Е Павлескоро унуко сине храбро

Ајде те дикха башо јекх терно мануш со спасинѓа пе вујко. Лескоро вујко сине о апостол Павле. На џанаја сар сине о анав акале терне манушескоро, ама џанаја кај сикавѓа кај тано бут храбро. Мангеа ли те џане со керѓа?—

О Павле сине ко затвор ко Ерусалим. Ов сине пханло соске вакерела сине е манушенге башо Исус. Несаве лошна мануша мрзинена сине е Павле, хем мангле те керен јекх лошно бути. Ола вакерге: ‚Те рода таро главно војнико те анен е Павле ко судо. Амен ка гарава амен негде ко друмо хем кеда ка накхел о Павле, ка мудара ле!‘

Е Павлескоро унуко шунѓа башо адава. Со керѓа ов? Гело ко затвор хем вакерѓа са е Павлеске. О Павле вакерѓа леске те џал ко главно војнико хем те вакерел леске са со шунѓа. Мислинеа ли кај сине локхо е Павлескере унукоске те керел лафи е главно војникоја?— На, соске о главно војнико сине важно мануш. Ама е Павлескоро унуко сине храбро хем гело те керел леа лафи.

О главно војнико џанља со те керел. Чхивѓа 500 војникија те аракхен е Павле! Вакерѓа адаја рат те легарен ле ки диз Цезареја. Спасинге ли е Павле?— Оја, о лошна мануша нашти сине те мударен ле! Адава со мангле нашти керге.

Со сикљовеа таро акава?— Ту да шај те ове храбро сар е Павлескоро унуко. Амен ваљани те ова храбра кеда вакераја е манушенге башо Јехова. Ка ове ли храбро секогаш те кере лафи башо Јехова?— Ако кереа аѓаар, тогаш шај ка спасине некаскоро живото.