OTKROVENIE E JOVANESKE

1 Otkrovenie* taro Isus Hristos, kova so dengja le o Devel, te sikavel ple robonge o bukja so ka slučinen pe panda hari. Ov bičhalgja ple angele hem preku leste znakoncar sikavgja ple roboske e Jovaneske, 2 kova so svedočingja bašo e Devleskoro lafi hem bašo sa so vakergja o Isus Hristos,* bašo sa o bukja so dikhlja. 3 Srekjno tano okova so čitinela ko glaso hem okola so šunena akala lafija taro akava proroštvo hem okola so ikerena o bukja kola soj pišime ki leste. Soske, o vreme so odredingja le o Devel tano paše.

4 Me o Jovan pišinava dži ko efta sobranija kola soj ki Azisko provincija:*

Mangava te dobinen o šukaripe so na zaslužinaja le hem o mir taro „okova soj tano, so sine hem so avela“, hem taro efta sile* kola soj anglo leskoro prestol, 5 hem taro Isus Hristos kova soj o Verno svedoko, o prvo so voskresningja taro mule* hem o Vladeteli upro carija ki phuv.

O Isus, kova so mangela amen hem kova so oslobodingja amen taro amare grevija preku plo rat - 6 hem kergja amen te ova carija hem sveštenikija leskere Devleskere hem Dadeskere - oja, leske pripadinena i slava hem i mokj zasekogaš. Amin.

7 Ake, ov avela e oblakoncar, hem sekova jekh ka dikhel le, čak okola so posavgje le kopjea. Hem o manuša taro sa o plemija ki phuv ka khuven pe ko kolin tari žal leskoro sebepi. Oja, akava čače ka ovel, amin.

8 „Me sium alfa hem omega“,* vakerela o Jehova* o Devel, „okova soj tano akana, so sine hem so ka avel, o Semokjno“.

9 Me, o Jovan, tumaro phral, kova so sar sledbeniko e Isuseskoro delinava tumencar o nevolje, o carstvo hem i istrajnost, sium sine ko ostrov kova so vikinela pe Patmos adaleske so kergjum lafi bašo Devel hem svedočingjum bašo Isus. 10 E Devleskiri sila* angja man ko e Gospodareskoro dive hem šungjum pali mande jekh silno glaso kova so sine sar zvuko tari truba, 11 sar vakerela: „Akava so dikhea, pišin le ko svitok* hem bičhal le dži ko efta sobranija: ko Efes, ki Smirna, ko Pergam, ki Tijatira, ko Sard, ki Filadelfija hem ki Laodikija“.

12 Irangjum man te dikhav koj kerela lafi. Keda irangjum man, dikhljum efta zlatna svetilnikija, 13 a maškar o svetilnikija nekoj so ličinela sar manušikano čhavo. Sine uravdo ki dugačko nametka hem okolu o kolin sine le zlatno pojas. 14 Leskoro šero hem o bala sine parne sar parni volna, sar iv, a leskere jakhja sine sar jag so thabljola. 15 Leskere pre svetinena sine sar čisto bakari keda topinela pe ki tati pečka, a o glaso sine leskoro sar o zvuko taro but panja. 16 Ko desno vas sine le efta zvezde, hem taro leskoro muj ikljola sine jekh dugačko hem oštro mači kova so čhinela sine taro solduj strane, a leskoro muj sine sar kham keda silno svetinela. 17 Keda dikhljum le, peljum sar mulo anglo leskere pre.

A ov čhivgja plo desno vas upri mande hem vakergja: „Ma dara, me sium o Prvo hem o Posledno, 18 hem okova soj dživdo. Sium sine mulo, ama ake akana živinava zasekogaš, hem isi man o klučija taro meribe hem taro grobo.* 19 Adaleske pišin o bukja so dikhljan, o bukja soj akana hem o bukja so ka oven palo akava. 20 E Devleskiri tajna* bašo efta zvezde so dikhljan len ko mlo desno vas hem bašo efta zlatna svetilnikija, tani akaja: o efta zvezde pretstavinena e angelen taro efta sobranija, a o efta svetilnikija pretstavinena o efta sobranija.

2 E angeleske taro sobranie ko Efes pišin akava: Akala bukja vakerela len okova so ikerela o efta zvezde ko plo desno vas hem phirela maškar o efta zlatna svetilnikija: 2 ’Džanava tle postapke, kobor trudingjan tut hem kobor istrajngjan, hem kaj na prifatinea e lošna manušen, hem kaj ispitingjan okolen so vakerena kaj tane apostolija, ama ustvari nane, hem otkringjan kaj ola hovavena. 3 Isto agjaar, istrajno sian, trpingjan bašo mlo anav hem na umoringjan tut. 4 Ama, akava isi man protiv tute: našavgjan o mangipe kova so sine tut ko početok.

5 Adaleske, setin tut kote sian sine angleder te pere, kain tut hem ker o bukja so kerea len sine ko početok. Ako na kainea tut, ka avav hem ka cidav tlo svetilniko taro leskoro than. 6 Ama, akava isi šukar ki tute: mrzinea o bukja so kerela len e Nikolaskiri sekta,* kolen so me da mrzinava. 7 Kas isi kana neka šunel so vakerela o Devel preku pli sila* e sobranienge: Okoleske so ka pobedinel ka dav le te hal taro kaš e životoskoro, kova soj ko e Devleskoro raj‘.

8 E angeleske taro sobranie ki Smirna, pišin akava: Akala bukja vakerela len okova soj tano ’Prvo hem Posledno‘, kova so sine mulo hem palem irangja pe ko životo: 9 ’Džanava tle nevolje hem tlo čorolipe, ama tu sian barvalo. Džanava hem okolen kola so vakerena kaj tane Evreija hem kerena lafi protiv tute, ama ola nane čače Evreija nego tane grupa* koja so pripadinela e Satanaske. 10 Ma dara taro muke so ka oven tut. Ake, o Beng ka frdel nesaven tumendar ko zatvor te šaj te oven celosno ispitime hem ka ovel tumen nevolje 10 dive. Ov verno dži ko meribe, hem ka dav tut i kruna e životoskiri. 11 Kas isi kana neka šunel so vakerela o Devel preku pli sila* e sobranienge: Okoleske so ka pobedinel, nane te kerel nisavi šteta o dujto meribe‘.

12 E angeleske taro sobranie ko Pergam, pišin akava: Akala bukja vakerela len okova so isi le dugačko hem oštro mači so čhinela taro solduj strane: 13 ’Džanava kaj živinea adathe kote soj e Satanaskoro prestol, ama sepak cvrsto ikerea tut ko mlo anav hem na čhinavgjan te verujne ki mande čak ni ko adala dive keda o Antipa, mlo verno svedoko, sine mudardo ki tumari diz, kote so živinela o Satana.

14 Ama, akala bukja isi man protiv tute: maškar tute isi nesave kola so ikerena pe ko e Valaameskoro sikljojbe, kova so sikavgja e Valako te prevarinel e Izraelcon te keren grevo agjaar so ka han adava so sine dendo sar žrtva e idolenge hem agjaar so ka keren nemoral.* 15 Isto agjaar, maškar tute isi hem asavke kola so ikerena pe ko adava so sikavela e Nikolaskiri sekta. 16 Adaleske, kain tut. Ako na kainea tut, ka avav ki tute sigate hem e dugačko mačea kova so ikljola taro mlo muj ka borinav man protiv lende.

17 Kas isi kana neka šunel so vakerela o Devel preku pli sila* e sobranienge: Okoleske so ka pobedinel, ka dav le tari mana so sine garavdi hem ka dav le jekh tikno parno bar, koleste soj tano pišimo nevo anav so na džanela le nikoj javer osven okova so dobinela adava anav‘.

18 E angeleske taro sobranie ki Tijatira, pišin akava: Akala bukja vakerela len e Devleskoro Čhavo, okova koleskere jakhja tane sar jag so thabljola hem o pre sar čisto bakari: 19 ’Džanava tle postapke hem tlo mangipe, i vera, i služba hem i istrajnost hem kaj o bukja so kerea len ko posledno vreme tane poviše taro adala so kergjan len ko početok.

20 Sepak, akava isi man protiv tute: trpinea adale džuvlja, koja soj sar i Jezavela, hem koja so baši peske vakerela kaj tani proročica. Oj hovavela hem sikavela mle robon te keren nemoral* hem te han adava soj dendo sar žrtva e idolenge. 21 Dengjum la vreme te kainel pe, ama oj na mangela te kainel pe bašo plo nemoral.* 22 Ake, ka kerav la nasvali te našti te uštel taro kreveti, a okolenge so kerena laja preljuba ka anav bari nevolja, ako na kainena pe bašo ple postapke kola soj isto sar lakere. 23 Lakere čhaven ka mudarav len nasvalipaja kolestar so merela pe, agjaar sa o sobranija ka džanen kaj me sium okova so ispitinela o najhor misle* hem o vile. Hem ka dav sekole jekheske tumendar sprema leskere postapke.

24 A e javerenge so sien ki Tijatira, kola so na džana palo sikljojbe adale džuvljakoro koja soj sar i Jezavela, hem so na džanena o hovavne sikljojba e Satanaskere,* vakerava akava: Na čhivava upro tumende nisavo javer pharipe. 25 Samo ikeren tumen cvrsto ko adava džikote na avava. 26 A okoleske so ka pobedinel hem kova so sa dži ko krajo ka kerel adava so zapovedingjum, ka dav le vlast upro narodija, 27 sar me so dobingjum vlast taro mlo Dad, ov da ka vladinel upro manuša sastrnale palkaja* hem ka phagel len sar phuvjale čare. 28 Hem ka dav le i sabalutni zvezda. 29 Kas isi kana, neka šunel so vakerela o Devel preku pli sila* e sobranienge‘.

