Ки амари организација нане амен платиме учителија. Наместо адава, исто сар ко собрание таро прво веко, авдиве да тане чхивде надгледникија те грижинен пе башо е Девлескоро собрание (Дела 20:28). Акала старешине тане духовно зрела мурша кола со водинена о собрание хем грижинена пе леске, ‚на со мора, него адалеске со мангена; на башо лове, него цело вилеа‘ (1. Петрово 5:1-3). Со керена ола аменге?

Грижинена пе аменге хем заштитинена амен. О старешине дена советија тари Библија хем поможинена е собраниеске те ачхол паше е Јеховаја. Адалеске со џанена кај о Јехова денѓа лен акаја важно задача ола на мангена те керен пе главна машкар е Девлескоро народо, него, анена џи ко адава сариненге те овел шукар хем те овен бахтале (2. Коринќаните 1:24). Исто сар со јекх мануш со аракхела бакхрен шукар грижинела пе секоле бакхреске, аѓаар о старешине трудинена пе те грижинен пе секаске ко собрание (Изреки 27:23).

Сикавена амен сар те кера е Девлескири волја. Секова курко, о старешине водинена о собраниска состанокија те шај те овел зорали амари вера (Дела 15:32). Акала верна мурша исто аѓаар тане пример башо проповедиба, џана аменцар ки служба хем сикавена амен сар пошукар те сикава е јаверен.

Ола охрабринена секас амендар. Те шај те поможинен секоле амендар те овел попаше е Јеховаја, о старешине таро амаро собрание шај те авен аменде кхере или ки дворана те керен аменцар лафи те шај те ден амен помош хем утеха тари Библија (Јаков 5:14, 15).

О старешине грижинена пе на само е собраниеске, него исто аѓаар, побутер лендар џана ки бути хем грижинен пе пле фамилијаке. Адалеске, амен ваљани те почитујна лен (1. Солуњаните 5:12, 13).

• Со керена о старешине ко собрание?

• Сар о старешине сикавена кај грижинена пе секаске амендар?

Тари Библија дикхаја кај о ‚надгледникија хем о слуге помошникија‘ грижинена пе башо собрание (Филипјаните 1:1). Ко секова собрание иси некобор асавке пхраља со служинена. Саве задаче иси е слуге-помошникон?

Ола поможинена е старешиненге. О слуге-помошникија, терне или пхуре, тане духовно зрела пхраља хем шукар керена пле задаче. Ола керена важна задаче со мора те керен пе ко секова собрание. Адалеске, е старешиненге тано полокхо хем иси лен побутер време те керен пли задача те сикавен хем те грижинен пе е пхраленге.

Ола тане корисна ко собрание. Несаве слуге-помошникија служинена сар редарија те доџарен околен со авена ко состанок. Јавера служинена ко озвучување, делинена литература, грижинена пе башо собраниска сметке или дена подрачја баши служба е пхраленге хем е пхењенге ко собрание. Ола, исто аѓаар, поможинена те одржинел пе и дворана. О старешине шај те пучен лен те поможинен е попхуренге. О слуге-помошникија тане спремна те керен секоја жадача со и ленге денди, а о собрание почитујнела лен адалеске со спремно служинена (1. Тимотеј 3:13).

Ола тане шукар пример ко собрание. О слуге-помошникија тане бириме адалеске со иси лен шукар христијанска особине. Ола бајрарена амари вера кеда иси лен учество ко состанокија. Ола тане пример башо проповедибе хем аѓаар керена те ова поревна. Адалеске со ола сложно керена бути е старешиненцар, анена џи ко адава те овел радост хем единство (Ефешаните 4:16). Сар со накхела о време, ола да шај те пхерен о условија те служинен сар старешине.

• Саве тане о слуге-помошникија?

• Сар ола поможинена ко собрание?

Ко Христијанска грчка списија бут пути пишинела башо Варнава хем о апостол Павле. Ола служинена сине сар покраинска надгледникија хем посетинена сине о прва собранија. Соске? Адалеске со чаче интересинена пе сине те овел шукар ленгере духовно пхраленге хем пхењенге. О Павле вакерѓа кај мангела те ‚иранен пе хем те посетинен е пхрален‘ те дикхен сар тане. Ов сине спремно те накхавел бут баро друмо те шај те охрабринен лен (Дела 15:36). Исто адава керена авдиве о покраинска надгледникија.

