ значинела „о Исус, о помазанико“ или „о Исус, о Месија“.

Ко пурано време, окола со добинена сине посебно положба, бут пути сине помазиме аѓаар со ко шеро чхорела пе сине ленге масло (3. Мојсеева 8:12; 1. Самоилова 16:13). О Исус сине помазимо таро Девел те овел о Месија хем адалеа сине леске дендо баро авторитети (Дела 2:36). Ама, о Девел на помазинѓа ле маслоја, него свети духоја (Матеј 3:16).

Дали шај повише мануша те исполнинен о пророштвија башо Месија?

На. О библиска пророштвија сикавена кај иси само јекх Месија или Христос. Сепак, и Библија предупрединела амен кај ка појавинен пе бут мануша со ка ховавен кај тане о Христос или ка вакерен кај тане пророкија хем ка керен баре чудија коленцар со ка манген те ховавен буте манушен, па чак е биримен (Матеј 24:24).

Дали о Месија ка појавинел пе ки иднина?

На. И Библија пророкујнѓа кај о Месија ка авел таро е Давидескоро потомство (Псалм 89:3, 4). Ама, о еврејска извештаија баши е Давидескири фамилијарно лоза нашавдиле, веројатно кеда о Римјања освојнѓе о Ерусалим ко 70 берш а.е.a Таро адава време, никој нашти сине те докажинел кај тано тари е Давидескири царско лоза. Ама, ко е Исусескоро време постојнена сине адала извештаија хем чак лескере душмања џанена сине кај ов тано е Давидескоро потомцо (Матеј 22:41-46).

Кобор пророштвија башо Месија иси ки Библија?

Нашти точно те вакерел пе кобор пророштвија иси башо Месија. На пример, о начин сар гејнена пе о пророштвија шај те овел различно, чак кеда тано јасно кај несаве стихија тане башо Месија. Ко извештај таро Исаија 53:2-7 тане спомниме некобор деталија башо Месија. Некој шај дикхела цело извештај сар јекх пророштво, а јавера секова детали сар посебно пророштво.

