Сар о старешине сикавена мангипе хем милост околенге со керѓе грево

1. Сави прилика иси околен со керѓе пхаро грево?

КИ АНГЛУНИ статија дикхлем со вакерѓа о апостол Павле е собраниеске ко Коринт башо адава сар те постапинел јекхе христијанеа со керела сине пхаро грево. Адава мануш на каинѓа пе хем ваљани сине те овел цидимо таро собрание. Сепак, сар со сикавела о главно стихо тари акаја статија, несавенге со керѓе пхаро грево, о Девел шај те поможинел те каинен пе (Рим. 2:4). Сар ов користинела е старешинен те шај те поможинел некаске те каинел пе?

2-3. Со ваљани те кера ако дознајнаја кај несаво пхрал или пхен керѓа пхаро грево, хем соске?

² Ако о старешине на џанена кај некој керѓа пхаро грево, ола ка нашти те поможинен леске. Тегани со ваљани те кера ако дознајнаја кај несаво пхрал или пхен керѓа пхаро грево со шај те анел џи ко адава те овел цидимо таро собрание? Ваљани те поттикнина ле те родел помош таро старешине (Иса. 1:18; Апо. 20:28; 1. Пет. 5:2).

³ Ама со ако окова со керѓа грево на мангела те вакерел адава е старешиненге? Тегани амен ка вакера ленге те шај окова со грешинѓа те добинел и помош со ваљани леске. Адалеа уствари сикаваја кај мангаја адале пхрале или пхења соске на мангаја те нашава ле. Ако ов понадари да керела адава сој погрешно, панда повише ка руминел пло амалипе е Јеховаја. Освен адава, ов шај те анел лаџ е собраниеске. Адалеске, иако нане локхо, амен храбро џаја ко старешине соске мангаја е Јехова хем амаре пхрале или пхења (Пс. 27:14).

САР О СТАРЕШИНЕ ПОМОЖИНЕНА ОКОЛЕНГЕ СО КЕРЃЕ ПХАРО ГРЕВО

4. Која тани е старешиненгири цел кеда ка кхеден пе те керен лафи некасаја со керѓа пхаро грево?

⁴ Кеда некој ко собрание ка керел пхаро грево, о старешинство ка биринел трине старешинен кола со ка служинен сар одбор.a Акала пхраља ваљани те овен скромна хем понизна. Ола ка трудинен пе те поможинен е грешникоскеb те каинел пе, ама свесна тане кај ола нашти те чхивен некас силаја те менинел пе (5. Мој. 30:19). О старешине џанена кај нане секој те каинел пе сар со каинѓа пе о цари о Давид (2. Сам. 12:13). Несаве грешникија ка биринен те отфрлинен е Јеховаскере опомене (1. Мој. 4:6-8). Сепак, е старешиненгири цел тани, ако шај, те поможинен е грешникоске те каинел пе. Кола буќа ваљани те овен ки годи е старешинен кеда ка керен лафи леа?

5. Саво совет ваљани те овел ки годи е старешинен кеда ка кхеден пе те керен лафи е грешникоја? (2. Тимотеј 2:24-26; дикх хем и слика.)

⁵ Ко окова со грешинѓа, о старешине дикхена сар скапоцено бакхро со нашавдило (Лука 15:4, 6). Адалеске, кеда ка кхеден пе те керен леа лафи, ола нане те керен адава ко грубо хем нељубезно начин. Ко адава состанок ола нане те дикхен само сар јекх обично процедура која со мора те накхел пе. Наместо адава, ола ка сикавен о особине сој пишиме ко 2. Тимотеј 2:24-26. (Читин.) О старешине ка ачховен кротка хем љубезна џикоте трудинена пе те ресен џи ко е грешникоскоро вило.

6. Сар о старешине ка спреминен пумаро вило англедер те кхеден пе те керен лафи е грешникоја? (Римјања 2:4).

