I Elisaveta bijangja čhavo

Nakhle poviše taro 400 berš otkeda sine obnovime o zidija taro Erusalim. Paše uzi akaja diz živinela sine o svešteniko o Zaharija hem leskiri romni, i Elisaveta. Ola sine but vreme ko brako, ama na sine len čhave. Jekh dive džikote o Zaharija tharela sine temjani andre ko hrami, pojavingja pe leske o angeli, o Gabriel. Ov but darandilo, ama o Gabriel vakergja leske: „Ma dara. Anava tuke šukar haberi taro Jehova. Ti romni, i Elisaveta, ka bijanel murš kova so ka vikinel pe Jovan. O Jehova biringja e Jovane baši jekh važno zadača“. O Zaharija pučlja: „Sar šaj te verujnav ko adava? Me hem mi romni siem but phure te oven amen čhave“. O Gabriel vakergja: „O Devel bičhalgja man te vakerav tumenge akava haberi. Ama, adaleske so na verujngjan man, nane te kere lafi sa džikote na bijangjovela o čhavo“.

O Zaharija ačhilo andre ko hrami poviše vreme taro adava so ačhola sine. Keda konečno iklilo, o manuša so sine adathe mangle te džanen so ulo. O Zaharija našti sine te kerel lafi. Ov šaj sine te kerel znakija pe vastencar. Tegani o manuša halile kaj o Zaharija dobingja poraka taro Devel.

Palo nesavo vreme, i Elisaveta ačhili khamni hem bijangja murš, baš sar so vakergja o angeli. Lengiri familija hem lengere amala ale te dikhen e bebe. Ola sine but radosna baši Elisaveta. Oj vakergja lenge: „Leskoro anav ka ovel Jovan“. Tegani ola vakergje lake: „Ama nikoj ki amari familija na vikinela pe Jovan. Neka vikinel pe Zaharija, sar po dad“. Ama, o Zaharija lelja jekh pločka hem pišingja: „Leskoro anav tano Jovan“. Taro adava momenti, o Zaharija palem šaj sine te kerel lafi! O manuša tari celo Judeja šungje bašo akava čhavo hem pučena pe sine: „So ka ovel lea keda ka bajrol?“

O Zaharija pherdilo sveti duh hem vakergja jekh proroštvo: „Neka ovel falimo o Jehova. Ov vetingja e Avraameske kaj ka bičhalel Mesija, so ka spasinel amen. O Jovan ka ovel proroko, hem ka phravel drumo e Mesijaske“.

Nešto posebno ulo e Marijake da, koja so sine familija e Elisavetake. So sine adava? Te dikha ko javer poglavje.