Ола авена те охрабринен амен. Секова покраинско надгледнико дуј пути ко берш посетинела околу 20 собранија хем ко секова ачховела по јекх курко. Шај бут те сикљова лендар хем ленгере ромњендар, ако тане прандиме. Ола трудинена пе те запознајнен саринен, тернен хем пхурен, хем бут мангена те авен аменцар ко подрачје хем ко амаре библиска студие. Акала надгледникија, заедно е старешиненцар таро собрание, џана ко пхраља те поможинен лен те овен духовно зорале хем охрабринена амен пле говоренцар ко состанокија хем ко конгресија (Дела 15:35).

Ола грижинена пе сариненге. Ола чаче интересинена пе баши сариненгири духовност ко собрание. Кхедена пе е старешиненцар хем е слуге-помошниконцар те дикхен сар духовно напредујнела о собрание хем дена лен совет сар шај панда пошукар те керен пле задаче. Ола поможинена е пионерен те овен пошукар ки служба хем исто аѓаар бут мангена те запознајнен е невен ко собрание хем те шунен сар ола духовно напредујнена. Секова таро акала пхраља спремно мангела те служинел башо е пхраленгоро шукарипе (2. Коринќаните 8:23). Амен да ваљани те овел амен сар ленгири вера хем те шуна е Девле ко са (Евреите 13:7).

• Соске о покраинска надгледникија посетинена о собранија?

• Со шај те сикљова таро ленгере посете?

Кеда овена природна катастрофе, е Јеховаскере сведокија сигате организиринена пе те поможинен пле пхраленге ко адава тхан. Адава сикавела кај чаче мангаја амен јекх јекхеја (Јован 13:34, 35; 1. Јованово 3:17, 18). Сар поможинаја?

Поможинаја ловенцар. Кеда сине баро бокхалипе ки Јудеа, о прва христијанија тари Антиохија бичхалге лове пле духовна пхраленге (Дела 11:27-30). Исто сар ленде, кеда шунаја кај амаре пхраља ко дисаве тхана тане ки невоља, амен преку амаро собрание бичхалаја доброволна прилогија те шај те овел лен адава со ваљани ленге (2. Коринќаните 8:13-15).

Џаја адари те поможина. О старешине ко тхана коте со ули и катастрофа родена те аракхен секоле таро собрание те дикхен дали сарине тане шукар. Шај те керел пе одбор баши помош со ка организиринел те овел хајбаске, чисто пани пибаске, шеја, тхан сојбаске хем медицинско помош. Бут Сведокија џана ко пло трошако те поможинен или те попрајнен е пхраленгере кхера хем о дворане. Адалеске со сием сложна сар организација хем со иси амен искуство те кера заедно бути, шај сигате те поможина кеда ваљани. Иако поможинаја ‚амаре пхраленге ки вера‘, кеда шај, амен поможинаја јаверенге да таро јавера религије (Галатите 6:10).

Даја утеха тари Библија хем охрабринаја лен. Посебно ваљани утеха околенге со накхле несави катастрофа. Ко асавко пхаро време ‚о Девел секоле утехакоро‘, о Јехова, шај те дел амен сила (2. Коринќаните 1:3, 4). Са околенге со и бизи надеж амен спремно вакераја башо адава со о Девел ветинела хем уверинаја лен кај е Девлескоро Царство ка анел крајо са е природна катастрофенге со анена дукх хем пхарипа (Откровение 21:4).

• Соске е Јеховаскере сведокија шај сигате те поможинен кеда иси природна катастрофе?

• Сави утеха тари Библија шај те да околенге со накхле несави катастрофа?

