О Јехова поможинѓа аменге те бајрова коте хем те ова сине садиме

О Матс хем и Ан-Катрин Касхолм сине ки Школа Гилеад ко 1979 берш хем ко берша со накхле сине „садиме“, јавере лафенцар, добинѓе задача те служинен ко Иран, Маврициус, Мјанмар, Танзанија, Уганда хем Заир. Хем баш ко Гилеад, таро инструктори Џек Редфорд, шунѓе о совет „бајров адатхе коте со сиан садимо“. Адава совет бут поможинѓа ленге соске бут пути сине „садиме“ хем „пресадиме“. Те дикха со иси те вакерен аменге.

Матс, ка манге ли те вакере аменге сар дознајнѓан о чачипе?

Матс: Мо дад, кова со живинела сине ки Полска џикоте трајнела сине и Дујто светско војна, дикхља кај ки католичко црква иси бут лицемерство. Сепак, бут вакерела сине: „Сигурно иси чачутни религија!“ Покасно, халиљум кај сине ко право. Бут пути кинава сине лила ко пуранипе. Машкар адала лила сине јекх плаво лил е насловеа Чачипе кова со ингарела ко вечно живото. О наслов бут привлечинѓа ман хем јекхе раќаке читинѓум цело лил. Кеда завршинѓум читибаја сабајле, халиљум кај аракхљум о чачипе!

Почминдор таро април 1972 берш, читинѓум бут публикацие е Јеховаскере сведоконгере коленде со аракхљум о одговорија ко мле библиска пучиба. Осетинѓум ман сар о трговцо тари е Исусескири споредба кова со откеда аракхља јекх скапоцено бисери, бикинѓа са те шај те кинел ле. Ман сине ман планија те завршинав факултети хем те овав доктори, ама „бикинѓум“ мле планија те шај те кинав о „бисери“ кова со аракхљум ле — о чачипе (Мат. 13:45, 46). Крстинѓум ман ко 10 декември 1972 берш.

Башо похари таро јекх берш, мле родителија хем мло потикно пхрал прифатинѓе о чачипе хем крстинѓе пе. Ко јули 1973 берш, почминѓум е полновремено службаја. Машкар о ревна пионерија ко амаро собрание сине јекх шужи хем духовно пхен со викинела пе Ан-Катрин. Заманглем амен хем венчинѓем амен ко 1975 берш. О следна штар берш живинѓем ки диз Стремсунд (Шведска), јекх бут шужо тхан коте со бут мануша мангена те сикљовен баши Библија.

Ан-Катрин: Мо дад дознајнѓа о чачипе кеда сине ко факултети ко Стокхолм. Ов лела ман сине пеа ко состанокија хем ки служба, иако сине ман само трин масек. Ме дајаке на свиџинѓа пе адава хем мангела сине те докажинел кај адава со вакерена о Сведокија нане чаче. Ама, нашти сине те керел адава хем пало несаво време ој да крстинѓа пе. Ме крстинѓум ман ко 13 берш, а ко 16 берш уљум пионерка. Јекх време служинѓум ко Умео коте со сине побари потреба таро објавителија хем пало адава уљум специјално пионерка.

Откеда ме хем о Матс лелем амен, сием сине радосна со шај сине те поможина некоборе манушенге те дознајнен о чачипе. Јекх лендар сине и Мајвор, тинејџерка која со откажинѓа пе тари спортско кариера хем заедно мле потикне пхењаја почминѓе те служинен сар пионерија. Ко 1984 берш, ола о солдуј геле ко Гилеад хем акана служинена сар мисионерке ко Еквадор.

Служинѓен ко бут тхана. Сар сикавѓен кај шунѓен о совет „бајров адатхе коте со сиан садимо“?

Матс: Бут пути сием сине „пресадиме“ тари јекх ки јавер задача. Ама, трудинаја амен сине амаре коренија те ачхон хор ко Исус аѓаар со џаја сине пало лескоро пример најшукар со шај, посебно кеда керела пе лафи баши понизност (Кол. 2:6, 7). На пример, наместо те очекујна таро пхраља со сине ко адала тхана те прилагодинен ки аменде, трудинаја амен сине те хаљова соске керена о буќа ко несаво начин. Мангаја сине те хаљова ленгири култура хем ленгоро начин сар размислинена. Кај хем те ова сине, кобор повише трудинаја амен сине те ова сар о Исус добором повише осетинаја амен сине „сар каш сој садимо узо пања со тхавдена“ (Пс. 1:2, 3).

Ан-Катрин: Откеда јекх каш ка овел пресадимо, те шај понадари да те бајрол ваљанена леске тати температура хем светлина. О Јехова секогаш сине аменге „кхам“ (Пс. 84:11). Ов денѓа амен бут шукар пхралипе колесте со иси мангипе. На пример, ко амаро тикно собрание ко Техеран (Иран) доживинѓем гостопримливост сар таро библиска времија. Мангаја сине те ачхова ко Иран, ама ко јули 1980 берш, е Јеховаскере сведокија сине официјално забраниме хем мора сине 48 саатенге те икљова тари пхув. Добинѓем задача те служина ко Заир (авдиве пенџардо сар Конго), ки Африка.