3 E angeleske taro sobranie ko Sard, pišin akava: Akala bukja vakerela len okova so isi le e Devleskere efta sile* hem o efta zvezde: ’Džanava tle postapke, dikhjovea kaj sian dživdo, ama mulo sian. 2 Ov džangavdo hem zajaknin adava so ačhilo hem samo so na mulo, soske na dikhava kaj kerea sa adava so mlo Devel očekujnela tutar. 3 Adaleske, ma bistre adava so primingjan hem adava so šungjan. Ponadari da iker tut ko adava, hem kain tut. Soske, ako na džangavgjovea, ka avav sar čor, hem nane te džane o saati keda ka avav.

4 Ama isi tut ko Sard nekobor džene* kola so na meljargje pumare šeja. Ola ka džan mancar uravde ko parne šeja, soske ola tane dostojna bašo adava. 5 Okova so ka pobedinel, ka ovel uravdo ko parne šeja. Leskoro anav nane te brišinav taro lil e životoskoro, nego ka priznajnav le anglo mlo Dad hem anglo leskere angelija. 6 Kas isi kana neka šunel adava so vakerela o Devel preku pli sila* e sobranienge‘.

7 E angeleske taro sobranie ki Filadelfija pišin akava: Akala lafija vakerela len okova kova soj sveto, čačutno, kole so isi le e Davideskoro klučo, hem keda ov phravela, adava nikoj našti te phandel hem keda ov phandela, adava nikoj našti te phravel: 8 ’Džanava tle postapke. Ake, angli tute phravgjum udar kova so nikoj našti te phandel. Džanava kaj isi tut hari sila, ama sepak ikergjan mle lafija hem dokažingjan kaj sian verno mle anaveske. 9 A okolen tari grupa* so pripadinela e Satanaske, so vakerena kaj tane Evreija, a nane Evreija nego hovavena, ka kerav len te aven hem te pokloninen pe anglo tle pre hem ka kerav te džanen kaj me mangava tut. 10 Adaleske so ikergjan tut ko adava so šungjan baši mli istrajnost,* me da ka arakhav tut ko saati e ispitibaskoro, kova so ka avel upri celi phuv, te šaj te oven ispitime okola so živinena ki phuv. 11 Avava sigate. Cvrsto iker tu ko adava so isi tut, te šaj nikoj te na lel tli kruna.

12 Okole so ka pobedinel, ka kerav le stubo ko mle Devleskoro hrami, hem ov više nane te ikljol lestar. Hem leste ka pišinav o anav mle Devleskoro hem o anav mle Devleskere dizjakoro, o nevo Erusalim, kova so hulela taro nebo, taro mlo Devel. Hem ki leste ka pišinav mlo nevo anav. 13 Kas isi kana neka šunel adava so vakerela o Devel preku pli sila* e sobranienge‘.

14 E angeleske taro sobranie ki Laodikija pišin akava: Akala bukja vakerela len o Amin, o verno hem o čačutno svedoko, o prvo taro sa so stvoringja o Devel: 15 ’Džanava tle postapke, na sian ni šudro ni tato. Te ove sine barem šudro ili tato. 16 Adaleske so sian mlako, ni tato ni šudro, ka čhungarav tut mle mujestar. 17 Soske, tu vakerea: „Barvalo sium, barvaliljum hem ništo na valjani mange“, a na džanea kaj sian žalibaske, kaj sian čorolo, korolo hem nango. 18 Adaleske, sovetinava tut te kine mandar zlato kova soj čistimo ki jag te šaj te ove barvalo. Kin mandar parne šeja te šaj te urave tut hem te na dikhjol tli ladž kaj sian nango. Kin mandar hem mast jakhenge te makhe tle jakhja te šaj te dikhe.

19 Me ukorinava hem vospitinava* sa okolen so mangava. Adaleske ov revno hem kain tut. 20 Ake, tergjovava anglo udar hem khuvava. Ako nekoj šunela mlo glaso hem phravela o udar, ka khuvav ko leskoro kher, ka hav zaedno lea večera hem ov ka hal mancar. 21 Okoleske so ka pobedinel, ka dav le te bešel mancar ko mlo prestol, isto sar me so pobedingjum hem bešljum mle Dadea ko leskoro prestol. 22 Kas isi kana neka šunel so vakerela o Devel preku pli sila* e sobranienge‘“.

4 Palo adava dikhljum jekh phravdo udar ko nebo. O prvo glaso kova so šungjum sine sar zvuko tari truba. Adava glaso vakergja mange: „Ukli akate hem ka sikavav tuke so ka slučinel pe“. 2 Palo adava e Devleskiri sila* odma ali upri mande hem dikhljum ko nebo jekh prestol hem nekoj sar bešela ko adava prestol. 3 Hem okova so bešela sine ko prestol dikhjola sine sar o bar jaspis* hem o bar sard,* a okolu o prestol sine vinožito slično sar o bar smaragd.*

4 Okolu adava prestol sine 24 prestolija, hem ko adala prestolija bešena sine 24 starešine uravde ko parne šeja hem ko šero sine len zlatna krune. 5 Taro prestol ikljona sine šemšekija, glasija hem gromija. Hem adathe sine efta lampe kolende so thabljola sine jag anglo prestol. Adala lampe pretstavinena e Devleskere efta sile.* 6 Anglo prestol sine nešto sar stakleno more kova so dikhjola sine sar kristali.

A ko maškar, kote so sine o prestol hem okolu o prestol, sine štar suštestvija kola so sine pherde jakhencar, hem anglal hem palal. 7 O prvo suštestvo ličinela sine sar lavi, o dujto suštestvo ličinela sine sar terno biko, e trito suštestvo sine le muj sar manušeskoro, a o štarto suštestvo ličinela sine sar orlo so ujrala. 8 Sekova jekh taro akala štar suštestvija sine le po šov paka. Segde ko telo hem telo paka sine pherde jakhencar. Hem ola, dive hem rat, bizo te ačhon vakerena sine: „Sveto, sveto, sveto tano o Jehova* o Devel, o Semokjno, kova so sine, kova soj tano hem kova so avela“.

9 Sekogaš keda akala suštestvija dena slava, čest hem blagodarnost okoleske so bešela ko prestol, okoleske so živinela zasekogaš, 10 o 24 starešine perena ko kočaka anglo okova so bešela ko prestol hem obožavinena okole so živinela zasekogaš. Hem frdena ple krune anglo prestol hem vakerena: 11 „Jehova* tu sian amaro Devel hem tu zaslužinea te dobine i slava, i čest hem i mokj, soske tu kergjan sa o bukja hem ola postojnena soske tu agjaar mangljan“.

5 Hem dikhljum ko desno vas okoleskoro so bešela ko prestol jekh svitok* koleste so sine pišimo taro solduj strane* hem sine phanlo efta pečatencar. 2 Hem dikhljum jekh silno angeli kova so objavinela sine glasno: „Koj tano dostojno te phravel o svitok hem te phagel leskere pečatija?“ 3 Ama nikoj ni ko nebo, ni ki phuv, ni teli phuv našti sine te phravel o svitok hem te dikhel so sine pišimo ki leste. 4 Počmingjum but te rovav, soske nikoj na sine dostojno te phravel o svitok hem te dikhel so pišinela ki leste. 5 Ama jekh taro starešine vakergja mange: „Ma rov. Pobedingja o lavi taro e Judaskoro pleme, e Davideskoro koreno. Ov tano dostojno te phravel o svitok hem leskere efta pečatija“.

6 Hem dikhljum sar maškaral, kote so sine o prestol hem o štar suštestvija, kola so sine opkolime e starešinencar, tergjola o Bakhro* hem dikhjola sine kaj sine čhindo. Sine le efta šinga hem efta jakhja, kola so pretstavinena e Devleskere efta sile* kola so sine bičhalde ki celo phuv. 7 Hem o Bakhro* odma gelo hem lelja o svitok taro desno vas okoleskoro so bešela ko prestol. 8 Keda o Bakhro* lelja o svitok, o štar suštestvija hem o 24 starešine pele ko kočaka angli leste hem sekole jekhe sine le harfa, a sine len hem zlatna čare pherde temjanea.* (O temjani pretstavinela o molitve okolengere soj sveta.) 9 Hem ola giljavena jekh nevi gili: „Tu sian dostojno te le o svitok hem te phrave leskere pečatija, soske tu sian sine čhindo hem tle ratea kingjan e Devleske manušen taro sekova pleme, čhib, narodo hem nacija, 10 hem kergjan len te oven amare Devleskere carija hem sveštenikija, hem ola ka vladinen sar carija upri celi phuv“.

11 Hem dikhljum bute angelen kola so sine okolu o prestol, isto agjaar e suštestvon hem e starešinen hem šungjum lengoro glaso. Lengoro broj sine poviše taro šel milionija*, 12 hem ola glasno vakerena sine: „O Bakhro* kova sine čhindo tano dostojno te priminel i mokj, o barvalipe, i sila, i mudrost, i čest, i slava hem o blagoslov“.

13 Šungjum sar sekova suštestvo ko nebo, ki phuv, teli phuv hem ko more hem sa so isi ki lende sar vakerena: „Okova so bešela ko prestol hem o Bakhro* neka oven falime hem lengiri neka ovel i čest, i slava hem i mokj zasekogaš“. 14 O štar suštestvija vakergje: „Amin!“ hem o starešine pele ko kočaka hem obožavingje e Devle.

6 Hem dikhljum keda o Bakhro* phravgja o prvo taro efta pečatija hem šungjum sar jekh taro štar suštestvija vakerela glasoja kova so šungjola sine sar gromi: „Ava!“ 2 Tegani dikhljum parno gras hem okole so bešela ki leste sine le lako hem strele. Sine leske dendi kruna hem iklilo te pobedinel ple dušmanen hem te završinel pli pobeda dži ko krajo.

3 Keda o Bakhro* phravgja o dujto pečati, šungjum o dujto suštestvo sar vakerela: „Ava!“ 4 Hem iklilo jekh javer gras kova so sine lolo sar jag. Okoleske so bešela sine upro gras sine dendo te lel o mir tari phuv te šaj o manuša te mudaren pe jekh jekhea. Hem sine leske dendo baro mači.