⁶ О старешине одвојнена песке време те шај те спреминен пумаро вило. Ола трудинена пе те постапинен околеа со керѓа грево ко исто начин сар со постапинела о Јехова. Ола на бистрена о лафија со вакерѓа лен о апостол Павле: „О Девел љубезно трудинела пе те поможинел туке те каине тут“. (Читин Римјања 2:4.) О старешине на ваљани те бистрен кај најангле ола тане пастирија кола со ваљани те џан пало е Христосескоро водство хем пример (Иса. 11:3, 4; Мат. 18:18-20). Англедер те кхеден пе те керен лафи е грешникоја, о старешине таро одбор ка молинен пе баши пумари цел — те поможинен ле те каинел пе. Ола ка истражинен ки Библија хем ко амаре публикацие хем ка молинен е Јехова те шај те поможинел ленге шукар те проценинен о буќа. Освен адава, ка пучен пе кола буќа ваљани те џанен баши адаја личност, со шај анѓе џи ко адава ов или ој те размислинел хем те постапинел погрешно (Изр. 20:5).

7-8. Сар шај о старешине те овен стрплива исто сар о Јехова кеда ка кхеден пе те керен лафи некасаја со керѓа грево?

⁷ О старешине трудинена пе те овен стрплива сар о Јехова. Лен иси лен ки годи сар о Јехова постапинѓа англедер околенцар со керѓе несаво грево. На пример, о Јехова стрпливо керѓа лафи е Каинеа, предупрединѓа ле башо последице таро грево хем вакерѓа леске кај ка благословинел ле ако шунела ле (1. Мој. 4:6, 7). О Јехова поможинѓа е Давиде преку о пророко о Натан, кова со вакерѓа јекх споредба која со погодинѓа е царе ко вило (2. Сам. 12:1-7). Исто аѓаар, о Јехова бут пути бичхалела сине пле пророкон ко бунтовна Израелција (Ерем. 7:24, 25). Ов на аџикерѓа лескоро народо те каинел пе, па чак тегани те поможинел леске. Наместо адава, ов керѓа о прво чекори те шај те поттикнинел лен те каинен пе.

⁸ О старешине џана пало е Јеховаскоро пример кеда трудинена пе те поможинен околенге со керѓе пхаро грево. Сар со пишинела ко 2. Тимотеј 4:2, ола трудинена пе те овен бут стрплива асавкенцар. Адалеске, о старешине секогаш ваљани те овен смириме хем стрплива те шај те поможинен околеске со керела грево те мангел те керел адава сој исправно. Ако некој лендар нервиринела пе или хољанела, о грешнико шај нане те мангел те шунел о совет или шај нане те мангел те каинел пе.

9-10. Сар шај о старешине те поможинен околеске со грешинѓа те хаљол со анѓа џи ко адава те керел грево?

⁹ О старешине трудинена пе те хаљовен кола буќа анѓе џи ко адава некој те керел грево. На пример, дали адава пхрал или пхен, хари по хари слабонѓа ко духовно поглед адалеске со чхинавѓа редовно те проучинел или адалеске со на џала сине редовно ки служба? Дали чхинавѓа редовно те молинел пе е Јеховаске или лескере молитве уле рутинска? Дали чхинавѓа те боринел пе против о погрешна желбе? Дали на анѓа мудра одлуке кеда керела пе лафи башо друштво или забава? Сар адала одлуке влијајнѓе ко лескоро вило? Дали хаљола кај лескере постапке хем одлуке влијајнена упро лескоро Дад о Јехова?