Кеда дознајнѓум кај ка служина ки Африка, бут рунѓум. Шунѓум кај ки Африка иси сапа хем насвалипа хем адалеске дарава сине. Ама, дуј амаре паше амала кола со бут време служинѓе адари, вакерѓе аменге: „Панда на гелен адари, а тумен више разочаринѓен тумен. Пробинен! Па ка дикхен, ка заманген и Африка“. Хем чаче заманглем ла. О пхраља хем о пхења адари тане бут шукар хем љубезна. Уствари, пало шов берш кеда ваљани сине те џа аменге таро Заир баши забрана со сине, асандиљум коркори манге соске халиљум кај акана молинѓум е Јехова те ачхова ки Африка.

Саве благословија доживинѓен ко са адала берша?

Матс: Мора те спомнинав о паше амалипа со сине амен е мисионеренцар таро различна пхувја. Исто аѓаар, ко несаве тхана икераја сине бут библиска курсија, понекогаш чак по 20 секова јекх амендар. Адава керела амен сине бут радосна. Никогаш нане те бистрав о мангипе хем о гостопримство е пхраленгоро хем е пхењенгоро тари Африка. Кеда посетинаја сине о собрание ки Танзанија, амен соваја сине ко амаро комби кова со паркиринаја ле сине узо пхраља хем пхења, а ола грижинена пе сине те овел амен са со ваљани аменге, иако сине бут чороле (2. Кор. 8:3). Нешто со бут мангава сине, сине адава со викинаја ле сине време раскажибаске. Ко крајо таро секова диве, и Ан-Катрин хем ме ка кера сине лафи сар накхлем аменге о диве хем благодаринаја сине е Јеховаске сој тано аменцар.

Ан-Катрин: Манге бари радост тани адаја со шај сине те запознајнав пхрален хем пхењен таро цело свето, сиклилем неве чхибја машкар коленде со сине и Персиско, Француско, Луганда хем Свахили, а дикхлем хем бут интересна културе. Поможинѓем е манушенге те запознајнен е Девле хем керѓем аменге чачутне амала хем заедно ленцар служинѓем е Јеховаске сложно (Соф. 3:9).

Исто аѓаар, сине амен прилика те дикха бут буќа со створинѓа о Јехова. Секова пути кеда ка прифатина сине несави неви задача ки служба башо Јехова, осетинаја амен сине сар ка пхене џаја ко јекх патујбе заедно е Јеховаја, амаро Водачи. Лестар сиклилем буќа кола со никогаш на би сикљоваја лен сине коркори.

Саве проблемија сине тумен, хем сар иклилен ленцар ко крајо?

Матс: О берша со накхле астарѓем некобор насвалипа, сар на пример и маларија. А и Ан-Катрин мора сине некобор пути те овел итно оперирими. Освен адава, сием сине секириме башо амаре родителија кола со сине пхуре. Ама, благодарна сием амаре телесна пхраленге хем пхењенге кола со грижинѓе пе ленге хем адава керена ле сине стрпливо, радосно хем мангипаја (1. Тим. 5:4). Сепак, понекогаш боринаја амен сине негативно чувствонцар соске нашти сине те поможина лен дуралдан.

Ан-Катрин: Ко 1983 џикоте служинаја сине ко Заир, астарѓум колера хем сиум сине бут насвали. О доктори вакерѓа мле ромеске: „Сар џанеа, панда авдиве икал ла тари акаја пхув!“ О следно диве више сием сине ко друмо те џа ки Шведска, ама ко товарно авиони соске на сине јавер начин сар те џа аменге.

Матс: Мислинѓем кај адалеа ка завршинел амари мисионерско служба. Бут сине аменге пхаро хем рунѓем. Иако о доктори мислинела сине кај и Ан-Катрин нане те сасљол, ој састили. Пало берш хем нешто иранѓем амен ко Заир, акава пути ко јекх тикно собрание ко свахили ко Лубумбаши.

Ан-Катрин: Џикоте служинаја сине ко Лубумбаши, сине ман спонтано абортус. Иако на планиринѓем те овен амен чхаве, сепак адава сине манге бут пхаро. Ама ко адава пхаро време, о Јехова благословинѓа амен ко начин со на очекујнѓем. Почминѓем повише курсија таро било кеда англедер. Башо похари таро јекх берш, о собрание барило таро 35 ко 70 објавителија, а присутност ко состанокија таро 40 ко 220. Сием сине бут зафатиме ки служба хем о благослов таро Јехова сине аменге бари утеха. Ама, акана да бут пути размислинаја хем кераја аменге лафи башо амаро бебе. Едвај аџикераја те дикха сар о Јехова целосно ка сасљарел амаре виле.