Некобор диве англедер те мерел, о Исус сине коркори ко јекх тхан пле штаре учениконцар — е Петареа, е Јаковеа, е Јованеа хем е Андрејеа. Кеда вакерѓа кова ка овел о знако баши лескири присутност ко последна диве, ов пучља јекх бут важно пучибе: ‚Кој тано о верно хем разборито робо касте со лескоро господари чхивѓа ле упро пле слуге те дел лен храна ко право време?‘ (Матеј 24:3, 45; Марко 13:3, 4). О Исус уверинѓа пле ученикон кај ов сар ленгоро ‚господари‘ ка биринел околен со редовно ка ден духовно храна лескере учениконге ко последна диве. Кој тано о ‚верно хем разборито робо‘?

Ов тано јекх тикни група керди таро е Исусескере помазиме ученикија. О Водечко тело е Јеховаскере сведоконгоро тано о ‚робо‘. Ов дела духовно храна ко право време околенге со служинена е Јеховаске. Амен зависинаја таро адава верно робо со поодориг да дела амен ‚храна ко право време‘ (Лука 12:42).

Ов грижинела пе е Делвескере кхереске (1. Тимотеј 3:15). О Исус денѓа е ‚верно хем разборито робоске‘ бари задача те грижинел пе са е буќенге поврзиме е Јеховаскере организацијаја ки Пхув — те грижинел пе башо материјална буќа со иси ла, те организиринел о проповедиба хем те сикавел амен преку амаре собранија. Те шај те дел амен баш адава со ваљани аменге ко право време ‚о верно хем разборито робо‘ делинела духовно храна преку о публикацие со користинена аменге ки амари служба хем преку о говорија со икерена пе ко амаре состанокија хем конгресија.

О робо тано верно ко адава со сикавела и Библија хем ки заповед те сведочинел о шукар хабери. Ов тано разборито адалеске со мудро грижинела пе са е буќенге ки Пхув со о Исус мукхља леске те грижинел пе (Дела 10:42). Адава со са побутер мануша прифатинена о чачипе хем со добинаја бут духовно храна сикавела кај о Јехова благословинела адава со о робо керела (Исаија 60:22; 65:13).

• Касте чхивѓа о Исус те дел духовно храна пе учениконге?

• Сар сикавела о робо кај тано верно хем разборито?

Ко прво веко јекх тикни група — о ‚апостолија хем о старешине ко Ерусалим‘ — служинела сине сар водечко тело хем анела сине важна одлуке башо цело христијанско собрание таро помазаникија (Дела 15:2). Англедер те анен несави одлука ола дикхена сине со вакерела и Библија баши адаја бути хем мукхена сине те водинел лен е Јеховаскоро духо (Дела 15:25). Аѓаар керела пе авдиве да.

О Девел керела пли волја преку о Водечко тело. О помазиме пхраља со служинена ко Водечко тело хор проучинена и Библија хем иси лен баро искуство сар шај те кера амари служба е Јеховаске хем сар те решинен дисаве пучиба башо духовна буќа. О Водечко тело кхедела пе секова курко те дикхел со ваљани е пхраленге ко цело сумнал. Исто сар ко прво веко, ола дена советија тари Библија преку писмија, преку о патувачка надгледникија хем јавера пхраља. Акава поможинела са е Девлескере слугенге те овен јекх ко адава со мислинена хем со керена (Дела 16:4, 5). О Водечко тело грижинела пе те овел спремими и духовно храна, охрабринела амен те чхива ко прво тхан о проповедиба хем грижинела пе те овен денде одговорностија е пхраленге.

О Водечко тело мукхела те водинел ле е Девлескоро духо. О Водечко тело башо са родела водство таро Најбаро, о Јехова, хем таро е собраниескоро Поглавари, о Исус (1. Коринќаните 11:3; Ефешаните 5:23). Адала со и ко Водечко тело на мислинена кај тане главна машкар е Девлескоро народо. Ола, исто сар о јавера помазаникија ки Пхув, ‚џана пало о Бакхро [о Исус] било кај те џал‘ (Откровение 14:4). О Водечко тело ценинела кеда молинаја амен ленге.

• Кој сине ко водечко тело ко прво веко?

• Сар о Водечко тело авдиве родела те овел водимо таро Девел?

