О Јехова ка поможинел тут ко проблемија со на очекујнѓан лен

1. Ко со сием увериме?

САР е Јеховаскоро народо џанаја кај ов мангела амен хем кај мангела те овел амен о најшукар живото (Рим. 8:35-39). Исто аѓаар сием увериме кај кеда применинаја о библиска начелија адава тано башо амаро шукарипе (Иса. 48:17, 18). Ама сар ваљани те реагирина ако иси амен проблемија со на очекујнѓем лен?

2. Саве проблемија шај те овен амен хем со шај те пуча амен?

² Са е Јеховаскере слуге иси лен проблемија. На пример, шај некој тари фамилија разочаринѓа амен. Шај иси амен несаво сериозно насвалипе со чхинавела амен те кера повише ки служба башо Јехова. Шај панда осетинаја о последице тари јекх природно катастрофа. Или шај сием прогониме баши амари вера. Кеда доживинаја асавко нешто шај ка пуча амен: „Соске случинела пе баш манге акава? Дали керѓум нешто погрешно? Дали акава сикавела кај нане ман е Јеховаскоро благослов?“ Дали некогаш осетинѓан тут аѓаар? Ако оја, ма обесхрабрин тут. Бут таро е Јеховаскере верна слуге осетинѓе пе слично сар туте (Пс. 22:1, 2; Авак. 1:2, 3).

3. Со шај те сикљова таро Псалм 34:19?

³ Читин Псалм 34:19. Приметин дуј важна буќа сој пишиме ко акава стихо: 1) Е праведна манушен ка овел лен неволје. 2) О Јехова спасинела амен таро амаре неволје. Сар спасинела амен о Јехова? Јекх начин тано аѓаар со поможинела аменге те хаљова кај амаро живото авдиве нане те овел бизо проблемија. Адава со о Јехова ветинела аменге кај ка ова радосна џикоте служинаја леске на значинела кај панда акана ка овел амен живото бизо секирацие (Иса. 66:14). О Јехова мангела те овел амен шукар живото, адалеске охрабринела амен те концентририна амен ки иднина кеда ка уживина ко живото засекогаш (2. Кор. 4:16-18). Џи тегани ов поможинела аменге понадари да те служина леске (Плач 3:22-24).

4. Башо со ка кера лафи ки акаја статија?

⁴ Акана те дикха со шај те сикљова таро верна слуге е Јеховаскере таро пурано време хем таро амаро време. Сар со ка дикха шај ка овен амен проблемија со на очекујнаја лен. Ама ако иси амен доверба ко Јехова тегани ов секогаш ка овел аменцар (Пс. 55:22). Џикоте дикхаја акала примерија, пуч тут: „Со би керава ме ки јекх слично ситуација? Сар акала примерија бајрарена мли доверба ко Јехова? Кола поуке шај те применинав ко мло живото?“

КО ПУРАНО ВРЕМЕ

5. Саве проблемија керѓа о Лаван е Јаковеске? (Дикх и слика тари насловно страна.)

⁵ Е Јеховаскере слуге таро пурано време доживинѓе проблемија со на очекујнѓе лен. Те дикха о пример е Јаковескоро. Лескоро дад вакерѓа леске те лел песке ромни таро е Лаванескере чхаја, кова со сине леске фамилија хем служинела сине е Јеховаске. Лескоро дад уверинѓа ле кај ако керела адава о Јехова бут ка наградинел ле (1. Мој. 28:1-4). Адалеске о Јаков керѓа адава. Ов таро Ханаан гело ко кхер е Лаванескоро касте со иси ле дуј чхаја — и Лија хем и Рахела. О Јаков заљубинѓа пе ки е Лаванескири потикни чхај ки Рахела хем сине спремно те керел бути ефта берш лакере дадеске те шај те лел ла (1. Мој. 29:18). Ама на уло аѓаар сар со замислинѓа песке о Јаков. О Лаван на икерѓа пе ко пло лафи. Наместо те дел е Рахела ов денѓа пле побаре чхаја е Лија. Ов дозволинѓа е Јаковеске пало јекх курко те лел е Рахела да ама само ако керела леске бути панда ефта берш (1. Мој. 29:25-27). Исто аѓаар менинѓа бут пути о договорија со керела сине е Јаковеа. О Лаван 20 берш искористинѓа е Јакове (1. Мој. 31:41, 42).

6. Саве јавера проблемија доживинѓа о Јаков?

