Фалин е Јехова тле животоја!

О живото тано бут вредно поклон. Адалеа сар користинаја акава поклон секова диве, сикаваја кобор ценинаја ле. Сар е Јеховаскере сведокија, трудинаја амен те користина амаре талентија хем способностија те фалина е Јехова — окова со денѓа амен о живото (Пс 36:9; От 4:11). Адалеске со иси бут проблемија ко живото ко акава лошно свето, шај бут локхе о духовна активностија те на овен аменге ко прво тхан (Мр 4:18, 19). Шукар тано секој амендар те пучел пе: „Дали чаче дава е Јеховаске мло најшукар? (Ос 14:2). Дали и бути или и кариера со иси ман влијајнела негативно упри мли служба башо Јехова? Саве духовна целија иси ман? Со шај те керав панда повише те служинав е Јеховаске?“ Ако дикхеа кај шај ко нешто те ове пошукар, молин е Јехова те поможинел тут те кере о промене со ваљани. Ако фалинаја е Јехова секова диве, амаро живото ка овел исполнимо хем радосно! (Пс 61:8).

ДИКХ О ВИДЕОКЛИПИ КОРИСТИН ТЛЕ СПОСОБНОСТИЈА БАШО ЈЕХОВА, ХЕМ ПАЛО АДАВА ОДГОВОРИН КО АКАЛА ПУЧИБА:

• Соске нане мудро те користине тле талентија хем способностија ко свето е Сатанаскоро? (1Јо 2:17).

• Саве берекетија иси адален со дена пло најшукар е Јеховаске?

• Ко саве гранке тари служба шај те користине тле талентија хем способностија?