Овен џангавде хем пазинен!

1. Со вакерѓа о Исус пле учениконге башо адава кеда ка авел о крајо хем саво предупредување денѓа лен?

НЕКОБОР диве англедер те мерел о Исус, штар таро лескере ученикија пучле ле: „Кова ка овел о знако... башо крајо акале светоскоро?“ (Мат. 24:3). Акала ученикија веројатно пучена пе сине котар ка џанен кеда ка овел уништимо о Ерусалим хем о храми. Кеда одговоринѓа ленге, о Исус на керѓа лафи само башо крајо таро Ерусалим хем таро храми, него исто аѓаар башо „крајо акале светоскоро“ сој ко амаро време. Ов вакерѓа: „Башо адава диве или саати никој на џанела. Ни о ангелија ко небо, ни о Чхаво, него само о Дад“. Пало адава ов предупрединѓа са пле ученикон те ачховен џангавде хем те пазинен (Мар. 13:32-37).

2. Соске сине бут важно о христијања таро прво веко те ачховен џангавде?

² О еврејска христијања таро прво веко мора сине те ачховен џангавде, соске таро адава зависинела сине ленгоро живото. О Исус вакерѓа пле следбениконге ко со ваљани те дикхен те шај те џанен кај тано паше о крајо кеда ка овен уништиме о Ерусалим хем о храми. Ов вакерѓа: „Кеда ка дикхен о Ерусалим кај тано опколимо таро војске, тегани џанен кај лескоро уништување тано паше“. Ко адава моменти ола ваљани сине те овен послушна ко е Исусескоро предупредување хем „те нашен ко планине“ (Лука 21:20, 21). Окола со шунѓе акава предупредување преживинѓе кеда о Римјања уништинѓе о Ерусалим.

3. Башо со ка кера лафи ки акаја статија?

³ Авдиве амен живинаја ко крајо акале лошно светоскоро. Адалеске амен да мора те ачхова џангавде. Ки акаја статија ка дикха сар шај те ова урамнотежена џикоте дикхаја со случинела пе ко свето, сар шај те пазина со кераја хем сар шај најшукар те користина о време со ачхило.

ОВ УРАМНОТЕЖЕНО КЕДА ДИКХЕА СО СЛУЧИНЕЛА ПЕ КО СВЕТО

4. Соске ваљани те интересинел амен сар о моментална светска настанија исполнинена о библиска пророштвија?

⁴ Шукар тано те интересина амен сар о светска настанија исполнинена о пророштвија. На пример, о Исус вакерѓа кола конкретна настанија ка случинен пе те шај те џана кај о крајо акале светоскоро тано паше (Мат. 24:3-14). О апостол Петар охрабринѓа амен те дикха сар исполнинена пе о пророштвија те шај амари вера те овел зорали (2. Пет. 1:19-21). А о последно лил тари Библија почминела е лафенцар: „Откровение таро Исус Христос, кова со денѓа ле о Девел, те сикавел пле робонге о буќа со ка случинен пе панда хари“ (Отк. 1:1). Адалеске интересинаја амен башо настанија со случинена пе ко свето хем мангаја те џана сар ола шај те исполнинен несаво библиско пророштво. Хем шај бут мангаја те кера лафи башо асавке настанија јекх јекхеа.

5. Со ваљани те избегина, а со ваљани те кера? (Дикх хем и слика.)

⁵ Кеда кераја лафи башо несаво библиско пророштво на ваљани те ширина амаро лично мислење башо адава сар ка исполнинел пе. Соске? Адалеске со на мангаја те вакера нешто со ка анел поделбе ко собрание. На пример, шај ка шуна сар о светска водачија керена лафи башо адава сар ка решинен несаво проблеми хем ка анен мир хем сигурност. Наместо те претпоставина кај асавке изјаваја исполнинела пе о пророштво таро 1. Солуњаните 5:3, амен ваљани те џана о најневе информацие сој ко амаре публикацие. Кеда кераја лафи башо буќа со темелинена пе ко амаре публикацие тегани поможинаја е пхраленге те ачхон ко јекхипе аѓаар со ка размислинен ко исто начин (1. Коринќаните 1:10; 4:6).

