Е манушен ко цело свето иси лен различна ставија башо алкохол. Несаве уживинена те пиен понекогаш кеда тане заедно пле амаленцар. Јавера одлучинена те на пиен ни најхари. А несаве палем пиена џикоте на маќовена. Со вакерела и Библија башо алкохол?

1. Дали тано погрешно те пиен пе алкохолна пијалокија?

И Библија на вакерела кај тано погрешно те пиел пе алкохол. Спротивно таро адава, ој вакерела кај јекх таро бут шуже буќа со денѓа амен о Девел тани „и мол која со керела е манушескоро вило бахтало“ (Псалм 104:14, 15). Несаве верна мурша хем џувља сој спомниме ки Библија пиена сине алкохолна пијалокија (1. Тимотеј 5:23).

2. Саво совет дела и Библија башо пијбе алкохол?

О Јехова осудинела о претерано пијбе хем о маќојбе (Галатите 5:21). Ов ко пло Лафи вакерела: „Ма ов околенцар со превише пиена мол“ (Изреки 23:20). Адалеске, ако одлучинаја те пија, чак кеда сием коркори, на ваљани те пија добором бут со ка нашти шукар те размислина хем те контролирина амаре лафија хем постапке. Исто аѓаар, на ваљани те пија добором бут со ка кера штета амаре састипаске. Ако нашти контролиринаја кобор ка пија, тегани пошукар ка овел те на пија.

3. Сар шај те поштујна е јаверенгере одлуке башо алкохол?

Секова јекх амендар ваљани коркори песке те одлучинел дали ка пиел алкохолна пијалокија. На ваљани те судина некас ако одлучинѓа те пиел умерено алкохол хем на ваљани те кера притисок упро некасте ако одлучинѓа те на пиел (Римјаните 14:10). Ако адава со ка пија ка влијајнел лошно упро јавера, тегани пошукар ка овел те на пија. (Читин Римјаните 14:21.) Ни јекх амендар „те на родел пли корист, него и корист е јаверескири“. (Читин 1. Коринќаните 10:23, 24.)

ДОЗНАЈН ПОВИШЕ

4. Алкохол — ка пијав или на?

Сар дикхела сине о Исус ко пијбе алкохол? Те шај те дознајне о одговор, размислин башо прво чудо со керѓа о Исус. Читин Јован 2:1-11, а пало адава керен лафи башо акала пучиба:

• Со шај те сикљова таро акава чудо башо адава сар дикхела сине о Исус ко алкохол хем ко адала со пиена алкохол?

• О Исус на осудинѓа о пијбе алкохол. Спрема адава, сар ваљани те дикха ко окола со одлучинена те пиен?

Ама, само адалеске со о христијања шај те пиен алкохол, на значинела кај адава тано секогаш мудро те керел пе. Читин Изреки 22:3, а пало адава керен лафи башо акала пучиба. Сар акава начело ка поможинел туке те одлучине дали те пие алкохол ако...

• ваљани те возине или те управине несаве машинаја?

• сиан кхамни?

• о доктори вакерѓа туке те на пие алкохол?

• нашти те контролирине тут кобор ка пие?

• о закони тари држава на дозволинела туке те пие алкохол?

• сиан некасаја кова со одлучинѓа те на пиел ни најхари адалеске со англедер сине ле проблемија алкохолеа?

Дали ка икале алкохол ко тло бијав или ко јавера прилике? Те шај те дикхе со шај те поможинел туке те ане одлука, дикх о ВИДЕОКЛИПИ.

ВИДЕОКЛИПИ: Дали те икалав алкохол? (2:41)

Читин Римјаните 13:13 хем 1. Коринќаните 10:31, 32. Пало секова стихо, керен лафи башо акава пучибе:

• Сар акава начело шај те поможинел туке те ане одлука со ка керел бахтало е Јехова?

5. Одлучин кобор ка пие

Ако одлучинеа те пие алкохолна пијалокија ма бистре кај иако о Јехова на забранинела о пијбе алкохол, сепак ов осудинела о претерано пијбе. Соске? Читин Осија 4:11, 18, а пало адава керен лафи башо акава пучибе:

• Со шај те случинел пе кеда некој превише пиела?

