Дали сиан спремно те крстине тут?

Џи акана ко тло библиско курси сиклиљан бут буќа башо Јехова. Веројатно керѓан несаве промене ко тло живото те шај те применине адава со сиклиљан. Сепак, шај иси нешто со чхинавела тут те де лафи е Јеховаске кај ка служине леске хем те крстине тут. Ки акаја лекција ка кера лафи башо несаве предизвикија со шај те керен туке пхаро те крстине тут хем ка дикха со шај те поможинел туке те накхаве лен.

1. Кобор ваљани те џане тари Библија англедер те крстине тут?

Те шај те крстине тут ваљани шукар те џане о чачипе (1. Тимотеј 2:4). Акава на значинела кај ваљани те џане о одговор башо секова пучибе тари Библија. Чак о христијања кола сој тане крстиме англедер бут берша, понадари да сикљовена тари Библија (Колошаните 1:9, 10). Сепак, иси нешто со ваљани те џане — о основна библиска сикљојба. Ако на сиан сигурно дали адава со џанеа тари Библија тано доволно, шај те пуче е старешинен хем ола ка поможинен туке.

2. Со ваљани те кере англедер те крстине тут?

Англедер те крстине тут, мора те каине тут хем те иране тут ко Девел. (Читин Дела 3:19.) Акава значинела кај ваљани бут те жалине башо лошна буќа со керѓан лен хем те молине е Јехова те простинел туке. Исто аѓаар, ваљани те ове решимо те циде тут таро са о буќа коленге со о Девел вакерела кај тане лошна хем те ове одлучно те живине аѓаар сар со мангела ов. А на само адава, важно тано те посетине о состанокија хем те проповедине заедно е собраниеа.

3. Соске на ваљани те дара те крстине тут?

Несаве дарана кај ка нашти те икерен пе ко адава со ветинѓе е Јеховаске. Чаче, понекогаш ту ка кере грешке сар со керѓе о верна мурша хем џувља сој тане спомниме ки Библија. Ама, ма бистре кај о Јехова на очекујнела таро пле слуге те овен совршена. (Читин Псалм 103:13, 14.) О Јехова тано бахтало кеда деа тло најшукар! Ов ка поможинел туке. Уствари, о Јехова уверинела амен кај ништо „нашти те одвојнел амен таро [лескоро] мангипе“. (Читин Римјаните 8:38, 39.)

ДОЗНАЈН ПОВИШЕ

4. Трудин тут те запознајне е Јехова пошукар

Кобор шукар ваљани те пенџаре е Јехова англедер те крстине тут? Ваљани те пенџаре ле доволно шукар те шај те манге ле хем те манге те угодине леске. Дикх о ВИДЕОКЛИПИ те шај те дикхе сар несаве интересентија таро цело свето керѓе адава, а пало адава керен лафи башо акава пучибе:

ВИДЕОКЛИПИ: О друмо џи ко крстибе (3:56)

• Со керѓе о мануша таро видеоклипи те шај те овен спремна башо крстибе?

Читин Римјаните 12:2, а пало адава керен лафи башо акала пучиба:

• Дали сумнинеа тут ко адава со сикавела и Библија, или ко адава кај е Јеховаскере сведокија сикавена о чачипе?

• Ако оја, со шај те кере?

5. Накхав о предизвикија со чхинавена тут те крстине тут

Сарине соочинаја амен предизвиконцар кеда одлучинаја те да лафи е Јеховаске кај ка служина леске хем те крстина амен. Те шај те дикхе јекх пример башо адава дикх о ВИДЕОКЛИПИ, а пало адава керен лафи башо акала пучиба:

ВИДЕОКЛИПИ: О мангипе спрема о Јехова поможинела туке те накхаве о предизвикија (5:22)

• Кола предизвикија сине е пхења?

• Сар о мангипе спрема о Јехова поможинѓа лаке те накхавел адала предизвикија?

Читин Изреки 29:25 хем 2. Тимотеј 1:7, а пало адава керен лафи башо акава пучибе:

• Со дела амен храброст те накхава о предизвикија?

6. Нека овел тут доверба кај о Јехова ка поможинел туке

О Јехова ка поможинел туке ако мангеа те кере адава сој угодно леске. Дикх о ВИДЕОКЛИПИ, а пало адава керен лафи башо акала пучиба:

ВИДЕОКЛИПИ: О Јехова ка поможинел туке (2:50)

• Соске сине пхаро е интересентеске те крстинел пе?

• Со сиклило башо Јехова хем сар адава поможинѓа леске те овел ле побари доверба ко Јехова?

Читин Исаија 41:10, 13, а пало адава керен лафи башо акава пучибе:

• Соске шај те ове сигурно кај ту шај те икере тут ко тло завет е Јеховаске?

7. Бајрар тло ценење башо е Јеховаскоро мангипе

Кобор повише размислинеа башо е Јеховаскоро мангипе спрема туте, добором повише ка ове благодарно леске хем добором повише ка бајровел тли желба те служине леске засекогаш. Читин Псалм 40:5, а пало адава керен лафи башо акава пучибе:

• Кола берекетија таро Јехова ценинеа највише?

О пророко о Еремија бут мангела сине е Јехова хем лескоро лафи, хем бут ценинела сине и чест те овел е Јеховаскоро слуга. Ов вакерѓа: „Тло лафи керѓа ман бахтало хем пхерѓа мло вило бахталипаја, соске ме пхиравава тло анав“ (Еремија 15:16). Керен лафи башо акала пучиба:

• Соске тани бари чест те ове е Јеховаскоро сведоко?

• Дали мангеа те крстине тут хем те ове е Јеховаскоро сведоко?

• Дали иси тут несаве предизвикија со керена туке пхаро те кере адава?

• Со мислинеа, сар шај те накхаве адала предизвикија?

СО СИКЛИЛЕМ

О Јехова ка поможинел туке те накхаве са о предизвикија со чхинавена тут те крстине тут.

Сар ка одговорине?

• Кобор ваљани те џане тари Библија англедер те крстине тут?

• Со ваљани те кере англедер те крстине тут?

• Соске на ваљани те дара те крстине тут?

ИСТРАЖИН

Читин која ваљани те овел и причина баши тли одлука те крстине тут

„Дали сиан спремно те крстине тут?“ (Стражарско кула таро март 2020)

Дикх сар шај те накхаве несаве конкретна предизвикија кола со шај чхинавена тут те крстине тут.

„Со чхинавела ман те крстинав ман?“ (Стражарско кула таро март 2019)

Дикх сар јекх мануш успешно накхавѓа несаве баре предизвикија те шај те крстинел пе.

Зошто го одолговлекуваш своето крштавање? (1:10)