⁶ О Јаков истрајнѓа ко јавера да проблемија. Ле сине ле бари фамилија, ама лескере чхаве на накхена сине секогаш шукар машкар песте. Ола чак бикинѓе пумаре пхрале е Јосифе сар робо. Исто аѓаар, дуј таро лескере чхаве, о Симеон хем о Леви, анѓе лаџ упри фамилија хем е Јеховаскере анавеске. Покрај са адава, е Јаковескири мангли ромни и Рахела мули џикоте бијанела сине е дујто чхаве. Хем адалеске со сине баро бокхалипе, о Јаков ко пле пхуре берша мора сине те селинел пе ко Египет (1. Мој. 34:30; 35:16-19; 37:28; 45:9-11, 28).

7. Сар о Јехова сикавѓа кај тано задоволно таро Јаков?

⁷ Иако доживинѓа са акала проблемија о Јаков никогаш на нашавѓа пли вера ко Јехова хем ко лескере ветувања. А о Јехова сикавѓа леске кај тано задоволно лестар. На пример, иако о Лаван на понашинѓа пе леа шукар, о Јехова денѓа е Јакове бут ко материјално поглед. Исто аѓаар о Јаков сине бут благодарно е Јеховаске кеда палем дикхља пле чхаве е Јосифе, каске со бут време мислинѓа кај тано муло. Адава со о Јаков сине паше амал е Јеховаја поможинѓа леске те истрајнел ко са о неволје со сине ле (1. Мој. 30:43; 32:9, 10; 46:28-30). Кеда сием паше е Јеховаја тегани амен да шај успешно те икљова ко крајо е проблеменцар со на очекујнѓем лен.

8. Со мангља о цари о Давид те керел?

⁸ О цари о Давид нашти сине те керел са со мангела ки служба башо Јехова. На пример, е Давиде сине ле бари желба те градинел о храми башо Девел. Ов вакерѓа адава е пророкоске е Натанеске. О Натан вакерѓа леске: „Кер са со пашљола туке ко вило, соске о чачутно Девел тано туја“ (1. Лет. 17:1, 2). Акала лафија сигурно бут охрабринѓе е Давиде. Ов веројатно одма почминѓа те керел планија башо адава баро проекти.

9. Сар реагиринѓа о Давид ко адава со вакерѓа леске о Натан?

⁹ Кратко пало адава, е Јеховаскоро пророко вакерѓа нешто е Давидеске со шај сине те разочаринел ле. Адаја рат, о Јехова вакерѓа е Натанеске кај нане о Давид те градинел о храми, него јекх таро лескере чхаве (1. Лет. 17:3, 4, 11, 12). Сар реагиринѓа о Давид кеда шунѓа адава? Ов прилагодинѓа пе. Концентриринѓа пе ко адава те кхедел паре хем о буќа со ка ваљанен лескере чхавеске, е Соломонеске, башо проекти (1. Лет. 29:1-5).

10. Сар о Јехова наградинѓа е Давиде?

¹⁰ Кратко откеда вакерѓа е Давидеске кај нане те керел о храми, о Јехова керѓа леа сојуз. Ов ветинѓа леске кај некој таро лескоро потомство ка владинел засекогаш (2. Сам. 7:16). Ко нево свето џикоте трајнена о милја берша коте со ка владинел о Исус, о Давид бут ка радујнел пе кеда ка дознајнел кај о Цари о Исус авела тари лескири фамилија. Акава извештај поможинела аменге те хаљова кај чак ако нашти те кера са со мангаја ки служба башо Јехова, амаро Девел шај те наградинел амен ко начин со никогаш на очекујнѓем.

11. Сар о христијања таро прво веко сине наградиме иако о Царство на ало ко време кеда ола очекујнѓе? (Дела 6:7).

¹¹ О христијања таро прво веко соочинѓе пе пхарипаја со на очекујнѓе. На пример, ола едвај аџикерена сине е Девлескоро Царство те авел ама на џанле кеда ка случинел пе адава (Дела 1:6, 7). Со керѓе џикоте аџикерена сине? Ола сине зафатиме е проповедибаја. Џикоте проповединена сине ко повише тхана, ола шај сине те дикхен сар о Јехова наградинела ленгоро трудо. (Читин Дела 6:7.)

12. Со керѓе о христијања таро прво веко кеда сине бокхалипе?

¹² Пало несаво време сине баро бокхалипе ки цело пхув (Дела 11:28). О бокхалипе погодинѓа исто аѓаар е христијанен таро прво веко. Шај ли замислинеа туке сар адава влијајнѓа упри ленде? О поглаварија сигурно секиринѓе пе сар ка грижинен пе баши пумари фамилија. А сар осетинѓе пе о терне кола со планиринѓе повише те џан ки служба? Дали мислинѓе песке кај мора те откажинен пе тари пумари цел? Ола прилагодинѓе пе спрема пле околностија. Понадари да проповединена сине кобор со шај хем делинена сине са со сине лен е јавере пхраленцар хем пхењенцар тари Јудеја (Дела 11:29, 30).