¹⁰ О старешине шај те пучен пучиба со ка поможинен е грешникоске те размислинел башо буќа со слабонкерѓе лескоро амалипе е Јеховаја хем со анѓе џи ко адава те керел грево (Изр. 20:5). Ола керена акава ко јекх љубезно начин хем на пучена ле башо деталија сој лична, а со нане потреба о старешине те џанен. Исто сар о Натан со користинѓа споредба те шај те поможинел е Давидеске, о старешине да шај те користинен несави споредба те шај те поможинен околеске со грешинѓа те размислинел башо пле постапке хем те хаљовел соске ола тане погрешна. Шај о прво пути кеда ка кхеден пе е грешникоја ов ка почминел те жалинел башо одлуке со анѓа лен хем башо начин сар размислинела, а шај хем ка каинел пе.

11. Сар постапинѓа о Исус е грешниконцар?

¹¹ О старешине трудинена пе те џан пало е Исусескоро пример. О Исус мангља те поможинел е Савлеске таро Тарс те хаљол кај адава со керела тано погрешно хем адалеске пучља ле јекх мудро пучибе: „Савле, Савле, соске прогонинеа ман?“ (Апо. 9:3-6). А ко случај „е џувљаја е Језавелаја“, која сој спомними ко лил Откровение, о Исус вакерѓа: „Денѓум ла време те каинел пе“ (Отк. 2:20, 21).

12-13. Сар шај о старешине те ден време несаве грешникоске те каинел пе? (Дикх хем и слика.)

¹² Исто сар о Исус, о старешине на одлучинена сигате кај о грешнико нане те каинел пе. Несаве шај ка каинен пе панда ко прво состанок е одбореа, а јаверенге шај ка ваљани повише време. Адалеске, о старешине шај ка договоринен пе леа те кхеден пе повише пути. Шај пало прво состанок, ка почминел сериозно те размислинел башо адава со сине леске вакердо хем понизно ка молинел е Јехова те простинел лескоро грево (Пс. 32:5; 38:18). Адалеске, ко следно состанок, шај ка овел ле појавер стави таро адава со сикавѓа ко прво состанок.

¹³ Те шај те поможинен околеске со грешинѓа те каинел пе, о старешине сикавена сочувство хем мангипе. Ола молинена е Јехова те благословинел ленгоро трудо хем надинена пе кај ленгоро пхрал или пхен ка хаљол пли грешка хем ка каинел пе (2. Тим. 2:25, 26).

14. Кој чаче поможинела е грешникоске те каинел пе?

¹⁴ Ако о грешнико каинела пе, тегани амен ка ова бут радосна! (Лука 15:7, 10). Иако о старешине денѓе пестар са те шај те поможинен е грешникоске те каинел пе, кој чаче поможинѓа леске те керел адала промене? Сетин тут со пишинѓа о Павле околенге со керѓе грево: „О Девел те дел лен те каинен пе“ (2. Тим. 2:25). Значи, о Јехова, а на несаво мануш, тано адава со поможинела јекхе христијанеске те менинел пло стави хем о начин сар размислинела. О Павле објаснинела кола шукар буќа случинена пе кеда некој ка каинел пе. Ов шај те почминел пошукар те хаљовел о чачипе, те хаљол пли грешка хем те цидел пе таро е Сатанаскере стапице (2. Тим. 2:26).

15. Сар шај о старешине понадари да те поможинен јекхе грешникоске со каинела пе?

¹⁵ Ако јекх грешнико каинела пе, о одбор таро старешине ка организиринел пастирска посете те шај ов понадари да те добинел и помош со ваљани леске те шај те боринел пе против е Сатанаскере стапице хем те керел адава сој исправно (Евр. 12:12, 13). Џанѓола пе, о старешине никаске нане те вакерен деталија башо адава со керѓа о грешнико. Сепак, башо со шај ка ваљани те овел известимо о собрание?

„УКОРИН ЛЕН АНГЛО САРИНЕ“

16. Спрема 1. Тимотеј 5:20, ки касте мислинѓа о Павле кеда вакерѓа „англо сарине“?