5 Keda o Bakhro* phravgja o trito pečati, šungjum o trito suštestvo sar vakerela: „Ava!“ Hem dikhljum kalo gras, hem okole so bešela sine ki leste sine le vaga ko plo vas. 6 Hem šungjum jekh glaso maškar o štar suštestvija sar vakerela: „Pohari taro jekh kilo giv bašo jekh denarij,* pohari taro trin kile jačmen bašo jekh denarij. A o maslo hem i mol ma trošinen sigate“.

7 Keda o Bakhro* phravgja o štarto pečati, šungjum o glaso taro štarto suštestvo sar vakerela: „Ava“! 8 Hem dikhljum jekh bledo gras hem okova so bešela sine ki leste vikinela pe sine Meribe. A pali leste avela sine o grobo.* Sine lenge dendi vlast upri jekh četvrtina tari phuv, te mudaren mačea, bokhalipaja, nasvalipaja hem e divo zveroncar tari phuv.

9 Keda o Bakhro* phravgja o pandžto pečati, dikhljum rat* telo žrtveniko, o rat okolengoro kola so sine mudarde sebepi e Devleskoro lafi hem bašo adava so svedočingje baši leste. 10 Ola glasno vikinena sine: „Tu o Najbaro Gospodari, kova so sian sveto hem čačutno, panda kobor ka adžikere? Keda ka sudine okolenge so živinena ki phuv hem ka odmazdine tut bašo amaro rat?“ 11 Hem sekole jekheske lendar sine dendi parni dugačko nametka hem sine lenge vakerdo te adžikeren panda hari, džikote na phergjola o broj okolengoro kola so zaedno lencar služingje sar robija hem lengere phralengoro kola so valjani te oven mudarde sar so sine ola.

12 Hem dikhljum keda o Bakhro* phravgja o šovto pečati, tegani ulo baro zemjotres, o kham ulo kalo sar kali nametka* hem celo mesečina uli sar rat, 13 a o zvezde taro nebo pele ki phuv sar so perena o smokve kola so nane resle taro plo kaš keda tresinkerela le i silno bavlal. 14 Hem o nebo našavdilo sar keda khedela pe jekh svitok.* Sekoja planina hem sekova ostrov sine cidime taro plo than. 15 Tegani o carija tari phuv, o bare manuša, o komandantija,* o barvale, o mokjna manuša, sekova robo hem sekova slobodno manuš garavgje pe ko peštere maškar ko planine. 16 Hem vakerena sine e planinenge hem e karpenge: „Peren upri amende hem garaven amen taro jakhja okoleskere so bešela ko prestol hem tari bari holi e Bakhreskiri,* 17 soske alo o baro dive lengere holjakoro. Koj šaj te ačhol dživdo?“

7 Palo adava dikhljum štar angelija sar tergjona ko štar strane tari phuv hem cvrsto ikerena e phuvjakere štar bavlala, te šaj nijekh bavlal te na phudel ni ki phuv, ni ko more, ni ko bilo kova kaš. 2 Hem dikhljum jekh javer angeli sar avela adathar kotar so ikljola o kham* hem anela o pečati e dživde Devleskoro. Ov ko celo glaso vikingja e angelenge kolenge so sine dendi i vlast te keren šteta e phuvjake hem e moreske, 3 hem vakergja lenge: „Ma keren šteta ni e phuvjake, ni e moreske, ni e kaštenge džikote amare Devleskere robon na obeležinaja pečatea ko čekat“.

4 Hem šungjum o broj okolengoro so sine obeležime pečatea - 144.000. Ola avena taro sekova pleme ko Izrael:

9 Palo adava dikhljum baro mnoštvo manuša kolen so nijekh našti sine te gejnel len, taro sa o nacie, plemija, narodija hem čhibja, sar tergjona anglo prestol hem anglo Bakhro,* uravde ko parne šeja, a ko vasta sine len granke tari palma. 10 Hem vikinena sine ko celo glaso: „O spasenie avela taro amaro Devel, kova so bešela ko prestol, hem taro Bakhro!“*

11 Sa o angelija tergjona sine okolu o prestol hem okolu o starešine hem o štar suštestvija, pa pele tele hem obožavingje e Devle 12 vakerindor: „Amin! I falba, i slava, i mudrost, i blagodarnost, i čest, i mokj hem i sila tane amare Devleskere zasekogaš. Amin“.

13 Tegani jekh taro starešine pučlja man: „Koj tane akala soj uravde ko parne šeja hem kotar ale?“ 14 Me odma odgovoringjum leske: „Gospodare, tu džanea adava“. Hem ov vakergja mange: „Ola tane adala so avena tari bari nevolja, kola so thovgje pumare šeja hem parnargje len ko e Bakhreskoro* rat. 15 Adaleske ola tane anglo e Devleskoro prestol hem služinena leske dive hem rat ko leskoro hrami. Okova so bešela ko prestol ka phravel plo šatori upri lende. 16 Ola nane više te oven bokhale, a ni žedna, ni o kham nane te tharel len, ni nesavo baro tatipe, 17 soske o Bakhro,* kova soj uzo prestol,* ka ovel lengoro pastiri hem ka ingarel len ko izvorija kotar so thavdela o pani e životoskoro. Hem o Devel ka kosel sekoja asvin taro lengere jakhja“.

8 Keda o Bakhro* phravgja o eftato pečati, ko nebo uli tišina koja so trajngja okolu ekvaš saati. 2 Tegani dikhljum efta angelija kola so tergjona sine anglo Devel, hem lenge sine dende efta trube.

3 Tegani alo javer angeli, kova so ikerela sine zlatno kadilniko.* Ov terdilo uzo žrtveniko hem sine leske dendo but temjani* te tharel le ko zlatno žrtveniko anglo prestol džikote molinena pe sa okola soj sveta. 4 O čuro taro temjani kova so o angeli thargja hem o molitve okolengere kola soj sveta, gele upre anglo Devel. 5 Tegani o angeli odma lelja o kadilniko hem phergja le e jagaja taro žrtveniko hem frdingja le ki phuv. Tegani grmingja, šundile glasija, svetingje šemšekija hem ulo zemjotres. 6 A o efta angelija, kolen so sine efta trube spremingje pe te phuden ko trube.

7 O prvo angeli phudingja ki pli truba. Hem uli kukudik hem jag mešime ratea hem sine frdime ki phuv. Jekh tretina tari phuv thabili, tretina taro kašta thabile hem sa o zelena rastenija thabile.

8 O dujto angeli phudingja ki pli truba. Hem nešto slično sar bari planina koja so thabljola jagaja sine frdimi ko more. Hem tretina taro more ulo rat. 9 Hem tretina taro životne kola so živinena sine ko more mule, hem tretina taro brodija phagile.

10 O trito angeli phudingja ki pli truba. Hem bari zvezda koja so thabljola sine sar lampa peli taro nebo. Peli ki tretina taro reke hem ki tretina taro izvorija e panjeskere. 11 O anav akale zvezdakoro tano Pelin.* Hem tretina taro panja ule pelini, hem but manuša mule taro panja soske o panja ule kerkje.

12 O štarto angeli phudingja ki pli truba. Tegani sine pogodime jekh tretina taro kham, jekh tretina tari mesečina hem jekh tretina taro zvezde, pa jekh tretina lendar kalile, hem agjaar jekh tretina taro dive na sine le svetlina hem isto agjaar i rat da.

13 Hem dikhljum orlo sar letinela maškar o nebo hem šungjum glasno sar vakerela: „Teško, teško, teško okolenge so živinena ki phuv sebepi o muke so ka slučinen pe keda panda hari okola da trin angelija ka phuden ko ple trube“.

9 O pandžto angeli phudingja ki pli truba. Tegani dikhljum zvezda koja so peli taro nebo ki phuv, hem oj dobingja o klučo tari bezdna.* 2 Keda phravgja i bezdna, latar iklilo čuro sar o čuro tari bari pečka, hem o čuro so iklilo tari bezdna kaljargja o kham hem o vozduh. 3 Taro čuro ki phuv iklile skakulcija hem sine lenge dendi mokj, savi so isi e škorpien ki phuv. 4 Sine lenge zapovedimo te na oštetinen i čar ki phuv, nisavo zeleno rastenie, ni bilo kova kaš, nego te keren šteta samo e manušenge kolen so nane len e Devleskoro pečati ko čekat.

5 Hem e skakulconge sine dozvolimo te mučinen len pandž masekija, ama te na mudaren len. O muke so ola trpinena sine, sine sar o muke kola so o manuša trpinena keda posavela len škorpija. 6 Ko adala dive o manuša ka roden o meribe, ama nisar ka našti te arakhen le. Edvaj ka adžikeren te meren, a o meribe ka našel lendar.

7 A o skakulcija dikhjona sine sar grasta kola soj spremime baši borba. Ko šero sine len nešto sar zlatna krune, a o muj lengoro sine sar manušikano muj, 8 a o bala lengere sine sar džuvljakere bala. Lengere danda sine sar e laveskere danda, 9 ko kolin sine len sar sastrnale oklopija. A o zvuko taro lengere paka sine sar o zvuko taro kočie e grastencar so sigate prastana te džan ki borba. 10 Isto agjaar, sine len porika kolencar so posavena, sar so isi e škorpien, a ki porik sine len mokj te anen dukh e manušenge pandž masekija. 11 Upri lende sine len cari, o angeli tari bezdna.* Ko hebrejsko ov vikinela pe Avadon,* a ko grčko Apolion.*

12 Jekh muka nakhlja. Dikh, pali late avena panda duj.

13 O šovto angeli phudingja ki pli truba. Hem šungjum nesavo glaso kova so avela sine taro šinga, kola so sine ko zlatno žrtveniko kova soj anglo Devel. 14 Ov vakergja e šovto angeleske kole so sine le i truba: „Phrav e štare angelen kola soj phanle ki bari reka Eufrat“. 15 Hem o štar angelija so sine spremime bašo saati, bašo dive, bašo masek hem bašo berš, sine phravde te mudaren jekh tretina taro manuša.