13. Саве благословија добинѓе о христијања џикоте трајнѓа о бокхалипе?

¹³ Саве благословија добинѓе о христијања џикоте трајнѓа о бокхалипе? Окола со добинѓе материјално помош осетинѓе е Јеховаскири поддршка (Мат. 6:31-33). Сигурно осетинѓе пе паше околенцар со поможинѓе ленге. Ама окола да со денѓе паре или поможинѓе ко јекх јавер начин осетинѓе и радост со авела таро дејбе (Дела 20:35). О Јехова наградинѓа саринен со прилагодинѓе пе ко неве околностија.

14. Со случинѓа пе е Варнаваске хем е апостол Павлеске, хем саво сине о резултати? (Дела 14:21, 22).

¹⁴ Бут пути о христијања таро прво веко сине прогониме. Понекогаш чак кеда ни хари на очекујнѓе адава. Те дикха со случинѓа пе е Варнаваске хем е апостол Павлеске џикоте проповединена сине ки Листра хем ко околна тхана. Ко почеток о мануша љубезно доџакерѓе лен хем спремно шунѓе лен. Ама покасно о противникија керѓе о народо те овел против о Павле хем несаве лендар каменујнѓе е Павле хем мукхле ле те мерел (Дела 14:19). Ама о Варнава хем о Павле продолжинѓе те проповединен ко јекх јавер тхан. Саво сине о резултати? Ола керѓе бут ученикија хем ленгере лафија хем пример охрабринѓа е јавере христијанен. (Читин Дела 14:21, 22.) Буте џенен сине лен корист таро адава со о Варнава хем о Павле на откажинѓе пе таро проповедибе иако таро јекх пути сине прогониме. Са џикоте на откажинаја амен тари служба со доверинѓа аменге о Јехова, амен ка ова благословиме.

КО АМАРО ВРЕМЕ

15. Со сиклиљан таро пример е пхралескоро Мекмилан?

¹⁵ Англедер 1914-то берш, е Јеховаскере слуге очекујнѓе нешто те случинел пе. Те дикха о пример јекхе пхралескоро со викинела пе Александар Мекмилан. Сар бут џене ко адава време, акава да пхрал мислинѓа кај панда хари ка џал ко небо. Ко јекх говор со икерѓа ле ко септември 1914-то берш, ов вакерѓа: „Акава говор веројатно ка овел мло последно“. Џанѓола пе акава на сине лескоро последно говор. Покасно о пхрал Мекмилан пишинѓа: „Веројатно несаве џене амендар сигате алем ко заклучок кај одма ка џа ко небо“. Ов понадари вакерела: „Адава со ваљани те кера тано те ачхова зафатиме ки служба“. О пхрал Мекмилан сине верно хем ачхило ревно ки пли служба. Шај сине те охрабринел буте пхрален со сине ко затвор адалеске со сине неутрална. Ов сине ревно хем редовно џала сине ко состанокија чак кеда сине пхуро. Сар е пхралеске Мекмилан користинѓа адава со ачхило зафатимо духовна активностенцар, џикоте аџикерела сине пли награда? Ко 1966-то берш кратко англедер те мерел ов пишинѓа: „Мли вера тани зорали сар никогаш англедер“. Кобор шукар стави кова со ваљани амен да те овел амен, посебно ако истрајнаја повише него со мислинѓем (Евр. 13:7).

16. Со на очекујнѓе те случинел пе о пхрал Херберт Џенингс хем лескири ромни? (Јаков 4:14).

¹⁶ Бут слуге е Јеховаскере иси лен проблемија е састипаја кола со на очекујнѓе лен. На пример, ко пло искуство о пхрал Херберт Џенингс објаснинѓа сар ов хем лескири ромни уживинѓе џикоте служинѓе сар мисионерија ки Гана.b Ама пало несаво време аракхле леске сериозно насвалипе со керела баре промене ко расположение. О пхрал Џенингс цитиринѓа о лафија таро Јаков 4:14 хем објаснинѓа кај лескири неви ситуација тани сар јекх „тајсутно диве“ кова со на очекујнѓа те авел. (Читин.) Ов пишинѓа: „Ваљани сине те дикха реално ки амари ситуација, адалеске гелем аменге тари Гана хем мукхлем амаре паше амален хем иранѓем амен ки Канада [баши медицинско терапија]“. О Јехова поможинѓа е пхралеске Џенингс хем лескере ромњаке понадари да те служинен леске верно иако сине лен пхарипа.

17. Сар користинѓа е јаверенге о пример е пхралескоро Џенингс?