Ки Хебрејско чхиб Бетел значинела „Девлескоро кхер“ (1. Мојсеева 28:17, 19, фуснота). Акава анав пхиравена са о зграде со иси е Јеховаскере сведокон ко цело сумнал колендар со водинела пе хем поможинела пе те кера амари служба. О Водечко тело служинела тари главно канцеларија е Јеховаскере сведоконгири со аракхљола ко Њујорк (САД) хем адатхар водинела и бути со керела пе ко подружнице ко бут пхувја. Сар група, адала со служинена ко Бетел тане пенџарде сар Бетелско фамилија. Ола џивдинена хем керена бути заедно, хана заедно, хем заедно проучинена и Библија (Псалм 133:1).

Посебно тхан коте со и Бетелско фамилија служинела цело вилеа. Ко секова Бетел иси мурша хем џувља со спремно керена е Девлескири волја хем дена са по време башо Царство (Матеј 6:33). Нијекх лендар на лела плата, ама сариненге тане обезбедиме некобор буќа — соба, хајбаске, хем тикни сума лове те учхарен пло лично харџи. Саринен ко Бетел иси лен несави задача. Несаве керена бути ки канцеларија, ки кујна или ки трпезарија. Јавера керена бути ко тхан коте со печатинена пе лила, тховена пе шеја или чистинена хем одржинена о Бетелска зграде или дисаве јавера задаче.

Тхан коте со керела пе бут бути те шај те проповединел пе о Царство. И главно цел ко секова Бетел тани со побутер мануша те џанен о чачипе тари Библија. Акаја брошура тани јекх пример башо адава. Цело пишибе акале брошуракоро сине водимо таро Водечко тело, пало адава сине компјутерски бичхалди ко бут тимија со превединена ко цело сумнал, печатими ко некобор бетелска печатнице хем ко крајо бичхалди ко побутер таро 110.000 собранија. Адалеа со керена са акава, о бетелска фамилие бут поможинена те керел пе и најважно задача — те проповединел пе о шукар хабери (Марко 13:10).

• Кој служинела ко Бетел хем кола буќа тане ленге обезбедиме?

• Ки која важно задача поможинела секоја бути со керела пе ко Бетел?

Саринен тари бетелско фамилија иси лен различна задаче хем поможинена те шај те проповединел пе ки јекх или ко некобор пхувја. Ола служинена ко преведувачка тимија, печатинена списанија хем лила, рединена и литература ко бетелско магацини, керена аудио хем видео снимке, или грижинена пе јавере буќенге со и потребна ко адава подрачје.

О Одбор е подружницакоро тано одговорно баши бути со керела пе ки лате. О Водечко тело ки секоја подружница биринела јекх Одбор е подружницакоро ко кова со служинена трин или побутер способна старешине. Акава Одбор редовно дела е Водечко телоске извештај секоле пхувјаке баши која тано одговорно — сар напредујнела духовно хем саве проблемија шај иси ки лате. Адала извештаија поможинена е Водечко телоске те одлучинел баши која тема те керел пе лафи ко неве публикацие, ко состанокија хем ко конгресија. Пхраља бичхалде таро Водечко тело редовно посетинена о подружнице хем дена советија е Одборенге сар те керен пумаре задаче (Изреки 11:14). Ки адаја посета адава пхрал икерела јекх говор колеа со охрабринела е пхрален таро адава тхан.

Поможинела пе е собраниенге. О одговорна пхраља тари подружница одобринена те керен пе неве собранија. Исто аѓаар, дена упатства е пионеренге, мисионеренге хем е покраинско надгледниконге со служинена ко адава подрачје. Ола организиринена о конгресија хем о собирија, грижинена пе те овен керде неве дворане хем бичхалена литература кобор со ваљани секоле собраниеске. Са со керела пе ки подружница поможинела те ова организириме ко проповедибе (1. Коринќаните 14:33, 40).

• Сар о Одбор е подружницакоро поможинела е Водечко телоске?

• Башо кола буќа грижинела пе и подружница?

