Ма мукх ништо те чхинавел тут те добине и награда

1, 2. а) Која награда аџикерена е Девлескере слуге? б) Со поможинела аменге те на бистра и награда? (Дикх и слика ко почеток тари статија.)

Е ПОМАЗАНИКОН иси лен бут шужи надеж. О апостол Павле баши акаја надеж вакерѓа кај тани „награда таро Девел, о живото ко небо“ (Фил. 3:14). О Исус Христос хем о помазаникија таро небо ка владинен ко лескоро Царство хем ка поможинен е манушенге те овен совршена (Отк. 20:6). Акаја тани чаче бут шужи надеж! Е јавере бакхрен иси лен надеж те живинен вечно ко рај ки Пхув. Ола бут радујнена пе баши акаја награда! (2. Пет. 3:13).

² Те шај те поможинел е помазаниконге те ачховен верна хем те добинен и награда, о Павле вакерѓа ленге: „Мислинен ко адава сој ко небо“ (Кол. 3:2). Ола ваљани сине те мислинен ки пли скапоцено надеж те живинен ко небо (Кол. 1:4, 5). Кеда е Девлескере слуге размислинена башо берекетија со ветинѓа лен о Јехова, адава поможинела ленге те на бистрен и награда, бизи разлика дали иси лен надеж те живинен ко небо или ки Пхув (1. Кор. 9:24).

3. Саво совет денѓа о Павле е христијаненге?

³ Исто аѓаар, о Павле советинѓа е христијанен те аракхен пе таро са адава со шај те чхинавел лен те добинен и награда. На пример, ов пишинѓа е пхраленге таро Колоси башо ховавне христијања кола со мангле те керен е Девлескири волја аѓаар со икерена сине е Мојсејескоро закони наместо те сикавен вера ко Христос (Кол. 2:16-18). О Павле исто аѓаар пишинѓа башо буќа кола со шај авдиве да те чхинавен амен те добина и награда таро Девел. Ов објаснинѓа сар те борина амен е неморална желбенцар хем со те кера кеда иси амен проблемија ки фамилија или е пхраленцар ко собрание. О советија со денѓа лен о Павле шај те користинен аменге авдиве. Адалеске те дикха несаве таро акала корисна советија сој тане пишиме ко лескоро писмо е пхраленге ко Колоси.

ЦИДЕН ТУМЕНДАР О НЕМОРАЛНА ЖЕЛБЕ

4. Соске о неморална желбе шај те чхинавен амен те добина и награда?

⁴ Откеда о Павле сетинкерѓа е христијанен баши ленгири шужи надеж, ов пишинѓа: „Целосно циден тумендар о желбе со авена таро тело: о сексуално неморал, о мелалипе, и неконтролирано сексуално страст, и лошно желба хем и желба те овел тумен са повише хем повише“ (Кол. 3:5). О неморална желбе шај те овен бут силна хем шај те анен џи ко адава те нашава амаро амалипе е Јеховаја хем амари надеж баши иднина. Јекх пхрал со керѓа неморал хем пало несаво време иранѓа пе ко собрание вакерѓа: „О неморална желбе добором силно влијајнѓе упри манде со уљум свесно со керава чак откеда сине бут касно“.

5. Сар шај те заштитина амен ко опасна ситуацие?

