Soske valjani poodorig da te sikljove bašo Jehova?

1. Soske tano šukar poodorig da te sikljove tari Biblija?

Adava so tari akaja brošura sikliljan o osnovna bukja so sikavela i Biblija, sigurno kergja pobuter te mange e Jehova. Ama, adava mangipe mora poodorig da te bajrare le (1. Petrovo 2:2). Tli nadež bašo večno dživdipe zavisinela taro adava dali ka ove sa popaše e Devlea agjaar so ka sikljove taro leskoro Lafi, i Biblija. Čitin Jovan 17:3; Juda 21.

Kobor pobuter pendžarea e Jehova, doborom pobari ka ovel tli vera. I vera ka pomožinel tu te kere adava so rodela o Devel (Evreite 11:1, 6). Ka pottikninel tu te kajne tu hem te kere promene ko tlo dživdipe. Čitin Dela 3:19.

2. Sar šaj te pomožine javerenge adalea so sikliljan bašo Devel?

Sarine mangaja te vakera o šukar bukja so džanaja len. Adaleske, sigurno ka mange tu da te vakere javerenge bašo adava so sikliljan. Džikote poodorig sikljovea tari Biblija, ka haljove sar šaj te koristine la te šaj te objasnine soske verujnea ko Jehova hem kova tano o šukar haberi. Čitin Rimjanite 10:13-15.

But džene amendar najangle vakerge o šukar haberi ple familijake hem amalenge. Ama, šukar ka ovel te pazine sar ka kere lencar lafi. Namesto te vakere lenge kaj lengiri religija nane šukar, vaker lenge o šukar bukja so vetinela o Devel. Isto agjaar, te ovel tu ki godi kaj o manuša pobuter dikhena so kerea, a na so vakerea. Čitin 2. Timotej 2:24, 25.

3. Kobor paše šaj te ove e Devlea?

Ako proučinea i Biblija, duhovno ka bajrove. Sar so nakhela o vreme, ka ove but paše e Jehovaja hem ka ove delo tari leskiri familija. Čitin 2. Korinkjanite 6:18.

4. Sar šaj poodorig da duhovno te bajrove?

Šaj duhovno te bajrove ako poodorig da sikljovea tari Biblija (Evreite 5:13, 14). Puč jekhe taro e Jehovaskere svedokija te proučinel tuja i Biblija e lilea So sikavela amen i Biblija? Kobor pobuter sikljovea tari Biblija, doborom pobahtalo ka ove. Čitin Psalm 1:1-3; 73:27, 28.

O šukar haberi avela taro Jehova, o bahtalo Devel. Ka ove paše lea ako uljan paše leskere narodoja (Evreite 10:24, 25). Ako poodorig kerea adava so o Jehova mangela ka šaj te dobine o čačutno dživdipe — o večno dživdipe. I najšukar buti so šaj te kere tani te ove paše e Devlea. Čitin 1. Timotej 1:11; 6:19.