Те шај најшукар те проповедина о ‚шукар хабери секоле народоске, племеске, чхибјаке хем манушеске‘, иси амен литература ко побутер таро 750 чхибја (Откровение 14:6). Сар ресаја са адава те кера? Аѓаар со ко цело сумнал иси амен мануша со пишинена амари литература хем преведувачија со превединена ла — сарине тане е Јеховаскере сведокија.

Ој тани прво пишими ки англиско чхиб. О Водечко тело надглединела и бути со керела о Оддел пишибаске ки амари главно канцеларија котар со водинела пе о проповедибе ко цело сумнал. Акава Оддел дела задаче околенге со пишинена и литература со служинена ки главно канцеларија или ко некобор јавера подружнице. Адалеске со о пхраља со пишинена амари литература тане таро различна културе, ки лате иси теме со интересинена различна манушен.

Ој бичхалела пе те превединел пе. Кеда о англиско тексто тано готово хем проверимо, ов тано компјутерскри бичхалдо џи ко преведувачка тимија ки цело Пхув, кола со превединена, проверинена хем поправинена о преведимо тексто. Ола трудинена пе те аракхен ‚точна лафија башо чачипе‘ те шај точно те превединен и смисла таро англиско тексто ки ленгири чхиб (Проповедник 12:10).

О компјутерија поможинена те превединел пе посигате. О компјутерија нашти те заменинен е манушен со пишинена хем со превединена. Ама, адала мануша шај посигате те керен пли бути адалеске со користинена компјутерска речникија хем разна програме со поможинена полокхе те аракхен адава со родена. Е Јеховаскере сведокија керге јекх компјутерско програма — MEPS (Multilanguage Electronic Publishing System) — која шај те користинел пе ко бут чхибја. Адатхе чхивела пе о преведимо тексто, споинела пе сликенцар, хем спреминела пе те шај те овел печатимо.

Соске добором трудинаја амен те преведина ко бут чхибја, чак ко чхибја со керена лафи некобор милја мануша? Адалеске со е Јеховаскири волја тани ‚различна мануша те овен спасиме хем шукар те пенџарен о чачипе‘ (1. Тимотеј 2:3, 4).

• Сар тани пишими амари литература?

• Соске превединаја амари литература ко бут чхибја?

Амари организација секова берш печатинела хем делинела бут милионија Библие хем јавера публикацие, бизо те лел лове башо адава. Градинаја хем одржинаја о дворане хем о подружнице. Исто аѓаар, поможинаја милја пхраленге со служинена ко Бетел или сар мисионерија, хем даја помош кеда иси природна катастрофе. Шај пучеа тут котар лаја лове башо са акава?

На лела пе десеток, на платинела пе чланарина хем никој нане должно те дел лове. Иако трошинела пе бут башо амаро проповедничко дело, амен на родаја лове е манушендар. Англедер јекх веко, ко дујто издание таро списание Стражарска кула терѓола сине кај амен верујнаја кај о Јехова бешела пали амари бути, адалеске ‚никед нане ловенге те молина е манушен‘ — хем никед на керѓем адава (Матеј 10:8).

Са со кераја тано финансиримо таро доброволна прилогија. Бут џене ценинена со сикаваја е манушен тари Библија хем адалеске дена прилогија. Коркори амен радосно даја амаро време, сила, лове хем јавера буќа те шај те керел пе е Девлескири волја ки цело Пхув (1. Летописи 29:9). Ко амаре дворане хем ко амаре конгресија иси кутие башо доброволна прилогија коте са окола со мангена те мукхен лове шај те керен адава. Или, шај те дел пе доброволно прилог преку амари интернет-страница jw.org. Побаро дело таро лове авена адалендар со нане барвале. Ола тане слична сар и вдовица кола со о Исус фалинѓа, соске иако сине чороли спремно денѓа таро вило (Лука 21:1-4). Адалеске, секој шај редовно те ‚цидел песке нешто ки страна‘ хем те дел ‚сар со решинѓа ко пло вило‘ (1. Коринќаните 16:2; 2. Коринќаните 9:7).

Сигурна сием кај о Јехова поодориг да ка поттикнинел околенгере виле со мангена ‚те сикавен леске чест адалеа со иси лен‘ те ден прилогија башо са со керела пе е Царствоске хем аѓаар те поможинен те овел лескири волја (Изреки 3:9).

