Lekcija 14
Sar tane organizirime
e Jehovaskere svedokija?
Kjeda e Jehovaskere svedokija počmingje te organizirinenpe? (1)
Sar vodinenape o sostanokija taro e Jehovaskere svedokija? (2)
Sar platinena o troškija? (3)
Koj grižinelape ko sakova sobranie? (4)
Kola pobare sostanokija ikjerenape sakova berš? (5)
Savi buti kjerelape ko lengoro sedište hem ko podružnice? (6)
1. E Jehovaskere svedokija isilen plo početok ko berša palo 1870-to berš. Tegani ola sine pendžarde sar Istraživačija e Biblijakere. Ama, ko 1931 berš ola lile o biblisko anav Jehovina svedokija (Isaija 43:10). Ko početok sine tikni organizacija, a sar nakhela sine o vakti oj barili ko milijonja Svedokija kola so propovedinena ko pobuter taro 230 phuvja.
2. Pobuter sobranija taro Jehovina svedokija isi len sostanokija trin puti ko kurko. Pokanimo sijan te dža ko disave lengjere sostanokija (Evreite 10:24, 25). I Biblija tani glavno lil kotar so sikljona ola. O sostanokija počminena hem završinena molitvaja. Isto agjaar, ko pobuter sostanokija giljavenape vilestar gilja kola so slavinena e Jehova (Efešanite 5:18, 19). Šaj te khuve bizo love (Matej 10:8).
3. Pobuter sobranija ikjerena sostanokija ki Thagaripaskiri Sala. Ola i tane obična sale so kjerenalen dobrovolno e Jehovaskere svedokija. Ko Thageripaskere Sale nae nisave ikone ja krstija. O trošako učharelape dobrovolno prilogoja. Okola so mangena te den dobrovolno prilog, isi kutije bašo odova (2. Korinkjanite 9:7).
4. Ko sakova sobranie isi starešine, nadglednikija. Olen isi len odgovornost te sikaven ko sobranie bašo e Devleskoro lafi (1. Timotej 3:1-7; 5:17). Olen pomožinena o sluge pomošnikija (1. Timotej 3:8-10, 12, 13). Akala murša nae vazdime ko baro taro javera ko sobranie (2. Korinkjanite 1:24). Nae olengje dinde posebna titule (Matej 23:8-10). Ola na uravenape pojaver taro javera. A nae ni platime bašo odova. O starešine grižinenape bašo duhovno bukja ko sobranie. Ola šaj te utešinen hem te pomožinen kjeda sijam ki nevolja (Jakov 5:14-16; 1. Petrovo 5:2, 3).
5. E Jehovaskere svedokija sakova berš ikjerena bare kongresija. Tegani khedenape but sobranija hem isilen posebno programa bašo biblisko sikavibe. Isto agjaar ko kongresija o neve učenikija krstinenape ko pani (Matej 3:13-17; 28:19, 20).
6. Glavno than e Jehovaskere svedokongoro tano ko Njujork. Odorig tano o Vodečko telo, jek grupa taro iskusna starešina kola so nadgledinena sa o sobranija ko celo sumnal. Isto agjaar, isi pobuter taro 100 podružnice ko celo sumnal. Ko akala thana, isi manuša so pomožinena dobrovolno te štanpinelpe hem te bičhaljolpe biblisko literatura. Isto agjaar, vodinena hem organizirinena bašo propovediba. Soske na planirinea te posetine jek podružnica koja so i tuke najpaše?