Сар спасинела амен о Исус?
Со вакерела и Библија:
О Исус спасинѓа е верна манушен адалеа со денѓа пло живото сар откупно жртва (Матеј 20:28). Адалеске, и Библија баши лесте вакерела кај тано „Спасители е светоскоро“ (1. Јованово 4:14). Ки Библија исто аѓаар пишинела: „Нане јавер спасители освен лесте, соске нане јавер анав ки пхув со о Девел биринѓа ле машкар о мануша те шај те спасинел амен“ (Дела 4:12).
О Исус муло секаске со сикавела вара ки лесте (Евреите 2:9; Јован 3:16). Адалеске, „о Девел ваздинѓа ле таро муле“, хем о Исус иранѓа пе ко небо сар духовно суштество (Дела 3:15). Адалеске, о Исус „шај целосно те спасинел околен со молинена е Девле ко лескоро анав. Ов шај те спасинел лен соске секогаш тано џивдо те молинел е Девле те поможинел ленге“ (Евреите 7:25).
Соске о Исус ваљани те застапинел амен?
Сарине сием грешникија (Римјаните 3:23). О грево одвојнела амен таро Девел хем ингарела амен џи ко мерибе (Римјаните 6:23). Ама, о Исус поможинела околенге со сикавена вера ки лескири откупно жртва (1. Јованово 2:1). Адава керела ле аѓаар со родела таро Девел те шунел ленгере молитве хем те простинел ленгере гревија преку лескири откупно жртва (Матеј 1:21; Римјаните 8:34). О Девел прифатинела е Исусескере молбе соске тане спрема лескири волја. О Девел бичхалѓа е Исусе ки Пхув те шај „о свето те овел спасимо преку лесте“ (Јован 3:17).
Дали тано доволно само те верујна ко Исус те шај те ова спасиме?
На. Иако те шај те ова спасиме мора те верујна ко Исус, нане доволно само адава (Дела 16:30, 31). Ки Библија пишинела: „Сар со о тело бизо духо тано муло, аѓаар и вера бизо делија тани мули“ (Јаков 2:26). Те шај те ова спасиме ваљани:
Те сикљова башо Исус хем лескоро Дад, о Јехова (Јован 17:3).
Те овел амен вера ки ленде (Јован 12:44; 14:1).
Те сикава амари вера аѓаар со ка ова послушна ко ленгере заповедија (Лука 6:46; 1. Јованово 2:17). О Исус вакерѓа кај на секова јекх со вакерела леске „Господаре“ ка овел спасимо, него „само окова со керела [лескере] Дадескири волја“ (Матеј 7:21).
Понадари да ваљани те сикава вара иако ка овен амен пхарипа. О Исус јасно вакерѓа: „Кој ка истрајнел џи ко крајо, ка овел спасимо“ (Матеј 24:13).