Е Библијакири главно тема тани е Девлескоро Царство. О Јехова ка користинел акава Царство те шај те керел и Пхув рај. Сој тано адава Царство? Котар џанаја кај више почминѓа те владинел? Кола буќа керѓа џи акана хем кола буќа ка керел ки иднина? Акаја хем о следна дуј лекцие ка одговоринен ко акала пучиба.

1. Сој тано е Девлескоро Царство хем кој тано лескоро Цари?

О Царство тано јекх влада која сој тани поставими таро Јехова о Девел. О Цари таро акава Царство тано о Исус Христос хем ов владинела таро небо (Матеј 4:17; Јован 18:36). И Библија башо Исус вакерела: „Ов вечно ка владинел сар Цари“ (Лука 1:32, 33). Сар Цари ко е Девлескоро Царство, о Исус ка владинел упро сарине со живинена ки Пхув.

2. Кој владинела заедно е Исусеа?

О Исус на владинела коркори. Мануша „таро секова племе, чхиб, народо хем нација... ка владинен сар царија упри цели пхув“ (Откровение 5:9, 10). Кобор џене ка владинен заедно е Исусеа? Откеда о Исус ало ки Пхув накхља бут време хем бут милиоња мануша уле христијања хем лескере следбеникија. Ама, само 144.000 лендар ка џан ко небо те владинен заедно е Исусеа. (Читин Откровение 14:1-4.) Са о јавера христијања ка живинен ки Пхув хем ка овен граѓанија таро е Девлескоро Царство (Псалм 37:29).

3. Соске е Девлескоро Царство тано пошукар таро манушикане владе?

Чак кеда о мануша со иси лен власт трудинена пе те керен нешто шукар е народоске, бут пути олен нане лен доволно моќ те керен са адава со мангена. Освен адава, пало несаво време ленге ко тхан шај те авен мануша кола сој тане себична хем кола со на мангена те поможинен е манушенге. Ама, ко е Девлескоро Царство никој јавер нане те авел ко тхан е Исусеске сар Цари. О Девел „ка ваздел царство кова со никогаш нане те овел уништимо“ (Даниел 2:44). О Исус ка владинел упри цели Пхув хем нане те овел пристрасно или те керел разлика машкар о мануша. Ов тано пхердо мангипаја, љубезно хем праведно хем ка сикавел е манушен ола да те овен асавке спрема о јавера. (Читин Исаија 11:9.)

4. Јекх моќно влада ка владинел цело светоја

О Исус Христос тано бут помоќно таро било кова владетели ки историја. Читин Матеј 28:18, а пало адава керен лафи башо акава пучибе:

• Ко со разликујнела пе и власт со иси е Исусе тари власт со иси е манушен?

О манушикане владе бут пути менинена пе хем секоја лендар владинела само упро јекх дело ки Пхув. Ама, сар тано е Девлескере Царствоја? Читин Даниел 7:14, а пало адава керен лафи башо акала пучиба:

• Со мислинеа, соске тано шукар со е Девлескоро Царство „никогаш нане те овел уништимо“?

• Со мислинеа, соске тано шукар со ов ка владинел упри цели Пхув?

5. О манушикане владе мора те овен замениме

Соске е Девлескоро Царство мора те заменинел е манушикане владен? Дикх о ВИДЕОКЛИПИ, а пало адава керен лафи башо акава пучибе:

ВИДЕОКЛИПИ: Сој е Девлескоро Царство? — извадок (1:41)

• Саве тане о резултатија таро манушикано владибе?

Читин Проповедник 8:9, а пало адава керен лафи башо акава пучибе:

• Дали мислинеа кај е Девлескоро Царство ваљани те заменинел е манушикане владен хем соске?