• Сар амари организација разликујнела пе таро јавера религие?

• Башо со користинена пе о доброволна прилогија?

И главно тема тари Библија баши која керела пе лафи ко е Јеховаскере сведоконгере дворане тани е Девлескоро Царство — и главно тема баши која о Исус проповединела сине (Лука 8:1).

Ки ленде сикљоваја о чачипе башо Девел. О дворане тане тхана колендар е Јеховаскере сведокија организиринена о проповедибе ко пло подрачје (Матеј 24:14). О дворане разликујнена пе, ама секоја лендар тани скромно хем шај те користинен ла побутер собранија. Адалеске со иси са побаро број објавителија хем собранија, ко последна берша керѓем некобор милје неве дворане, ко просек по панџ ко диве. Сар кераја акава? (Матеј 19:26).

Градиме тане таро доброволна прилогија кхедиме башо адава. Адала прилогија бичхалена пе ки подружница те шај те користинен лен о собранија со ваљани ленге те градинен или те реновиринен пли дворана.

Градинена лен е Јеховаскере сведокија, хем на лена лове башо адава. Ко бут пхувја, керена пе групе со градинена дворане. О пхраља хем о пхења со служинена ко акала групе, џана ко различна собранија ки адаја пхув — чак ко подур тхана — те поможинен е собраниенге те керен пумаре дворане. Ко јавера пхувја, иси несаве пхраља кола тане одговорна башо кериба хем реновириба о дворане ко несаво подрачје. Иако бут пхраља со и мајсторија тари цели област поможинена ко тхан коте со керела пе и дворана, најбутер поможинена о пхраља хем о пхења таро адава собрание. Е Јеховаскоро духо хем адава со лескоро народо цело вилеа поможинела, керена те завршинел пе адаја бути (Псалм 127:1; Колошаните 3:23).

• Соске градинаја дворане хем сар ола изглединена?

• Сар градинаја амаре дворане ко цело сумнал?

Секоја дворана, ки која е Јеховаскере сведокија икерена пле состанокија, тани поврзими е Девлескере свето анавеа. Адалеске, аменге тано чест те поможина ој те овел чисто хем ки шукар состојба хем адава тано важно дело тари амари служба е Девлеске. Сарине шај те поможинен ко акава.

Поможин ко чистибе пало состанок. Пало секова состанок, о пхраља хем о пхења радосно поможинена те чистинел пе и дворана. Јекх пути ко масек темелно чистинела пе. Акаја бути водинела јекх старешина или слуга-помошнико касте со обично иси ле списако башо буќа со ваљани те керен пе. Шај некој ка ваљани те косел или те шулавел о поди, те усисивинел, те косел и прашина, те рединел о столице, шукар те чистинел о тоалетија, те косел о џамија хем о ајне, те фрдел о ѓубре, или те чистинел и авлин. Адава со о чхаве да ка поможинен ко чистибе ка сикавел лен те ценинен о тхан коте со сикљоваја башо Девел (Проповедник 5:1).

Поможин кеда керена пе поправке ки сала. Секова берш, керела пе темелно проверка е салаке, андрал хем авријал. Пало адала проверке, ако ваљани керена пе поправке, а адава поможинела и дворана те овел шукар одржими хем те на ден пе бут лове башо побаре поправке (2. Летописи 24:13; 34:10). Јекх чисто хем шукар одржими дворана тани достојно тхан коте со славинаја амаре Девле. Кеда амен да поможинаја, тегани сикаваја кај мангаја е Јехова хем ценинаја о тхан коте со славинаја ле (Псалм 122:1). Акава дела шукар сведоштво е јавере манушенге (2. Коринќаните 6:3).

• Соске ваљани те грижина амен е тханеске коте со славинаја е Девле?

• Со кераја те шај те овел чисто и дворана?

Дали мангеа те истражине хем те џане побутер баши Библија? Мангеа ли те џане побутер башо несаво стихо, личност, тхан или несави бути вакерди ки Библија? Или, пучеа ту сар шај и Библија те поможинел кеда мучинела ту несаво проблеми? Тегани, користин и библиотека ки дворана.

