So ovela kjeda o manuš merela?

So i tano meribe? O meribe tano sar hor sojbe (Jovan 11:11-14). O mule našti ništo te šunen, te dikhen, te kjeren lafi ili te mislinen (Propovednik 9:5, 10). I hovavni religija sikavela kaj o mule džana ko disavo duhovno than te oven zaedno pumare pašencar so mule poangle. I Biblija nasikavela odova.

Okola so mule našti te pomožinen amen, a ni palem te kjeren amenge šteta. Kjeda merela nekoj, o manuša kjerena običaija hem dena žrtve soske mislinena kaj o mule mangena odova. Ama o Devel namangela asavkje bukja soske o Beng agjaar hovavela e manušen. Odoleja našti te pomožinelpe e mulengje, soske ola nae dživde. Na valjani te dara taro mule ili te kjera nešto lenge ko anav. Valjani te obožavina samo e Devle (Matej 4:10).

O mule palem ka oven dživde. Panda hari, ka avel vakti kjeda o Jehova ka vazdel e mulen te dživdinen ki rajsko Phuv (Jovan 5:28, 29; Dela 24:15). Kaj o Devel ka vazdel e mulen dobor tano sigurno sar so šaj tu te vazde nekas so sovela (Marko 5:22, 23, 41, 42).

O manuš kaj na merela tano hovajbe so širinelale o Beng. O Satana hem leskere demonija terinena e manušen te mislinen kaj o duho e mulengoro tano dživdo thaj kjerela problemija. O Beng hovavela e manešen, preku o sune ili kaj dikhena e mulen. O Jehova kazninela okolen so probinena te kjerena lafi e mulencar (5. Mojseeva 18:10-12).