Понадари да нека овел тут самоконтрола

1, 2. а) Саве тане о последице кеда некас нане самоконтрола? б) Соске тано важно те кера лафи баши самоконтрола?

И САМОКОНТРОЛА тани јекх особина која со о Јехова шај те поможинел аменге те сикава ла (Гал. 5:22, 23). Е Јехова иси ле совршено самоконтрола, ама амен нане амен адалеске со сием несовршена. Е манушен авдиве иси лен бут проблемија адалеске со нане лен самоконтрола. Адала со нане лен самоконтрола на керена ко време о важна буќа, на џала ленге шукар и школа хем нане шукар работникија. Исто аѓаар, адава шај те анел џи ко малтретирибе, маќојбе, насилство, развод, борчија, зависност, затвор, емоционално дукх, сексуално пренослива насвалипа хем кхамнипе со нане планиримо (Пс. 34:11-14).

² О мануша со нане лен самоконтрола керена проблемија песке хем е јаверенге. Сар со накхела о време, дикхјола пе кај е манушен иси лен са похари самоконтрола. Акава на ваљани те изненадинел амен соске ки Библија пишинела кај адава тано јекх доказ кај живинаја ко „последна диве“ (2. Тим. 3:1-3).

3. Соске ваљани те овел амен самоконтрола?

³ Соске ваљани те овел амен самоконтрола? Таро дуј важна причине. Прво, е манушен со контролиринена пле чувствија обично иси лен похари проблемија. Ола тане емоционално постабилна, ко шукар односија тане е јаверенцар, на хољанена сигате, на секиринена пе претерано хем на перена локхе ки депресија. Дујто, те шај те ачхова е Девлескере амала, ваљани те борина амен против о искушенија хем те контролирина амаре погрешна желбе. О Адам хем и Ева на успејнѓе те керен адава (1. Мој. 3:6). Слично сар ленде, бут мануша авдиве иси лен баре проблемија адалеске со нане лен самоконтрола.

4. Со шај те охрабринел околен со нане ленге локхо те сикавен самоконтрола?

⁴ О Јехова џанела кај сием несовршена хем кај нане аменге локхо те сикава самоконтрола. Ама, ов мангела те поможинел аменге те контролирина амаре погрешна желбе (1. Цар. 8:46-50). О Јехова тано сар јекх шукар амал со охрабринела околен сој ленге понекогаш пхаро те контролиринен пле чувствија хем желбе. Ки акаја статија ка дикха сар о Јехова сикавела совршено самоконтрола. Исто аѓаар, ка дикха несаве шукар хем лошна примерија тари Библија хем ка дикха несаве практична советија со шај те поможинен аменге те сикава самоконтрола.

О ЈЕХОВА ДЕНЃА АМЕНГЕ ПРИМЕР

5, 6. Саво пример баши самоконтрола денѓа аменге о Јехова?

⁵ Е Јехова иси ле совршено самоконтрола соске ов тано совршено ко секова поглед (5. Мој. 32:4). Тари јавер страна, амен на сием совршена. Ама, шај те сикљова те овел амен побари самоконтрола ако сикљоваја таро лескоро пример. Адава ка поможинел аменге те постапина исправно кеда ка случинел пе нешто со ка вознемиринел амен. Кола тане несаве ситуацие кеда о Јехова сикавѓа самоконтрола?

⁶ Размислин баши е Јеховаскири реакција кеда о Сатана бунинѓа пе против лесте ки градина Еден. Веројатно, адалеске со о Сатана кривинѓа е Јехова, са е Девлескере верна слуге ко небо сине изненадиме, хољаме хем почминѓе те дикхен лошно ки лесте. Шај ту да осетинеа тут слично кеда размислинеа башо са о проблемија со керѓа лен о Сатана. Ама, о Јехова на дозволинѓа те водинен ле о чувствија хем на реагиринѓа ки сиг. Ов постапинѓа исправно. Таро адава сар реагиринѓа о Јехова кеда о Сатана бунинѓа пе, дикхаја кај тано бавно ки холи хем праведно (2. Мој. 34:6; Јов 2:2-6). Јекх причина соске о Јехова дозволинѓа те накхел време тани адаја со на мангела нијекх те овел уништимо, „него саринен те овел лен прилика те кајнен пе“ (2. Пет. 3:9).

