Пучиба таро читателија

Ко Изреки 24:16 вакерела: „Ако о праведнико перела ефта пути да, ов палем ка уштел“. Дали акале стихоја мислинела ки некасте со стално грешинела хем о Девел простинела леске?

Акава стихо на вакерела адава. Акате мислинела пе ки некасте со повише пути перела башо проблемија или башо пхарипа со иси ле, ама успејнела палем те уштел.

Соске вакераја акава. Те дикха о контекст е стихоскоро: „Ма ов сар о лошно хем гаравиндор те дикхе о кхер е праведникоскоро, ма уништин о тхан коте со живинела. Соске, ако о праведнико перела ефта пути да, ов палем ка уштел, а о лошно ка пропадинел ки пли неволја. Кеда ка перел тло душмани, ма ов бахтало, хем тло вило те на радујнел пе кеда ка сопкинел пе“ (Изр. 24:15-17).

Несаве мислинена кај о 16 стихо керела лафи башо мануша кола со грешинена хем каинена пе. Дуј свештеникија тари Англија вакерѓе кај бут џене објаснинѓе акава стихо ко акава начин. Ола вакерѓе кај јекх шукар мануш шај повише пути те грешинел ама нане те чхинавел те мангел е Девле хем шај секогаш те каинел пе кеда ка грешинел. Асавко размислибе одговоринела околенге со на мангена те боринен пе против о грево. Ола шај те мислинен песке кобор хем те грешинен о Девел секогаш ка простинел ленге.

Ама, акава стихо на вакерела адава.

О хебрејско лафи „пело“ или „перела“ сој користимо ко 16 хем 17 стихо шај те овел ле различно значење. На пример, ки дословно смисла шај те користинел пе сар, о бико пело ко друмо, некој перела таро крови, о бар перела ки пхув (5. Мој. 22:4, 8; Амос 9:9). Акава лафи шај те овел ле јавер да значење, сар на пример: „О Јехова водинела е манушескере чекорија хем бахтало тано башо лескоро друмо. Те перел да, ов нане те пропадинел, соске о Јехова икерела ле пле вастеа“ (Пс. 37:23, 24; Изр. 11:5; 13:17; 17:20).

„Ама о хебрејско лафи ’перела‘ никогаш нане користимо башо грево“, објаснинела јекх професори. Јавер изучувачи објаснинела о 16 стихо ко акава начин: „Џабе тано те понашине тут лошно е Девлескере народоја, соске ов секогаш ка овел успешно, а о лошна на!“

Значи, са акава сикавела кај о Изреки 24:16 на керела лафи башо грево, него башо проблемија хем пхарипа со стално шај те овен амен. Ко авдисутно лошно свето, е праведно мануше шај те овен ле бут проблемија, на пример, проблемија е састипаја. Ов шај чак те овел прогонимо таро властија баши пли вера. Ама ле шај те овел ле доверба кај о Девел ка поддржинел ле хем ка поможинел леске те икљол ко крајо адале проблеменцар хем те овел успешно. Размислин само кобор пути поможинѓа о Девел пле слугенге! Соске? Амен сием сигурна кај „о Јехова икерела са околен со перена хем ваздела са околен со пеле“ (Пс. 41:1-3; 145:14-19).

О праведно мануш нане бахтало кеда е јаверен иси лен проблемија. Наместо адава, ов осетинела пе шукар соске џанела „кај ка овел шукар адаленге со дарана таро чачутно Девел“ (Проп. 8:11-13; Јов 31:3-6; Пс. 27:5, 6).