E Devleskjere amala ka dživdinen ko raj

Ko raj nae te dživdina sar akana. O Devel nikjed na manglja ki Phuv te ovel pharipa, dukha hem muke. Ka avel vakti, o Devel ka kjerel i Phuv raj. Sar ka ovel o raj? Te dikha so vakjerela i Biblija:

Šukar manuša. Ko raj ka oven sa okola so i paše e Devleja. Ola ka kjeren šukar bukja jek jekheske. Ka dživdinen pravedno sar so rodela o Devel (Izreki 2:21).

But hajba. Ko raj nae te ovel bokhalipe. I Biblija vakjerela kaj ki celo Phuv sa e manušen ka ovelen hajbaske (Psalm 72:16).

Šuže khera hem šukar buti. Ki rajsko Phuv, sakoja familija ka ovela plo kher. Sarine ka kjeren buti so ka kjerelen bahtale (Isaija 65:21-23).

Mir ko celo sumnal. O manuša nae te džan povekje ko maribe hem odorig te meren. E Devleskoro lafi vakjerela kaj o Devel ka čhinavel o maribe ko celo sumnal (Psalm 46:8, 9).

Šukar sastipe. I Biblija vetinela kaj ko raj nijek manuš nae te vakjerel: ,nasvalo sijum‘ (Isaija 33:24). Isto agjaar, nijek nae te ovel sakati, ili korolo, ili kašuko, ili te našti te kjerel lafi (Isaija 35:5, 6).

Krajo e dukhenge, žalibaske thaj meribaske. I Biblija vakjerela: ,Meribe nae te ovel, ni rojbe, ni žalibe, ni dukha. Sa so sine poangle, nakhlja‘ (Otkrovenie 21:4).

O bilačhe manuša nae te oven. O Jehova vetinela kaj sa e bilačhe manušen ka uništinel, thaj okolen so nae verna ka otkorninelen tari Phuv (Izreki 2:22).

O manuša ka mangenpe hem ka poštunjenpe maškaripeste. Nae te ovel pobuter nepravda, maltretiribe hem omraza. O manuša ka dživdinen složno hem ka džan palo e Devleskere pravedno drumija (Isaija 26:9).