7. Со шај те сикљова таро е Јеховаскоро пример?

⁷ Таро е Јеховаскоро пример сикљоваја кај ваљани шукар те размислина англедер те вакера нешто хем кај на ваљани те реагирина бут сигате. Адалеске, кеда ваљани те ане несави важно одлука, одвојн туке време те размислине. Молин е Јехова те дел тут мудрост те шај те џане со те вакере хем сар те постапине (Пс. 141:3). Кеда сием хољаме или вознемириме, бут локхе шај те реагирина бизо те размислина. Адалеске, бут џене амендар вакерѓем или керѓем буќа коленге со пало адава сине аменге пхаро (Изр. 14:29; 15:28; 19:2).

ШУКАР ХЕМ ЛОШНА ПРИМЕРИЈА

8. а) Коте шај те аракха примерија таро мануша кола со сикавѓе самоконтрола? б) Со поможинѓа е Јосифеске те на грешинел кеда е Петефријаскири ромни пробинѓа те завединел ле? (Дикх и слика ко почеток тари статија.)

⁸ Кола примерија тари Библија сикавена кобор тано важно те овел амен самоконтрола? Јекх пример тано о Јосиф, е Јаковескоро чхаво. Ов на мукхља те перел ко искушение кеда служинела сине ко кхер е Петефријаскоро, о заповеднико е фараонескере стражакоро. О Јосиф сине шужо хем свиџинѓа пе е Петефријаскере ромњаке, адалеске ој некобор пути пробинѓа те завединел ле. Со поможинѓа е Јосифеске те на грешинел? Ов веројатно англедер размислинѓа кола ка овен о последице ако керѓа нешто лаја. Пало адава, кеда ој астарѓа ле таро шеја, о Јосиф одма нашља. Ов вакерѓа: „Сар шај те керав добором баро лошнипе хем те грешинав е Девлеске?“ (1. Мој. 39:6, 9; читин Изреки 1:10.)

9. Сар шај те спремине тут башо искушенија?

⁹ Со сикљоваја таро Јосиф? Ако сием ко искушение те пхага е Девлескоро закони, ваљани те борина амен против адава искушение. Англедер те овен е Јеховаскере сведокија несаве сине лен проблеми претерано хајбаја, пиена сине алкохол, пушинена сине, дрогиринена пе сине, керена сине неморал, или сине лен јавера проблемија. Чак откеда крстинѓе пе, понекогаш шај тане ко искушение палем те керен адала буќа. Ако акава некогаш случинела пе туке, размислин кобор лошно ка влијајнел упро тло амалипе е Јеховаја ако пхагеа несаво таро лескере законија. Трудин тут те хаљове кола ситуацие шај те чхивен тут ко искушение хем размислин сар шај те избегине лен (Пс. 26:4, 5; Изр. 22:3). Ама, ако некогаш аракхлиљан ко искушение, молин е Јехова те дел тут мудрост хем самоконтрола те шај те борине тут против о искушение.

10, 11. а) Со случинела пе буте терненге ки школа? б) Со шај те поможинел е терненге те боринен пе против о искушение те пхаѓен е Девлескоро закони?

¹⁰ Авдиве, бут терне Девлескере слуге аракхена пе ки слично ситуација сар о Јосиф. Јекх пример тани и Ким. Лакере соученикија бут пути фалинена пе сине кај ко викенд совѓе некасаја. И Ким на керела сине адава, хем адалеске нашти сине те фалинел пе адалеа. Ој вакерела кај адалеске со сине појавер лендар понекогаш осетинела пе сине „отфрлими хем коркори“ хем лакере соученикија мислинена сине кај ој тани глупаво адалеске со нане ла камло. Ама, и Ким сине мудро. Ој џанља кај, кеда некој тано терно, и желба те овел ле сексуална односија шај те овел бут бари (2. Тим. 2:22). Лакере соученикија бут пути пучена ла сине дали панда на совѓа некасаја. Адава дела ла сине прилика те објаснинел ленге соске на мангела те овел ла секс англедер о брако. Бут сием горда со амаре терне тане одлучна те боринен пе против о притисок те керен сексуално неморал хем о Јехова да тано ленцар гордо!

