СОВЕТИЈА БАШО ФАМИЛИЕ
Сар те сикавел пе мангипе ко брако?
Сар со накхена о берша, несаве брачна парија са похари сикавена мангипе јекх јекхеске. Ако акава овела ко тумаро брако да, ваљани ли те секиринен тумен башо адава?
Со ваљани те џане
О мангипе тано потребно те шај о брако те овел зорало. Сар амен со нашти те ова састе хем зорале бизо храна хем пани, аѓаар нашти ни о брако те ачхол зорало хем стабилно ако о ром хем и ромни на сикавена мангипе машкар песте. Чак пало бут берша брако, о ром хем и ромни ваљани секова диве те уверинен јекх јекхе кај мангена пе хем грижинена пе јекх јекхеске.
О чачутно мангипе нане себично. Некој со чаче мангела, тегани ов керела са те шај о јавер те овел бахтало. Ако о брачна партнерија тане обѕирна, нане те сикавен песке мангипе само кеда иси лен потреба таро адава. Наместо адава, ола лена ко предвид о потребе пумаре брачна партнеренгере хем трудинена пе те задоволинен ленгере потребе.
Е ромњенге обично ваљани те сикавел пе повише внимание него е роменге. Јекх ром шај те мангел искрено пле ромња. Ама ако адава сикавела ле само ко почеток таро диве хем ко крајо, или само англедер те овел лен односија, тегани и ромни шај те осетинел кај нане чаче мангли. Бут пошукар тано кеда о ром секова диве користинела секоја прилика те вакерел лаке кај мангела ла.
Со шај те кере
Сикав мангипе лафенцар. Едноставна лафија сар сој „мангава тут“ или „бут значинеа манге“ ка уверинел тле брачно партнере кај тано мангло.
Библиско начело: „О муј вакерела адава солеа тано пхердо о вило“ (Матеј 12:34).
Совет: Адава со осетинеа шај те вакере ле ко јавера да начинија. На пример, шај те пишине јекх кратко писмо, имејл или порака.
Сикав мангипе постапкенцар. Јекх гушибе, јекх чумибе или само астарибе таро вас сикавела кај о лафија „мангава тут“ тане искрена. Исто аѓаар, искрено те грижине тут шај те сикавел пе нежно галибаја или дикхибаја, а понекогаш хем поклоненцар. О ром шај те керел несаве практична буќа пле ромњаке —сар сој те пхиравел лаке о пхаре ќесе, те пхравел лаке о удар, те тховел лаке чаре, те чхивел о шеја ки машина тхојбаскири или те керел хајбаске. Буте ромњенге адава нане само практично помош, него адалеа сикавела пе мангипе!
Библиско начело: „Те на манга амен само лафенцар или само чхибјаја, него постапкенцар“ (1. Јованово 3:18).
Совет: Понашин тут тле брачно партнереа сар кеда сиен сине ки врска.
Одвојнен време јекх јекхеске. Кеда одвојнеа време те ове коркори тле брачно партнереа, ту сикавеа леске кај мангеа ле хем кај мангеа те ове узи лесте, а аѓаар кереа позорало о брако. Точно, адава шај те овел пхаро кеда иси тут чхаве или бут обврске со ваљани те завршине лен. Ама, шај те керен нешто едноставно, на пример редовно те пхирен туменге заедно.
Библиско начело: „Те проценинен сој тано најважно“ (Филипјаните 1:10).
Совет: Несаве брачна парија со керена бут бути хем иси лен бут обврске редовно одвојнена време те џан ко вечере или икљона викендија те шај те овен заедно.
Пенџар шукар тле брачно партнере. Секова мануш тано посебно хем иси ле потреба ко различна начинија те сикавел пе леске мангипе. Адалеске кер лафи тле брачно партнереа башо адава сар мангела те сикаве леске мангипе хем дали ваљани панда повише те кере адава. Пало адава де тутар са те кере адава со родела тутар тло брачно партнери. Ма бистре кај о мангипе тано бут потребно те шај о брако те овел зорало.
Библиско начело: „О мангипе... на родела пли корист“ (1. Коринќаните 13:4, 5).
Совет: Наместо те аџикере само тло брачно партнери те сикавел туке побаро мангипе, пуч тут: „Со шај те керав те шај панда повише те мангел ман?“