Бискотија е џукеленге

О Сведокија на сине љубезна само е манушенцар, него хем ме џукеленцар. Јекх диве и Илејн, која со терѓола сине узи количка, денѓа бискотија мле дује џукеленге. Оттегани, само со ка накха сине таро количке, мле џукела влечинена ман сине ко тхан коте со добинена сине бискотија.

Некобор масекија накхле, мле џукела уживинена сине ко бискотија, а ме уживинава сине ко кратка разговорија е Сведоконцар. Ама на мангљум те овав бут паше ленцар. Сине ман повише таро 70 берш, хем на сиум сине сигурно ко со верујнена о Сведокија. Адалеске со сиум сине разочаримо таро бут христијанска цркве, мислинѓум манге кај тано најшукар коркори те проучинав и Библија.

Ко адава периоди, дикхљум јавере да Сведокон ко јавера делија тари диз сар терѓона сине количкенцар сведочибаске. Ола да сине секогаш љубезна. Секогаш одговоринена манге сине е Библијаја ко мле пучиба, хем адалеске мли доверба ки ленде барили.

Јекх диве, и Илејн пучља ман: ’Со мислинеа, дали о животне тане поклон таро Девел?‘ Ме одговоринѓум: ’Оја, сигурно сиум ко адава!‘ Тегани и Илејн читинѓа манге о лафија таро Исаија 11:6-9. Пало адава мангљум те дознајнав нешто повише баши Библија, ама понадари да на мангава сине те лав лендар литература.

Ко следна диве, е Илејнаја хем лакере ромеа е Брентеа кераја сине кратко лафи, ама башо хор теме. Ола денѓе ман предлог те читинав и Библија таро Матеј џи ко Дела, те шај те хаљовав со значинела те овел пе чачутно христијани. Баш адава керѓум. Сигате пало адава, почминѓум те проучинав и Библија ленцар. Адава сине ко нилај 2016 берш.

Уживинава сине со секова курко проучинава сине и Библија, хем со џава сине ко состанокија ки е Јеховаскере сведоконгири дворана. Сиум сине бут бахтало со шај сине те сикљовав о библиска чачипа. Јекх берш пало адава, крстинѓум ман хем уљум е Јеховаскоро сведоко. Акана иси ман 79 берш хем џанава кај сиум ко исправно друмо. О Јехова денѓа ман берекети адалеа со дозволинѓа манге те овав дело тари лескири фамилија сој ко цело свето“.