Пучиба таро читателија
Со мислинѓа о Исус кеда вакерѓа: „Ма мислинен кај аљум те анав мир“?
О Исус сикавела сине е манушен те овен ко мир е јаверенцар. Ама ки јекх прилика вакерѓа пле апостоленге: „Ма мислинен кај аљум те анав мир ки пхув. На аљум те анав мир него мачи. Аљум те одвојнав е чхаве таро пло дад, е чхаја тари пли дај хем е бојра тари пли сасуј“ (Мат. 10:34, 35). Со мислинѓа о Исус адалеа?
О Исус на мангља те одвојнел е фамилија, ама ов џанља кај башо лескере сикајба несаве фамилие ка одвојнен пе. Адалеске, окола со мангена те овен е Христосескере следбеникија хем те крстинен пе, ваљани те овен свесна кај шај те овел лен проблемија е фамилијаја. Шај те овел ленге пхаро те ачховен верна е Христосеске, ако ленгоро брачно партнери или некој тари фамилија противинела пе ленге.
И Библија поттикнинела е христијанен те „овен ко мир са е манушенцар“ (Рим. 12:18). Ама ко несаве фамилие е Исусескере сикљојба шај те овен сар „мачи“. Адава обично случинела пе кеда некој тари фамилија прифатинела е Исусескере сикљојба, а јавера отфрлинена адала сикљојба или тане против. Ко асавко случај асавке членија тари фамилија овена „душмања“ околеске со прифатинела о чачипе (Мат. 10:36).
О христијања кола со живинена ки асавки фамилија понекогаш тане ко испит те сикавен дали тане послушна е Јеховаске хем е Исусеске или пумаре фамилијаке. На пример, и фамилија шај те керел ленге притисок те славинен несаве празникија. Тегани ола ваљани те одлучинен каске ка овен послушна. О Исус вакерѓа: „Кој мангела пле даде или пле даја повише мандар, ов на заслужинела те овел мло ученико“ (Мат. 10:37). Џанѓола пе, о Исус на мангља те вакерел кај ако некој мангела те овел лескоро ученико на ваљани бут те мангел пле родителен. Наместо адава, ов мангља те сикавел ленге кола буќа ваљани те овен ленге најважна ко живото. Ако амари фамилија која со нане ко чачипе керела аменге притисок те на служина е Јеховаске, амен понадари да мангаја лен, ама џанаја кај највише ваљани те манга е Девле.
Сигурно, о противибе тари фамилија шај бут те дукхал. Сепак, е Исусескере ученикија на ваљани те бистрен лескере лафија: „Кој на прифатинела пло стубо мучибаске хем на џала пали манде, на заслужинела те овел мло ученико“ (Мат. 10:38). Јавере лафенцар, кеда о христијања доживинена противибе тари фамилија, ко адава дикхена сар неволје кола со спремно прифатинена лен. А ко исто време, надинена пе кај пумаре шукар постапкенцар ка поттикнинен е фамилија те менинел пло стави хем те сикљовел нешто повише баши Библија (1. Пет. 3:1, 2).