Со ка поможинел аменге те на пија бут? Ваљани те ова скромна, јавере лафенцар ваљани те ова свесна башо амаре границе. Читин Изреки 11:2, а пало адава керен лафи башо акава пучибе:

• Соске тано шукар англедер те одредина кобор ка пија?

6. Со ка поможинел некаске те чхинавел е претерано пијбаја?

ВИДЕОКЛИПИ: „Нашти сине више те живинав асавко живото“ (6:32)

• Сар понашинела пе сине о Димитри кеда сине мато?

• Дали шај сине одма те чхинавел е пијбаја?

• Сар сепак ко крајо успејнѓа те чхинавел е претерано пијбаја?

Читин 1. Коринќаните 6:10, 11, а пало адава керен лафи башо акала пучиба:

• Кобор тано сериозно о маќојбе?

• Котар џанаја кај окола со иси лен проблеми е алкохолеа шај те менинен пе?

Читин Матеј 5:30, а пало адава керен лафи башо акава пучибе:

• Кеда о Исус вакерѓа те чхина амаро вас, ов мислинѓа ко адава кај ваљани те откажина амен таро несаве буќа те шај те угодина е Јеховаске. Со шај те кере ако туке пхаро те мукхе о алкохол?a

Читин 1. Коринќаните 15:33, а пало адава керен лафи башо акава пучибе:

• Сар шај тло друштво те влијајнел упро адава кобор ка пие?

СО СИКЛИЛЕМ

О Јехова денѓа о алкохол те шај те уживина, ама ов осудинела о претерано пијбе хем о маќојбе.

Сар ка одговорине?

• Со вакерела и Библија башо алкохол?

• Соске тано опасно претерано те пиел пе алкохол?

• Сар шај те поштујна е јаверенгере одлуке башо алкохол?

ИСТРАЖИН

Дикх кола чекорија ка поможинен туке те борине тут против о алкохол.

„Исправен став кон алкохолот“ (Стражарска кула таро 1 јануари 2010)

Дали ваљани о христијања те керен „живели“?

„Прашања од читателите“ (Стражарска кула таро 15 февруари 2007)

Ко искуство е насловеа „Бев буре без дно“, дикх сар јекх мануш чхинавѓа е пијбаја.

„Библијата менува животи“ (Стражарска кула таро 1 мај 2012)

Сарине иси амен различно вкус кеда керела пе лафи башо урајбе хем башо изглед. Дали шај те задржина амаро вкус башо урајбе хем изглед, а ко исто време те кера бахтало е Јехова? Оја шај, ако икераја амен ко некобор едноставна библиска начелија. Те дикха кола тане адала начелија.

1. Кола начелија шај те водинен амен кеда ваљани те одлучина со ка урава хем сар ка изгледина?

Амаро урајбе хем амаро изглед ваљани те овел пристојно, скромно хем разборито. Исто аѓаар, ваљани секогаш те ова чиста, соске адалеа сикаваја е јаверенге кај служинаја е Девлеске (1. Тимотеј 2:9, 10). Сар шај те применина акала штар начелија? 1) Пристојно: Сар со шај сине те дикхе таро амаре состанокија, амен сар е Јеховаскере слуге иси амен различна вкусија, ама амаро урајбе хем амаре фризуре секогаш сикавена кај поштујнаја амаре Девле. 2) Скромно: Ваљани те пазина те на привлекујна превише внимание ки аменде хем те на поттикнина е јаверен ко неморална мисле. 3) Разборито: На ваљани те следина секоја неви мода ко свето. 4) Служинаја е Девлеске: Амаро урајбе хем амаро изглед секогаш ваљани те сикавел кај служинаја е Девлеске. О мануша околу аменде локхесте ваљани те дикхен кај амен обожавинаја е чачутне Девле (1. Коринќаните 10:31).

2. Сар амаро урајбе хем амаро изглед влијајнела упро амаре пхраља хем пхења?

Иако иси амен слобода те бирина со ка урава хем сар ка изгледина, сепак ваљани те размислина сар адава ка влијајнел упро јавера. Амен на мангаја те кера некој те осетинел пе незгодно. Наместо адава, даја амендар са те кера адава сој тано шукар амаре пашутнеске те шај те изградина ле. (Читин Римјаните 15:1, 2.)