6. О владетелија ко е Девлескоро Царство хаљовена амен

Адалеске со амаро Цари, о Исус, живинѓа сар мануш, ов шај „те хаљовел амаре слабостија“ (Евреите 4:15). Заедно леа ка владинен 144.000 верна мурша хем џувља колен со о Девел биринѓа „таро секова племе, чхиб, народо хем нација“ (Откровение 5:9).

• Дали охрабринела тут адава со џанеа кај о Исус хем адала со ка владинен заедно леа џанена сар тано те живине сар мануш хем соске?

7. Е Девлескере Царство иси ле о најшукар законија

О владе керена законија кола со мислинена кај ка овен корисна е граѓаненге хем кај ка заштитинен лен. Исто аѓаар, е Девлескере Царство иси ле пле законија хем окола со мангена ов те владинел упри ленде ваљани те икерен пе ко адала законија. Читин 1. Коринќаните 6:9-11, а пало адава керен лафи башо акала пучиба:

• Со мислинеа, саво ка овел о свето ако сарине икерена пе ко е Девлескере законија?a

• Со мислинеа, дали е Јехова иси ле право те очекујнел околендар со мангена лескоро Царство те владинел упри ленде те икерен пе ко лескере законија? Соске мислинеа аѓаар?

• Котар џанаја кај о мануша со нане послушна ко акала законија шај те менинен пе? (Дикх о стихо 11.)

СО СИКЛИЛЕМ

Е Девлескоро Царство тано јекх чачутни влада ко небо која со ка владинел упри цели Пхув.

Сар ка одговорине?

• Кој тане о владетелија ко е Девлескоро Царство?

• Соске е Девлескоро Царство тано бут пошукар тари било која манушикани влада?

• Со очекујнела о Јехова таро окола со мангена лескоро Царство те владинел упри ленде?

ИСТРАЖИН

Читин со вакерѓа о Исус башо адава коте тано е Девлескоро Царство.

„Дали Божјето Царство се наоѓа во твоето срце?” (интернет статија)

Дикх со вакерела и Библија башо 144.000 сој бириме таро Јехова те владинен заедно е Исусеа.

„Кој оди на небото?” (интернет статија)

Со уверинѓа јекхе џувља која со сине пханли ко затвор кај само о Девел шај те анел правда ко свето?

„Каде го најдов решението за неправдите” (Разбудете се! таро ноември 2011)

Е Девлескоро Царство почминѓа те владинел ко небо ко 1914 берш. Ко акава берш, исто аѓаар, почминѓе о последна диве таро манушикано владибе. Котар џанаја адава? Те шај те добина о одговор, ваљани те дикха со пророкујнѓа и Библија хем те дикха сар о условија ко свето хем о мануша менинѓе пе таро 1914 берш.

1. Со пророкујнѓа и Библија?

Таро библиско лил Даниел џанаја кај е Девлескоро Царство ка почминел те владинел откеда ка завршинел о периоди со викинела пе „ефта времија“ (Даниел 4:16, 17). Веконцар покасно, о Исус башо акава периоди вакерѓа кај тано „о време сој одредимо е народонге со на служинена е Девлеске“ хем вакерѓа кај адава периоди панда на завршинѓа (Лука 21:24). Сар со ка дикха, акала ефта времија завршинѓе ко 1914 берш.

2. Сар о условија ко свето хем о мануша менинѓе пе таро 1914 берш?

Е Исусескере ученикија пучле ле: „Кова ка овел о знако баши тли присутност хем башо крајо акале светоскоро?“ (Матеј 24:3). Ко одговор, о Исус вакерѓа бут буќа со ка случинен пе откеда ка почминел те владинел ко небо сар Цари ко е Девлескоро Царство. Ов вакерѓа кај ка овен војне, бокхалипа, земјотресија хем јавера буќа. (Читин Матеј 24:7.) Исто аѓаар, и Библија пророкујнѓа кај о живото ко „последна диве“ ка овел „бут пхаро“ адалеске со о мануша ка овен лошна (2. Тимотеј 3:1-5). Са акала буќа почминѓе са повише те овен хем јасно те дикхен пе таро 1914 берш.