6. Со шај те сикљова таро 2. Петрово 3:11-13?

⁶ Читин 2. Петрово 3:11-13. О апостол Петар поможинела аменге те овел амен урамнотежено стави кеда размислинаја башо несаво библиско пророштво. Ов поттикнинела амен те овел амен ки годи е Јеховаскоро диве. Соске? На адалеске со мангаја те открина о диве хем о саати кеда ка авел о Армагедон, него адалеске со мангаја те користина о време со ачхило те шај амаре постапке те овен света хем лендар те дикхел пе кај сием целосно посветиме е Девлеске (Мат. 24:36; Лука 12:40). Јавере лафенцар, мангаја те постапина ко исправно начин хем и служба те кера ла адалеске со мангаја ле. Адалеске ваљани те пазина со кераја.

СО ЗНАЧИНЕЛА ТЕ ПАЗИНА СО КЕРАЈА?

7. Сар сикаваја кај пазинаја амен? (Лука 21:34).

⁷ О Исус вакерѓа пле следбениконге те пазинен на само ко адава со случинела пе ко свето него исто аѓаар те пазинен ки песте. Акава јасно дикхела пе таро предупредување сој пишимо ко Лука 21:34. (Читин.) О Исус адатхе вакерѓа: „Пазинен тумен“. Окова со пазинела ки песте свесно тано баши било која опасност со шај те руминел лескоро амалипе е Јеховаја, хем трудинела пе те избегинел ла. Аѓаар ов ачховела ко е Девлескоро мангипе (Изр. 22:3; Јуда 20, 21).

8. Со вакерѓа о апостол Павле е христијаненге?

⁸ О апостол Павле пхенѓа е христијаненге те пазинен ки песте. На пример е христијаненге ко Ефес вакерѓа: „Шукар пазинен сар живинена — на сар окола со нане мудра, него сар окола сој мудра“ (Еф. 5:15, 16). Амари духовност тани нонстоп ки опасност, адалеске и Библија дела амен совет те трудина амен те хаљова „сој тани е Јеховаскири волја“ те шај те заштитина амен тари било која опасност со авела таро Сатана (Еф. 5:17).

9. Сар шај те хаљова која тани е Јеховаскири волја?

⁹ И Библија на керела лафи баши секоја јекх опасност со шај те руминел амаро амалипе е Јеховаја. Бут пути мора те ана одлуке коленге со ки Библија на керела пе конкретно лафи. Те шај те ана мудра одлуке ваљани те хаљова која тани „е Јеховаскири волја“. А те шај те кера адава ваљани редовно те проучина е Девлескоро Лафи хем хор те размислина башо адава со читинаја. Со повише хаљоваја е Јеховаскири волја хем трудинаја амен те овел амен е Христосескири годи, добором побари ка овел и веројатност те постапина мудро, чак кеда нане те овен амен конкретна упатствија со ка вакерен аменге со те кера (1. Кор. 2:14-16). Понекогаш несаве опасностија шај локхе те дикхен пе, а јавера на.

10. Кола тане несаве опасностија со мора те избегина?

¹⁰ Несаве опасностија со мора те избегина лен тане о флертујбе, о претерано пијбе, о претерано хајбе, те користина лафија со поврединена, исто аѓаар те дикха буќа коте со иси насилство, порнографија хем слично (Пс. 101:3). Амаро душмани о Бенг родела секогаш прилике те руминел амаро амалипе е Јеховаја (1. Пет. 5:8). Ако на пазинаја, ов шај те „садинел“ ки амари годи хем ко амаро вило љубомора, нечесност, алчност, омраза, гордост хем холи (Гал. 5:19-21). Ко почеток шај те мислина аменге кај акала чувствија нане добором опасна. Ама ако одма на кераја нешто те шај те икала лен корендан, ола ка продолжинен те бајрон сар јекх отровно растение хем те керен аменге штета (Јак. 1:14, 15).

11. Која тани јекх гаравди опасност со мора те избегина ла, хем соске?

