О Самоил керела сине шукар буќа

Панда сар тикно, о Самоил служинела сине ко е Девлескоро шатори хем живинела сине паше узи лесте. Адари о мануша џана сине те обожавинен е Јехова. Џанеа ли сар о Самоил гело адари? Ајде прво те сикљова нешто баши лескири дај, и Ана.

Бут берша, е Ана нашти сине те овен ла чхаве, а ој бут мангела сине адава. Адалеске молинѓа е Јехова те дел ла чхаво. Ој ветинѓа е Јеховаске кај ако сине ла мурш чхаво, ка легарел ле те служинел ко е Девлескоро шатори хем адари те живинел. О Јехова шунѓа лакири молитва хем ој добинѓа мурш чхаво. Лескоро анав чхивѓа Самоил. И Ана керѓа аѓаар сар со ветинѓа. Кеда е Самоиле сине ле трин или штар берш, легарѓа ле ко шатори те служинел е Девлеске.

Ко е Девлескоро шатори о Илиј сине првосвештенико. Ов претставинела сине е манушен англо Девел. Лескере дуј чхаве, исто аѓаар служинена сине адатхе. Сигурно сетинеа ту, о шатори сине тхан коте со обожавинела пе сине о Девел. Адатхе о мануша ваљани сине те керен шукар буќа. Ама е Илијескере чхаве керена сине бут лошна буќа. О Самоил дикхела сине са адава. Дали о Самоил да керела сине лошна буќа сар ленде?— На, ов керела сине шукар буќа, сар со сиклило пе дадестар хем пе дајатар.

Со мислинеа, со ваљани сине о Илиј те керел пе чхавенге?— Ваљани сине те казнинел лен. На ваљанѓа те мукхел лен те служинен ко шатори. Ама, ов на керѓа адава. Адалеске о Јехова хољанѓа леске хем лескере чхавенге хем решинѓа те казнинел лен.

Јекх рат кеда совела сине, о Самоил шунѓа сар некој викинела ле: ‚Самоил!‘ Ов прастандило ко Илиј, а о Илиј вакерѓа леске: ‚Ме на викинѓум ту‘. Аѓаар уло дуј пути. Пало трито пути, о Илиј вакерѓа е Самоилеске те шунѓа палем адава гласо, те вакерел: ‚Вакер Јехова, шунава ту‘. О Самоил аѓаар керѓа. Тогаш о Јехова вакерѓа леске: ‚Вакер е Илијеске кај ка казнинав лен башо лошна буќа со керена лен‘. Со мислинеа, сине ли локхо е Самоилеске те вакерел акава?— На, на сине. О Самоил дарала сине, ама палем керѓа адава со родинѓа лестар о Јехова. Сар со вакерѓа о Јехова, аѓаар уло. О Илиј хем лескере чхаве муле.

Шукар тано те ова сар о Самоил. Ов керела сине шукар буќа чак кеда дикхела сине кај о јавера керена лошна буќа. Со ка кере ту? Ка ове ли сар о Самоил, ту да те кере шукар буќа? Те керѓан аѓаар, о Јехова, то дат хем ти дај ка овен радосна.