3. Соске о условија ко свето уле добором лошна откеда почминѓа те владинел е Девлескоро Царство?

Кратко откеда о Исус уло Цари ко е Девлескоро Царство, ов водинѓа војна против о Сатана хем о демонија. О Сатана нашавѓа ки адаја војна. И Библија вакерела: „[О Сатана] сине фрдимо ки пхув, а заедно леа сине фрдиме лескере ангелија да“ (Откровение 12:9, 10, 12). Ов тано бут хољамо соске џанела кај ка овел уништимо. Адалеске керела ко цело свето те овел лошнипе хем муке. На чудинела амен со о условија ко свето тане добором лошна! Ама, е Девлескоро Царство ка решинел са акала проблемија.

ДОЗНАЈН ПОВИШЕ

4. О библиска пророштвија сикавена кај о Царство почминѓа те владинел ко 1914 берш

ВИДЕОКЛИПИ: Е Девлескоро Царство почминѓа те владинел ко 1914 берш (5:02)

О Девел керѓа о Навуходоносор, кова со сине цари ко пурано Вавилон, те дикхел јекх суно кова со сине пророштво. О суно хем о објаснување со денѓа о пророко о Даниел сикавена кај акава пророштво иси ле дуј исполнувања. О прво исполнување сине упро е Навуходоносорескоро владибе, а о дујто упро е Девлескоро Царство. (Читин Даниел 4:17.)a

Читин Даниел 4:20-26, а пало адава користин и рамка те шај те одговорине ко акала пучиба:

• (1) Со дикхља ко суно о Навуходоносор? (Дикх о стихија 20 хем 21.)

• (2) Со ка овел е каштеа? (Дикх о стихо 23.)

• (3) Со ка овел откеда ка завршинен о „ефта времија“? (Дикх о стихо 26.)

Сар о суно башо каш тано поврзимо е Девлескере Царствоја?

О ПРОРОШТВО (Даниел 4:20-36)

О владибе

(1) Јекх бут баро каш

О владибе чхинавдо

(2) „Чхинен о каш“ хем нека накхен „ефта времија“

О владибе ирамо

(3) „Тло царство палем ка иранел пе туке“

Ко прво исполнување таро акава пророштво...

• (4) кас претставинела о каш? (Дикх о стихо 22.)

• (5) сар сине чхинавдо лескоро владибе? (Читин Даниел 4:29-33.)

• (6) со случинѓа пе е Навуходоносореске ко крајо таро „ефта времија“? (Читин Даниел 4:34-36.)

ПРВО ИСПОЛНУВАЊЕ

О владибе

(4) О Навуходоносор, о цари таро Вавилон

О владибе чхинавдо

(5) Пало 606 берш а.а.е., о Навуходоносор нашавела пли годи хем нашти те владинел ефта дословна берша

О владибе ирамо

(6) Е Навуходоносорескири годи иранела пе хем ов почминел палем те владинел

Ко дујто исполнување таро акава пророштво...

• (7) кас претставинела о каш? (Читин 1. Летописи 29:23.)

• (8) сар сине чхинавдо ленгоро владибе? Котар џанаја кај акава панда трајнела сине џикоте о Исус сине ки Пхув? (Читин Лука 21:24.)

• (9) кеда хем коте сине ирами и власт?

ДУЈТО ИСПОЛНУВАЊЕ

О владибе

(7) О израелска царија кола со претставинена сине е Девлескоро владибе

О владибе чхинавдо

(8) О Ерусалим тано уништимо, и власт таро израелска царија тани чхинавди 2.520 берша

О владибе ирамо

(9) О Исус почминела те владинел ко небо сар Цари ко е Девлескоро Царство

5. О свето менинѓа пе таро 1914 берш

Дикх о ВИДЕОКЛИПИ.