¹⁶ Читин 1. Тимотеј 5:20. О Павле пишинѓа акала лафија е Тимотееске, кова со исто аѓаар сине старешина, те шај те вакерел леске сар те постапинел „околенцар со керена грево“. Дали мангља те вакерел кај ваљани те овен укориме англо цело собрание? На секогаш. Кеда вакерѓа „англо сарине“, ов мислинѓа ко некобор џене кола со више џанена сине башо грево. Адала шај сине те овен окола со дикхле адава со случинѓа пе или окола коленге со о грешнико вакерѓа со керѓа. О старешине ка вакерен само акале манушенге кај керѓе нешто башо случај хем кај о грешнико тано укоримо.

17. Ако бут џене ко собрание џанена кај некој керѓа пхаро грево или веројатно ка дознајнен башо адава, саво известување ваљани те дел пе, хем соске?

¹⁷ Понекогаш, бут џене ко собрание више џанена кај некој керѓа пхаро грево или веројатно ка дознајнен башо адава. Ко асавко случај е лафенцар „англо сарине“ мислинела пе ко цело собрание. Адалеске, јекх старешина ка известинел о собрание кај некој тано укоримо. Соске? Сар со објаснинѓа о Павле, те шај о јавера те сикљовен таро адава хем те на керен пхаро грево.

18. Сар ка постапинен о старешине ако јекх крстимо малолетно чхаво керела пхаро грево? (Дикх хем и слика.)

¹⁸ Со керена о старешине кеда несаво крстимо чхаво со иси ле похари таро 18 берш керела пхаро грево? О старешинство ка организиринел дуј старешине те кхеден пе леа хем лескере родителенцарc сој е Јеховаскере сведокија. О старешине ка пучен е родителен со ола више керѓе те шај те поможинен пумаре чхавеске те керел о промене со ваљани хем те каинел пе. Ако о чхаво шунела пле родителенгере советија хем керела промене, о дуј старешине шај ка одлучинен кај на ваљани те керен ништо повише. О старешине тане свесна кај о Јехова денѓа е родителенге и одговорност мангипаја те испрајнен пумаре чхавен (5. Мој. 6:6, 7; Изр. 6:20; 22:6; Еф. 6:2-4). Сар со ка накхел о време о старешине понекогаш ка керен лафи е родителенцар те шај те уверинен пе кај о чхаво добинела и помош со ваљани леске. Ама со ако адава малолетно чхаво на каинела пе хем понадари да керела адава сој погрешно? Ко асавко случај јекх одбор таро старешине ка кхеден пе леа хем лескере родителенцар кола сој е Јеховаскере сведокија.

„О ЈЕХОВА ТАНО ПХЕРДО СОЧУВСТВО ХЕМ МИЛОСТ“

19. Сар о старешине трудинена пе те џан пало е Јеховаскоро пример кеда кхедена пе те керен лафи околенцар со керѓе пхаро грево?

¹⁹ О пхраља кола со служинена ко одбор таро старешине тане одговорна англо Јехова те аракхен о собрание чисто (1. Кор. 5:7). Исто аѓаар, ола дена пестар са те шај те поможинен околенге со керѓе несаво грево, ако шај те каинен пе. Адалеске, џикоте поможинена адале пхраленге, о старешине икерена позитивно стави хем на нашавена надеж кај ола ка менинен пе. Соске? Адалеске со мангена те џан пало е Јеховаскоро пример, кова сој „пхердо сочувство хем милост“ (Јак. 5:11). Приметин сар о апостол Јован, кова со сине пхуро, сикавѓа асавко стави. Ов пишинѓа: „Ме мангле чхаве, акава пишинава туменге те шај те на керен грево. Ама ако некој керела грево, ко амаро Дад иси амен помошнико, о Исус Христос, о праведнико“ (1. Јов. 2:1).

20. Со ка дикха ки следно статија?

²⁰ Жално тано со иси ситуацие кеда несаво грешнико на мангела те каинел пе. Ко асавко случај, ов мора те овел цидимо таро собрание. Со керена о старешине ако случинела пе нешто асавко? Адава ка дикха ки следно статија.