¹¹ Јекх гаравди опасност тани о лошно друштво? Размислин баши акаја ситуација. Кереа некасаја бути со нане Сведоко. Адалеске со мангеа то колега те овел ле шукар мислење башо е Јеховаскере сведокија сиан леа љубезно хем поможинеа ле. Понекогаш шај чак заедно кереа леа пауза. Пало несаво време почесто сиан леа ки пауза. Ко несаве ситуацие почминела те керел лафи башо неморална буќа. Прво игнориринеа адава, ама покасно навикнинеа ко асавке разговорија хем на сметинела тут више адава. Тегани викинела тут заедно те икљовен пали бути. Пало несаво време почминеа више те размислине сар лесте. Хем нане те накхел бут време кеда ка почмине те понашине тут сар лесте. Џанѓола пе, амен сием љубезна хем поштујнаја саринен, ама на смејнаја те бистра кај амаро друштво шај бут те влијајнел упри аменде (1. Кор. 15:33). Сар со поттикнинѓа амен о Исус, ако пазинаја со кераја нане те дружина амен околенцар со на живинена спрема е Јеховаскере мерилија (2. Кор. 6:15). Ка дикха и опасност хем ка избегина ла.

КОРИСТИН ТЛО ВРЕМЕ НАЈШУКАР СО ШАЈ

12. Со ваљани сине е Исусескере ученикија те керен џикоте аџикерѓе те авел о крајо?

¹² О Исус мангља лескере ученикија те овен зафатиме џикоте аџикерена сине те авел о крајо. Адалеске денѓа лен важно задача. Заповединѓа ленге те проповединен о шукар хабери „ко Ерусалим, ки цело Јудеја, ки Самарија хем ко најдур тхана ки пхув“ (Дела 1:6-8). Сине лен бари бути те керен. Адалеа со сине зафатиме те завршинен акаја задача ола користинѓе пло време најшукар со шај.

13. Соске ваљани те користина амаро време најшукар со шај? (Колошаните 4:5).

¹³ Читин Колошаните 4:5. Те шај те пазина со кераја ваљани шукар те размислина сар користинаја амаро време. Секоле јекхеске амендар шај те случинен пе буќа со на очекујнаја лен (Проп. 9:11). Амаро живото шај таро јекх пути те завршинел.

14-15. Сар шај најшукар те користина амаро време? (Евреите 6:11, 12). (Дикх хем и слика.)

¹⁴ Кеда кераја е Јеховаскири волја хем оваја леа попаше тегани користинаја амаро време најшукар со шај (Јован 14:21). Ваљани те ова „духовно зорале, истрајна, секогаш зафатиме ки бути е Господареске“ (1. Кор. 15:58). Тегани кеда ка авел о крајо, бизи разлика дали о крајо акале светоскоро или о крајо амаре животоскоро, нане те пера пишмани соске на користинѓем амаро време најшукар со шај (Мат. 24:13; Рим. 14:8).

¹⁵ Авдиве о Исус понадари да водинела пле ученикон џикоте проповединена башо е Девлескоро Царство ки цело пхув. Ов икерѓа пе ко пло лафи. Преку е Јеховаскири организација о Исус обучинела амен сар те проповедина хем дела амен са со ваљани аменге те шај те завршина адаја задача (Мат. 28:18-20). Амен кераја амаро дело аѓаар со даја амендар са те проповедина хем те поучина е јаверен хем аѓаар со ачховаја џангавде џикоте аџикераја о Јехова те анел о крајо акале светоскоро. Ако применинаја о совет таро Евреите 6:11, 12, ка икера амен цврсто ки амари вера џи ко крајо е светоскоро. (Читин.)

16. Со сием одлучна те кера?

¹⁶ О Јехова више одрединѓа диве хем саати кеда ка анел о крајо е Сатанаскере светоске. Кеда ка авел адава диве о Јехова сигурно ка исполнинел са о пророштвија сој тане пишиме ко лескоро Лафи. Ама понекогаш шај те мислина аменге кај о крајо тано панда дур. Сепак, е Јеховаскоро диве „нане те каснинел“ (Авак. 2:3). Адалеске, те ова одлучна понадари да те дикха ко Јехова аѓаар со спремно ка аџикера е Девле со ка спасинел амен (Мих. 7:7).