16 O broj taro vojnikija e grastencar sine dujšel milionija*, me šungjum lengoro broj. 17 O grasta hem okola so bešena sine upri lende kolen so dikhljum len ki vizija, dikhjona sine agjaar: ko kolin sine len oklopija lole sar jag, plava sar o bar hijacint hem žuta sar sulfur. A o šere e grastengere sine sar o šere e lavengere, a taro muj ikljola lendar sine jag, čuro hem sulfur. 18 Jekh tretina taro manuša mule taro akala trin nevolje - tari jag, taro čuro hem taro sulfur so ikljola sine taro lengoro muj. 19 Soske, i mokj akale grastengiri tani ko lengere muja hem ko porika, soske lengere porika tane sar sapa hem isi len šere kola so anena dukha.

20 A o javera manuša, so na mule taro akala nevolje, na kaingje pe bašo bukja so kergje len pumare vastencar - na čhinavgje te obožavinen e demonen hem e idolen soj kerde taro zlato, srebro, bakari, bar hem kaš, kola so našti ni te dikhen, ni te šunen, a ni te phiren. 21 Na kaingje pe ni bašo adava so mudargje, ni bašo spiritizam,* ni bašo nemoral,* hem ni bašo adava so čorgje.

10 Hem dikhljum jekhe javere silno angele sar hulela taro nebo pakjardo oblakoja hem upro šero sine le vinožito. Leskoro muj sine sar kham, a o pre sar jagale stubija. 2 Ko vas sine le jekh tikno svitok* kova so sine phravdo. Hem e desno prea terdilo ko more, a e levo prea ki phuv, 3 hem glasno vikingja sar keda vikinela jekh lavi. Keda vikingja, šundile o glasija taro efta gromija.

4 Keda o efta gromija kergje lafi, mangljum te pišinav adava so vakergje, ama šungjum glaso taro nebo kova so vakergja: „Iker ki tajna* adava so vakergje o efta gromija hem ma pišin“. 5 O angeli, kole so dikhljum sar tergjola ko more hem ki phuv vazdingja plo desno vas ko nebo 6 hem dengja sovli upro okova so živinela zasekogaš, so stvoringja o nebo hem sa soj ki leste, i phuv hem sa soj ki late hem o more hem sa adava soj ki leste: „O Devel nane više te adžikerel. 7 Ama, keda ka avel o vreme o eftato angeli te phudel ki pli truba, ka završinel e Devleskiri tajna* koja so ov objavingja la sar šukar haberi ple robonge, e prorokonge“.

8 Tegani šungjum o glaso taro nebo sar palem vakerela mange: „Dža, hem le o phravdo svitok* taro vas e angeleskoro kova so tergjola ko more hem ki phuv“. 9 Geljum ko angeli hem rodingjum te del man o tikno svitok. A ov vakergja mange: „Le hem ha le. Ko vogi ka ovel tuke kerko, a ko muj ka ovel tuke gudlo sar avgin“. 10 Me leljum o tikno svitok taro e angeleskoro vas hem haljum le. Ko muj sine mange gudlo sar avgin, ama keda gltingjum le, ko vogi sine mange kerko. 11 Hem ola vakergje mange: „Tu mora palem te prorokujne bašo manuša hem narodija, bašo čhibja hem bašo but carija“.

11 Hem sine mange dendi trska koja so sine sar kaš* hem sine mange vakerdo: „Ušti hem merin o svetilište taro e Devleskoro hrami hem o žrtveniko. Hem gejn okolen so obožavinena e Devle ki leste. 2 Ama o dvoro soj avrijal taro e hrameskoro svetilište mukh le hem ma merin le, soske ov sine dendo e manušenge taro javera narodija. Ola ka gazinen i sveto diz 42 masekija. 3 Ka bičhalav mle duje svedokon te prorokujnen 1.260 dive uravde ko šeja žalibaske“.* 4 Ola tane pretstavime e duje kaštencar taro maslinke hem e duje svetilnikoncar hem tergjona anglo o Gospodari e phuvjakoro.

5 Ako nekoj mangela te kerel lenge lošnipe, taro lengoro muj ka ikljol jag koja so ka gltinel lengere dušmanen. Koj mangela te kerel lenge lošnipe, agjaar ka ovel mudardo. 6 Olen isi len mokj te phanden o nebo te šaj te na del bršim džikote prorokujnena. Hem isi len mokj te keren o panja te oven rat hem te keren ki phuv razna nevolje keda ka mangen.

7 A keda ola ka završinen pumare prorokujbaja, o zvero kova so ikljola tari bezdna ka vodinel vojna lencar, ka pobedinel len hem ka mudarel len. 8 Lengoro telo ka ovel ki glavno ulica tari bari diz, koja so ki simbolično smisla vikinela pe Sodom hem Egipet, kote so lengoro da Gospodari sine kovimo ko stubo. 9 A o manuša taro sa o narodija, plemija, čhibja hem nacie ka dikhen lengoro telo trin tekvaš dive hem nane te mukhen lengoro telo te ovel parumo. 10 A okola so živinena ki phuv ka radujnen pe hem ka slavinen bašo lengoro meribe hem ka bičhalen poklonija jekh jekheske, soske akala duj prorokija mučinena sine okolen so živinena ki phuv.

11 Palo trin tekvaš dive, i životno sila* taro Devel khuvgja ki lende hem ola uštile ko pre, pa uklili len bari dar okolen so dikhle len. 12 Hem šungje jekh silno glaso taro nebo sar vakerela lenge: „Aven akari upre“. Hem ola gele ko oblako ko nebo, a lengere dušmanja dikhena len sine. 13 Ko adava momenti sine baro zemjotres hem jekh desetina tari diz rušingja pe. Taro adava zemjotres mule 7.000 manuša, a o javera darandile hem falingje e Devle soj ko nebo.

14 I dujto muka nakhlja. Ake, i trito muka avela sigate.

15 O eftato angeli phudingja ki pli truba. Tegani šundile silna glasija taro nebo sar vakerena: „I carsko vlast upro sveto akana pripadinela amare Gospodareske* hem leskere Hristoseske, hem ov ka vladinel sar cari zasekogaš.“

16 Hem o 24 starešine kola so bešena sine anglo Devel ko pumare prestolija, pele dži tele ple mujea hem obožavingje e Devle, 17 hem vakergje: „Blagodarinaja tuke Jehova,* Semokjno Devla, tu kova so sian hem kova so sian sine, soske tu sikavgjan* tli bari mokj hem počmingjan te vladine sar cari. 18 Ama o narodija but holjangje, tegani tu sikavgjan tli bari holi hem alo o vreme kova so sine odredimo te sudinel pe e mulenge hem te nagradinen pe tle robija, o prorokija, okola soj sveta hem okola so darana taro tlo anav, hem o tikne hem o bare, hem te uništinen pe okola so uništinena i phuv“.

19 Tegani o svetilište taro e Devleskoro hrami ko nebo phravdilo hem dikhljum o sanduko e Devleskere sojuzeskoro ko svetilište taro leskoro hrami. Hem svetingje šemšekija, šundile glasija hem gromija hem sine zemjotres hem bari kukudik.

12 Tegani ko nebo dikhlja pe jekh baro znako: jekh džuvli uravdi ko šeja kola so svetinena sine sar o kham, telo pre sine lake i mesečina, a ko šero sine la kruna taro 12 zvezde. 2 Sine khamni hem vikinela sine taro dukha hem taro muke adaleske so valjani sine te bijanel.

3 Ko nebo dikhljum panda jekh znako: jekh baro zmej kole so sine le i boja e jagakiri, efta šerencar hem deše šingencar, a ko šere sine le efta krune. 4 Ple porikaja vlečingja jekh tretina taro zvezde soj ko nebo hem frdingja len ki phuv. Hem o zmej tergjola sine angli džuvli so valjani sine te bijanel, te šaj te gltinel lakere čhave keda ka bijangjovel.

5 Hem oj bijangja murše čhave, kova so sastrnale palkaja* ka vladinel upro sa o narodija. Lakoro čhavo odma sine ingardo ko Devel hem ko leskoro prestol. 6 A i džuvli našlja ki pustina kote so o Devel spremingja lake than, kote so valjani sine te hraninen la 1.260 dive.

7 Uli vojna ko nebo: o Mihael* hem leskere angelija boringje pe protiv o zmej. O zmej hem leskere angelija da boringje pe protiv lende, 8 ama ola na pobedingje,* hem lenge više na sine than ko nebo. 9 Hem sine frdimo o baro zmej, o najpurano sap, kova so vikinela pe Beng hem Satana, kova so hovavela celo sveto. Sine frdimo ki phuv, a zaedno lea sine frdime leskere angelija da. 10 Hem šungjum silno glaso taro nebo sar vakerela:

„Akana o spasenie, i mokj hem o Carstvo amare Devleskoro hem i vlast leskere Pomazanikoskiri ule čače, soske tano frdimo okova so krivinela amare phralen, okova so dive hem rat anglo amaro Devel vakerela hovajba baši lende. 11 A ola pobedingje le e Bakhreskere* ratea hem e haberea bašo kova so svedočingje. Na darandile te našaven pumaro životo čak ni keda o meribe sine anglo lende. 12 Adaleske, neka radujnel pe o nebo hem tumen kola so živinena ki leste. Teško e phuvjake hem e moreske, soske o Beng hulilo tele ki tumende hem but tano holjamo adaleske so džanela kaj isi le hari vreme“.

13 Keda o zmej dikhlja kaj tano frdimo ki phuv, počmingja te progoninel e džuvlja koja so bijangja e murše čhave. 14 Ama e džuvljake sine dende duj bare paka taro baro orlo te šaj te letinel ki pustina ko than kova soj spremimo lake, te šaj adari, dur taro sap, te hraninen la jekh vreme, duj vremija hem ekvaš vreme.

