ТЕ ЖИВИНА САР ХРИСТИЈАЊА

Неве буќа ко состанок Амаро живото хем служба

Таро јануари 2018 берш, ко состанок Амаро живото хем служба ка керел пе лафи башо повише информацие, слике хем клипија таро Свето писмо — превод Нов свет, онлајн издание башо проучибе (nwtsty-E), чак ако акава издание башо проучибе нане панда ки тли чхиб. Акава сигурно бут ка поможинел тут џикоте спреминеа тут башо состанок. А сој поважно, ка поможинел тут панда повише те дикхе о мангипе амаре Дадескоро, е Јеховаскоро!

ПОВИШЕ ИНФОРМАЦИЕ

Објаснинена и култура, о географска поединостија хем несаве лафија таро библиска стихија.

Матеј 12:20

О фитили со иси ле бут хари јаг: Ко кхера, ко пурано време сар ламба обично користинела пе сине јекх тикно пхувјало чаро пхердо маслиново масло. Преку о ленено фитили, о масло џала сине наупре хем аѓаар керела сине те тхабљол и јаг. Акава израз ки грчко чхиб шај значинела фитили со чуринела хем панда иси ле жаро, ама и јаг само со на ачхили или више ачхили. Ко Исаија 42:3 тано пророкујмо кај е Исусе ка овел ле сочувство. Ов никогаш нане те ачхавел и најтикни да надеж ко понизна хем угнетиме мануша.

Матеј 26:13

Чачипе: О грчко лафи „амин“ сој преведимо ко акава стихо сар „чаче“ авела таро хебрејско лафи „амин“, со значинела „аѓаар нека овел“ или „сигурно“. О Исус бут пути користинела сине акава лафи англедер те вакерел несави изјава, пророштво или ветување. Аѓаар истакнинела сине кај адава со вакерѓа тано чаче аѓаар. Мислинела пе кај само о Исус користинела сине акава лафи ко асавко начин адалеске со нашти те аракхел пе ко јавер тхан ки Библија или ко јавера религиозна лила. Кеда о Исус вакерела сине дуј пути адава лафи (амин, амин), сар сој ко лил таро Јован, преведимо тано сар „чаче, чаче“ (Јвн 1:51).

СЛИКЕ ХЕМ КЛИПИЈА

Ка овен сикавде различна деталија тари Библија преку слике, цртежија, анимацие хем видеоклипија бизо гласо.

И Витфага, и Маслинско Гора хем о Ерусалим

Ко акава кратко видеоклипи тано сикавдо о друмо кова со ингарела џи ко Ерусалим таро исток, таро авдисутно гав Ат-тур (коте со мислинела пе кај порано аракхљола сине и Витфага) џи ко јекх таро најуче делија тари Маслинско Гора. И Витанија сине источно тари Витфага, ки источно страна тари Маслинско Гора. Кеда сине ко Ерусалим, о Исус хем лескере ученикија бут пути накхавена сине и рат ки Витанија. Авдиве адатхе аракхљола и диз Ел-Азарија, со ки арапско чхиб значинела „е Лазарескоро тхан“. О Исус бут пути ачхола сине ко кхер коте со живинена сине и Марта, и Марија хем о Лазар (Мт 21:17; Мр 11:11; Лк 21:37; Јвн 11:1). Кеда таро ленгоро кхер џала сине ко Ерусалим, шај о Исус накхела сине таро друмо сој тано сикавдо ко акава видеоклипи. Кеда ко 9 Нисан 33 берш а.е. о Исус гело ко Ерусалим хереа преку и Маслинско Гора, шај цидинѓа тари Витфага.

Друмо тари Витанија џи ки Витфага
Витфага
И Маслинско Гора
И долина е Кедронескири
Храмско планина

Шајка ко кокало тари пета

Акаја тани слика тари реплика таро е петакоро кокало коте сој ковими састрнали шајка дугачко 11,5 сантиметрија. О оргинали, кова со авела таро римско време, сине аракхло ко 1968 берш џикоте о истражувачија рандена сине о северно дело таро Ерусалим. Акава сикавела кај најверојатно користинена сине шајке кеда ковинена сине е манушен ко стубо таро каш кеда мангена сине те мударен лен. И шајка шај тани слично сар о шајке со користинена сине о римска војникија те шај те ковинен е Исусе ко стубо. Е петакоро кокало сине аракхло ко сандуко таро бар, со викинена ле сине костурница, коте со чхивена пе сине шуке кокала таро муло мануш кеда ка распадинел пе о тело. Акава сикавела кај окола да со сине мударде ко стубо шај сине те овен паруме (Мт 27:35).