„Ништо нашти те чхинавел е Јехова“

Таро пумаро стражарско тхан кова со сине ко јекх пусто хем карпесто тхан, о филистејска војникија дикхле нешто со леља ленгоро внимание — дуј Израелција терѓовена сине карши ленде, тари јавер страна тари клисура. Само со дикхле лен, о Филистејција почминѓе те асан ленге. Ола ки ленде на дикхена сине сар опасност. Уствари, о Филистејција бершенцар сине лен моќ упро Израелција. Ола мора сине те џан ко пле душмања те шај те оштринен несаве таро пле метална алатија, адалеске со ки цели пхув на сине лен нијекх ковачи. Адава значинела кај и израелско војска на сине ла скоро нисаво оружје. Освен адава, англо филистејска стражарија терѓона сине само дуј мурша! Чак те овен лен сине бут оружје пеа, со шај сине те керен ленге? Асандор, о Филистејција викинѓе: „Авен упре ки аменде те вакера туменге нешто!“ (1. Самоилова 13:19-23; 14:11, 12).

Уствари, о филистејска војникија мангле те анен лен ки годи, ама о буќа иклиле јавер чхане. О дуј Израелција сигате хулиле тари клисура, накхавѓе ла хем цидинѓе наупре преку о карпе тари јавер страна. Добором сине стрмно со мора сине хем вастенцар хем пренцар те уклен, ама на мукхле адава те чхинавел лен. Уклена сине преку о карпе право ко стражарско тхан! (1. Самоилова 14:13). Кеда ресле попаше, о Филистејција шај сине те дикхен кај о мануш со џала сине прво сине ле пеа оружје, а пали лесте сине лескоро слуга со пхиравела сине лескоро копје хем штити. Ама, шај ли сине акала дуј мануша те џан против добором бари војска? Дали акава мануш сине делино?

На, на сине делино. Адава мануш сине о Јонатан, кова со сине ле бари вера. О чачутне христијања шај бут те сикљон лестар. Иако авдиве на боринаја амен ки дословно војна, таро Јонатан шај те сикљова важна поуке баши храброст, верност хем те на ова себична, особине кола со ваљанена аменге те шај те развина чачутни вера (Исаија 2:4; Матеј 26:51, 52).

Верно чхаво хем храбро војнико

Те шај те хаљова соске о Јонатан нападинѓа акава стражарско тхан, шукар тано те џана нешто повише баши лесте. О Јонатан сине о најбаро чхаво е Саулескоро, о прво цари ко Израел. Кеда о Саул сине помазимо башо цари, о Јонатан веројатно сине ле околу 20 берш. Шај сине бут паше пле дадеа, кова со бут пути вакерела леске сине несаве доверлива буќа. Кеда почминѓа те владинел, о Саул сине учо, шужо хем храбро мануш. Ама, о Јонатан џанља кај лескере даде иси ле панда дуј шуже особине — понизност хем силно вера. Адалеске сине леске јасно соске о Јехова биринѓа ле те овел цари. Чак о пророко, о Самоил, вакерѓа кај ки цели пхув нане мануш сар о Саул (1. Самоилова 9:1, 2, 21; 10:20-24; 20:2).

Е Јонатанеске сигурно сине чест те боринел пе против о душмања е Јеховаскере народоскере аѓаар сар со заповединела сине лескоро дад. Адала војне на сине сар о авдисутне војне коленде о мануша боринена пе баши пумари пхув. Ко адава време, о Израелција сине е Јеховаскоро народо, хем адалеске стално сине нападимо таро околна народија кола со обожавинена сине ховавне девлен. О Филистејција, кола со обожавинена сине ховавне девлен сар со сине о Дагон, угнетинена сине е Јеховаскере бириме народо хем чак мангена сине те уништинен ле.