15 A o sap taro plo muj frdingja pani pali džuvli sar reka, te šaj i džuvli te tasljol ki reka. 16 Ama i phuv pomožingja e džuvljake, hem i phuv phravgja plo muj hem gltingja i reka koja so o zmej frdingja taro plo muj. 17 Tegani o zmej but holjangja e džuvljake hem gelo te vodinel vojna protiv okola so ačhile taro lakoro potomstvo,* kola so ikerena e Devleskere zapovedija hem kolenge tano dendo te svedočinen bašo Isus.

13 Hem ov* terdilo ki morsko pošik.

Tegani dikhljum sar taro more ikljola jekh zvero deše šingencar hem efta šerencar. Ko šinga sine le 10 krune, a ko šere sine le anava kola so vredžinena e Devle. 2 E zvero so dikhljum sine sar leopardi, o pre leskere sine sar mečkakere, a o muj leskoro sar laveskoro. O zvero dobingja pli mokj, plo prestol hem pli bari vlast taro zmej.

3 Hem dikhljum kaj jekh taro šere sine doborom but ranimo so šaj sine te merel, ama i rana kolatar so šaj sine te merel, sastili. Hem sa o manuša tari phuv sine vooduševime hem džana sine palo zvero. 4 O manuša obožavingje e zmeje adaleske so dengja vlast e zvero. Obožavingje e zvero da hem vakerena sine: „Koj tano sar o zvero hem koj šaj te borinel pe lea?“ 5 O zmej dengja e zveroske muj gordo te kerel lafi hem te vredžinel e Devle hem sine leske dendi vlast 42 masekija te kerel adava so mangela. 6 Hem o zvero phravgja plo muj te vredžinel e Devle, te vredžinel leskoro anav, o than kote so živinela hem te vredžinel čak okolen so živinena ko nebo. 7 Sine leske dozvolimo te vodinel vojna okolencar soj sveta hem te pobedinel len. Hem dobingja vlast upro sa o plemija, narodija, čhibja hem nacie. 8 Hem sa okola so živinena ki phuv ka obožavinen le. Panda taro početok e svetoskoro ni jekh taro lengere anava nane pišime ko svitok* e životoskoro, hem adava svitok tano e Bakhreskoro,* kova so sine čhindo.

9 Kas isi kana, neka šunel. 10 Ako nekoj mora te ovel zarobimo, ka ovel zarobimo. Ako nekoj mudarela nekas mačea,* ka ovel mudardo mačea. Adaleske, okolenge soj sveta valjani istrajnost hem vera.

11 Tegani dikhljum jekhe javere zvero sar ikljola tari phuv. Sine le duj šinga sar bakhro, ama počmingja te kerel lafi sar zmej. 12 Sine le isto vlast sar so sine e prvo zvero hem sikavela sine adaja vlast anglo leskere jakhja. Hem teringja e phuvja hem sa okolen so živinena ki late te obožavinen e prvo zvero, koleskiri so rana, kolatar so šaj sine te merel, sastili. 13 Hem kerela sine bare čudija anglo manuša, čak kerela sine taro nebo te perel jag ki phuv.

14 Hem hovavela sine okolen so živinena ki phuv preku o čudija so sine leske dozvolimo te kerel len anglo prvo zvero. Hem vakerela sine okolenge so živinena ki phuv te keren kipi taro zvero kole so sine le rana taro mači, ama sepak ačhilo dživdo. 15 Hem sine leske dozvolimo te del životo e zveroskere kipeske, te šaj o kipi taro zvero te kerel lafi hem te kerel te oven mudarde sa okola so na mangena te obožavinen e zveroskere kipe.

16 Silaja čhivela sine sa e manušen, e tiknen hem e baren, e barvalen hem e čorolen, okolen soj slobodna hem okolen soj robija, te oven obeležime ko desno vas ili ko čekat, 17 te šaj nikoj te na kinel hem te na bikinel, osven okova so isi le o belego, a adava tano o anav e zveroskoro ili o broj leskere anaveskoro. 18 Bašo akava valjani mudrost, koj tano razumno neka računinel o broj e zveroskoro, soske adava tano manušikano broj. Leskoro broj tano 666.

14 Tegani dikhljum e Bakhre* sar tergjola ki planina Sion hem lea 144.000 so isi len leskoro anav hem leskere Dadeskoro anav pišimo ko lengoro čekat. 2 Šungjum zvuko taro nebo kova so sine sar o zvuko taro but panja hem sar o zvuko taro jekh silno gromi. O zvuko so šungjum le sine sar o zvuko e pejačengoro kola so giljavena hem bašalena ko pumare harfe. 3 Anglo prestol, anglo štar suštestvija hem anglo starešine giljavena sine nešto so šungjola sine sar nevi gili. Hem nikoj našti sine te sikljovel adaja gili osven o 144.000, kola so sine kinde tari phuv. 4 Ola tane okola so na meljargje pe džuvlencar, kola so na sukje nikasaja. Ola džana palo Bakhro* bilo kote ov te džal. Ola sine kinde taro manuša te šaj te oven o prva* so ka oven dende e Devleske hem e Bakhreske,* 5 hem nisavo hovajbe na arakhlja pe ko lengoro muj. Ola tane bizi maana.

6 Dikhljum jekh javer angeli sar letinela maškar o nebo hem ingarela o šukar haberi so ka ačhol večno te šaj te vakerel le okolenge so živinena ki phuv, sekole nacijake, plemeske, čhibjake hem narodoske. 7 Hem vakerela sine silno glasoja: „Daran taro Devel hem den leske slava, soske alo o saati te sudinel. Obožavinen okole so stvoringja o nebo, i phuv, o more hem o izvorija e panjeskere“.

8 Pali leste alo o dujto angeli, hem vakergja: „Pelo, pelo o baro Vavilon, i nemoralno džuvli,* koja so čhivgja sa e narodon te pien lakiri mol koja so kerela silno želba te kerel pe nemoral“.*

9 Pali leste alo o trito angeli hem vakergja silno glasoja: „Ako nekoj pokloninela pe e zveroske hem leskere kipeske hem priminela o belego ko plo čekat ili ko plo vas, 10 ov isto agjaar ka piel e Devleskiri mol koja soj tani leskiri bari holi. Adaja tani čisto mol so čhorela la o Devel ki čaša tari pli bari holi. Hem ka ovel mučimo jagaja hem sulfurea anglo sveta angelija hem anglo Bakhro.* 11 Hem o čuro taro lengoro mučibe ka uštel zasekogaš. Okola so pokloninena pe e zveroske hem leskere kipeske hem sa okola so primingje o belego taro leskoro anav, nane te ovel len mir dive hem rat. 12 Adaleske valjani istrajnost okolenge soj sveta, so postapinena sprema e Devleskere zapovedija hem so ikerena pe cvrsto ki vera ko Isus“.

13 Hem šungjum glaso taro nebo sar vakerela: „Pišin: srekjna tane okola so otakana merena ko jekhipe e Gospodarea. O Devel preku pli sila* vakerela oja, neka odmorinen pe tari pumari phari buti, soske o Devel pamtinela sa o šukar bukja so kergje len“.*

14 Tegani dikhljum parno oblako, a ko oblako bešela sine nekoj sar manušikano čhavo. Ko šero sine le zlatno kruna, a ko vas ikerela sine oštro srpi.*

15 Tegani jekh javer angeli iklilo taro e hrameskoro svetilište hem glasno vikingja okoleske so bešela sine ko oblako: „Počmin te čhine e srpea hem te khede, soske i žetva e phuvjakiri tani zrelo hem alo o saati te khedel pe i žetva“. 16 Tegani okova so bešela sine ko oblako khedingja o plodija tari phuv ple srpea.

17 Hem panda jekh angeli iklilo taro svetilište taro nebesno hrami, hem le da sine le oštro srpi.

18 Tegani taro žrtveniko iklilo panda jekh angeli so sine le vlast upri jag. Hem glasno vakergja okoleske so sine le oštro srpi: „Le o srpi hem počmin te khede i drakh soj ki phuv, soske lakere drakha tane više resle“. 19 O angeli lelja plo srpi hem počmingja te čhinel hem te khedel i drakh ki phuv, hem frdingja la ko jekh baro than kote so gazinena pe o drakha,* kova so pretstavinela e Devleskiri holi. 20 O grasta gazinena sine o drakha ko adava than kova so sine avri tari diz, hem o rat so ikljola sine lestar reslja dži e grastenge ko dizginja* hem thavdingja okolu 300 kilometre* dur.

15 Palo adava dikhljum ko nebo jekh javer znako, baro hem čudesno: efta angelija efta nevoljencar. Akala tane o posledna nevolje, soske lencar završinela e Devleskiri holi.

2 Hem dikhljum nešto sar stakleno more mešimo jagaja. Uzo stakleno more tergjona sine okola so pobedingje e zvero, leskere kipe hem o broj leskere anaveskoro, a ko vasta ikerena sine e Devleskere harfe. 3 Ola giljavena sine e Mojseeskiri gili, kova soj e Devleskoro robo, hem e Bakhreskiri* gili:

„Bare hem čudesna tane o bukja so kerea, Jehova,* Semokjno Devla. Pravedna hem čačutne tane tle drumija, tu sian večno Cari.* 4 Koj nane te daral tutar Jehova,* hem koj nane te slavinel tlo anav? Soske, tu sian verno. O manuša taro sa o nacie ka aven angli tute hem ka obožavinen tut, soske dikhena kaj tu pravedno sudinea“.

5 Palo adava dikhljum ko nebo sar phravdilo o svetilište taro šatori bašo svedoštvo. 6 Hem o efta angelija e efta nevoljencar iklile taro svetilište. Sine uravde ko čisto len so svetinela hem okolu o kolin sine len zlatno pojas. 7 Hem jekh taro štar suštestvija dengja e efta angelenge o efta zlatna čare pherde e Devleskere holjaja, i holi okoleskiri kova so živinela zasekogaš. 8 Tari e Devleskiri slava hem tari leskiri mokj o svetilište pherdilo čuro, hem nikoj našti sine te khuvel ko svetilište sa džikote na završingje o efta nevolje taro efta angelija.

