4 LEKCIJA

Koj tano o Devel?

O MANUŠA služinena bute devlenge. Ama e Devleskoro Lafi sikavela kaj isi samo jekh has Devel. Sar leste nane nijekh javer, ov tano najbaro hem nane le ni početok ni kraj. Ov kergja sa so isi ko nebo hem ki Phuv, hem dengja amen dživdipe. Adaleske, samo leske valjani te služina.

O Musa ikerela ko vas o duj ploče kote soj pišime o deš zapovedija — O Zakon sine dendo preku o pekamberi o Musa sar „lafi vakerdo preku o angelija“

E Devle isi le plo anav. Leskoro anav tano JEHOVA. O Devel vakergja e Musaske: „Akava ka vakere e Izraeleskere čhavenge: ,O Jehova, o Devel tumare dadengoro, o Devel e Avraameskoro, o Devel e Isakoskoro hem o Devel e Jakoveskoro, bičhalgja ma tumende.‘ Akava tano mo anav zasekogaš, agjaar ka pamtinen ma tari generacija ki generacija“ (2. Mojseeva 3:15). Ko e Devleskoro Lafi, o anav Jehova, arakhela pe otprilika 7.000 puti. Ko leskoro Lafi vakerela: „Tu, kova to anav tano Jehova, sian Najbaro upri celi phuv“ (Psalm 83:18).

Svitok arakhlo ko Mrtvo more kote soj pišimo e Devleskoro anav — Ko purane pišime lila taro Mrtvo More pišinela e Devleskoro anav

Nijekh manuš nikogaš na dikhlja e Devle. O Devel vakergja e Musaske: „Tu našti te dikhe mo muj, soske našti o manuš te dikhel man hem te ačhol dživdo“ (2. Mojseeva 33:20). O Devel dživdinela ko nebo hem našti te dikha le amare jakhencar. Pogrešno tano te kera idolija, slike ili simbolija so pretstavinena e Devle hem te molina amen lenge. O Devel o Jehova preku o Musa dengja zapoved: „Ma ker tuke rezbimo liko ni bilo so javer so ličinela sar adava so isi upre ko nebo, ili tele ki phuv, ili ko panja teli phuv. Na valjani te klanjine tu ili te služine lenge, soske me, o Jehova to Devel, sium Devel so rodela samo leske te služine“ (2. Mojseeva 20:2-5). Palo adava, preku po pekamberi o Isaija, o Devel vakergja: „Me sium o Jehova. Adava tano mo anav hem nikaske nane te dav mi slava, ni mi čest e rezbime likonge“ (Isaija 42:8).

Nesave manuša verunjena ko Devel ama šaj mislinena kaj našti te pendžaren le hem našti te oven paše lea, ola mislinena kaj valjani pobuter te daran lestar nego te mangen le. So mislinea tu? Grižinela pe li o Devel tuke? Šaj li čače te pendžare le hem te ove paše lea? Te dikha so vakerela e Devleskoro Lafi bašo adava savo tano o Devel.

E Devleskoro duho hem leskere meljaikija

Sar o Devel kerela adava so mangela? Ov kerela adava pe duhoja. E Devleskoro duho nane nesavi ličnost ili meljaiko (angeli), nego ov tano e Devleskiri sila so našti dikhaja la, energija so nane la krajo hem kolaja šaj te kerel sa so mangela. O Devel akale silaja kergja o nebo hem i Phuv. „E Jehovaskere lafea sine kerdo o nebo, hem e duhoja taro leskoro muj sine kerdo sa so i ko nebo“ (Psalm 33:6). Ki 1. Mojseeva 1:2 vakerela kaj džikote i Phuv sine panda učhardi panjea hem džikote o Devel spreminela sine i Phuv e manušenge ,e Devleskiri sila delunjela sine upro pani‘. O Devel tegani koristingja po duho ili pi sila te kerel sa so dživdinela ki Phuv.

O Devel isto agjaar koristinela e meljaikon te keren adava so ov mangela. O Devel kergja len te dživdinen lea ko nebo. O meljaikija tane but silna. Ola ingarena porake taro Devel hem kerena javera važna zadače. Na primer, e Devleskoro Lafi vakerela kaj o Zakon so sine dendo preku o Musa tano „lafi vakerdo preku o angelija“. E Devleskere meljaikija isto agjaar pomožinena leskere slugenge ki Phuv. E Devleskoro Lafi vakerela kaj ola tane ,duhija so služinena, kola tane bičhalde te služinen okolenge so ka oven spasime‘ (Evreite 1:14; 2:2).