ВИДЕОКЛИПИ: О свето менинѓа пе таро 1914 берш (1:10)

О Исус вакерѓа саво ка овел о свето откеда ов ка овел Цари. Читин Лука 21:9-11, а пало адава керен лафи башо акава пучибе:

• Кола таро акала буќа лично доживинѓан или шунѓан кај случинѓе пе?

О апостол Павле опишинѓа саве ка овен о мануша ко последна диве таро манушикано владибе. Читин 2. Тимотеј 3:1-5, а пало адава керен лафи башо акава пучибе:

• Кола таро акала буќа дикхљан ко мануша авдиве?

6. Ко со ваљани те поттикнинел амен адава со е Девлескоро Царство владинела?

Читин Матеј 24:3, 14, а пало адава керен лафи башо акала пучиба:

• Која важно задача сикавела кај е Девлескоро Царство више владинела?

• Сар шај ту да те учествујне ки акаја задача?

Е Девлескоро Царство више владинела ко небо хем бут паше тано о диве кеда ка почминел те владинел упри цели Пхув. Читин Евреите 10:24, 25, а пало адава керен лафи башо акава пучибе:

• Со ваљани секој амендар те керел џикоте дикхела „кај авела попаше о диве“?

СО СИКЛИЛЕМ

О библиска пророштвија хем о условија ко свето сикавена кај е Девлескоро Царство више владинела. Амен сикаваја кај верујнаја ко адава аѓаар со проповединаја баши лесте хем присуствујнаја ко состанокија.

Сар ка одговорине?

• Со случинѓа пе ко крајо таро ефта времија сој спомниме ки Библија ко лил Даниел?

• Со уверинела тут кај е Девлескоро Царство почминѓа те владинел ко 1914 берш?

• Сар шај те сикаве кај верујнеа кај е Девлескоро Царство више владинела?

ИСТРАЖИН

Дикх со вакерена о историчарија хем о јавера мануша башо адава сар о свето менинѓа пе таро 1914 берш.

„Време на драстичен пад на моралот“ (Разбудете се! таро април 2007)

Читин сар о пророштво ко Матеј 24:14 влијајнѓа упро јекхе манушескоро живото.

„Бејзболот ми беше сѐ!“ (Стражарска кула бр. 3, 2017)

Котар џанаја кај о пророштво таро Даниел 4 поглавје однесинела пе ко е Девлескоро Царство?

„Кога почнало да владее Божјето Царство? (прв дел)“ (Стражарска кула таро 1 октомври 2014)

Со сикавела кај о „ефта времија“ сој спомниме ко Даниел 4 поглавје завршинѓе ко 1914 берш?

„Кога почнало да владее Божјето Царство? (втор дел)“ (Стражарска кула таро 1 ноември 2014)

Е Девлескоро Царство више владинела. Панда хари, ов ка керел баре промене ки Пхув. Те дикха несаве шукар буќа со ка керел е Девлескоро Царство.

1. Сар е Девлескоро Царство ка анел мир хем правда ки Пхув?

О Исус, сар цари ко е Девлескоро Царство, ка уништинел е лошна манушен хем е владен ки војна со викинела пе Армагедон (Откровение 16:14, 16). Тегани ка исполнинел пе акава ветување тари Библија: „Панда хари, о лошно нане те овел више“ (Псалм 37:10). Преку е Девлескоро Царство, о Исус ка керел те овел мир хем правда ки цели Пхув. (Читин Исаија 11:4.)

2. Саво ка овел о живото ки Пхув кеда сарине ка керен е Девлескири волја?

Кеда е Девлескоро Царство ка владинел „о праведна мануша ка наслединен и пхув хем ка живинен вечно ки лате“ (Псалм 37:​29). Замислин туке те живине ко свето коте со сарине тане праведна хем мангена е Јехова хем јекх јекхе! Никој нане те овел насвало хем сарине ка живинен вечно.

3. Со ка керел е Девлескоро Царство откеда о лошна мануша ка овен уништиме?