3. Сар шај амаро урајбе хем амаро изглед те керел о мануша те манген те сикљовен повише башо Јехова?

Секогаш трудинаја амен те урава амен хем те изгледина шукар. Ама, посебно пазинаја ко адава кеда џаја ко состанокија хем кеда сием ки служба. Адава кераја ле адалеске со на мангаја те цида е манушенгоро внимание таро шукар хабери со проповединаја ле. Наместо адава, амен мангаја адалеа сар ураваја амен хем сар изглединаја те украсина о сикљојба таро амаро Спасители, о Девел. Адава шај те керел о мануша те манген те сикљовен повише баши лесте (Тит 2:10).

ДОЗНАЈН ПОВИШЕ

4. Амаро шукар урајбе хем изглед сикавела поштовање е Јеховаске

Која тани и најважно причина соске пазинаја ко амаро урајбе хем ко амаро изглед? Читин Псалм 47:2, а пало адава керен лафи башо акала пучиба:

• Сар адава со џанаја кај амен претставинаја е Јехова ваљани те влијајнел упро адава сар ураваја амен хем сар изглединаја?

• Со мислинеа, дали тано чаче добором важно те пазина ко амаро урајбе хем изглед кеда џаја ко состанокија хем кеда сием ки служба? Соске мислинеа аѓаар?

5. Со ка поможинел аменге те ана шукар одлуке башо амаро урајбе хем амаро изглед?

Дикх о ВИДЕОКЛИПИ.

ВИДЕОКЛИПИ: „Керен са баши е Девлескири слава“ (10:18)

Бизи разлика дали амаре шеја тане скупа или на, ола ваљани те овен чиста хем соодветна баши ситуација коте со аракхљоваја. Читин 1. Коринќаните 10:24 хем 1. Тимотеј 2:9, 10, а пало адава керен лафи башо акала пучиба. Соске на ваљани те урава шеја кола сој тане...

• неуредна или претерано лежерна?

• превише тесна, превише пхравде или провокативна?

Иако амен на сием тело е Мојсеескоро закони, сепак ов сикавела аменге сар о Јехова размислинела. Читин 5. Мојсеева 22:5, а пало адава керен лафи башо акава пучибе:

• Соске на ваљани јекх мурш те уравел пе хем те изглединел сар јекх џувли или јекх џувли те уравел пе хем те изглединел сар мурш?

Читин 1. Коринќаните 10:32, 33 хем 1. Јованово 2:15, 16, а пало адава керен лафи башо акала пучиба:

• Соске на ваљани те овел аменге са јекх сар о јавера хем о пхраља таро собрание дикхена ко адава сар ураваја амен хем сар изглединаја?

• Сар уравена пе хем сар изглединена о мануша ко тхан коте со живинеа?

• Со мислинеа, дали адава урајбе хем адава изглед тано соодветно јекхе христијанеске хем соске мислинеа аѓаар?

СО СИКЛИЛЕМ

Кеда пазинаја сар ураваја амен хем сар изглединаја, сикаваја поштовање е Јеховаске хем е јаверенге.

Сар ка одговорине?

• Соске тано важно е Јеховаске сар ураваја амен хем сар изглединаја?

• Кола начелија шај те водинен амен кеда ваљани те одлучина со ка урава хем сар ка изгледина?

• Сар амаро урајбе хем амаро изглед влијајнела упро адава сар о јавера дикхена ко Јехова?

ИСТРАЖИН

Дали јекх христијани смејнела те тетовиринел пе?

„Што вели Библијата за тетовирањето?“ (интернет статија)

Дознајн кола јавера начелија шај те поможинен аменге те ана шукар одлуке башо амаро урајбе хем изглед.

„Го славиш ли Бог со својот начин на облекување?“ (Стражарска кула таро септември 2016)

Со поможинѓа јекхе ромњаке те поштујнел е јаверенгири одлука башо адава сар ка уравен пе хем сар ка изглединен?

„Облеката и дотерувањето ми беа камен на спрепнување“ (Разбудете се! таро 8 април 2004)