¹¹ Ки Библија исто аѓаар тане пишиме примерија башо мануша кола со на боринѓе пе против о искушение те керен сексуално неморал. Ки лате исто пишинела кола тане о последице ако нане амен самоконтрола. Ако сиан ки слично ситуација сар и Ким, размислин башо Изреки 7 поглавје коте со пишинела башо јекх терно со на сине гоѓавер. Исто аѓаар, размислин башо Амнон хем башо бут лошна последице со анѓа лескири постапка (2. Сам. 13:1, 2, 10-15, 28-32). О родителија шај те поможинен пумаре чхавенге те овел лен самоконтрола хем мудрост аѓаар со ка керен ленцар лафи башо асавке примерија ки Фамилијарно рат.

12. а) Сар о Јосиф контролиринѓа пле чувствија кеда дикхља пле пхрален? б) Ко кола ситуацие ваљани те контролирина амаре чувствија?

¹² Ки јавер прилика, о Јосиф палем денѓа аменге шукар пример баши самоконтрола. Адава сине кеда лескере пхраља але ко Египет те кинен храна. Те шај те џанел со иси лен ко вило, о Јосиф на вакерѓа ленге кај тано ленгоро пхрал. Кеда нашти сине више те издржинел, ов цидинѓа пе ки страна те овел коркори хем ровѓа (1. Мој. 43:30, 31; 45:1). Ако јекх пхрал или пхен керела нешто со ка вознемиринел амен, адава со ка трудина амен те сикава самоконтрола сар о Јосиф ка поможинел аменге те на вакера или те кера нешто башо кова со пало адава ка овел аменге криво (Изр. 16:32; 17:27). Или, шај некој тари тли фамилија тано исклучимо. Ако сиан ки асавки ситуација, ваљани те контролирине тле чувствија те шај те избегине непотребно контакт леа. Акава шај те овел туке пхаро. Ама, ка овел туке полокхо ако на бистреа кај трудинеа тут те постапине сар о Јехова хем шунеа лескири заповед.

13. Со шај те сикљова таро е Давидескоро пример?

¹³ Исто аѓаар, шај те сикљова таро е Давидескоро пример. Кеда провоциринѓе ле о Саул хем о Симеј о Давид на хољанѓа хем на користинѓа пли моќ против ленде (1. Сам. 26:9-11; 2. Сам. 16:5-10). Ама, сине ситуацие кеда о Давид на сикавѓа самоконтрола. Акава џанаја таро о грево со керѓа ле е Витсавеаја хем тари лескири реакција кеда шунѓа кобор алчно тано о Навал (1. Сам. 25:10-13; 2. Сам. 11:2-4). Таро е Давидескоро пример шај те сикљова важна поуке. Прво, е надгледниконге машкар е Девлескоро народо ваљани самоконтрола те на користинен пло авторитети ко погрешно начин. Дујто, нијекх на ваљани те овел претерано сигурно ки песте кај никогаш нане те грешинел (1. Кор. 10:12).

СО ШАЈ ТУ ТЕ КЕРЕ

14. Со случинѓа пе јекхе пхралеске хем соске тано важно сар реагиринаја амен ко слична ситуацие?

¹⁴ Со шај те кере те овел тут побари самоконтрола? Размислин башо јекх пхрал со викинела пе Луиџи. Јекх мануш кхувѓа лескоро врда. Иако о мануш сине криво, ов почминѓа те викинел леске хем мангља те марел пе леа. О Луиџи молинѓа пе е Јеховаске те ачховел смиримо хем пробинѓа те смиринел е мануше да. Ама, о мануш понадари да викинела сине. О Луиџи пишинѓа о број тари е манушескири регистарско табличка те шај те добинел отштета тари осигурително компанија. Тегани, ов гело песке џикоте о мануш панда викинела сине. Јекх курко пало адава, о Луиџи гело ки повторно посета јекхе манушњате. Сине бут изненадимо кеда дикхља кај лакоро ром сине о шофери со кхувѓа лескоро врда! О мануш лаџандило хем извининѓа пе башо адава со понашинѓа пе леа лошно. Ов вакерѓа леске кај мангела те јавинел пе ки осигурително компанија те шај о Луиџи те добинел посигате и отштета. О мануш шунѓа џикоте керена сине лафи тари Библија хем бут свиџинѓа пе леске адава. Таро акава о Луиџи халило кобор сине важно адава со ачхило смиримо пали сообраќајка хем кобор баре последице шај сине те овен ако ов да хољанела сине. (Читин 2. Коринќаните 6:3, 4.)