⁵ Ваљани посебно те пазина ако аракхљоваја ко ситуацие кола со шај те чхивен амен те пхага е Јеховаскере мерилија. На пример, кеда дуј џене тане ки врска, мудро тано панда таро почеток те чхивен песке јасна границе башо буќа сар сој о пипибе или о чумибе. Исто аѓаар, ваљани англедер те чхивен песке разумна границе те шај те на анен пе ко ситуацие те ачховен коркори ко тхана коте со никој нашти те дикхел лен (Изр. 22:3). Јавера опасна ситуацие шај те овен кеда несаво Јеховаскоро сведоко ваљани те џал ко службено друмо или те керел бути некасаја таро спротивно пол (Изр. 2:10-12, 16). Сар шај те заштитине тут ко асавке ситуацие? Вакер кај сиан е Јеховаскоро сведоко. Понашин тут пристојно хем никогаш ма бистре кај о флертујбе шај те анел џи ко баре последице. Исто аѓаар ваљани те пазина ко ситуацие кеда осетинаја амен коркори или тажна. Ко асавке моментија шај мангаја некој те сикавел аменге кај ценинела амен. Шај осетинаја добором бари потреба таро внимание со сием спремна те прифатина било каскоро внимание. Акава тано опасно. Ако осетинеа тут некогаш аѓаар, ма кер ништо со ка чхинавел тут те добине и награда. Роде помош таро Јехова хем таро пхраља хем пхења. (Читин Псалм 34:18; Изреки 13:20.)

6. Со на ваљани те бистра кеда биринаја забава?

⁶ Те шај целосно те цида о неморална желбе, ваљани те аракха амен тари неморално забава. Авдиве, баро дело тари забава со иси ко свето тани слично ко адава со керела пе сине ко Содом хем Гомор (Јуда 7). Окола со керена асавки забава сикавена о сексуално неморал сар нешто сој нормално хем нане опасно. Адалеске, секогаш ваљани те пазина. На ваљани те прифатина било која забава со нудинела аменге о свето. Наместо адава, ваљани те бирина забава која нане те чхинавел амен те добина и награда — о вечно живото (Изр. 4:23).

„УРАВЕН ТУМЕН КО МАНГИПЕ“ ХЕМ ЉУБЕЗНОСТ

7. Саве проблемија шај те овен ко собрание?

⁷ Баро берекети тано адава со сием дело тари е Јеховаскири организација. Амен проучинаја е Девлескоро Лафи ко состанокија хем мангипаја поддржинаја јекх јекхе. Акава поможинела аменге те на бистра и награда. Ама, понекогаш случинена пе буќа кола со шај те анен џи ко проблемија машкар о пхраља хем о пхења. Ако на решинаја акала проблемија, ола локхе шај те анен џи ко адава те икера холи некаске. (Читин 1. Петрово 3:8, 9.)

8, 9. а) Кола особине ка поможинен аменге те добина и награда? б) Со ка поможинел аменге те икера о мир ко собрание ако несаво пхрал или пхен дукхавѓа амен пле лафенцар или понашибаја?

⁸ На ваљани те мукха адава со сием хољаме некаске те чхинавел амен те добина и награда. О Павле вакерѓа со ваљани те кера: „Адалеске со сиен бириме таро Девел, чиста хем мангле, уравен тумен ко сочувство, мангипе, љубезност, понизност, ма хољанен сигате хем овен стрплива. Трпинен тумен јекх јекхеа хем цело вилеа простинен туменге чак кеда некој ка вреџинел тумен. Сар о Јехова спремно со простинѓа туменге, аѓаар керен тумен да. Ама, освен са акава, уравен тумен ко мангипе, соске о мангипе керела о мануша те овен ко совршено јекхипе“ (Кол. 3:12-14).

⁹ О мангипе хем и љубезност шај те поможинен аменге те простина е јаверенге. Ако несаво пхрал или пхен дукхавѓа амен пле лафенцар или понашибаја, шај те сетина амен ко ситуацие кеда амен да вакерѓем или керѓем о исто е јаверенге. На сием ли благодарна е пхраленге хем е пхењенге со мангипаја простинѓе аменге? (Читин Проповедник 7:21, 22.) Благодарна сием со о Христос мангипаја поможинела е Девлескере слугенге те овел лен јекхипе (Кол. 3:15). Сарине мангаја е исто Девле, проповединаја о исто хабери хем иси амен о иста проблемија. Ако сикаваја мангипе хем љубезност хем ако простинаја јекх јекхеске, о јекхипе ко собрание ка овел позорало хем ка шај понадари да те мислина ки награда.