Адалеа со учествујнела сине о Јонатан ко војне против е Девлескере душмања, ов уствари сикавела сине кај тано верно хем послушно е Јеховаске. О Девел наградинела ле сине башо адава. Сигате откеда уло цари, о Саул чхивѓа пле чхаве те управинел 1.000 војниконцар. О Јонатан водинела сине акале војска ки војна против о Филистејција ки Гева. Иако лескере манушен на сине лен бут оружје, адава диве о Јонатан побединѓа ки војна адалеа со о Јехова поможинѓа леске. Ама, о Филистејција мангле те иранен ленге, адалеске кхединѓе бари војска. О војникија со сине е Саулеа тресинена сине тари дар. Несаве лендар нашле хем гаравѓе пе, а сине хем несаве со геле тари страна е душманенгири! Ама, о Јонатан сине добором храбро со ни на мислинѓа те откажинел пе (1. Самоилова 13:2-7; 14:21).

Сар со сине пхендо ко почеток, ов одлучинѓа гаравиндор те икљол таро логор заедно пле слугаја. Џикоте џала сине попаше ко филистејско стражарско тхан ко Михмаш, о Јонатан вакерѓа пле слугаске пло плани. Вакерѓа леске кај ола ка појавинен пе те шај о филистејска војникија те дикхен лен, хем ако ола викинена лен те џан ки ленде, адава ка овел ленге знако кај о Јехова ка поможинел ленге. О слуга лескоро спремно согласинѓа пе леа. Веројатно сине охрабримо таро силна лафија е Јонатанескере: „Ништо нашти те чхинавел е Јехова те спасинел, било буте манушенцар било хари манушенцар“ (1. Самоилова 14:6-10). Со мангља те вакерел адалеа?

Сигурно о Јонатан пенџарела сине бут шукар пле Девле. Џанела сине кај ко пурано време о Јехова поможинела сине пле народоске те побединел е душманен кола со сине лен бут побаре војске. Некобор пути анѓа победа е Израелцонге преку само јекх мануш (Судиите 3:31; 4:1-23; 16:23-30). Адава керѓа е Јонатанеске те овел јасно кај и победа на зависинела таро адава кобор џене тане, кобор тане силна или дали е Девлескере народо иси ле оружје, него зависинела тари ленгири вера. Адалеске со сине ле вера, о Јонатан мукхља о Јехова те одлучинел дали ов хем лескоро слуга ка нападинен е Филистејцон. Родинѓа таро Јехова те дел ле знако колеа ка сикавел леске кај тано ленцар. Кеда добинѓа адава знако, о Јонатан храбро цидинѓа ко напад.

Те дикха дуј буќа баши вера е Јонатанескири. Прво, ле сине ле дар хем поштовање спрема пло Девел, о Јехова. Џанља кај, иако шај те исполнинел пли намера бизо те користинел манушен, о Семоќно Девел бут мангела те користинел хем те наградинел адален со верно служинена леске (2. Летописи 16:9). Дујто, англедер те керел нешто, о Јонатан родинѓа таро Јехова те дел леске знако кај поддржинела ле. Авдиве амен на родаја чудија таро Девел те шај те потврдинел аменге кај тано задоволно таро адава со кераја. Амен иси амен цели Библија, со значинела кај иси амен са со ваљанела аменге те шај те хаљова е Девлескири волја (2. Тимотеј 3:16, 17). Дали внимателно родаја советија тари Библија англедер те ана несаве важна одлуке? Ако кераја адава, сикаваја кај е Девлескири волја тани аменге поважно тари амари — исто сар со сине е Јонатанеске.

Ама, те ирана амен ки парамис. О Јонатан хем лескоро слуга почминѓе сигате те уклен ки стрмно планина. Кеда е Филистејцонге сине јасно кај тане нападиме, бичхалѓе манушен против адала дуј Израелција. Е Филистејцон сине лен предност — ола сине повише хем сине ко поучо тхан. Дикхјола сине кај локхесте ка икљон ко крајо акале дује манушенцар. Ама, о Јонатан почминѓа те перавел е филистејска војникон јекх по јекх, а лескоро слуга кова со џала сине пали лесте мударела лен сине. Башо хари време, акала дуј мануша мударѓе 20 војникон! Ама, о Јехова керѓа хем нешто јавер. Ки Библија пишинела: „Тегани ко логори ко поле хем машкар о стражарија ули бари дар, чак о војникија да тресинена сине тари дар. И пхув почминѓа те тресинел, хем о Девел керѓа те овел дар машкар о Филистејција“ (1. Самоилова 14:15).