16 Hem taro svetilište šungjum jekh silno glaso sar vakerela e efta angelenge: „Džan hem čhoren ki phuv e Devleskiri holi taro efta čare“.

2 O prvo angeli gelo hem čhorgja plo čaro ki phuv. Hem e manušenge kola so sine len o belego e zveroskoro hem kola so obožavinena sine leskere kipe, pojavingje pe strašna čirija so dukhana.

3 O dujto angeli čhorgja plo čaro ko more. Tegani o more ulo rat sar mule manušeskoro rat, hem sa o dživde suštestvija mule, sa so sine ko more.

4 O trito angeli čhorgja plo čaro ko reke hem ko izvorija e panjeskere. Hem ola ule rat. 5 Hem šungjum e angele so isi le vlast upro panja sar vakerela: „Devla kova so sian verno, kova so sian hem kova so sian sine, tu sian pravedno soske angjan akala presude. 6 Ola čhorgje o rat okolengoro soj sveta hem e prorokongoro hem tu dengjan len te pien rat. Hem adava ola zaslužingje“. 7 Hem šungjum o žrtveniko sar vakerela: „Jehova,* Semokjno Devla, ispravna hem pravedna tane tle presude“.*

8 O štarto angeli čhorgja plo čaro ko kham. Hem e khameske sine dozvolimo te tharel e manušen e jagaja. 9 O manuša thabljona sine taro baro tatipe, ama namesto te kainen pe hem te slavinen e Devle kole so isi le vlast upro akala nevolje, ola vredžingje leskoro anav.

10 O pandžto angeli čhorgja plo čaro upro prestol e zveroskoro. Tegani ko leskoro carstvo uli temnica. Hem o manuša počmingje te kicinen pumari čhib tari dukh, 11 ama namesto te kainen pe bašo pumare postapke, ola vredžingje e nebesno Devle bašo pumare dukha hem čirija.

12 O šovto angeli čhorgja plo čaro upri bari reka Eufrat. Hem lakoro pani šukilo, te šaj te spreminel pe o drumo bašo carija taro istok.

13 Hem dikhljum sar taro muj e zmejeskoro, taro muj e zveroskoro, taro muj e hovavne prorokoskoro ikljona trin melale porake* so ličinena sine sar žambe. 14 Akala porake, kola so avena taro demonija, kerena čudija hem džana ko carija taro celo sveto te kheden len baši vojna so ka ovel ko baro dive e Semokjno Devleskoro.

15 „Ake, avava sar čor. Srekjno tano okova so ačhovela džangavdo hem so arakhela ple šeja, te šaj te na phirel nango hem te na dikhen o manuša leskiri ladž.“

16 Hem khedingje e caren ko than kova so ko hebrejski vikinela pe Armagedon.*

17 O eftato angeli čhorgja plo čaro ko vozduh. Tegani taro svetilište taro prestol, šundilo jekh silno glaso, kova so vakergja: „Završimo tano“. 18 Tegani svetingje šemšekija, šundile glasija, sine gromija hem ulo baro zemjotres. Asavko silno hem baro zemjotres na sine otkeda sine stvorime o manuša ki phuv. 19 I bari diz odvojngja pe ko trin delija hem o dizja taro celo sveto sine uništime. O Devel setingja pe ko Baro Vavilon hem dengja le te piel tari čaša e moljaja tari pli bari holi. 20 Hem sa o ostrovija našavdile, hem o planine našti sine više te arakhen pe. 21 Tegani taro nebo upro manuša peli bari kukudik kolakoro so jekh zrno sine pharo okolu jekh talanti,* hem o manuša vredžinena sine e Devle sebepi i nevolja so angja akaja kukudik, soske i kukudik kergja bari šteta.

17 Jekh taro efta angelija kolen so sine len o efta čare, alo hem vakergja mange: „Ava, ka sikavav tuke i kazna upri i bari nemoralno džuvli* so bešela ko but panja, 2 kolaja so kergje nemoral* e phuvjakere carija, a okola so živinena ki phuv matile tari mol taro lakoro nemoral“.

3 Hem o angeli preku e Devleskiri sila* ingargja man ki pustina. Adathe dikhljum jekhe džuvlja koja so bešela sine upro lolo zvero kova so sine pherdo anavencar so vredžinena e Devle, hem sine le efta šere hem deš šinga. 4 I džuvli sine uravdi ko liljakova hem lole šeja, sine ukrasimi zlatoja skapoceno barencar hem biserencar. Ko vas sine la zlatno čaša pherdi gadna hem melale bukjencar taro lakoro nemoral. 5 Ko lakoro čekat sine pišimo jekh tajno anav: „O Baro Vavilon, i daj e nemoralno džuvlengiri hem e gadna bukjengere so kerena pe ki phuv“. 6 Hem dikhljum kaj i džuvli tani mati taro rat okolengoro soj sveta, hem taro rat e Isuseskere svedokongoro.

Keda dikhljum la, but čudingjum man. 7 A o angeli vakergja mange: „Soske čudinea tut? Ka vakerav tuke koja tani i tajna e džuvljakiri hem e zveroskiri upri koleste so bešela oj hem so isi le efta šere hem deš šinga: 8 O zvero so dikhljan le, ov sine, ama akana nane, ama panda hari ka ikljol tari bezdna* hem palo adava ka ovel uništimo. A okola so živinena ki phuv - kolengere so anava na sine pišime ko lil e životoskoro panda taro početok e svetoskoro - ka čudinen pe keda ka dikhen kaj o zvero kova so sine, a palo adava na sine, palem pojavingja pe.

9 Te šaj te haljovel pe akava valjani mudrost: o efta šere pretstavinena efta planine kolende so bešela i džuvli. 10 Ola pretstavinena hem efta caren: pandž lendar pele, jekh vladinela, a jekh lendar panda na alo. Ama keda ka avel, ka ačhol kratko vreme. 11 A o zvero kova so sine, a akana nane, tano o oftoto cari, ama ov avela taro okola efta hem ka ovel uništimo.

12 O 10 šinga so dikhljan pretstavinena 10 carija, kola so panda na počmingje te vladinen, ama ka dobinen vlast te vladinen sar carija jekh saati zaedno e zveroja. 13 Olen isi len isto cel,* pa adaleske pli mokj hem pli vlast dena e zveroske. 14 Ola ka borinen pe protiv o Bakhro,* ama o Bakhro* ka pobedinel len, soske ov tano Gospodari e gospodarengoro hem Cari e carengoro. A ka pobedinen len hem okola soj lea, okola soj vikime, birime hem verna“.

15 O angeli vakergja mange: „O panja so dikhljan, upro kolende so bešela i nemoralno džuvli, pretstavinena bute narodon, nacien hem čhibjen. 16 A o 10 šinga so dikhljan hem o zvero ka mrzinen e nemoralno džuvlja, ka len latar sa o bukja so isi la hem ka mukhen la nangi. Ka han lakoro mas hem ka tharen la ki jag. 17 Soske, o Devel čhivgja lenge ko vilo te keren adava so ov mangela, ustvari te ispolninen pumari zaedničko cel, te den plo carstvo e zveroske nesavo vreme, sa džikote na ispolninena pe e Devleskere lafija. 18 A i džuvli so dikhljan pretstavinela i bari diz, koja so vladinela upro carija ki phuv“.

18 Palo akava dikhljum jekh javer angeli sar hulela taro nebo. Le sine le bari vlast hem leskiri slava kergja te svetinel celo phuv. 2 Hem ov glasno vikingja: „Pelo, pelo o Baro Vavilon, i nemoralno džuvli,* hem uli than kote so živinena o demonija hem than kote so garavena pe o lošna angelija* hem i sekoja nečisto hem odvratno ptica! 3 Soske, sa o narodija matile tari mol - i silno želba taro lakoro nemoral.* O carija ki phuv kergje nemoral laja, hem o trgovcija ki phuv barvalile taro lakoro baro barvalipe so khedingja le bizi ladž“.

4 Hem šungjum javer glaso taro nebo sar vakerela: „Ikljoven latar, mlo narodo, te šaj te na oven laja ko lakere grevija hem te na arakhen tumen lakere nevolje! 5 Soske, lakere grevija khedingje pe hem resle dži ko nebo, hem o Devel setingja pe ko lakere lošna postapke. 6 Keren lake agjaar sar so kergja oj e javerenge hem iranen lake duj puti poviše bašo bukja so kergja. Tari mol koja so oj mešingja ki čaša te del e javerenge, den oj te piel latar duj puti poviše. 7 Kobor so vazdingja pe hem živingja ko baro barvalipe, kova so khedingja le bizi ladž, doborom keren lake muke hem pharipa. Soske, oj ko plo vilo vakerela sine: ’Bešava sar carica, hem na sium udovica, hem nikogaš nane te tugujnav‘. 8 Adaleske ko jekh dive ka aven lakere nevolje: meribe, rojbe hem bokhalipe, hem ka ovel celosno thari jagaja, soske silno tano o Jehova,* o Devel, kova so osudingja la.

9 O carija ki phuv kola so kergje laja nemoral hem so živingje laja ko baro barvalipe, kova so oj khedingja le bizi ladž, ka roven hem ka khuven pe tari žal baši lake keda ka dikhen o čuro so ikljola tari jag ki kolate so oj thabljola. 10 Tari dar ma te oven mučime sar late, ola ka tergjon podur latar hem ka vakeren: ’Šteta bari adava so ulo tuja Vavilon, koja so sian bari hem silno diz, soske ko jekh momenti ali tli kazna!‘

11 Hem o trgovcija ki phuv ka roven hem ka žalinen baši late, soske nikoj više nane te kinel o bukja so ola angje te bikinen: 12 ni o zlato, ni o srebro, ni o skapocena bara, ni o biserija, ni o šužo len, ni o liljakova materijalija, ni i svila, ni o lole materijalija, ni bilo save predmetija kerde taro mirislivo kaš, taro e sloneskoro kokalo, taro skapoceno kaš, taro bakari, taro sastrn hem taro mermeri. 13 Isto agjaar ni o cimet, ni o indiska začinija, ni o temjani,* ni o mirislivo maslo, ni o parno temjani, ni i mol, ni e maslinkengoro maslo, ni o šužo varo, ni o giv, ni o guruva, ni o bakhre, ni o grasta, ni o kočie, ni o robija hem javera manuša. 14 Ačhiljan bizo reslo ovošje kova so but mangea sine. Sa o barvalo hajbe hem o luksuzna bukja so sine tut našavdile tutar hem nikogaš nane te iranen pe tuke.