10, 11. а) Соске и љубомора тани опасно? б) Со ваљани те кера те на мукха и љубомора те чхинавел амен те добина награда?

¹⁰ Ки Библија иси примерија кола со сикавена кај и љубомора шај те чхинавел амен те добина и награда. На пример, о Каин уло љубоморно е Авелеске хем мударѓа ле. О Кореј, о Датан хем о Авирон сине љубоморна е Мојсејеске хем бунинѓе пе против лесте. О Саул, сине љубоморно е Давидеске хем мангља те мударел ле. Адалеске, на ваљани те изненадинел амен адава со вакерела е Девлескоро Лафи: „Коте со иси љубомора хем акошибе, адатхе нане редо хем иси разна лошна буќа“ (Јак. 3:16).

¹¹ Ако трудинаја амен те бајрара амаро мангипе хем те ова љубезна, нане локхесте те ова љубоморна. Е Девлескоро Лафи вакерела: „О мангипе тано стрпливо хем љубезно. О мангипе нане љубоморно“ (1. Кор. 13:4). Ако мангаја и љубомора те на овел дело амендар, ваљани те трудина амен те дикха ко буќа сар со дикхела о Јехова. Ко амаре пхраља хем пхења ваљани те дикха сар делија таро исто тело, а адава тано о собрание. И Библија вакерела: „Ако несаво дело тано фалимо, са о јавера делија тане бахтале леа“ (1. Кор. 12:16-18, 26). Значи, ако случинела пе нешто шукар јекхе пхралеске, амен нане те ова леске љубоморна, него ка ова бахтале леа. Размислин башо шукар пример со денѓа о Јонатан, о чхаво е Саулескоро. О Јонатан на сине љубоморно кеда о Давид сине биримо те овел цари ко лескоро тхан. Ов чак охрабринѓа хем поддржинѓа е Давиде (1. Сам. 23:16-18). Дали шај амен да те сикава мангипе хем љубезност сар о Јонатан?

ДОБИНЕН И НАГРАДА САР ФАМИЛИЈА

12. Кова совет тари Библија шај те поможинел аменге те добина и награда сар фамилија?

¹² Кеда сарине тари фамилија икерена пе ко мерилија тари Библија, машкар ленде ка овел мир, бахталипе, хем ка шај те добинен и награда таро Девел. О Павле денѓа акава мудро совет е фамилиенге: „Тумен ромњален, шунен тумаре ромен, сар со аџикерела о Господари. Тумен ромален, манген тумаре ромњен хем ма понашинен тумен ленцар грубо. Тумен чхавален, шунен тумаре родителен ко са, соске аѓаар мангела о Господари. Тумен о дада, ма хољанкерен тумаре чхавен, хем адалеа те разочаринен лен“ (Кол. 3:18-21). Сигурно ка сложине тут кај о совет со пишинѓа ле о Павле шај те поможинел сариненге ки фамилија.

13. Сар шај јекх пхен те поможинел пле ромеске кова со на служинела е Јеховаске те мангел те овел лескоро слуга?

¹³ Со шај те кере ако мислинеа кај тло ром, кова со на служинела е Јеховаске, на понашинела пе туја шукар? Дали ка кере пошукар и ситуација ако хољанеа хем акошеа тут леа? Чак ако побединеа ко адава акошибе, дали адалеа ка охрабрине ле те служинел е Јеховаске? Веројатно на. Ама, ако сикавеа кај поштујнеа ле сар поглавари, ка поможине те овел мир ки тли фамилија хем ка фалине е Јехова. Тло шукар пример шај ка охрабринел тле роме те мангел те служинел е Јеховаске хем тегани шај заедно те добинен и награда. (Читин 1. Петрово 3:1, 2.)

14. Со ваљани те керел јекх пхрал ако лескири ромни која со на служинела е Јеховаске на поштујнела ле?

