ЛЕКЦИЈА 56
Икер о јекхипе ко собрание
Кеда сием заедно амаре пхраленцар хем пхењенцар осетинаја амен сар о цари о Давид кова со вакерѓа: „Кобор тано шукар хем пријатно кеда о пхраља живинена заедно ко јекхипе!“ (Псалм 133:1). Адава јекхипе со иси машкар аменде на уло случајно. Сарине амен иси амен одговорност те икера о јекхипе ко собрание.
1. Сој тано посебно ко е Девлескоро народо?
Ако џаја ко состанокија ки јекх јавер пхув, шај на хаљовеа и чхиб, ама сепак осетинеа тут сар те пхене кхере сиан. Соске? Адалеске со користинаја о иста публикацие ко цело свето кеда проучинаја и Библија хем адалеске со сикаваја мангипе јекх јекхеске. Бизи разлика коте живинаја, сарине служинаја е Јеховаске сложно хем ко јекхипе (Софонија 3:9).
2. Со шај те кере ту, те шај те овел јекхипе ко е Девлескоро народо?
„Манген тумен јекх јекхеа силно таро вило“ (1. Петрово 1:22). Сар шај те применине акава совет? Наместо те концентририне тут ко е јаверенгере слабостија, трудин тут те дикхе ленгере шукар особине. Ма дружин тут само околенцар кола сој тане сар туте хем кола со мангена о буќа со ту да мангеа лен. Трудин тут исто аѓаар те запознајне е пхрален хем е пхењен сој тане појавер тутар. Ако приметинеа кај иси тут несаве предрасуде, кер са со шај те отфрлине адала чувствија. (Читин 1. Петрово 2:17.)a
3. Со ка кере ако појавинела пе несаво проблеми јекхе пхралеа или пхењаја?
Адава со сием ко јекхипе на значинела кај сием совршена. Понекогаш шај ка разочарина или ка дукхава јекх јекхе. Адалеске, е Девлескоро Лафи поттикнинела амен: „Трпинен тумен јекх јекхеа хем... простинен туменге. Сар о Јехова спремно со простинѓа туменге, аѓаар керен тумен да.“ (Читин Колошаните 3:13.) Амен поврединѓем е Јехова бут пути, ама сепак ов простинѓа аменге. Адалеске, ов очекујнела амен да те простина амаре пхраленге. Ако поврединѓан некас, кер ту о прво чекори те решинел пе о проблеми. (Читин Матеј 5:23, 24.)b
ДОЗНАЈН ПОВИШЕ
Дознајн со шај ту те кере, те шај те овел мир хем јекхипе ко собрание.
Со сиан спремно те кере башо мир?
4. Отфрлин о предрасуде
Амен мангаја те сикава мангипе са амаре пхраленге. Ама, адава шај те овел пхаро кеда некој тано појавер амендар. Со шај те поможинел аменге те сикава мангипе са е пхраленге? Читин Дела 10:34, 35, а пало адава керен лафи башо акала пучиба:
О Јехова нане пристрасно хем адалеске прифатинела манушен таро цело свето те овен лескере Сведокија. Сар ваљани адава те влијајнел упро тло стави спрема о пхраља хем о пхења кола со иси лен различно потекло или култура?
Кола предрасуде иси е манушен ко тхан коте со живинеа? Соске ваљани те отфрлине адала предрасуде?
Читин 2. Коринќаните 6:11-13, а пало адава керен лафи башо акава пучибе:
Со мислинеа, сар шај те ове попаше е пхраленцар хем е пхењенцар кола со иси лен различно потекло или култура?
5. Простин таро вило хем кер те овел мир
О Јехова спремно хем таро вило простинела аменге иако амен леске никогаш на ваљани те простина. Читин Псалм 86:5, а пало адава керен лафи башо акала пучиба:
Со сикљоваја таро акава стихо башо Јехова?
Дали сиан благодарно е Јеховаске со простинела туке хем соске?
Кола ситуацие шај те керен аменге пхаро те ова ко мир е јаверенцар?
Сар шај те џа пало е Јеховаскоро пример хем те ачхова ко јекхипе амаре пхраленцар хем пхењенцар? Читин Изреки 19:11, а пало адава керен лафи башо акава пучибе:
Со шај те кере ако некој џала туке ко живце или дукхавела тут?
Понекогаш амен ка дукхава е јаверен. Со ваљани тегани те кера? Дикх о ВИДЕОКЛИПИ, а пало адава керен лафи башо акава пучибе:
Со керѓа и пхен те шај те керел мир?
6. Концентририн тут ко е пхраленгере хем е пхењенгере шукар стране
Кеда оваја попаше амаре пхраленцар хем пхењенцар амен дикхаја ленгере шукар стране хем ленгере слабостија. Со ка поможинел амен те концентририна амен ко ленгере шукар стране? Дикх о ВИДЕОКЛИПИ, а пало адава керен лафи башо акава пучибе:
Со шај те поможинел туке те дикхе о шукар особине тле пхраленгере хем пхењенгере?
О Јехова концентриринела пе ко амаре шукар особине. Читин 2. Летописи 16:9а, а пало адава керен лафи башо акава пучибе:
Сар осетинеа тут кеда џанеа кај о Јехова концентриринела пе ко тле шукар особине?
Чак о најшужо дијаманти иси ле маане, ама сепак тано бут вредно. Слично, иако амаре пхраља хем пхења иси лен маане, ола тане бут вредна е Јеховаске
НЕСАВЕ ШАЈ ВАКЕРЕНА: „Ов (или ој) грешинѓа против манде, соске ме те извининав ман?“
Соске ваљани те ова спремна те простина е јаверенге?
СО СИКЛИЛЕМ
Ту шај те икере о јекхипе ко собрание аѓаар со ка ове спремно те простине хем аѓаар со ка сикаве мангипе са тле пхраленге хем пхењенге.
Сар ка одговорине?
Со ка поможинел туке те на овел тут предрасуде спрема о јавера?
Со ка кере ако појавинела пе несаво проблеми јекхе пхралеа или пхењаја?
Соске ваљани исто сар о Јехова амен да те простина е јаверенге?
ИСТРАЖИН
Дикх сар јекх споредба со вакерѓа ла о Исус шај те поможинел аменге те на судина е јаверен.
Дали ваљани те извинина амен иако на керѓем ништо погрешно?
„Извинување — клуч за да се постигне мир“ (Стражарска кула таро 1 ноември 2002)
Дикх несаве сиклиле те на овел лен предрасуде.
Дикх сар шај те решине о проблемија некасаја, те шај те икере о мир ко собрание.
„Решавај ги несогласувањата со љубов“ (Стражарска кула таро мај 2016)