Откеда о лошна мануша ка овен уништиме, о Исус ка владинел сар Цари 1.000 берша. Ко адава време, ов хем о 144.000 со ка владинен заедно леа, ка поможинен е манушенге те овен совршена. Ко крајо таро адава периоди и Пхув ка овел рај хем са о мануша ка овен бахтале адалеске со шунена е Јеховаскере законија. Тегани о Исус ка иранел о Царство пле Дадеске е Јеховаске. Сар никогаш англедер, ка „славинел пе [е Јеховаскоро] анав“ (Матеј 6:9, 10). Тегани ка овел јасно кај о Јехова тано шукар Владетели кова со грижинела пе башо пле слуге. Пало адава, о Јехова ка уништинел е Сатана, е демонен хем са околен со бунинена пе против лескоро владибе (Откровение 20:7-10). Са о шукар буќа со ка керел е Девлескоро Царство ка ачховен засекогаш.

ДОЗНАЈН ПОВИШЕ

4. Е Девлескоро Царство ка чхивел крајо е манушикане владенге

„О мануш владинела упро мануш ки лескири штета“ (Проповедник 8:9). Преку пло Царство, о Јехова ка поправинел са и штета со керѓе о мануша пле владибаја.

Читин Даниел 2:44 хем 2. Солуњаните 1:6-8, а пало адава керен лафи башо акала пучиба:

• Со ка керел о Јехова хем о Исус е манушикане владенге хем околенге со поддржинена лен?

• Сар адава со џи акана сиклиљан башо Јехова хем о Исус уверинела тут кај са адава со ка керен ка овел праведно?

5. О Исус тано о најшукар Цари

Сар Цари ко е Девлескоро Царство, о Исус ка поможинел е манушенге ки Пхув ко разна начинија. Дикх о ВИДЕОКЛИПИ те шај те дикхе кај о Исус мангела те поможинел е манушенге хем кај о Јехова денѓа ле и моќ те керел адава.

ВИДЕОКЛИПИ: О Исус сикавѓа со ка керел е Девлескоро Царство (1:13)

О буќа со керѓа о Исус џикоте сине ки Пхув, сикавена со ка керел е Девлескоро Царство. Кола берекетија сој тане денде потеле аџикереа посебно те исполнинен пе? Читин о стихија кола со керена лафи башо адала берекетија.

6. Е Девлескоро Царство ка анел јекх бут шужи иднина

ВИДЕОКЛИПИ: Берекетија со ка авен ки иднина (4:38)

Читин Псалм 145:16, а пало адава керен лафи башо акава пучибе:

• Сар осетинеа тут башо адава со џанеа кај о Јехова ка дел „са е манушенге хем е животненге адава со мангена“?

СО СИКЛИЛЕМ

Преку пло Царство о Девел ка керел адава со мангела. Кеда о Царство ка владинел, цели Пхув ка овел рај хем ки лате ка живинен само шукар мануша кола со засекогаш ка обожавинен е Јехова.

Сар ка одговорине?

• Сар е Девлескоро Царство ка славинел е Јеховаскоро анав?

• Соске шај те верујна кај е Девлескоро Царство ка исполнинел о ветувања тари Библија?

• Која бути мангеа највише те керел е Девлескоро Царство?

ИСТРАЖИН

Дознајн сој тани и војна Армагедон.

„Што е Армагедон?“ (интернет статија)

Читин кола настанија ка овен ко време кова со о Исус викинѓа ле „бари неволја“ (Матеј 24:21).

„Што е големата неволја?“ (интернет статија)

Дикх сар шај сар фамилија те размислинен башо рај.

Замисли се себеси во рајот (1:50)

Ко искуство е насловеа „Ме мачеа многу прашања“, читин сар јекх политичко бунтовнико халило кој ка решинел амаре проблемија.

„Библијата менува животи“ (Стражарска кула таро 1 јануари 2012)