Мудро бирин тле амален

Сарине амен мангаја те овен амен шукар амала кола со ка овен аменцар ко шукар хем ко пхаре моментија таро живото. Ама, и Библија предупрединела амен кај нашти било кој те овел аменге шукар амал хем адалеске поттикнинела амен мудро те бирина амаре амален. Сар шај те кера адава? О одговор ка добина ки акаја лекција.

1. Сар влијајнена о амала упри аменде?

Амен оваја сар о мануша коленцар со дружинаја амен. Ола влијајнена или шукар или лошно упри аменде, бизи разлика дали ка накхава ленцар време лично или преку социјална мреже. Баш сар со вакерела и Библија: „Кој џала мудра манушенцар, мудро ка овел, а кас иси бути околенцар со нане гоѓавер [окола со на мангена е Јехова], лошно ка накхел“ (Изреки 13:20). О амала со мангена е Јехова хем со служинена леске, поможинена туке те ове паше леа хем те ане шукар одлуке. Тари јавер страна, о амала со на мангена е Јехова хем на служинена леске, шај те циден тут лестар. Адалеске на чудинела амен со и Библија поттикнинела амен мудро те бирина амаре амален! Кеда амаре амала мангена е Јехова хем служинена леске, ола ка шај шукар те влијајнен упри аменде хем амен да ка шај шукар те влијајна упри ленде. Тегани, ка шај те охрабрина амен машкар аменде хем те поможина аменге јекх јекхеа (1. Солуњаните 5:11).

2. Сар о Јехова осетинела пе кеда дикхела кој тане амаре амала?

О Јехова внимателно биринела пле амален. Ки Библија пишинела кај ов „паше амал тано околенцар сој тане чесна“ (Изреки 3:32). Сар би осетинела пе о Јехова ако биринаја аменге амала кола со на мангена ле? Ов би овела бут разочаримо! (Читин Јаков 4:4.) Тари јавер страна, о Јехова ка овел бахтало хем ка биринел амен сар пле амала, ако цидаја амен таро лошно друштво хем ако трудинаја амен те ова паше леа хем околенцар со мангена ле (Псалм 15:1-4).

ДОЗНАЈН ПОВИШЕ

3. Аракх тут таро лошно друштво

О мануша кола со на мангена е Девле хем лескере мерилија тане лошно друштво. Дикх о ВИДЕОКЛИПИ, а пало адава керен лафи башо акава пучибе:

ВИДЕОКЛИПИ: Циде тут таро лошно друштво (6:17)

• Сар шај те пера ки замка те ова ко лошно друштво бизо те ова свесна башо адава?

Читин 1. Коринќаните 15:33, а пало адава керен лафи башо акава пучибе:

• Со мислинеа, кола мануша шај те овен туке лошно друштво хем соске?

Читин Псалм 119:63, а пало адава керен лафи башо акава пучибе:

• Саве амала ваљани те бирина аменге?

4. Шај те ова шукар амала околенцар сој тане различна амендар

Ки Библија опишимо тано о амалипа таро дуј мануша ко пурано Израел — о Давид хем о Јонатан. О Јонатан сине бут попхуро таро Давид хем ов сине о чхаво е царескоро. А о Давид аракхела сине бакхрен. Иако сине акала баре разлике машкар ленде, ола уле шукар амала. Читин 1. Самоилова 18:1, а пало адава керен лафи башо акава пучибе:

• Соске амаре амала не мора те овен ко иста берша сар аменде или те овен лен о иста околностија сар аменде?

Читин Римјаните 1:11, 12, а пало адава керен лафи башо акава пучибе:

• Сар шај о амала кола со мангена е Јехова те охрабринен пе јекх јекхеа?

Ко акава видеоклипи, дикх сар јекх терно пхрал аракхља амала адатхе коте со на очекујнѓа. Дикх о ВИДЕОКЛИПИ, а пало адава керен лафи башо акала пучиба:

ВИДЕОКЛИПИ: Аракх амала адатхе коте со на очекујнѓан (5:06)

• Соске е Акилескере родителија сине секириме кеда шунѓе касаја дружинела пе ки школа?

• Соске о Акил мангља те дружинел пе адале амаленцар тари школа?

• Со поможинѓа леске те на осетинел пе коркори?

5. Сар шај те развине шукар амалипа?

ВИДЕОКЛИПИ: Сој тано чачутно амал? (4:14)

Читин Изреки 18:24 хем 27:17, а пало адава керен лафи башо акала пучиба:

• Сар поможинена песке о чачутне амала?

• Дали иси тут асавке шукар амала? Ако на, сар шај те аракхе асавке амала?

Читин Филипјаните 2:4, а пало адава керен лафи башо акава пучибе:

• Ако мангеа те овен тут шукар амала, најангле ту ваљани те ове шукар амал. Сар шај те кере адава?

СО СИКЛИЛЕМ

Кеда мудро биринаја амаре амален, тегани о Јехова ка овел бахтало хем адава ка овел амаре шукарипаске.

Сар ка одговорине?

• Соске е Јеховаске тано важно саве амала иси амен?

• Саве манушенцар на ваљани те ова амала?

• Сар шај те аракхе чачутне амала?

ИСТРАЖИН

Дикх сар шај о чачутне амала те поможинен аменге ко пхаро време.

„Кер туке зорале амалипа англедер те авел о крајо“ (Стражарско кула таро ноември 2019)

Читин башо практична советија со ка поможинен туке те аракхе шукар амала.

„Како да најдам добри пријатели?“ (Младите прашуваат — делотворни одговори (том 1), поглавје 8)

Со ваљани те џане башо амалипа ко социјална мреже?

Немој да се заплеткаш во социјалните мрежи (4:12)

Ко искуство е насловеа „Копнеев по татко“, читин соске јекх мануш менинѓа пло друштво.

„Библијата менува животи“ (Стражарска кула таро 1 април 2012)