Кеда геле песке тари градина Еден, о Адам хем и Ева сине лен бут чхаве. Ленгоро прво чхаво, о Каин, уло земјоделцо, а ленгоро дујто чхаво, о Абел, аракхела сине бакхрен.

Јекх диве о Каин хем о Абел денѓе жртве е Јеховаске. Џанеа ли сој адава жртва? Адава тано поклон со дела пе е Девлеске. О Јехова радујнѓа пе баши жртва е Абелескири, ама на радујнѓа пе баши жртва е Каинескири. Адалеске о Каин бут хољанѓа. О Јехова вакерѓа е Каинеске ма те овел понадари хољамо соске ка шај те керел нешто лошно. Ама, о Каин на шунѓа ле.

Наместо адава, о Каин вакерѓа е Абелеске: „Ава манцар ко поле“. Кеда ресле адари, о Каин нападинѓа пле пхрале хем мударѓа ле. Со керѓа о Јехова башо акава? О Јехова казнинѓа ле аѓаар со палдинѓа ле дур тари лескири фамилија. О Каин на смејнела сине те иранел пе више палал.

Со сикљоваја таро акава? Шај ка почмина те хољана ако нане са сар со мангаја амен. Ако дикхаја кај амари холи овела побари, или некој авела те вакерел аменге кај сием бут хољаме, тегани ваљани одма те попрајна амен, хем те почмина те контролирина амаре чувствија англедер ола те контролиринен амен.

Адалеске со о Абел мангела сине е Јехова хем керела сине шукар буќа, о Јехова на бистерѓа ле. О Јехова ка иранел е Абеле ко живото кеда и пхув палем ка овел рај.

Сар со накхела сине о време, и Пхув пхердили бут мануша. Бут лендар сине лошна. Чак несаве ангелија да уле лошна. Ола мукхле о небо хем але те живинен теле ки Пхув. Џанеа ли соске керѓе адава? Те шај те лен песке манушикано тело хем те лен песке ромња.

Акала ангелија хем ленгере ромња сине лен чхаве. Кеда бариле ленгере чхаве, ола уле бут силна хем насилна. Ола поврединена сине е манушен. О Јехова на мангља те овен асавке буќа, адалеске одлучинѓа те уништинел е лошно манушен Потопеа.

Ама, сине јекх мануш со на сине сар о јавера. Ов мангела сине е Јехова. Лескоро анав сине Ное. Лесте сине ле ромни хем трин чхаве, о Сем, о Хам хем о Јафет, хем о сотрин сине лен ромња. О Јехова вакерѓа е Ноеске те керел бари арка те шај ов хем лескири фамилија те спасинен пе ко Потоп. И арка тани бари кутија таро каш со шај те ачхол упро пани. Исто аѓаар о Јехова вакерѓа е Ноеске те чхивел ки арка бут животне те шај ола да те спасинен пе.

О Ное одма почминѓа те керел и арка. Леске хем лескере фамилијаке ваљанѓе околу 50 берша те шај те керен ла. Ола керѓе и арка аѓаар сар со вакерѓа ленге о Јехова. Џикоте керела пе сине и арка, о Ное исто аѓаар, вакерела сине е манушенге кај ка овел Потоп. Ама, никој на мангела сине те шунел ле.

Ко крајо, ало о време те кхувен ки арка. Ајде те дикха со уло пало адава.