15 O trgovcija so bikinena sine lake sa akala bukja hem so barvalile latar, tari dar ma te oven mučime sar late, ka tergjon podur latar, ka roven, ka žalinen 16 hem ka vakeren: ’Šteta bari adava so ulo tuja Vavilon, koja so sian bari diz uravdi ko šužo len, ko liljakova hem lole šeja, ukrasimi zlatoja, skapocena barencar hem biserencar, 17 soske ko jekh momenti sine uništimo doborom baro barvalipe!‘

Hem sa o kapetanija e brodengere, sa okola so ale brodencar taro razna thana, o mornarija hem sa okola so zarabotinena taro more, tergjona sine podur latar 18 hem džikote dikhena sine o čuro so ikljola tari jag ki kolate so oj thabljola, vikinena sine: ’Koja diz tani sar akaja bari diz?‘ 19 Ola čhivgje peske pravo ko šero, hem džikote rovena hem žalinena, vikinena sine: ’Šteta bari adava so ulo e Vavilonea, i bari diz ki kolate so barvalile taro lakoro barvalipe sa okola so sine len brodija ko more, soske ko jekh momenti sine uništimo!‘

20 Tumen so sien ko nebo hem tumen so sien sveta, zaedno e apostolencar hem e prorokoncar, radujnen tumen, soske o Devel osudingja la bašo sa o bukja so oj kergja tumenge!“

21 Hem jekh zoralo angeli vazdingja jekh baro hem pharo bar, frdingja le ko more hem vakergja: „Agjaar sigate ka ovel frdimo o Vavilon, i bari diz, hem nikogaš više nane te postojnel. 22 Ki tute više nane te šungjol muzika taro okola so giljavena hem so bašalena ki harfa, ki flejta hem ki truba, a ni taro javera muzičarija. Nisavo zanaetčija, taro bilo savo zanati, nane te ovel više ki tute hem više nane te šungjol ki tute o zvuko taro baro bar kolea so melinela pe o giv. 23 O svetlo tari lampa nikogaš više nane te svetinel ki tute, hem o glaso taro jekh džamutro hem bori više nane te šungjol ki tute. Akava ka slučinel pe soske tle trgovcija sine važna manuša ki phuv hem preku tlo spiritizam* sine hovavde o manuša taro sa o nacie. 24 Ki adaja diz sine arakhlo o rat e prorokongoro, okolengoro soj sveta hem sa okolengoro so sine mudarde ki phuv“.

19 Palo adava šungjum sar silno glaso taro baro mnoštvo ko nebo, sar vakerela: „Falinen e Jehova!* Amaro Devel spasinela e manušen hem le isi le bari mokj hem slava, 2 soske leskere presude tane čačutne hem pravedna. Soske, ov kazningja e bare nemoralno džuvlja* koja so rumingja i phuv adalea so kerela sine nemoral* hem odmazdingja pe bašo ple robija kolen so oj mudargja“. 3 Hem odma palo adava, po dujto puti o baro mnoštvo ko nebo vakergja: „Falinen e Jehova!* Hem taro Vavilon kova so thabljola, ka ikljol čuro zasekogaš“.

4 O 24 starešine hem o štar suštestvija pele ko kočaka hem obožavingje e Devle, kova so bešela ko prestol, hem vakergje: „Amin! Falinen e Jehova!“*

5 Hem taro prestol šundilo glaso, kova so vakergja: „Falinen amare Devle, sarine tumen so sien leskere robija, kola so darana lestar, tikne hem bare“.

6 Hem šungjum nešto kova so šungjola sine sar o glaso taro baro mnoštvo, o zvuko taro but panja hem sar o zvuko taro bare gromija, sar vakerela: „Falinen e Jehova,* soske o Jehova* amaro Semokjno Devel, počmingja te vladinel sar Cari. 7 Te radujna amen, te veselina amen hem te da leske čest, soske alo o vreme bašo e Bakhreskoro* bijav hem okoja so ka ovel leskiri romni tani spremno. 8 Sine lake dendo te uravel šužo hem čisto len kova so svetinela, soske o šužo len pretstavinela o pravedna postapke e sveta manušengere“.

9 Hem o angeli vakergja mange: „Pišin: srekjna tane okola soj vikime ki večera ko e Bakhreskoro* bijav“. Hem isto agjaar vakergja mange: „Akala tane e Devleskere lafija, kola soj čače“. 10 Tegani peljum tele anglo leskere pre te pokloninav man leske, ama ov vakergja mange: „Pazin! Ma ker adava! Soske, me da sium samo robo sar so sian tu hem tle phralja, kolenge soj dendo te svedočinen bašo Isus. Poklonin tut e Devleske!* Soske, o proroštvija tane te svedočinen bašo Isus“.

11 Dikhljum o nebo phravdo hem adathe sine jekh parno gras. A okova so bešela sine upri leste vikinela pe sine Verno hem Čačutno, hem ov pravedno sudinela hem pravedno borinela pe ki vojna. 12 Leskere jakhja sine sar jag so thabljola hem ko šero sine le but krune. Ki leste sine pišimo jekh anav kova so nikoj javer na džanela le, nego samo ov, 13 hem ov sine uravdo ko šeja kola so sine prskime ratea hem leskoro anav sine Lafi e Devleskoro. 14 Isto agjaar, o vojske taro nebo da džana sine pali leste ko parne grasta hem sine uravde ko šužo, parno hem čisto len. 15 Hem taro leskoro muj ikljola sine jekh oštro hem dugačko mači te šaj lea te uništinel e manušen taro sa o nacie hem ov ka vladinel lencar sastrnale palkaja.* Isto agjaar, ov ka gazinel o drakha ko e Semokjno Devleskoro than kote so gazinena pe o drakha,* kova soj leskiri bari holi. 16 Ko leskere šeja, ko kuko sine le pišimo o anav: Cari upro sa o carija hem Gospodari upro sa o gospodarija.

17 Dikhljum hem jekh angeli sar tergjola ko kham. Ov glasno vikingja, hem e pticenge so ujrana maškar ko nebo vakergja: „Aven akate, kheden tumen ki e Devleskiri bari večera, 18 te šaj te han o mas e carengoro, o mas e komandantengoro,* o mas e silna manušengoro, o mas e grastengoro, o mas okolengoro so bešena sine upro grasta hem o mas sa e manušengoro, e slobodna manušengoro hem e robongoro, e obična manušengoro hem e važna manušengoro“.

19 Hem dikhljum e zvero hem e caren tari phuv hem lengere vojsken. Ola khedingje pe te borinen pe protiv okova so bešela ko gras hem leskiri vojska. 20 Okova so bešela sine ko gras astargja e zvero, a lea hem e hovavne proroko, kova so anglo zvero kerela sine znakija kolencar so hovavgja okolen so primingje o belego e zveroskoro hem okolen so pokloninena pe leskere kipeske. O zvero hem o hovavno proroko, džikote sine panda dživde, sine frdime ko jekh ezero tari jag so thabljola sulfurea. 21 A okola so ačhile, sine mudarde e dugačko mačea so ikljola sine taro muj okoleskoro so bešela ko gras. Hem sa o ptice čalile taro lengoro mas.

20 Hem dikhljum jekh angeli sar hulela taro nebo. Ko vas sine le o klučo tari bezdna* hem jekh baro sindžiri. 2 Ov astargja e zmee, e najpurane sape, kova tano o Beng hem o Satana, hem phanlja le 1.000 berša. 3 Frdingja le ki bezdna, koja so phanlja la hem čhivgja lake pečati, te šaj te na hovavel više e narodon džikote na nakhena 1.000 berša. Palo adava valjani te ovel mukhlo kratko vreme.

4 Palo adava dikhljum prestolija hem okolenge so bešena sine ki lende sine dendi vlast te sudinen. Dikhljum o rat* okolengoro so sine mudarde* adaleske so svedočingje bašo Isus hem vakergje bašo Devel, kola so na pokloningje pe e zveroske ni leskere kipeske hem so na primingje o belego ni ko čekat ni ko vas. Ola palem irangje pe ko životo hem vladingje sar carija e Hristosea 1.000 berša. 5 (O javera so sine mule na irangje pe ko životo sa džikote na završingje adala 1.000 berša.) Akava tano o prvo voskresenie. 6 Srekjna hem sveta tane sa okola so ka ušten ko prvo voskresenie, upri lende o dujto meribe nane le vlast. Ola ka oven e Devleskere hem e Hristoseskere sveštenikija hem ka vladinen sar carija e Hristosea 1.000 berša.

7 A keda ka završinen o 1.000 berša, o Satana ka ovel mukhlo taro plo phanlipe. 8 Hem ka ikljol te hovavel e narodon taro soštar kraija ki phuv, adala tane o Gog hem o Magog, te šaj te khedel len baši vojna. Lengoro broj ka ovel sar i pošik ko more. 9 Hem dikhljum sar širingje pe ki celo phuv hem sar opkolingje o logori okolengoro soj sveta hem i mangli diz. Ama, jag hulili taro nebo hem gltingja len. 10 A o Beng kova so hovavgja len, sine frdimo ko ezero tari jag so thabljola sulfurea, kote so angleder sine frdime o zvero hem o hovavno proroko. Ola ka oven mučime dive hem rat, zasekogaš.