Несаве пророштвија башо Месија со исполнинѓе пе упро Исус

Пророштво	Аракхљола ко	Исполнибе
Е Авраамескоро потомство	1. Мојсеева 22:17, 18	Матеј 1:1
Потомцо таро е Авраамескоро чхаво о Исак	1. Мојсеева 17:19	Матеј 1:2
Бијамо ко Израелско племе Јуда	1. Мојсеева 49:10	Матеј 1:1, 3
Авела тари е Давидескири царско лоза	Исаија 9:7	Матеј 1:1
Бијанѓа ле чхај	Исаија 7:14	Матеј 1:18, 22, 23
Бијамо ко Витлеем	Михеј 5:2	Матеј 2:1, 5, 6
Добинѓа о анав Емануелb	Исаија 7:14	Матеј 1:21-23
Скромно почеток	Исаија 53:2	Лука 2:7
Тикне чхаве сине мударде откеда бијандило	Еремија 31:15	Матеј 2:16-18
Викимо таро Египет	Осија 11:1	Матеј 2:13-15
Викимо Назареќанцоc	Исаија 11:1	Матеј 2:23
Англедер лесте ало гласнико	Малахија 3:1	Матеј 11:7-10
Помазимо сар Месија ко 29 берш а.е.d	Даниел 9:25	Матеј 3:13-17
О Девел признајнѓа ле сар пло Чхаво	Псалм 2:7	Дела 13:33, 34
Ревно башо е Девлескоро кхер	Псалм 69:9	Јован 2:13-17
Објавинѓа о шукар хабери	Исаија 61:1	Лука 4:16-21
Лескири служба анѓа бари светлина ки Галилеја	Исаија 9:1, 2	Матеј 4:13-16
Керѓа чудија исто сар о Мојсеј	5. Мојсеева 18:15	Дела 2:22
Исто сар о Мојсеј, ов вакерела сине е Девлескере мисле	5. Мојсеева 18:18, 19	Јован 12:49
Сасљарѓа буте манушен	Исаија 53:4	Матеј 8:16, 17
На привлечинела сине о внимание ки песте	Исаија 42:2	Матеј 12:17, 19
Сикавела сине сочувство околенге со сине мучиме	Исаија 42:3	Матеј 12:9-20; Марко 6:34
Сикавела сине е Девлескири правда	Исаија 42:1, 4	Матеј 12:17-20
Дела сине бут шукар советија	Исаија 9:6, 7	Јован 6:68
Објавинѓа е Јеховаскоро анав	Псалм 22:22	Јован 17:6
Керела сине лафи споредбенцар	Псалм 78:2	Матеј 13:34, 35
Водачи	Даниел 9:25	Матеј 23:10
Бут џене на верујнѓе ки лесте	Исаија 53:1	Јован 12:37, 38
Аголно бар	Исаија 8:14, 15	Матеј 21:42-44
Отфрлимо таро мануша	Псалм 118:22, 23	Дела 4:10, 11
Мрзимо бизи причина	Псалм 69:4	Јован 15:24, 25
Кхувѓа ко Ерусалим бешиндор упро хер	Захарија 9:9	Матеј 21:4-9
Фалинена ле сине о чхаве	Псалм 8:2	Матеј 21:15, 16
Ало ко е Јеховаскоро анав	Псалм 118:26	Јован 12:12, 13
Издајнѓа ле лескоро паше амал	Псалм 41:9	Јован 13:18
Издајмо башо 30 сребреникијаe	Захарија 11:12, 13	Матеј 26:14-16; 27:3-10
Мукхле ле о амала	Захарија 13:7	Матеј 26:31, 56
Ховавне сведокија сведочинѓе против лесте	Псалм 35:11	Матеј 26:59-61
Чутинѓа англо адала со кривинена ле сине	Исаија 53:7	Матеј 27:12-14
Чхунгарѓе ле	Исаија 50:6	Матеј 26:67; 27:27, 30
Кхувѓе ле ко шеро	Михеј 5:1	Марко 15:19
Сине камшикујмо	Исаија 50:6	Јован 19:1
На спротивставинѓа пе околенге со марѓе ле	Исаија 50:6	Јован 18:22, 23
О владетелија кхединѓе пе против лесте	Псалм 2:2	Лука 23:10-12
Лескере васта хем пре сине ковиме ко стубо	Псалм 22:16	Матеј 27:35; Јован 20:25
Фрдинѓе ждрепка лескере шеенѓе	Псалм 22:18	Јован 19:23, 24
Дикхле ле сар грешнико	Исаија 53:12	Матеј 27:38
Понижимо хем вреџимо	Псалм 22:7, 8	Матеј 27:39-43
Цидинѓа муке башо е јаверенгере гревија	Исаија 53:5, 6	1. Петрово 2:23-25
Дикхјола сине сар те пхене мукхља ле о Девел	Псалм 22:1	Марко 15:34
Денѓе ле те пиел мол мешими жолчкаја	Псалм 69:21	Матеј 27:34
Сине жедно англедер те мерел	Псалм 22:15	Јован 19:28, 29
Предајнѓа пло духо е Девлеске	Псалм 31:5	Лука 23:46
Денѓа пло живото	Исаија 53:12	Марко 15:37
Денѓа откупнина која со ка цидел о грево	Исаија 53:12	Матеј 20:28
Нијекх кокало на сине лестар пхаго	Псалм 34:20	Јован 19:31-33, 36
Сине посавдо	Захарија 12:10	Јован 19:33-35, 37
Сине парумо машкар о барвале	Исаија 53:9	Матеј 27:57-60
Сине воскреснимо	Псалм 16:10	Дела 2:29-31
Адава со издајнѓа ле сине заменимо	Псалм 109:8	Дела 1:15-20
Бешља тари е Девлескири десно страна	Псалм 110:1	Дела 2:34-36

a Ки јекх енциклопедија пишинела: „Најверојатно о извештаија башо еврејска племија хем фамилие сине уништиме кеда сине уништимо о Ерусалим, а на англедер“ (McClintock and Strong’s Cyclopedia).

b О хебрејско анав Емануел значинела „о Девел тано аменцар“ хем акава шукар опишинела е Исусескири улога сар Месија. Адава со ов сине ки Пхув хем о буќа со керѓа лен сикавена кај о Девел тано пле слугенцар (Лука 2:27-32; 7:12-16).

c О израз „Назареќанцо“ авела најверојатно таро хебрејско лафи нецер, кова со значинела „фиданка“ или „потомцо“.

d Ако мангеа те џане сар и библиско хронологија сикавела кај о Месија појавинѓа пе ко 29 берш а.е., дикх ки фуснота 13, таро лил Со сикавела амен и Библија?

e Акава пророштво аракхљола ко лил Захарија, ама о библиско писатели о Матеј вакерела кај сине вакердо таро о пророко о Еремија (Матеј 27:9). Ко лескоро време, о лил Еремија понекогаш чхивела пе сине ко почеток таро дело „О пророкија“ ко Света списија (Лука 24:44). Кеда о Матеј вакерѓа „Еремија“, веројатно мислинѓа ко повише лила коте сој вклучимо хем о лил Захарија.