15, 16. Сар адава со ка проучине и Библија ка поможинел туке хем тле фамилијаке те сикавен самоконтрола?

¹⁵ Адава со редовно хем хор ка проучина и Библија шај те поможинел аменге те сикава самоконтрола. На ваљани те бистра со вакерѓа о Девел е Исус Навинеске: „Акава лил е законескоро ма те цидел пе тле мујестар, хем ту мора те читине хем те размислине леске диве хем рат, те шај те кере са адава со пишинела ки лесте, соске тегани ка ове успешно ко тло друмо хем ка ове мудро“ (Ис. Нав. 1:8). Сар адава со ка проучине и Библија ка поможинел тут те сикаве самоконтрола?

¹⁶ Сар со дикхлем, ки Библија тане пишиме примерија кола со сикавена соске тано важно те овел амен самоконтрола хем саве ка овен о последице ако нане амен акаја особина. Е Јехова сине ле причина соске мукхља те овен пишиме акала извештаија (Рим. 15:4). Ка овел мудро те читина, те проучина хем хор те размислина баши ленде! Трудин тут те хаљове сар шај те користинен туке хем тле фамилијаке. Молин е Јехова те поможинел тут те применине о советија таро лескоро Лафи. Ако дикхеа кај фалинела туке самоконтрола, признајн туке адава. Пало адава молин тут хем трудин тут те дикхе сар шај те подобрине тут (Јак. 1:5). Истражин ко публикацие те шај те аракхе практична советија со шај те поможинен тут.

17. Сар шај о родителија те поможинен пумаре чхавенге те овел лен самоконтрола?

¹⁷ Сар шај те поможине тле чхавенге те овел лен самоконтрола? О родителија џанена кај о чхаве на бијанѓовена акале особинаја. Адалеске о родителија ваљани те овен шукар пример пле чхавенге те шај те поможинен ленге те овен лен шукар особине (Еф. 6:4). Ако дикхеа кај тле чхавенге фалинела самоконтрола, пуч тут саво пример деа лен ту. Ако сикавеа самоконтрола аѓаар со чхивеа о духовна буќа ко прво тхан, сар сој и служба, о состанокија хем и Фамилијарно рат, тегани ту деа шукар пример тле чхавенге. Хем ма дара те вакере „на“ тле чхавенге кеда ваљани! О Јехова денѓа ограничувања е Адамеске хем Еваке. Акала ограничувања шај сине те поможинен ленге те сикљовен те поштујнен е Јеховаскоро авторитети. Слично, кеда о родителија воспитинена пле чхавен хем дена ленге шукар пример, ола сикавена лен те овел лен самоконтрола. Јекх таро најважна буќа со шај те сикавен лен тани те манген е Девле сар Владетели хем те поштујнен лескере мерилија. (Читин Изреки 1:5, 7, 8.)

18. Соске ваљани мудро те бирина амаре амален?

¹⁸ Бизи разлика дали сием родителија или на, сарине амен ваљани мудро те бирина амаре амален. Ако тле амала мангена е Јехова, ка охрабринен тут те чхиве туке шукар целија хем те циде тут таро проблемија (Изр. 13:20). Ленгоро шукар пример ка охрабринел тут те сикаве самоконтрола. Ту да ка охрабрине лен ако деа ленге шукар пример. Ако трудинаја амен те сикава самоконтрола ка радујна е Јехова, ка уживина ко живото хем ка накха шукар амаре мангленцар.