Ки лате шај те аракхе бут публикацие. Шај кхере нане ту са о библиска публикацие со иси е Јеховаскере сведокон ки чхиб со хаљовеа ла. Ама, ки библиотека ки дворана иси бут публикацие. Ки лате шај исто аѓаар те аракхе различна преводија тари Библија, шукар речнико хем јавера лила. Шај те користине и библиотека, англедер хем пало состанокија. ко ки лате иси компјутери, ка шај те користине и Библиотека публикациенцар е Јеховаскере сведоконгири (Watchtower Library). Ој тани компјутерско програма ки која иси бут публикацие, хем локхе шај те аракхе дисави тема, лафи или стихо со родеа.

Ој тани корисно адаленге со учествујнена ко состанок Амаро живото хем служба. Шај те користине и библиотека ки дворана кеда спреминеа ту башо задаче со иси тут ко акава состанок. О надгледнико акале состанокоскоро грижинела пе баши библиотека. Ов тано одговорно те дикхел дали о неве публикацие тане адатхе хем дали тане шукар средиме. Ов или адава со проучинела туја и Библија шај те сикавен ту сар те аракхе адава со ваљани туке. Ама, нијекх лил тари библиотека на ваљани те лел пе кхере. Исто аѓаар, ваљани шукар те аракхен пе адала лила хем ма те пишинел пе ки ленде.

И Библија вакерела кај ако мангаја те аракха ‚о џандипе башо Девел‘, мора те рода ле ‚сар гаравдо барвалипе‘ (Изреки 2:1-5). И библиотека ки дворана шај те поможинел туке ко акава.

• Со иси ки библиотека ки дворана?

• Кој шај те сикавел ту сар те користине и библиотека?

О Исус вакерѓа пле учениконге: ‚Нека светинел тумари светлина англо мануша, те шај ола те дикхен о шукарипе со керена хем те славинен тумаре Даде, со и ко небо‘ (Матеј 5:16) Башо адава, користинаја и модерно технологија сар со и о Интернет. Преку амари интернет-страница, jw.org, шај те добинен пе информацие башо адава ко со верујнена хем со керена е Јеховаскере сведокија. Со иси ки лате?

Библиска одговорија башо бут пучиба. Шај те аракхе одговорија башо бут важна пучиба со побутер мануша пучена пе. На пример, о трактатија Ка авел крајо е мукенге? хем Ка џивдинен ли палем о муле? тане достапна ко повише таро 600 чхибја. Адари шај те аракхе о Превод Нов свет ко побутер таро 130 чхибја хем бут публикацие коленцар со проучинела пе и Библија, сар со и тано о лил Со чаче сикавела и Библија? хем о најневе списанија Стражарска кула хем Разбудете се! Бут таро акала публикацие шај те читине, те шуне или те пераве ко MP3, PDF или EPUB форматија. Шај чак те принтине некобор стране те сикаве е интересентенге ки ленгири чхиб! Иси видеопубликацие ко бут знаковна чхибја. Шај те пераве снимке таро драмско читибе и Библија, библиска драме хем шужи музика те шај те уживине ко тло слободно време.

Чачутне информацие башо е Јеховаскере сведокија. Исто аѓаар адатхе тане чхивде о најневе хаберија хем видеоклипија баши амари бути ко цело сумнал хем башо адава сар поможинаја кеда овена природна катастрофе. Адатхе шај те дикхе кеда ка овен амаре конгресија хем о адресе таро амаре подружнице.

Са акалеа, амен ширинаја о чачипе џи ко најдур тхана ки Пхув. О мануша таро секова континенти, чак таро Антартик, иси лен корист акалестар. Амен бут мангаја ‚е Јеховаскоро лафи сигате те шунѓовел‘ ки цело Пхув, те овел славимо о Девел (2. Солуњаните 3:1).

• Сар и jw.org поможинела е манушенге те сикљон о чачипе тари Библија?

• Со би мангеа те роде ки амари интернет-страница?