¹⁷ О искуство е пхралескоро Џенингс бут поможинѓа е јаверен. Јекх пхен пишинела: „Таро акава искуство сиум сине охрабрими сар никогаш англедер. Кеда читинѓум кај о пхрал Џенингс мора сине те мукхел пле задаче те шај те грижинел пе башо пло састипе, адава поможинѓа ман те дикхав исправно ки мли ситуација“. А јекх пхрал пишинела: „Сиум сине старешина деш берш, ама мора сине те чхинавав адале службаја адалеске со насвалиљум. Адава добором разочаринѓа ман со нашти сине те читинав искуствија коте со керела пе лафи башо буќа со постигнинела лен е Јеховаскоро народо. Ама и истрајност е пхралескири Џенингс бут охрабринѓа ман“. Акава сикавела аменге кај кеда истрајнаја ко проблемија со на очекујнѓем лен, тегани охрабринаја е јаверен да. Чак ако ко живото на џала са сар со мангаја, понадари да шај те ова шукар пример баши вера хем истрајност (1. Пет. 5:9).

18. Сар сој сикавдо ки слика, со сикљовеа таро пример е удовицакоро тари Нигерија?

¹⁸ И пандемија КОВИД–19 влијајнѓа упро бут џене таро е Јеховаскоро народо. На пример, јекхе удовица тари Нигерија сине ла бут хари хајбаске хем паре. Јекх сабај лакири чхај пучља ла со ка хан откеда ка спреминен о последно хајбе со сине лен. Амари пхен вакерѓа пе чхајаке кај на ачхило лен ни паре ни хајбе хем кај ваљани те џан пало пример е удовицакоро тари Сарепта, те спреминен о последно хајбе хем те овел лен целосно доверба ко Јехова (1. Цар. 17:8-16). Англедер те почминен те размислинен башо адава со ка хан ручкоске, ола добинѓе кеса буте буќенцар таро пхраља. Ки кеса сине доволно хајбаске со шај сине леа те накхен повише таро дуј курке. И пхен вакерѓа кај на сине свесно кобор внимателно о Јехова шунѓа ла џикоте вакерѓа адала лафија пле чхајаке. Чаче, кеда иси амен доверба ко Јехова, о проблемија со на очекујнѓем лен ко амаро живото уствари шај те керен амен попаше леа (1. Пет. 5:6, 7).

19. Саво прогонство доживинѓа о Алексеј Јершов?

¹⁹ Ко берша со накхле, бут таро амаре пхраља хем пхења истрајнѓе ко прогонство кова со на очекујнѓе кај ка овел лен. Те дикха о пример е пхралескоро Алексеј Јершов, кова со живинела ки Русија. Кеда о пхрал Јершов крстинѓа пе ко 1994-то берш, е Јеховаскоро народо ки адаја пхув на сине прогонимо. Покасно и ситуација ки Русија менинѓа пе. Ко 2020-то берш, ко кхер е пхралескоро Јершов керѓе претрес хем леле лестар бут буќа со сине ле. Некобор масекија покасно, и влада обвининѓа ле башо криминал. Сој панда полошно, адава обвинение сине темелимо ко јекх видео таро јекх мануш кова со повише таро јекх берш глуминѓа кај мангела те проучинел и Библија. Акаја сине бут лошно постапка!

20. Сар о пхрал Јершов уло попаше е Јеховаја?

²⁰ Дали е пхрале Јершов сине ле несави корист тари акаја ситуација? Оја, ов уло попаше е Јеховаја. Ов вакерела: „Ме хем ми ромни молинаја амен сине бут почесто. Халиљум кај на би шај сине те истрајнав ки акаја ситуација бизо е Јеховаскири помош. И лично студија поможинѓа манге те на овав обесхрабримо. Размислинѓум башо верна слуге таро пурано време. Ки Библија иси бут извештаија со истакнинена кобор тано важно те ачхова смириме хем те сикава доверба ко Јехова“.

21. Со сиклилем ки акаја статија?

²¹ Со сиклилем ки акаја статија? Ко акава свето понекогаш шај те овен амен проблемија со на очекујнаја лен. Ама чак те ова ки асавки ситуација, ако иси амен доверба ко Јехова ов секогаш ка поможинел аменге. Сар со пишинела ко амаро главно стихо: „Бут неволје иси е праведнико, ама о Јехова спасинела ле тари секоја“ (Пс. 34:19). Адалеске понадари да те концентририна амен ки е Јеховаскири бари моќ, а на ко амаре проблемија. Тегани исто сар о апостол Павле амен да шај те вакера: „Са шај те керав соске поможинела манге окова со дела ман сила“ (Фил. 4:13).