Koj tano o dušmani e čačutne verakoro?

ANGLEDER te kerel i Phuv, o Jehova kergja e meljaikon ko nebo. Sar so nakhela sine o vreme, jekh meljaiko manglja sarine te služinen leske, a adava zaslužinela samo o Devel. Keda počmingja te kerel nesave bukja te šaj te pherel adaja želba, tegani ov ulo Šejtani (Satana) hem Beng (Iblis). O anav „Šejtan“ značinela „Protivniko“, adava tano nekoj so protivinela pe e Devleske. Sar protivingja pe o Beng e Devleske?

O Beng hovavgja e Hava te na šunel e Devle. Čhivgja la te mislinel kaj adaleske so o Jehova zabraningja lake te hal taro kaš, garavela latar nešto šukar. Ov bizi ladž phengja kaj o Devel hovavela hem kaj na valjani i Hava te šunel le, agjaar so vakergja lake: „O Devel džanela kaj ko adava dive keda ka han lestar, ka phravgjon tumare jakhja, hem ka oven sar o Devel, ka džanen so i šukar a so i lošno“ (1. Mojseeva 3:5). I Hava na sine gogjaver so verunjgja ko leskere hovavne lafija. Oj phaglja e Devleskoro zakon hem vlijanjgja upro Ademi ov da te kerel adava. Taro tegani, o Beng tano dušmani sa okolenge so sikavena čačutni vera. Avdive da, ov panda hovavela e manušen. Sar?

Bajrola i hovavni vera ko Devel

O Beng hovavgja e Izraelcon preku o idolija hem o manušikane adetija. O Isa, o Mesija, vakergja e religiozna vodačenge kaj adaleske so sikavena e javeren „manušikane zapovedija“, lengoro služibe na vredinela anglo Devel (Matej 15:9). Keda adava narodo na prifatingja e Mesija, o Devel da na prifatingja len. O Isa vakergja lenge: „E Devleskoro Carstvo ka lel pe tumendar hem ka del le e narodoske so ka kerel adava so ov rodela lestar“ (Matej 21:43). Tegani, adala so šunena sine e Isa ule e Devleskoro manglo narodo.

Palo adava, o Beng manglja te hovavel okolen so šunena sine e Isa. Kergja li adava? Preku jekh paramis, o Isa angleder vakergja so ka ovel. Ki adaja paramis, jekh manuš sejngja giv ki pi niva. Palo adava, alo jekh dušmani hem sejngja divo čar maškar o giv. Solduj sine mukhle te bajron dži ki žetva. Tegani i divo čar sine odvojmi taro giv hem sine uništimi, a o giv sine khedimo ko ambari.

O Isa pe učenikonge vakergja so značinela akaja paramis. Ov tano o Sejači. Poadari vakergja: „O šukar seme tano o čhave e Carstvoskere, i divo čar tani o čhave e Lošnoskere, a o dušmani so sejngja la tano o Beng. I žetva tani o krajo akale sumnaleskoro, a o žetvarija tane o angelija“ (Matej 13:38, 39). O Isa sporedingja pe čačutne učenikon e givea. Ama o Beng, sar divo čar sejngja hovavne učenikija maškar o has učenikija e Isaskere. Sar so vakergja o Isa, palo leskoro meribe iklile hovavne učenikija. Ola sikavgje e manušen hovavne sikljojba sar so i o trojstvo, kaj trin džene tane jekh Devel. O hovavne učenikija isto agjaar počmingje te koristinen idolija hem te mešinen pe ki politika. Samo hari džene ikerena pe sine ko adava so sikavela sine o Isa.

I čačutni vera ko Devel ka pobedinel

O Isa vakergja kaj ka meninen pe o bukja. E Devleskere meljaikija ka odvojnen okolen so nane len čačutni vera ko Devel te oven uništime. Tegani, okola so isi len čačutni vera, lokheste ka pendžargjoven. Ko krajo, o Beng, o najpurano hem o najbaro dušmani e čačutne verakoro, isto agjaar ka ovel uništimo. Oja, i čačutni vera ko Devel ka pobedinel!

Ama sar šaj avdive te pendžara koj sikavela čačutni vera ko Devel? Bašo akava pučibe ka kerel pe lafi ponadari.