ЛЕКЦИЈА 39
Сар дикхела о Девел ко рат?
О рат тано бут важно, соске бизо лесте нашти те живина. Сар амаро Створители, е Девле иси ле право те вакерел сар те користинел пе о рат. Ки акаја лекција ка сикљова со ов вакерѓа башо рат. Дали шај те ха рат или те примина ле преку трансфузија? Хем со ка поможинел аменге те ана шукар одлуке башо рат?
1. Сар дикхела о Јехова ко рат?
О Јехова пле слугенге таро пурано време вакерѓа: „О живото таро секова тело тано лескоро рат“ (3. Мојсеева 17:14). Значи, е Јеховаске о рат претставинела о живото. Исто сар со о живото тано свето, аѓаар о рат да тано свето.
2. Со забранинѓа о Девел башо рат?
О Јехова пле слугенге таро пурано време заповединѓа те на хан рат. (Читин 1. Мојсеева 9:4 хем 3. Мојсеева 17:10.) Ов повторинѓа акаја заповед кеда е христијаненге преку о водечко тело денѓа упатство: „Воздржинен тумен... таро рат“. (Читин Дела 15:28, 29.)
Со значинела те воздржине тут таро рат? Кеда јекх доктори би вакерела туке те воздржине тут таро алкохол, тегани ту на би пиеа алкохол, нели? Ама, дали би хаја хајбе коте со иси алкохол или дали би приминеа алкохол преку вене? Сигурно на! Ко слично начин, е Девлескири заповед те воздржина амен таро рат значинела те на пија рат или те на ха мас колестар со нане цедимо о рат. Исто аѓаар, нане те ха хајбе коте сој чхивдо рат.
Ама, со шај те вакера башо користибе о рат ко медицинска третманија? Несаве третманија јасно пхаѓена е Девлескоро закони. На пример, адала третманија тане и трансфузија таро цело рат или таро лескере главна состојке — о лоле клетке, о парне клетке, о плочке хем и плазма. Тари јавер страна, башо несаве третманија нане добором јасно дали пхагела пе е Девлескоро закони башо рат. На пример, ко несаве третманија користинена пе потикне состојке кола со икалена пе таро главна состојке е ратескере. Адала потикне состојке викинена пе фракцие. Исто аѓаар, ко несаве третманија користинела пе о рат е пациентескоро. Кеда керела пе лафи башо асавке третманија, секова јекх амендар мора те анел лично одлукаa (Галатите 6:5).
ДОЗНАЈН ПОВИШЕ
Сикљов сар те ане одлуке башо медицинска третманија коте со користинела пе о рат.
3. Ана одлуке кола со ка керен бахтало е Јехова
Сар шај те ане одлуке башо медицинска третманија кола сој тане ко склад е Девлескере волјаја? Дикх о ВИДЕОКЛИПИ, а пало адава керен лафи башо акава пучибе. Соске тано важно те кере акала чекорија англедер те ане несави одлука?
Молин тут баши мудрост (Јаков 1:5).
Роде библиска начелија хем размислин сар шај те применине лен (Изреки 13:16).
Дознајн кола медицинска третманија тане достапна ко тхан коте со живинеа.
Размислин кола медицинска третманија сигурно нане те прифатине.
Ана одлука со ка дел тут чисто совест (Дела 24:16).b
Ма бистре кај никој јавер — ни тло брачно партнери, јекх старешина или окова со проучинела туја, нашти те анел одлука туке ко тхан (Римјаните 14:12).
Пишин тле одлуке.
4. Е Јеховаскере сведокија мангена те овен лечиме ко најшукар начин
Амен шај ко исто време хем те икера амен ко е Девлескоро закони башо рат хем те добина квалитетно медицинско третмани бизо рат. Дикх о ВИДЕОКЛИПИ.
Читин Тит 3:2, а пало адава керен лафи башо акава пучибе:
Соске ваљани секогаш те сикава поштовање хем те ова љубезна кеда кераја лафи е докторенцар?
На прифатинаја |
Лично одлука |
|---|---|
1. Плазма |
Фракцие тари плазма |
2. Парне клетке |
Фракцие таро парне клетке |
3. Плочке |
Фракцие таро плочке |
4. Лоле клетке |
Фракцие таро лоле клетке |
5. Одлуке башо е ратескере фракцие
Е рате иси ле штар главна состојке — о лоле клетке, о парне клетке, о плочке хем и плазма. Таро акала главна состојке шај те икалел пе потикне состојке кола со викинена пе е ратескере фракцие.c Несаве фракцие користинена пе те шај те керен пе иљачија против несаво насвалипе или поможинена те чхинавел пе о крварибе.
Кеда ваљани те ана одлука дали ка примина е ратескере фракцие или на, секој амендар ваљани те анел лично одлука спрема пли библиско школујми совест. Несаве шај нане те манген те прифатинен медицинска третманија или постапке коте сој вклучиме е ратескере фракцие. Тари јавер страна, несавенге шај ка дозволинел ленгири совест те прифатинен асавке фракцие.
Кеда анеа асавке лична одлуке, размислин башо акава пучибе:
Сар би објаснинава јекхе доктореске соске одбинава или прифатинава несаве ратескере фракцие?
НЕСАВЕ ШАЈ ПУЧЕНА: „Соске тумен на приминена рат?“
Со ка вакере ту?
СО СИКЛИЛЕМ
О Јехова мангела те дикха ко рат сар нешто свето.
Сар ка одговорине?
Соске е Јеховаске о рат тано свето?
Котар џанаја кај е Девлескири заповед те воздржина амен таро рат значинела хем те на примина трансфузија?
Со шај те поможинел туке те ане шукар одлуке башо медицинска третманија коте сој вклучимо о рат?
ИСТРАЖИН
Башо со ваљани те размислине англедер те ане одлуке башо несаве медицинска постапке коте со користинела пе тло рат?
„Прашања од читателите“ (Стражарска кула таро 15 октомври 2000)
Башо со ваљани те размислине англедер те ане одлука дали ка прифатине е ратескере фракцие или на?
Со поможинѓа јекхе доктореске те прифатинел е Девлескоро стави башо рат?
„Го прифатив Божјето гледиште за крвта“ (Разбудете се! таро 8 март 2004)
a Дикх ки лекција 35 е темаја „Сар шај те ана шукар одлуке?“
b Дикх ки точка 5, „Одлуке башо е ратескере фракцие“ хем 3 фуснота, „Медицинска третманија коте со користинела пе о рат“.
c Несаве докторија ко штар главна состојке е ратескере дикхена сар фракцие. Адалеске шај кај ваљани те објаснине ленге тли одлука кај на приминеа трансфузија таро цело рат или таро лескере штар главна состојке — о лоле клетке, о парне клетке, о плочке или и плазма.