11 Dikhljum jekh baro hem parno prestol hem okole so bešela ki leste. Anglo leskere jakhja i phuv hem o nebo našle hem na sine nigde više. 12 Dikhljum e mulen, e važna manušen hem e obična manušen, sar bešena anglo prestol hem phravdile svitokija. Ama phravdilo jekh javer svitok, o svitok e životoskoro. E mulenge sine sudimo taro adava so sine pišimo ko svitokija sprema lengere postapke. 13 O more dengja e mulen so sine ki leste, hem o meribe hem o grobo* dengje e mulen so sine ki lende. Hem sekaske sine sudimo sprema adava so kergja. 14 A o meribe hem o grobo* sine frdime ko ezero tari jag. Adava ezero tari jag pretstavinela o dujto meribe. 15 Sekova jekh so na sine pišimo ko lil e životoskoro sine frdimo ko ezero tari jag.

21 Hem dikhljum nevo nebo hem nevi phuv, soske o purano nebo hem i purani phuv na postojnena sine više, hem o more na sine više. 2 Isto agjaar dikhljum i sveto diz, o Nevo Erusalim, sar hulela tele taro nebo taro Devel, spremimi sar bori soj sredimi ple romeske. 3 Tegani šungjum jekh silno glaso taro prestol sar vakerela: „Ake! E Devleskoro šatori tano maškar o manuša, hem ov ka živinel lencar, a ola ka oven leskoro narodo hem o Devel ka ovel lencar“. 4 Hem ov ka kosel sekoja asvin taro lengere jakhja, hem meribe nane te ovel više, ni žalibe, ni rojbe, ni dukha. Sa so sine angle, nakhlja“.

5 Hem okova so bešela ko prestol vakergja: „Ake! Kerava sa o bukja neve!“ Isto agjaar vakergja: „Pišin, soske ko akala lafija šaj te verujnel pe hem tane čačutne!“ 6 Hem vakergja mange: „Akala lafija više ispolningje pe! Me sium alfa hem omega,* o početok hem o krajo. Sekaske soj tano žedno ka dav le bizo pare te piel taro izvor e panjeskoro so dela životo. 7 Koj ka pobedinel, ka dobinel* akala bukja. Me ka ovav leskoro Devel, a ov ka ovel mlo čhavo. 8 A sa okola so darana, so nane len vera, soj nečista hem kerena odvratna bukja, so mudarena, so kerena nemoral,* so kerena spiritistička bukja, so obožavinena idolen hem sa okola so hovavena, ka oven frdime ko ezero tari jag so thabljola sulfurea. Akava pretstavinela o dujto meribe.

9 Tegani alo jekh taro efta angelija kolen so sine len o efta čare pherde e efta posledna nevoljencar, hem vakergja mange: „Ava, ka sikavav tuke e bojra, e Bakhreskere* romnja“. 10 Hem preku e Devleskiri sila* ingargja man ki jekh bari hem uči planina, hem sikavgja mange i sveto diz, o Erusalim, sar hulela taro nebo taro Devel 11 hem svetinela sine e Devleskere slavaja. Ov but svetinela sine sar jekh but skapoceno bar, sar o bar jaspis kova so svetinela sar kristali. 12 Sine le baro hem učo zido ki koleste so sine 12 porte, a ko porte tergjona sine 12 angelija. Ko porte sine pišime o anava taro 12 izraelska plemija. 13 Ko istok sine trin porte, ko sever sine trin porte, ko jug sine trin porte hem ko zapad sine trin porte. 14 O zido okolu i diz sine le 12 bara ko plo temeli. Ki lende sine pišime o 12 anava taro e Bakhreskere* 12 apostolija.

15 Okova so kerela sine mancar lafi, ikerela sine zlatno trska kolaja so merinela pe, te šaj te merinel i diz, lakere porte hem o zido okolu i diz. 16 I diz sine gradimi sar kocka. Lakiri dolžina sine isto sar lakiri širina. Hem keda meringja i diz e trskaja, sine okolu 2.220 kilometre* - i dolžina, i širina hem i visina sine ista. 17 Ov isto agjaar meringja o zido da okolu i diz hem sine 144 laktija* sprema i manušikani merka, a asavki merka koristingja o angeli da. 18 O zido sine kerdo taro jaspis, a i diz taro čisto zlato, slično sar prozirno staklo. 19 O temelija taro zido soj okolu i diz sine tari sekoja vrsta skapocena bara: o prvo temeli sine taro jaspis, o dujto taro safir, o trito taro kalcedon, o štarto taro smaragd, 20 o pandžto taro sardoniks, o šovto taro sard, o eftato taro hrizolit, o oftoto taro beril, o enjato taro topaz, o dešto taro hrizopras, o dešujekto taro hijacint hem o dešudujto taro ametist. 21 Isto agjaar, o 12 porte sine 12 biserija - sekoja porta sine kerdi taro jekh biseri. Hem i glavno ulica ki diz sine taro čisto zlato, slično sar prozirno staklo.

22 Ki diz na dikhljum hrami, soske lakoro hrami tano o Jehova,* o Semokjno Devel, hem o Bakhro.* 23 E dizjake na valjani sine te den svetlo ni o kham ni i mesečina, soske e Devleskiri slava dela la svetlo, hem lakiri lampa sine o Bakhro. 24 O svetlo tari akaja diz ka svetinkerel o drumo ki koleste so džana o narodija, hem o carija tari phuv ka anen pumari slava ki adaja diz. 25 Diveskoro o porte nikogaš nane te oven phanle hem i rat nane te postojnel. 26 Ki late ka anen pe i slava hem i čest taro sa o narodija. 27 A ništo soj nečisto hem sekova jekh so kerela odvratna bukja hem so prevarinela, nane te khuvel ki late. Ka khuven samo okola soj pišime ko e Bakhreskoro* svitok bašo životo.

22 Hem o angeli sikavgja mange jekh reka panjea so dela životo, bistro sar kristali, sar thavdela taro e Devleskoro hem e Bakhreskoro* prestol 2 hem nakhela maškar i glavno ulica ki diz. Taro solduj strane tari reka sine kašta so dena životo. Ola dena sine plodi 12 puti ko berš, dena sine plodi sekova masek. A o listija taro adala kašta sine bašo sasljaribe sa e narodongoro.

3 Hem ki adaja diz više nane te ovel dendi nisavi arman. Ama e Devleskoro hem e Bakhreskoro* prestol ka ovel ki adaja diz hem e Devleske ka služinen leskere robija. 4 Ola ka dikhen e Devleskoro muj hem leskoro anav ka ovel pišimo lenge ko čekat. 5 Hem i rat nane te ovel više, hem lenge na ka valjanel o svetlo taro lampe ni o svetlo taro kham, soske o Jehova* o Devel ka svetinel upri lende hem ola ka vladinen sar carija zasekogaš.

6 O angeli vakergja mange: „Šaj čače te verujnel pe ko akala lafija hem ola tane čačutne. O Jehova,* o Devel kova so ple silaja vodingja e prorokon te keren lafi, bičhalgja ple angele te sikavel ple robonge adava so ka ovel panda hari. 7 Ake, me avava sigate! Srekjno tano okova so ikerela pe ko lafija taro proroštvo soj pišimo ko akava svitok.“*

8 Me o Jovan šungjum hem dikhljum sa akala bukja. Keda šungjum hem dikhljum akala bukja, peljum ko kočaka anglo pre e angeleskere kova so sikavgja mange akala bukja te pokloninav man leske. 9 Ama ov vakergja mange: „Pazin! Ma ker adava! Me da sium robo sar tu so sian hem sar soj tle phralja o prorokija hem sar soj okola so ikerena pe ko lafija taro akava svitok. Poklonin tut e Devleske“.*

10 Isto agjaar vakergja mange: „Ma iker ki tajna o lafija* taro proroštvo so arakhljona ko akava svitok, soske paše tano o vreme te ispolninen pe. 11 Koj tano nepravedno, ponadari da neka postapinel nepravedno, koj tano melalo ponadari da neka meljarel pe, a koj tano pravedno ponadari da neka postapinel pravedno hem okova soj sveto ponadari da neka ovel sveto.

12 ’Ake, avava sigate hem sekaske ka platinav sprema leskere postapke. 13 Me sium alfa hem omega,* o prvo hem o posledno, o početok hem o krajo. 14 Srekjna tane okola so thovgje pumare dugačka šeja. Len isi len pravo te han taro kaš so dela životo hem te khuven ki diz taro lakere porte. 15 Avrijal tane o džukela,* okola so kerena spiritistička* bukja, okola soj nemoralna,* okola so mudarena, okola so obožavinena idolen hem sa okola so mangena o hovajbe hem so hovavena‘.

16 ’Me, o Isus, bičhalgjum tumenge mle angele te šaj te svedočinel tumenge bašo akala bukja te šaj e sobranien te ovel len korist. Me sium e Davideskoro koreno hem potomco, hem i sabalutni zvezda so svetinela‘“.

17 Hem o Devel preku pli sila* hem i bori vakerena: „Ava!“ Hem sekoj so šunela neka vakerel: „Ava!“ Hem sekoj soj žedno, neka avel. Sekoj so mangela, neka lel bizo pare taro pani so dela životo.

18 „Sekole jekheske so šunela o lafija taro proroštvo soj ko akava svitok, svedočinava akava: Ako nekoj dodajnela nešto ko akava, o Devel ka dodajnel leske o nevolje soj pišime ko akava svitok. 19 Ako nekoj ikalela nešto taro lafija taro proroštvo so arakhljona ko akava svitok, o Devel ka lel lestar adava so valjani te dobinel, sprema adava so pišinela ko akava svitok. Nane te dozvolinel leske te hal taro kašta so dena životo hem ni nane te dozvolinel leske te khuvel ki sveto diz.

20 Okova so svedočinela bašo akala bukja vakerela: ,Oja, me avava sigate‘“.

„Amin! Ava, Gospodare Isus!“

21 O šukaripe so na zaslužinaja le e Gospodareskoro e Isuseskoro neka ovel okolencar soj sveta.