О Саул хем лескере мануша дуралдан дикхена сине сар ко логор е душманенгоро овела паника хем хаос — о филистејска војникија почминѓе чак те мударен пе јекх јекхеа! (1. Самоилова 14:16, 20). О Израелција охрабринѓе пе хем цидинѓе ко напад, изгледа ола леле о оружје таро мударде Филистејција. Адава диве о Јехова денѓа бари победа пле народоске. Авдиве да о Девел на менинѓа пе. Ако амен да сикаваја силно вера ки лесте, исто сар о Јонатан хем лескоро слуга, никогаш нане те жалина башо адава (Малахија 3:16; Римјаните 10:11).

„Е Девлеа керѓа акава авдиве“

Акаја сине славно победа е Јонатанеске, а на е Саулеске. Ов керѓа несаве сериозна грешке. Денѓа жртва која со ваљани сине де дел ла о пророко о Самоил, кова со сине левити, хем адалеа о Саул сикавѓа кај нане послушно. Кеда ресља о Самоил, вакерѓа леске кај о Јехова ка лел лестар о царство соске на шунѓа ле. Освен адава, кеда бичхалѓа пле манушен ки борба, о Саул постапинѓа неразумно аѓаар со чхивѓа лен ки заклетва: „Проклето те овел окова со ка хал нешто англедер и рат, џикоте на иранава ме душманенге!“ (1. Самоилова 13:10-14; 14:24).

Акала лафија е Саулескере сикавена кај ов почминѓа те менинел пе — ко полошно. Дали акава мануш, кова ко почеток сине понизно хем сине ле бари вера, мукхља те водинел ле и желба те овел славно хем и гордост? О Јехова никогаш на би чхивела сине асавке неразумна ограничувања акале храбра хем самопожртвувана војниконге. А со дикхаја башо Саул таро лескере лафија „џикоте на иранава ме душманенге?“ Дали адалеа мангља те вакерел кај адаја тани лескири војна? Дали бистерѓа кај најважно сине е Јеховаскири правда, а на лескири желба те иранел пле душманенге, те овел славно хем те побединел?

О Јонатан на џанља баши заклетва пле дадескири. Уморно тари пхари борба, чхивѓа о каш ко јекх саќе авгинеа хем, кеда хаља хари, одма иранѓа пе лескири сила. Тегани јекх таро лескере мануша вакерѓе леске баши заклетва со денѓа ла лескоро дад. О Јонатан вакерѓа: „Мо дад анѓа бари неволја ки пхув. Дикхен сар светинѓе ме јакхја адалеске со хаљум хари авгин. Кобор пошукар ка овел сине кеда о народо авдиве би хала сине таро адава со леле таро пле душмања! Тегани ка мудара сине бут повише Филистејција“ (1. Самоилова 14:25-30). Хем сине ко право. О Јонатан сине верно. Ама ов на согласинела пе сине бизо те размислинел башо са со ка керел или со ка вакерел лескоро дад, хем адалеске со сине ле урамнотежено стави, о јавера поштујнена ле сине.

Чак кеда шунѓа кај о Јонатан пхагља лескири заповед, о Саул на мангља те признајнел кај лескири забрана на сине ла нисави смисла. Наместо адава, ов мислинѓа кај лескоро чхаво заслужинела те мерел! О Јонатан на акошља пе хем на родинѓа те сикавел пе леске милост. Ов пхенѓа: „Аке сиум! Спремно сиум те мерав!“ Ама, о Израелција бунинѓе пе: „Зарем те мерел о Јонатан, кова со анѓа акаја бари победа е Израелеске? Нашти те овел адава! Сар сој џивдо о Јехова, ни јекх бал таро лескоро шеро нане те перел ки пхув, соске е Девлеа керѓа акава авдиве!“ Со уло ко крајо? О Саул конечно попуштинѓа. О извештај вакерела: „Аѓаар о народо спасинѓа е Јонатане, па на муло“ (1. Самоилова 14:43-45).

