Матеј
1 Акава тано о лил башо живото* е Исус Христосескоро,* о чхаво е Давидескоро, о чхаво е Авраамескоро:
2 е Авраамеске бијандило о Исак,
е Исакоске бијандило о Јаков,
е Јаковеске бијандиле о Јуда хем лескере пхраља,
3 е Јудаске и Тамара бијанѓа е Фаресе хем е Зара,
е Фаресеске бијандило о Есрон,
е Есронеске бијандило о Арам,
4 е Арамеске бијандило о Аминадав,
е Аминадавеске бијандило о Насон,
е Насонеске бијандило о Салмон,
5 е Салмонеске и Раав бијанѓа е Воозе,
е Воозеске и Рут бијанѓа е Овиде,
е Овидеске бијандило о Јесеј,
6 е Јесееске бијандило о цари о Давид.
Е Давидеске и ромни која со англедер сине е Уријаскири бијанѓа е Соломоне,
7 е Соломонеске бијандило о Ровоам,
е Ровоамеске бијандило о Авија,
е Авијаске бијандило о Аса,
8 е Асаске бијандило о Јосафат,
е Јосафатеске бијандило о Јорам,
е Јорамеске бијандило о Озија,
9 е Озијаске бијандило о Јотам,
е Јотамеске бијандило о Ахаз,
е Ахазеске бијандило о Езекија,
10 е Езекијаске бијандило о Манасија,
е Манасијаске бијандило о Амон,
е Амонеске бијандило о Јосија,
11 е Јосијаске бијандиле о Јехонија хем лескере пхраља ко време кеда о Израелција сине ингарде ко Вавилон.
12 Откеда ингарѓе лен ко Вавилон, е Јехонијаске бијандило о Салатиел,
е Салатиелеске бијандило о Зоровавел,
13 е Зоровавелеске бијандило о Авиуд, е Авиудеске бијандило о Елијаким,
е Елијакимеске бијандило о Азор,
14 е Азореске бијандило о Садок,
е Садокеске бијандило о Ахим,
е Ахимеске бијандило о Елиуд,
15 е Елиудеске бијандило о Елеазар,
е Елеазареске бијандило о Матан,
е Матанеске бијандило о Јаков,
16 е Јаковеске бијандило о Јосиф, о ром е Маријакоро, која со бијанѓа е Исусе, коле со викинена ле Христос.
17 Аѓаар, са заедно сине, таро Авраам џи ко Давид 14 генерацие, таро Давид џи кеда сине ингарде ко Вавилон 14 генерацие хем откеда сине ингарде ко Вавилон џи ко Христос 14 генерацие.
18 Аке сар бијандило о Исус Христос. Џикоте лескири дај и Марија сине верими е Јосифеа, англедер те лен пе, ој ачхили кхамни тари е Девлескири сила.* 19 Ама о Јосиф, лакоро веренико,* адалеске со сине праведно мануш хем на мангља јавно те лаџакерел ла, сине ле намера тајно те пхаѓел и веридба.* 20 Ама откеда размислинѓа башо адава, е Јеховаскоро* ангели појавинѓа пе леске ко суно хем вакерѓа леске: „Јосиф, ту о чхаво е Давидескоро, ма дара те ане е Марија кхере сар тли ромни,* соске ој ачхили кхамни тари е Девлескири сила.* 21 Ој ка бијанел чхаво, хем ту чхив леске анав Исус,* соске ов ка спасинел пле народо таро ленгере гревија“. 22 Са акава случинѓа пе те шај те исполнинел пе адава со вакерѓа о Јехова* преку пло пророко: 23 „Аке, чхај ка ачховел кхамни хем ка бијанел чхаво, хем ка чхивен леске анав Емануел“, со значинела: „О Девел тано аменцар“.
24 Тегани о Јосиф уштило таро сојбе хем керѓа аѓаар сар со вакерѓа леске е Јеховаскоро* ангели, хем леља е Марија ромњаке.* 25 Ама на суќа лаја са џикоте на бијанѓа е чхаве, хем чхивѓа е чхавеске о анав Исус.