2. Сар шај те ова чесна ко амаро секојдневно живото?

О Јехова мангела те вакера „о чачипе јекх јекхеске“ (Захарија 8:16, 17). Со значинела адава? Бизи разлика дали кераја лафи амаре фамилијаја, амаре колегенцар, амаре пхраленцар хем пхењенцар таро собрание или несаве државна службениконцар, амен на ховаваја хем на даја погрешна информацие. О чесна мануша на преваринена е јаверен хем на чорена. (Читин Изреки 24:28 хем Ефешаните 4:28.) Ола исто аѓаар платинена са пумаре сметке хем данокија (Римјаните 13:5-7). Ама, на мангаја само ко акала буќа те ова чесна, него амен „мангаја ко са о буќа те ова чесна“ (Евреите 13:18).

О Исус вакерѓа кај лескере следбеникија на ваљани те овен „дело таро свето“ (Јован 15:19). Адава значинела кај мора те овен неутрална — те на мешинен пе ки политика хем ко војне. Ама, адава нане секогаш локхо. О мануша шај ка асан аменге хем ка критикујнен амен адалеске со сием неутрална. Сар шај те ачхова неутрална хем те сикава кај сием верна е Јеховаске?

1. Сар дикхена о чачутне христијања ко манушикане владе?

О христијања сикавена поштовање спрема и влада. Сар со вакерѓа о Исус, амен даја е Цезарескоро е Цезареске (Марко 12:17). Адава значинела кај амен поштујнаја о законија ки пхув коте со живинаја, сар на пример о закони те платинен пе о данокија. И Библија сикавела кај о манушикане владе постојнена само адалеске со о Јехова дозволинела ленге те владинен (Римјаните 13:1). Амен хаљоваја кај о манушикане владе иси лен само релативно или ограничимо авторитети. Џанаја кај само амаро Девел преку пло небесно Царство ка решинел са о манушикане проблемија.

2. Сар шај те сикава кај сием неутрална?

Исто сар о Исус, амен да на мешинаја амен ки политика. Кеда о мануша дикхле сар о Исус керѓа јекх чудо, ола мангле те керен ле цари, ама о Исус на дозволинѓа ленге адава (Јован 6:15). Соске? Ов ки јекх јавер прилика вакерѓа: „Мло Царство нане дело таро акава свето“ (Јован 18:36). Амен сар е Исусескере следбеникија сикаваја кај сием неутрална ко бут начинија. На пример, на џаја ки војна. (Читин Михеј 4:3.) Амен поштујнаја о национална симболија сар сој о знаме, ама на обожавинаја ле (1. Јованово 5:21). Амен на поддржинаја нијекх политичко партија или политичаре, а ни на сием против ленде. Ко акала хем ко бут јавера начинија, амен сикаваја кај сием целосно верна е владаке со поставинѓа ла о Девел — лескоро Царство.

ДОЗНАЈН ПОВИШЕ

3. О чачутне христијања тане неутрална

О Исус хем лескере следбеникија денѓе аменге пример башо акава. Читин Римјаните 13:1, 5-7 хем 1. Петрово 2:13, 14, а пало адава дикх о ВИДЕОКЛИПИ хем керен лафи башо акала пучиба:

ВИДЕОКЛИПИ: О чачутне христијања тане неутрална (прво дело) (4:28)

• Соске ваљани те поштујна е манушикане владен?

• Ко саве начинија шај те сикава кај сием ленге подложна?

Кеда иси војна, несаве државе вакерена кај тане неутрална, ама ола поддржинена о солдуј стране сој тане ки војна. На пример, ола керена адава аѓаар со дена паре или оружје. Ама, акаја нане чачутни неутралност. Читин Јован 17:16, а пало адава дикх о ВИДЕОКЛИПИ хем керен лафи башо акава пучибе:

ВИДЕОКЛИПИ: О чачутне христијања тане неутрална (дујто дело) (3:11)

• Со чаче значинела те ове неутрално?

Со би кереа ако и влада родела тутар те кере нешто сој тано против е Девлескоро закони? Читин Дела 5:28, 29, а пало адава дикх о ВИДЕОКЛИПИ хем керен лафи башо акала пучиба:

ВИДЕОКЛИПИ: О чачутне христијања тане неутрална (трито дело) (1:18)

• Ако о манушикано закони родела нешто сој тано против е Девлескоро закони, каске ваљани те ова послушна?

• Со мислинеа, ко кола ситуацие о христијања на би овена послушна е манушикане владенге?

4. Ов неутрално ко мисле хем ко постапке

Читин 1. Јованово 5:21, а пало адава дикх о ВИДЕОКЛИПИ хем керен лафи башо акала пучиба:

ВИДЕОКЛИПИ: Соске е чачутне христијаненге ваљани храброст — те овен неутрална (2:49)

• Соске о пхрал Ајенге одлучинѓа те на овел члени ки политичко партија или те учествујнел ко несаве национална церемоние, сар на пример те поздравинел пе о знаме?

• Со мислинеа ту баши лескири одлука?

Кола јавера ситуацие шај те керен аменге пхаро те ачхова неутрална? Дикх о ВИДЕОКЛИПИ, а пало адава керен лафи башо акала пучиба:

ВИДЕОКЛИПИ: Поуке тари Стражарско кула — ачхов неутрално ко поделимо свето (5:16)

• Сар шај те ачхова неутрална ко меѓународна спортска настанија?

• Сар шај те ачхова неутрална кеда сием лично погодиме таро одлуке со анена о политичарија, чак кеда адала одлуке тане баши амари корист?

• Сар шај о вестија хем амаро друштво те влијајнен упри амари неутралност?

СО СИКЛИЛЕМ

О христијања бут трудинена пе те ачховен политичко неутрална ко пумаре мисле, лафија хем постапке.

Сар ка одговорине?

• Сар ваљани те дикха ко манушикане владе?

• Соске сием политичко неутрална?

• Кола ситуацие шај те керен аменге пхаро те ачхова неутрална?

ИСТРАЖИН

Кола жртве шај ка ваљани те кера те шај те ачхова неутрална?

Јехова никогаш не нѐ остави (3:14)

Сар шај о родителија хем о чхаве те спреминен пе башо ситуацие кола со шај те керен ленге пхаро те ачховен неутрална?

Како да ја задржиш својата неутралност на јавни настани (4:25)

Дикх сар шај те сикава кај на сием дело таро свето кеда ваљани те ана одлука сави бути ка кера.

„Секој ќе го носи својот сопствен товар“ (Стражарска кула таро 15 март 2006)