О Јонатан керѓа песке шукар анав адалеа со сине храбро, бут буќарно хем на сине себично. Кеда сине ки опасност, о углед со сине ле ко народо спасинѓа лескоро живото. Шукар тано секој амендар те размислинел саво анав керела песке таро диве ко диве. И Библија вакерела кај о шукар анав тано скапоцено (Проповедник 7:1). Ако амен, исто сар о Јонатан, трудинаја амен те кера аменге шукар анав ко Јехова, адава бут ка врединел аменге.

О Саул овела са полошно

Иако керѓа о Саул бут грешке, о Јонатан понадари да верно боринела пе сине тари лескири страна. Шај те замислина аменге кобор сине леске пхаро џикоте дикхела сине сар лескоро дад овела непослушно хем гордо. О Саул овела сине са полошно, а о Јонатан нашти сине ништо те керел.

И ситуација ули панда полошно кеда о Јехова вакерѓа е Саулеске те џал ки војна против о Амаличанија. Адава народо сине бут лошно, хем панда таро време е Мојсеескоро, о Јехова пророкујнѓа кај ола ка овен целосно уништиме (2. Мојсеева 17:14). О Саул добинѓа заповед те мударел цели ленгири стока хем ленгере царе, е Агаге. О Израелција побединѓе, а о Јонатан, сар стално, боринѓа пе храбро аѓаар сар со заповединѓа лескоро дад. Ама, о Саул бизи лаџ противинѓа пе е Јеховаске хем на мударѓа е Агаге хем леља песке и најшукар стока. О пророко о Самоил вакерѓа и конечно осуда е Девлескири против о Саул: „Адалеске со на шунѓан е Јеховаскере лафија, ов отфрлинѓа тут те на ове више цари“ (1. Самоилова 15:2, 3, 9, 10, 23).

Кратко пало адава, о Јехова цидинѓа пло свети дух таро Саул. Бизо е Јеховаскоро мангипе хем поддршка, е Саулескоро расположение почминѓа те менинел пе, те овел насилно хем те овел ле бари дар. Целосно нашавѓа пло андруно мир (1. Самоилова 16:14; 18:10-12). Е Јонатанеске сигурно сине бут пхаро кеда дикхела сине кобор менинѓа пе лескоро дад, кова со некогаш сине шукар хем благодарно мануш! Ама, сепак о Јонатан понадари да верно служинела сине е Јеховаске. Ов поддржинела сине пле даде кобор со шај, па чак некобор пути искрено керѓа леа лафи. Сепак, ко прво тхан ко живото сине леске лескоро Девел хем Дад, о Јехова, кова со никогаш на менинела пе (1. Самоилова 19:4, 5).

Дали некогаш дикхљан сар некој со бут мангеа ле — на пример несаво паше члени тари фамилија — таро јекх пути менинела пе ко полошно? Адава шај те анел бари дукх. О пример е Јонатанескоро сетинкерела амен ко адава со покасно пишинѓа о псалмисти: „Чак те мукхел ман мо дад хем ми дај, о Јехова ка прифатинел ман“ (Псалм 27:10). О Јехова тано верно. Ов ка прифатинел туте да хем ка овел тло најшукар Дад со постојнела, бизи разлика кобор ка разочаринен тут хем ка поврединен тут о несовршена мануша.

О Јонатан веројатно џанела сине кај е Јехова иси ле намера те лел о царство таро Саул. Сар реагиринѓа? Дали шај мислинѓа песке саво цари би овела ов? Дали надинела пе сине кај ка овел ле прилика те испрајнел са о лошнипа со керѓа лескоро дад, хем кај ка мукхел шукар пример сар верно хем послушно цари? На џанаја сар размислинѓа. Џанаја само кај, те овел ле да сине асавки надеж, адава никогаш на исполнинѓа пе. Дали адава значинела кај о Јехова мукхља акале верно мануше? На. Ки Библија, о Јехова истакнинѓа е Јонатане сар јекх таро најбаре примерија башо адава со значинела те овел пе верно амал. Башо акава ка керел пе лафи ки несави јавер статија.