¹⁴ Со шај те кере ако мислинеа кај тли ромни, која со на служинела е Јеховаске, на поштујнела тут? Дали мислинеа кај повише ка поштујнел тут ако викибаја мангеа те сикаве лаке кој тано о газда ко кхер? Сигурно кај на! О Девел аџикерела тутар те ове ром кова со мангела пле ромња хем постапинела сар о Исус (Еф. 5:23). Сар поглавари е собраниескоро, о Исус секогаш тано стрпливо хем сикавела мангипе (Лука 9:46-48). Ако постапинеа сар о Исус, шај тли ромни да ка мангел те служинел е Јеховаске.

15. Сар јекх пхрал шај те сикавел пле ромњаке кај мангела ла?

¹⁵ О Јехова вакерела е роменге: „Тумен ромален, манген тумаре ромњен хем ма понашинен тумен ленцар грубо“ (Кол. 3:19). Јекх шукар ром сикавела кај ценинела пле ромња аѓаар со шунела ла кеда ој керела лафи хем сикавела лаке кај леске тано важно адава со ој мислинела (1. Пет. 3:7). Иако нашти секогаш те керел адава ој со родела лестар, адава со ка шунел ла ка поможинел леске те анел пошукар одлуке (Изр. 15:22). Јекх шукар ром на родела тари пли ромни те поштујнел ле, него трудинела пе те заслужинел адава. Кеда јекх ром мангела пле ромња хем пле чхавен, ола шај те овен побахтале хем шај те добинен и награда — о вечно живото.

ТЕРНАЛЕН — МА МУКХЕН НИШТО ТЕ ЧХИНАВЕЛ ТУМЕН ТЕ ДОБИНЕН И НАГРАДА!

16, 17. Тернален, со шај те поможинел туменге те на хољанен сигате тумаре родителенге?

¹⁶ Ако сиан тинејџери, со шај те кере ако мислинеа кај тле родителија на хаљовена тут или кај тане бут строга туја? Акава шај добором бут нервиринела тут со чак пучеа тут дали мангеа те служине е Јеховаске. Ама, ако цидеа тут таро Јехова, ка хаљове кај никој ко свето на мангела тут повише таро тле родителија кола со служинена е Јеховаске хем таро пхраља хем пхења ко собрание.

¹⁷ Размислин башо акава: Ако тле родителија никогаш на попрајнена тут, сар ка џане дали чаче грижинена пе туке? (Евр. 12:8). Точно, ола нане совршена хем адалеске шај нервиринела тут о начин сар воспитинена тут. Ама, ма дикх само адава. Трудин тут те хаљове соске керена или вакерена нешто. Ов смиримо хем ма реагирин нервозно. Е Девлескоро Лафи вакерела: „О гоѓавер мануш контролиринела пле лафија, о мудро мануш ачховела смиримо“ (Изр. 17:27). Чхив туке цел те ове зрело мануш кова со прифатинела советија хем сикљола лендар бизи разлика ко саво начин тане вакерде (Изр. 1:8). Никогаш ма бистре кај тле родителија кола со мангена е Јехова тане скапоцено поклон. Ола мангена те поможинен туке вечно те живине.

18. Соске сиан одлучно те на бистре и награда?

¹⁸ Бизи разлика дали иси амен надеж те живина ко небо или ко рај ки Пхув, секоле јекхе амендар аџикерела ле бут шужи иднина. Амари надеж тани сигурно соске адава ветинѓа амаро Створители, кова со вакерела: „И пхув ка овел пхерди пенџарибаја башо Јехова“ (Иса. 11:9). Панда хари секова мануш ка овел сикавдо таро Девел. Чаче врединела те трудина амен те добина адаја награда. Адалеске, никогаш ма бистре со ветинѓа туке о Јехова хем ма мукх ништо те чхинавел тут те добине и награда!