3. Соске о шукар мануша цидена муке?
Соске тано важно о одговор
О факти кај о шукар мануша цидена муке тано спротивно таро амаро чувство баши правда. Исто аѓаар, адава факти анела амен џи ко заклучок кај на врединела те ове шукар адалеске со аѓаар да ка циде муке.
Размислин
Несаве мануша мислинена кај постојнела јекх круго коте со о мануш стално бијанѓовела хем мерела. Ола верујнена кај окова со керела шукар буќа, кеда палем бијанѓовела ка овел ле пошукар живото. Ама, окова со керела лошна буќа, ко јавер живото стално ка цидел муке. Спрема адава верување, чак кеда некој со акана тано шукар шај те цидел муке ако постапинѓа лошно ко несаво „англуно живото“. Јавера палем, верујнена кај о мануша цидена муке соске аѓаар сине ленге пишимо. Ама...
Сави смисла иси некој со демек палем бијанѓовела те цидел муке башо англуно живото колесте со ни на сетинела пе?
Ако насваљоваја или доживинаја несреќе сар казна башо нешто со керѓем англедер, тегани соске акана те аракха амаро састипе хем те избегина несреќе?
ДОЗНАЈН ПОВИШЕ
Дикх о видеоклипи Соске о Девел панда мукхела те овел о лошнипе хем о муке? ки jw.org.
Со вакерела и Библија
О муке нане казна таро Девел.
Наместо адава, бут пути случинена пе трагедие соске некој аракхљовела ко погрешно тхан ко погрешно време.
„И трка на добинена ла секогаш окола со сигате прастана, ни о силна и битка, ни о маро нане секогаш околен сој мудра, ни о барвалипе околен сој интелигентна, чак окола со бут џанена нане лен секогаш успех; соске о време хем о буќа со нашти те предвидинен пе аракхена секоле мануше“ (ПРОПОВЕДНИК 9:11).
Јекх таро причине башо амаре муке тано о грево со наслединѓем ле.
О лафи „грево“ о мануша обично поврзинена ле несаве лошно постапкаја со керѓа ла некој. Ама, и Библија користинела акава лафи те шај те опишинел и несовршеност која со са о мануша — хем о шукар хем о лошна — наслединѓе ла таро прва мануша, о Адам хем и Ева.
„Кеда бијандиљум више сиум сине криво башо грево, панда таро моменти кеда ми дај ачхили кхамни о грево сине ки манде“ (ПСАЛМ 51:5).
Адалеске со о мануша наслединѓе о грево иси лен баре последице.
О грево на само со руминѓа амаро однос амаре Створителеа него хем керела те овел аменге попхаро те ова ко шукар односија е јаверенцар хем те контролирина амаре чувствија. Башо са акава цидена са о мануша, а на само поединција.
„Кеда мангава те керав адава сој шукар, о лошно тано ки манде“ (РИМЈАНИТЕ 7:21).
„Са о створиме буќа заедно офкинена хем тане ки дукх са џи акана“ (РИМЈАНИТЕ 8:22).