Матс: Јекх време и Ан-Катрин осетинела пе сине бут омалаксими. Ко исто време, аракхле манге рако ко дебело црево со сине ки штарто фаза хем ваљани сине те керел пе манге бари операција. Ама, акана сиум шукар, а и Ан-Катрин дела пестар са ки служба.

Халилем кај нане амен само амен проблемија. Откеда сине о геноцид ки Руанда ко 1994 берш, посетинѓем буте пхрален хем пхењен ко избегличка кампија. Ленгири вера, истрајност хем бари гостопримливост аменге сине доказ кај е Јехова иси ле моќ те поможинел пле слугенге ки било сави неволја (Пс. 55:22).

Ан-Катрин: Јекх јавер пхари ситуација колате со аракхлилем, сине кеда сием сине ко свечено отворање е подружницакоро ки Уганда ко 2007 берш. Пали програма цидинѓем те џа ко Најроби (Кенија) јекхе групаја колате со сине околу 25 мисионерија хем бетелитија. Негде англедер и граница е Кенијаја, јекх камиони таро јекх пути кхувѓа ки амари лента хем кхувѓа директно аменде. О возачи хем панџ амаре амала муле ко тхан, а јекх пхен мули покасно ки болница. Едвај аџикераја палем те дикха амаре амален (Јов 14:13-15).

Сар со накхела сине о време о физичка повреде састиле. Ама ме роме, ман хем некобор јавере пхрален хем пхењен, сине амен посттрауматско стрес. Раќате сине ман анксиозна нападија хем уштава сине симптоменцар слична сар инфаркт. Сине страшно. Ама, бут поможинѓа аменге и молитва хем и утеха со добинаја сине таро несаве амаре омилена стихија. Родинѓем хем професионално помош хем адава бут поможинѓа амен. Акана о симптомија тане полокхе хем молинаја е Јехова те поможинел е јаверенге да со иси лен анксиозност.

Кеда вакерѓен аменге со поможинѓа туменге ко пхаре ситуацие, вакерѓен аменге кај о Јехова ингарѓа тумен „сар џивдо јаро ко вас“. Со значинела адава?

Матс: Акаја тани јекх изрека ки чхиб свахили. Кеда некас иси џивдо јаро ко вас, бут пазинела сар пхиравела ле. Ко асавко начин о Јехова грижинѓа пе аменге ки секоја амари задача. Секогаш сине амен адава со ваљанѓа аменге, па чак хем повише. Јекх начин сар секогаш осетинаја сине е Јеховаскоро мангипе хем поддршка сине кеда дикхаја сине кобор бут хаљовела амен о Водечко тело.

Ан-Катрин: Мангава те вакерав туменге јекх ситуација ки која со о Јехова бут поможинѓа манге. Јекх диве јавинѓе манге кај мо дад ки Шведска тано ки интензивно нега. О Матс само со састило тари маларија. На сине амен паре те шај те кина авионска карте те џа аменге кхере хем адалеске одлучинѓем те бикина о врда. Ама, тегани добинѓем дуј телефонска повикија. Прво, јавинѓа пе аменге јекх брачно пари со шунѓа баши амари ситуација хем мангља те платинел аменге јекх карта. Пало адава, јавинѓа пе аменге јекх попхури пхен која со сине ла штедиме паре ки јекх кутија колате со сине пишимо: „Некаске каске со ваљани“. Аѓаар, само башо некобор минутија, о Јехова грижинѓа пе те овел амен адава со ваљанѓа аменге! (Евр. 13:6).

Ко акала 50 берш со накхавѓен ки полновремено служба, со сиклилен?

Ан-Катрин: Халиљум кај ка овел амен сила ако аракхаја амаро мир хем доверба ко Јехова. Кеда иси амен доверба ки лесте, ов ка боринел пе аменге ко тхан (Иса. 30:15; 2. Лет. 20:15, 17). Ки секоја амари задача служинѓем е Јеховаске са амаре силенцар. Хем адалеске добинѓем благословија кола со на би добинаја лен сине ко нијекх јавер начин.

Матс: Манге и главно лекција сине адава те овел ман доверба ко Јехова ки секоја ситуација хем те дикхав со ка керел ов баши манде (Пс. 37:5). Хем сар со ветинѓа, ов секогаш сине узи манде. Хем џи авдиве дикхаја адава џикоте служинаја ко Бетел ко Мјанмар.

Надинаја амен кај бут терне со мангена те керен повише ки служба башо Јехова ка осетинен о исто верно мангипе кова со ов сикавѓа ле аменге. Увериме сием кај ка осетинен ле ако мукхена о Јехова те поможинел лен те бајрон адатхе коте сој садиме.